1, 2. Kiko ta hasi nos selebro úniko?

NOS selebro ta algu úniko. Por ehèmpel, komo hende nos tin e kapasidat pa siña un idioma i esei ta permití nos lesa, skirbi, papia, komprondé loke nos ta skucha, hasi orashon i kanta kantika di alabansa na Yehova. Un lingwista a bisa: “E kapasidat ku un mucha tin pa siña un idioma ta un karakterístika ku ser humano so tin.”

² E kapasidat akí ta un regalo di Dios. (Sal. 139:14; Rev. 4:11) Nos selebro ta úniko den un otro sentido tambe. Distinto di bestia, nos a ser kreá “segun e imágen di Dios.” Nos tin boluntat liber i nos por skohe pa usa nos kapasidat di siña idioma pa duna gloria na Dios.​—Gén. 1:27.

3. Ki regalo presioso Yehova a duna nos ku por hasi nos sabí?

³ E Kreador di idioma a duna tur hende ku ke ador’é un regalo presioso: Beibel. E buki sagrado akí ta disponibel sea kompleto òf en parte na mas ku 2.800 idioma. Ora bo studia Beibel, bo ta yena bo mente ku Dios su pensamentunan. (Sal. 40:5; 92:5; 139:17) Esei lo yuda bo meditá riba kosnan ku “por hasi bo sabí pa salbashon.”—Lesa 2 Timoteo 3:​14-17.

4. (a) Kiko meditashon ta nifiká? (b) Ki preguntanan nos lo konsiderá?

⁴ Ora un persona ta meditá, e ta reflekshoná òf pensa profundamente riba algu. (Sal. 77:12; Pro. 24:​1, 2) Lo por tin algu mihó pa meditá riba dje ku Yehova i Hesus? (Huan 17:3) Pero, kisas nos ta puntra nos mes: Ki konekshon tin entre lesa i meditá? Ki oportunidat nos tin pa meditá, i kon nos por disfrutá di esaki?

5, 6. Kiko lo yuda bo komprondé i kòrda mihó loke bo ta lesa?

⁵ Nos selebro por hasi kosnan maravioso, tin biaha, sin ku nos ta konsiente di esaki. Por ehèmpel, nos ta hala rosea, kana, kore baiskel i taip sin para ketu mes na e kosnan akí. Esei ta sosodé tambe ora nos ta lesa. P’esei ta importante pa nos hasi esfuerso pa komprondé loke nos ta lesa. Ora bo ta yegando na fin di un paragraf òf ora bo ta yegando un suptema nobo, lo ta bon pa bo para un ratu i pensa riba loke bo a kaba di lesa. Asina bo por hasi sigur ku bo a komprondé loke bo a lesa. Distraishon i falta di konsentrashon por pone nos kuminsá pensa riba otro kos i stroba nos di saka pleno probecho di nos lesamentu. Kon nos por evitá esaki?

⁶ Investigashonnan ta mustra ku ora un persona lesa na bos haltu miéntras ku e ta studia, e ta kòrda mihó loke el a siña. Esun ku a krea nos selebro sa esei. P’esei el a instruí Hosue pa “meditá” riba e buki di Lei, òf segun e nifikashon di e palabra akí na hebreo, “les’é den un tono abou.” (Lesa Hosue 1:8.) Lo bo ripará ku si bo lesa Beibel den un tono abou, lo bo komprondé mihó loke bo ta lesa. Ademas, esaki lo yuda bo konsentrá mihó.

7. Ki ora ta e mihó momento pa meditá riba e Palabra di Dios? (Wak e promé plachi.)

⁷ Meditashon ta rekerí esfuerso i konsentrashon. P’esei, komo ku nos tin un selebro imperfekto, nos tin e tendensia di hasi loke ta mas fásil i loke ta rekerí ménos esfuerso. Pues, e mihó momento pa nos meditá ta ora nos no ta muchu kansá. Tambe nos mester buska un lugá trankil i sin distraishon. Pa e salmista David, e mihó momento pa meditá tabata anochi riba su kama. (Sal. 63:6) Hesus mes, kende tabatin un mente perfekto, a preferá di meditá i hasi orashon den un lugá trankil.​—Luk. 6:12.

8. (a) Kiko mas nos por meditá ariba? (b) Kon Yehova ta sintié ora nos ta tuma tempu pa papia tokante dje?

⁸ Klaru ku e kosnan mas importante ku nos por meditá ariba ta loke nos ta lesa den Beibel. Pero riba kiko mas nos por reflekshoná? Por ehèmpel, ora nos ta opservá e maravianan di kreashon, nos por para un ratu i meditá riba loke nos ta mira. Sin duda esaki lo motivá bo pa alabá Yehova pa su bondat. I si bo ta ku un otro persona, bo por papia kuné tokante bo sintimentu di apresio pa Yehova. (Sal. 104:24; Echo. 14:17) Yehova ta apresiá ora nos ta pensa riba dje, hasi orashon na dje i papia di dje? Laga nos wak kiko Beibel ta kontestá. Relashoná ku e tempu krítiko ku nos ta bibando aden, Beibel ta bisa: “E ora ei esnan ku a teme SEÑOR a papia ku otro, i SEÑOR a presta atenshon i a tende  esaki, i un buki di memoria a wòrdu skirbí su dilanti pa esnan ku ta teme SEÑOR i ku ta [meditá riba] su nòmber.”​—Mal. 3:16.

9. (a) Kiko Pablo a bisa Timoteo pa meditá ariba? (b) Kon nos por apliká Pablo su konseho ora nos ta prepará pa bai sirbishi?

⁹ Apòstel Pablo a bisa Timoteo pa meditá riba e efekto ku su palabranan, kondukta i siñansa tabatin riba otro hende. (Lesa 1 Timoteo 4:​12-16.) Meskos ku Timoteo, nos tambe tin hopi kosnan spiritual ku nos por meditá ariba. Por ehèmpel, nos mester tuma tempu pa meditá ora nos ta prepará pa dirigí un estudio di Beibel. Ku kada studiante na mente, nos mester pensa riba pregunta di punto di bista òf ilustrashon ku por yuda e studiante hasi progreso. Si nos hasi esaki, nos lo fortalesé nos mes fe i nos lo dirigí estudio di Beibel ku hopi mas entusiasmo i na un manera mas efektivo. Nos por hasi meskos ora nos ta prepará pa sali den sirbishi. (Lesa Èsdras 7:10.) E buki di Echonan por yuda nos haña mas entusiasmo pa bai sirbishi. Algu ku tambe por yuda nos ku e trabou di prediká ta ora nos meditá riba e versíkulonan di Beibel ku nos ke usa i e publikashonnan ku nos ke laga e dia ei. (2 Tim. 1:6) Pensa riba e hendenan den nos teritorio i kiko lo interesá nan. E tipo di preparashonnan akí lo yuda nos prediká na un manera mas efektivo “ku demostrashon di e spiritu i di e poder” di e Palabra di Dios.​—1 Kor. 2:4.

10. Ki oportunidat mas nos tin pa meditá riba kosnan spiritual?

¹⁰ Abo ta hasi nota durante diskurso  públiko, asamblea i kongreso? Si esei ta e kaso, tuma tempu pa repasá bo notanan. Esaki ta un bon oportunidat pa meditá riba loke bo a siña di Dios su palabra i su organisashon. Ademas, E Toren di Vigilansia i ¡Despertad! ku nos ta haña tur luna i e publikashonnan ku nos ta haña na kongreso ta duna nos informashon nobo pa nos pensa ariba. Ora bo lesa e Anuario, lo ta bon pa bo stòp un ratu i meditá riba e eksperensia ku bo a kaba di lesa; asina, e informashon lo yega na bo kurason. Lo ta bon pa bo marka e puntonan importante òf hasi nota na banda, pasobra esei lo yuda bo ora bo ta prepará pa hasi rebishita, bishita di pastoreo òf duna un diskurso. Mas importante ainda, e manera akí di meditá lo duna nos e oportunidat pa benefisiá plenamente di e informashon i gradisí Yehova pa tur e bon kosnan ku e ta siña nos.

11. Kua ta e publikashon di mas importante ku nos por meditá ariba, i kon esei lo yuda nos? (Wak tambe e nota.)

¹¹ Naturalmente, Beibel ta e publikashon di mas importante ku nos por ­meditá ariba. Imaginá bo ku bo ta den un situashon unda bo no por tin un Beibel. * Den un kaso asina, bo por meditá riba bo tekstonan faborito i kantikanan ku bo ta kòrda for di kabes. (Echo. 16:25) I spiritu santu lo yuda bo kòrda loke bo a siña.​—Huan 14:26.

12. Ki schedule di lesa Beibel bo por sigui?

¹² Abo tin un schedule pa lesa Beibel? Kisas bo por purba e siguiente sugerensianan. Bo por dediká algun dia den siman na lesa i meditá riba e parti asigná di Beibel pa trata den e Skol di Ministerio Teokrátiko. Riba otro dianan bo por meditá riba loke Hesus a hasi i bisa. Sin duda e Evangelionan, ku ta papia di Hesus su bida, ta entre e bukinan mas konosí di Beibel. (Rom. 10:⁠17; Heb. 12:⁠2; 1 Ped. 2:⁠21) Nos tin asta un publikashon ku ta papia tokante Hesus su bida riba Tera den un órden kronológiko. E publikashon akí por yuda bo lesa i meditá riba e Evangelionan.​—Huan 14:6.

13, 14. Dikon ta asina importante pa meditá riba kosnan spiritual, i kiko esei lo motivá nos pa hasi?

¹³ Si nos meditá riba kosnan spiritual, nos lo bira spiritualmente maduro. (Heb. 5:14; 6:1) Si nos no tuma tempu pa pensa riba Yehova i Hesus, pokopoko nos lo por alehá for di Dios òf asta pèrdè nos relashon kuné. (Heb. 2:1; 3:12) Hesus a bisa ku pa nos por “retené” e Palabra di Dios, nos mester skuch’é òf asept’é ku “un kurason onesto i bon.” (Luk. 8:15, BS) Si nos no hasi esei, fásilmente nos lo por “laga inkietut, rikesa i plaser di e bida akí distraí” nos, i nunka nos lo alkansá madures.​—Luk. 8:14.

¹⁴ P’esei, laga nos sigui meditá riba e Palabra di Dios. Esaki lo yuda nos reflehá Yehova su gloria, i imitá su kualidatnan i personalidat. (2 Kor. 3:18) Esta un gran privilegio nos tin di por siña konosé Yehova i reflehá su gloria pa tur eternidat!​—Ekl. 3:11.

15, 16. (a) Kon meditashon riba kosnan spiritual por benefisiá nos? (b) Dikon tin biaha ta difísil pa meditá, pero pakiko nos mester perseverá den esaki?

¹⁵ Ora nos tin kustumber di meditá riba kosnan spiritual, nos lo mantené nos entusiasmo pa e bèrdat. Pues nos lo ta un fuente di animashon pa nos rumannan i esnan interesá ku nos ta topa den sirbishi. Ora nos meditá profundamente riba e sakrifisio di reskate di Hesus, ku ta e regalo di mas grandi ku Dios a duna nos, nos lo balorá mas e privilegio di tin un relashon íntimo ku Yehova. (Rom. 3:24; Sant. 4:8) Un ruman di Suráfrika ku yama Mark, ku a pasa tres aña den prizòn pa motibu ku el a mantené su posishon neutral, a bisa: “Meditashon ta manera un aventura. Mas nos meditá riba kosnan spiritual, mas kos nobo nos lo deskubrí tokante nos Dios, Yehova. Tin biaha, ora mi ta sinti mi un tiki desanimá òf preokupá tokante futuro, mi ta kue mi Beibel i meditá riba un relato. Esei ta laga mi sinti mi mihó.”

¹⁶ Ta bèrdat ku tin biaha ta hopi difísil pa meditá riba kosnan spiritual ya ku tin asina tantu distraishon den e mundu akí. Un otro ruman di Afrika ku yama Patrick a bisa: “Mi mente ta manera un mailbox ku ta yen di informashon ku mi tin ku pasa dor di dje tur dia. Tin ku ta importante i tin ku no ta kos di lesa mes. Miéntras mi ta repasá e informashon ku tin den mi mente, mayoria di biaha mi ta haña ku mi mente ta yena ku ‘preokupashon.’ Den un kaso asina, mi tin ku hasi orashon promé pa mi por haña pas mental pa mi por meditá na drechi. Aunke esei ta ­rekerí esfuerso, mi ta hala mas serka di Yehova. Di e manera ei mi por komprondé e bèrdat mas mihó.” (Sal. 94:19) No tin duda ku esnan ku ta “analisá e Skritura tur dia” i meditá riba dje lo haña hopi benefisio.​—Echo. 17:11.

17. Ki ora abo ta meditá?

¹⁷ Tin hende ta lanta trempan pa asina nan por lesa, meditá i hasi orashon. Otronan ta hasi esaki durante nan pousa di mèrdia. Kisas bo ta haña ta mihó pa hasi esei atardi òf promé ku bo bai drumi. Algun hende ta lesa Beibel tantu mainta komo anochi. Bon mirá, no ta importá ki ora nos ta lesa Beibel, basta nos les’é “di dia i anochi,” esta, regularmente. (Hos. 1:8) Pa nos hasi esei, nos mester dediká ménos tempu na kosnan ku ta ménos importante pa asina nos por tin mas tempu pa meditá riba e Palabra di Dios tur dia.​—Efe. 5:​15, 16.

18. Kiko Beibel ta bisa tokante esnan ku ta meditá riba e Palabra di Dios diariamente i ku ta apliká loke nan ta siña?

¹⁸ Beibel ta primintí ku Yehova lo bendishoná esnan ku ta hasi esfuerso pa meditá i apliká loke nan ta siña. (Lesa Salmo 1:​1-3.) Hesus a bisa: “Felis ta esnan ku ta tende e palabra di Dios i ta kumpli kuné.” (Luk. 11:⁠28) Pero e kos di mas importante ta pa meditá tur dia riba kosnan spiritual. Esei lo yuda nos onra Yehova, e Kreador di nos maravioso selebro, kende lo rekompensá nos ku felisidat awor i bida eterno den su mundu nobo.​—Sant. 1:25; Rev. 1:3.