DURANTE e último añanan di bida di mi tio grandi Nikolai Dubovinsky, kende a sirbi Yehova pa hopi aña, el a skirbi tokante su eksperensianan. El a skirbi tantu di e kosnan bon komo e kosnan malu ku el a pasa aden, foral durante e tempu ku e trabou di prediká tabata prohibí na eks Union Soviétiko. Apesar di tur e difikultatnan ku el a pasa aden, semper el a keda fiel i e tabata stima bida. Semper Tio Nikolai tabata bisa ku e tin gana di konta e hóbennan di su bida; p’esei mi ke kompartí algun di su eksperensianan. El a nase na aña 1926 den e pueblo di Podvirivka, ku ta keda den e provinsia di Chernivtsi, Ukrania. El a bini di un famia kampesino.

Tio Nikolai a konta: “Un dia na aña 1941, Ivan, un di mi ruman hòmbernan mas grandi, a trese vários publikashon kas, entre nan e bukinan E Harpa di Dios i E Plan Divino di Épokanan, algun Toren di Vigilansia i vários foyeto chikitu. Mi a lesa nan tur. Mi a keda asombrá ora mi a haña sa ku no ta Dios sino Diabel ta e fuente di tur e problemanan ku tin na mundu. Ademas di e publikashonnan ei, mi a lesa e Evangelionan i mi a bin realisá ku mi a haña e bèrdat. Ku hopi entusiasmo mi a kuminsá konta otronan tokante e Reino. Mas mi a studia e publikashonnan akí, mas mi a komprondé e bèrdat, i esei a duna mi mas gana di sirbi Yehova.

Komo ku tabata tempu di guera, mi tabata sa ku lo mi a bai sufri pa motibu di mi kreensianan pasobra mi no tabata dispuesto pa mata ningun hende. Pa mi prepará mi mes pa e pruebanan ku lo mi a bai enfrentá, mi a kuminsá siña tekstonan di Beibel manera Mateo 10:28 i 26:52 for di kabes. Mi tabata determiná pa keda fiel na Yehova asta si mi mester a muri.

Na aña 1944, ora mi a hasi 18 aña, nan a yama mi pa drenta servisio militar. Ora mi a yega na e lugá di inskribí, pa promé biaha den mi bida mi a topa otro hóbennan ku tabatin e mesun kreensianan ku mi. Nan tambe tabatin edat pa kuminsá servisio militar. Na un manera firme nos a bisa e outoridatnan ku nos lo no partisipá den guera. Esei a pone nan rabia masha hopi. Nan a menasá nos ku nan lo laga nos muri di hamber, forsa nos koba kanal pa e sòldánan òf djis tira nos mata. Sin miedu nos a kontestá: ‘Boso por hasi kiko ku boso ke ku nos. Pero nada lo pone nos kibra e mandamentu di Dios: “No mata.”’​—Éks. 20:13.

Ku tempu, nan a manda ami i dos otro ruman hòmber na Belarus pa traha den kunuku i pa drecha kasnan ku a sufri daño. Ainda mi ta kòrda e efektonan horibel di guera ku mi a mira den e kunukunan di Minsk. Banda di kaminda tabatin matanan karbonisá. Den e kanalnan i den mondi tabatin restunan mortal ku no a ser derá i kadaver hinchá di kabai morto. Mi a mira garoshi di guera, tur e armanan ku nan a laga atras i asta e restunan di un avion tumbá. Ku mi mes wowo mi  por a mira e konsekuensianan di bai kontra e mandamentunan di Dios.

Aunke e guera a kaba na aña 1945, tòg nan a sentensiá nos na dies aña di prizòn pasobra nos a nenga di partisipá den guera. Durante e promé tres añanan, nos no tabatin reunion ni literatura bíbliko. Via karta nos a logra haña kontakto ku algun ruman muhé, pero despues nan a arestá nan tambe i sentensiá nan na 25 aña den kampamentu di trabou forsá.

Na 1950 nan a laga nos sali liber i nos por a bai kas pasobra nan a redusí nos sentensia. Tempu ku mi tabata den prizòn, mi mama i mi ruman muhé mas chikitu ku yama Maria a bira Testigu di Yehova. Mi ruman hòmbernan mas grandi no tabata Testigu ainda, pero nan tabata studia Beibel sí. Komo ku mi tabata prediká regularmente, e polisnan kier a manda mi prizòn atrobe. Den e tempu ei, e rumannan ku tabata enkargá ku e trabou di prediká a pidi mi pa yuda produsí publikashonnan den sekreto, esta, den forma klandestino. Mi tabatin 24 aña.”

Tio Nikolai a sigui konta: “E Testigunan tabata gusta bisa: ‘Si prohibí e trabou di prediká riba tera, lo e sigui bou di tera.’ (Pro. 28:28) Den e tempu ei, nos tabata imprimí mayoria di nos publikashonnan den lugánan sekreto bou di tera. Mi promé ‘ofisina’ tabata den un bùnker bou di e kas di Dmitry, un di mi ruman hòmbernan mas grandi. Tin biaha mi tabata keda dos siman largu den mi bùnker sin sali. De bes en kuando e lampi di kerozin tabata paga pa falta di oksígeno. E ora ei mi tabata drumi i warda te ora e kamber yena ku aire fresku.

Un dia, un ruman hòmber ku tabata traha ku mi a puntra mi: ‘Nikolai, bo a batisá kaba?’ Aunke  mi tabata sirbi Yehova pa 11 aña kaba, mi no a batisá ainda. Pues, nos a papia tokante e asuntu, i e mesun anochi ei, ku 26 aña, mi a batisá den un lago. Tres aña despues mi a haña mas responsabilidat. Mi a bira un miembro di e Komité di Pais. E tempu ei, pa e trabou di prediká por a sigui, nan tabata nombra rumannan ku no tabata enkarselá pa tuma lugá di esnan ku tabata den prizòn.”

Tio Nikolai a konta: “E trabou di imprimí bou di tera tabata hopi mas difísil ku prizòn. Pa evitá di hala atenshon di polis sekreto, pa shete aña largu mi no por a asistí na e reunionnan, i mi mes mester a sòru pa mi keda spiritualmente fuerte. Mi tabata wak mi famia solamente ora mi bishitá nan, loke mi por a hasi masha poko biaha. Pero e echo ku nan tabata komprondé e situashon ku mi tabata aden a enkurashá mi hopi. Mi tabata sinti mi hopi kansá pasobra konstantemente mi tabata bou di strès i semper mi mester a keda alerta. Nos mester tabata prepará pa kualke kos. Por ehèmpel, un anochi, dos polis a bini na e kas kaminda mi tabata kedando. Mi a bula for di un bentana na e otro banda di e kas i mi a kore bai den mondi. Ora mi a yega na un área kaminda no tabatin lugá pa skonde, mi a skucha un zonido straño. E zonido tabata manera un tipo di flùitmentu. Despues di un ratu mi a ripará ku nan tabata tirando i ku e zonido straño tabata di e balanan di skopèt. Un di mi persiguidónan a subi riba un kabai i a sigui tira te ora ku su balanan a kaba. Un di e balanan a alkansá mi na mi man. Despues ku nan a kore mi tras pa 5 kilometer, mi a logra skapa dor di skonde den mondi. Mas despues ora mi tabata den korte, nan a bisa mi ku e polisnan a tira 32 biaha riba mi.

Debí ku mi tabata pasa asina tantu tempu bou di tera, mi a bira blek, i esei a pone ku mesora hende por a ripará kiko mi tabata hasiendo. P’esei mi tabata bai den solo mas tantu posibel. Tambe mi salú a bai atras. Na un okashon mi no por a asistí na un reunion importante ku algun ruman hòmber pasobra mi tabata sangra for di boka i nanishi.”

Tio Nikolai a sigui konta: “Dia 26 di yanüari 1957 nan a bolbe arestá mi. Seis luna despues Korte Supremo di Ukrania a duna e veredikto. Nan a sentensiá mi na morto pa medio di peloton di fusilamentu, pero komo ku nan a kita pena di  morto den e pais, nan a kambia mi sentensia pa 25 aña di prizòn. Nan a sentensiá ocho di nos na un total di 130 aña den kampamentunan di trabou fòrsá. Nan a manda nos na e kampamentunan di Mordvinia, unda tabatin mas o ménos 500 Testigu. Nos tabata reuní den gruponan chikitu pa studia E Toren di Vigilansia den sekreto. Despues ku un guardia a lesa algun di nos revistanan ku nan a konfiská, el a bisa: ‘Si boso sigui lesa e revistanan akí, niun hende por pone boso pèrdè boso fe.’ Semper nos tabata purba di hasi nos trabou na un manera diligente, i tin biaha nos tabata hasi asta mas di loke nan tabata pidi nos. Tòg e komandante a bisa: ‘E trabou ku boso ta hasi akinan no ta asina importante. Loke nos mester ta boso lealtat.’”

Na aña 1967, ora Tio Nikolai a sali for di e kampamentu di trabou fòrsá, el a yuda establesé algun kongregashon na Estonia i St. Petersburg, Rusia. Na komienso di 1991, nan a anulá e veredikto ku e korte a dikta na aña 1957 pasobra no tabatin sufisiente evidensia pa mustra ku Tio Nikolai a kometé un krímen. Durante e tempu ei, hopi Testigu di Yehova ku a sufri maltrato a ser deklará inosente. Na aña 1996, Tio Nikolai a muda pa e stat di Velikiye Luki den e provinsia di Pskov Oblast, ku ta keda mas o ménos 500 kilometer for di St. Petersburg. El a kumpra un kas chikitu i na 2003 nan a traha un Salòn di Reino riba su tereno. Awe tin dos kongregashon progresivo ta reuní einan.

Ami ku mi esposo ta sirbi na e sukursal di Testigunan di Yehova na Rusia. Na mart 2011, algun luna promé ku Tio Nikolai a muri, el a bishitá nos pa último biaha. Su bunita palabranan a konmové nos. Ku un mirada profundo el a bisa: “Ora mi mira tur loke ta pasando, ta parse ku e di shete dia di kana rònt di Yériko ya a kuminsá.” (Hos. 6:15) E tabatin 85 aña. Aunke su bida no tabata fásil, el a ekspresá su mes ku e siguiente palabranan: “Esta kontentu mi ta ku mi a sirbi Yehova den mi hubentut! Nunka mi a lamentá e desishonnan ku mi a tuma.”