MESKOS ku 200 aña pasá hende no por a kere tur loke tabata sali den korant, awe tampoko nos no por kere tur loke ta riba Internet. Debí na avansenan den teknologia den nos tempu awe hende tin un gran kantidat di informashon na su alkanse. Pero nos mester ta masha kouteloso pasobra aunke algun informashon ta bon i útil, otronan ta engañoso i asta peligroso. Foral hende ku a kaba di kuminsá usa Internet mester tene kuidou, ya ku nan lo por kai den e trampa di pensa ku tur notisia òf kuenta sensashonalista òf straño ku nan topa online ta bèrdat djis pasobra e ta riba Internet òf pasobra un hende a mand’é pa nan via e-mail. P’esei Beibel ta spièrta nos: “Hende sin eksperensia ta kere tur kos ku bis’é, hende sabí mes ta pensa.”​—Pro. 14:15, BPK.

Kon nos por bira “sabí” i rekonosé kuenta inventá, leyenda, engaño i otro informashon inkorekto? Na promé lugá, puntra bo mes: E informashon akí ta di un website ofisial i konfiabel, òf e ta bini di un blog òf otro fuente deskonosí? El a yega di aparesé kaba riba un otro website komo algu ku no ta bèrdat? * P’esei, usa bo “sano huisio.” (1 Ped. 5:8) Si un notisia ta parse muchu bon pa kere, probablemente e no ta bèrdat. Ademas, si un informashon ta daña e reputashon di un hende, lo ta bon pa puntra bo mes ta ken ta esun ku a plama e informashon i ku ki intenshon e ta hasi esei.

Tin hende ku semper ke ta promé pa plama un notisia. Ora nan haña e notisia, nan ta forward e na tur nan kontaktonan sin averiguá si e ta bèrdat òf sin pensa kiko lo por ta e konsekuensianan. (2 Sam. 13:​28-33) Sinembargo, si nos ta “sabí,” nos lo pensa riba e posibel daño ku e informashon akí lo por kousa; e por daña e reputashon di un hende òf un organisashon.

 Ta kosta hopi tempu pa averiguá si un notisia ta bèrdat. P’esei algun hende ta pensa ku ta mihó pa djis laga esun ku ta haña e mensahe averiguá pa su mes si e ta bèrdat òf no. Pero tempu ta presioso. (Efe. 5:​15, 16) Pues, si bo no tin sigur ku un informashon ta verídiko, no kore mand’é; ta mihó pa djis delete e.

Puntra bo mes: Semper mi ta forward e-mail pa tur hende? Mi mester a pidi despensa na mi kontaktonan pa motibu ku mi a manda informashon ku a resultá di ta inkorekto òf mentira? Tin hende ku a yega di pidi mi pa stòp di forward e-mail pa nan? Kòrda ku bo kontaktonan tambe tin akseso na Internet, i p’esei nan mes tambe por buska informashon interesante. Nan no tin nodi di haña un avalancha di kuenta, vidio klep òf potrèt. No ta sabí tampoko pa manda grabashon òf notanan di diskurso bíbliko. * Ademas, lo ta mihó pa un ruman hasi su mes investigashon, buska tekstonan di Beibel òf prepará su kontestanan pa e reunionnan. E lo benefisiá mas si e mes hasi esaki ku si abo manda nan p’e.

Kiko nos mester hasi si nos haña notisianan falsu tokante Testigunan di Yehova riba Internet? Nos mester rechas’é umbes. Tin ruman ta pensa ku nan mester pone otronan na haltura pa haña sa nan opinion, pero e úniko kos ku nan ta logra ku esei ta plama e mal informashon. Si nos ta preokupá tokante loke nos a lesa riba Internet, nos mester pidi Yehova sabiduria i papia ku rumannan maduro tokante esei. (Sant. 1:​5, 6; Hudas 22, 23) Hesus, kende tambe a ser akusá falsamente, a spièrta su sirbidónan ku enemigunan lo persiguí nan i “saka tur sorto di mentira malisioso kontra [nan].” (Mat. 5:11; 11:19; Huan 10:​19-21) Nos mester usa nos “kapasidat di pensa” i “disernimentu” pa nos por identifiká tantu esnan “ku ta papia kos malu” komo esnan ku ta purba di gaña nos.​—Pro. 2:​10-16, NW.

Nos mester ta kouteloso tambe pa no forward notisia- òf eksperensianan di nos rumannan ku nos a tende for di otro hende. Asta si e informenan akí ta bèrdat, esei no ke men ku nos mester sigui plama nan. Tin bes ta mihó i un muestra di amor pa no hasi esaki. (Mat. 7:12) Por ehèmpel, no ta amoroso ni edifikante pa plama redu, maske e informashon por ta bèrdat. (2 Tes. 3:11; 1 Tim. 5:13) Algun notisia tin di haber ku asuntunan privá, i nos mester respetá derecho di otronan pa disidí ki ora i kon nan lo ke trese eseinan padilanti. Si nos konta otronan di nan promé ku tempu, nos lo por kousa hopi daño.

Awendia ta hopi fásil pa plama notisia, sea ku nan ta verídiko òf falsu, útil òf peligroso. Asta si un hende manda un e-mail òf mensahe pa un persona so, nos mester kòrda ku e persona ei por forward e informashon pa hende rònt mundu den un fregá di wowo, sea ku esei tabata e intenshon òf no. P’esei, laga nos resistí e tendensia di kore manda informashon na tur nos kontaktonan. E amor ku nos tin pa próhimo ta pone ku nos no ta sospechá tur kos, pero tampoko nos ta kere tur kos pa loko. P’esei ora nos haña un notisia sensashonalista, nos no ta kore kere mesora. Ademas, amor ta yuda nos rechasá informenan sin base tokante Yehova su organisashon òf mentiranan tokante nos rumannan. Hende ku ta plama e informashonnan ei ta esklabo di Satanas, e “tata di mentira.” (Huan 8:44; 1 Kor. 13:7) Ora nos ta usa nos kapasidat di pensa i disernimentu, nos lo bira “sabí” i nos lo haña sa mas mihó kon pa usa e tantísimo informashon ku nos ta haña tur dia. Beibel ta bisa ku un persona sin eksperensia “ta ereda bobedad; ma e prudente ta coroná cu sabiduría.”​—Pro. 14:18, Salmonan y Proverbionan, Editorial Evangélica.