Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:

Ora e fin yega, kiko lo ta algun kos ku lo yega na nan fin?

Entre e kosnan ku lo yega na nan fin ta tur gobièrnu humano, guera i inhustisia, religion ku a desepshoná Dios i hende, i hende ku ta stima maldat.—1/5, pág. 3-5.

Ken ta e Gòg di Magòg menshoná den e buki di Ezekiel?

Gòg di Magòg no ta Satanas; parse ku Gòg di Magòg ta un koalishon, òf grupo, di nashon ku lo purba di kaba ku e pueblo di Dios despues ku e tribulashon grandi kuminsá.—15/5, pág. 29-30.

Kiko ta seis kos ku por yuda un persona saka lo mihó di su behes?

Beibel ta rekomendá pa nos ta (1) modesto, (2) balansá, (3) positivo, (4) generoso, (5) amabel i (6) gradisidu. Pues, bo por saka lo mihó di bo behes si bo ta demostrá e kualidatnan ei.—1/6, pág. 8-10.

Kon e milagernan di Hesus ta demostrá ku e tabata generoso?

Na un fiesta di kasamentu na Kana, Hesus a kambia 380 liter (100 galòn) di awa den biña. Na un otro okashon Hesus a hasi milager i alimentá mas ku 5.000 hende. (Mat. 14:14-21; Huan 2:6-11) Na tur dos okashon, el a imitá e generosidat di su Tata.—15/6, pág. 4-5.

Dikon nos por tin sigur ku nos por agradá Dios aunke nos ta imperfekto?

Hende manera Yòb, Lòt i David a faya. Sinembargo, nan tabatin e deseo di sirbi Dios, a arepentí di nan fayonan i a hasi e kambionan nesesario. Asina nan a haña e aprobashon di Dios, i nos tambe por.—1/7, pág. 12-13.

Ta tur e miembronan di religion falsu lo muri ora Babilonia e Grandi ser destruí?

Aparentemente ku nò. Zakarías 13:4-6 ta duna di komprondé ku asta algun miembro di klero lo distansiá nan mes for di nan religion i hasi komo si fuera nunka nan no tabata pertenesé na e religionnan ei.—15/7, pág. 15-16.

Dikon Barak a bai di akuerdo pa bringa, basta Débora a bai kuné?

Barak tabata un hòmber di fe. En bes di pidi Yehova pa mas arma, e tabata ke pa e representante di Yehova—Débora—bai kuné pa fortalesé e ku su hòmbernan. (Hues. 4:6-8; 5:7)—1/8, pág. 13.

Riba kiko asina un kristian por meditá?

Nos por meditá por ehèmpel riba e kreashon di Yehova, e balor di su Palabra inspirá, e privilegio di por hasi orashon i su provishon maravioso di e reskate.—15/8, pág. 10-13.

Ken un kristian soltero lo no ‘date,’ òf sali kuné ku intenshonnan romántiko, si e ke evitá mal kompania?

Aunke nos ta trata di ta amabel ku tur hende, lo ta robes pa un kristian soltero ‘date’ òf sali ku intenshonnan romántiko ku un persona ku no ta un fiel sirbidó batisá di Yehova. (1 Kor. 15:33)—15/8, pág. 25.

Kon Pedro a pèrdè su fe momentániamente, pero kiko a yud’é rekuperá su fe?

Ku fe apòstel Pedro a kana riba laman pa bai serka Hesus. (Mat. 14:24-32) Pero ora Pedro a wak e tormenta, el a haña miedu. Despues el a bolbe enfoká riba Hesus i a aseptá su yudansa.—15/9, pág. 16-17.

Echonan 28:4 ta bisa ku e habitantenan di Malta a kere ku apòstel Pablo tabata un asesino. Dikon nan a pensa esei?

Kisas pasobra ora un kolebra venenoso a morde Pablo, nan a pensa ku ta Dike, e diosa di hustisia, tabata kastig’é.—1/10, pág. 9.

Ki lès nos por siña for di e echo ku Marta tabata distraí ku hopi kos di hasi?

Na un okashon, Marta tabata demasiado okupá ku preparashon di un kuminda spesial. Hesus a bis’é ku su ruman muhé a skohe e mihó parti pasobra el a sinta skucha Hesus su siñansa. Nos no mester laga kosnan innesesario interferí ku nos aktividatnan spiritual.—15/10, pág. 18-20.