Kiko e Reino di Dios Ta?

KIKO tabata e tema di Hesus su predikashon? Hesus mes a bisa ku esaki tabata e Reino di Dios. (Lukas 4:43) Ora hende a skuch’é, siguramente nan a tend’é referí vários bes na e Reino ei. Nan a keda strañá òf konfundí? Nan a puntr’é kiko e Reino aki ta? Nò. E Evangelionan no ta hasi menshon di preguntanan asina. Akaso e Reino di Dios tabata un konsepto konosí pa e hendenan ei?

De echo, e Skrituranan di antigwedat ku e hudiunan a respetá komo algu santu a deskribí e Reino ei. El a usa términonan bibu i konkreto pa revelá kiko e Reino ta i kiko lo e logra. Awendia nos por siña asta mas tokante e Reino. Nos por hasi esaki den e mesun manera ku e hudiunan di pasado, esta, dor di bai den Beibel. Laga nos konsiderá shete echo verídiko ku Beibel ta siña nos tokante e Reino. E promé tresnan ta loke e hudiunan den tempu di Hesus i mas promé por a disponé fásilmente di dje. E otro tresnan ku ta sigui a ser revelá dor di Kristu òf su apòstelnan durante e promé siglo. Anto e último echo a bira opvio den nos propio tempu.

1. E Reino di Dios ta un berdadero gobièrnu ku lo dura pa semper. E promé profesia di Beibel a revelá ku Dios lo a manda un reskatadó pa hende fiel. Esun aki, yamá e “simia,” lo deshasí di tur e problemanan teribel ku a kuminsá debí na e rebelion di Adam, Eva i Satanas. (Génesis 3:15) Hopi mas despues, fiel Rei David a haña sa algu interesante tokante e simia, e “desendiente” òf Mesias aki. Lo e bira Rei di un Reino. E gobièrnu aki lo ta diferente for di tur otro. Lo e dura pa semper.—2 Samuel 7:12-14.

2. E Reino di Dios lo pone un fin na tur gobièrnu humano. Profeta Daniel a haña un vishon den kua el a mira kon podernan mundial tabata sigui un tras di otro te den nos tempu. Tuma nota di e kulminashon emoshonante di e vishon ei: “Den e dianan di e [último reinan humano] ei e Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan aki, ma e mes lo dura pa semper.” Pues, tur e reinonan òf gobièrnunan di e mundu aki—ku nan gueranan, opreshon  i korupshon—lo ser destruí pa semper. Manera e profesia di Daniel ta mustra, pronto e Reino di Dios lo e goberná riba henter e tera. (Daniel 2:44, 45) E Reino aki no solamente lo ta un berdadero gobièrnu, sino tambe lo e ta e úniko gobernashon riba tera. *

3. E Reino di Dios lo kaba ku guera, malesa, hamber i asta morto. Profesianan emoshonante di Beibel ta revelá loke e Reino di Dios lo hasi aki riba tera. E gobièrnu ei lo logra loke ningun organisashon humano no a yega di hasi ni lo no hasi tampoko. Imaginá bo, tur arma di guera lo ser destruí pa semper! “E ta hasi gueranan stòp te na e fin di tera.” (Salmo 46:9) Lo no tin dòkter, hospital ni ningun sorto di malesa mas. “Ningun habitante lo no bisa: ‘Mi ta malu.’” (Isaias 33:24) Lo no tin hamber, skarsedat di kuminda, malnutrishon ni hende ku ta muri di hamber mas. “Lo tin abundansia di maishi den e tera.” (Salmo 72:16) Lo no tin entiero, belorio, santana, i mortuario mas, ni e sufrimentu ku ta bini huntu ku nan. Finalmente, morto, nos enemigu kruel, lo ser destruí. Yehova “lo traga morto pa semper, i Señor DIOS lo seka awa di wowo for di tur kara.”—Isaias 25:8.

4. E Reino di Dios tin un Gobernante ku Dios a skohe. No ta e Mesias a nombra su mes ni no ta hende imperfekto a skoh’é. Ta Yehova Dios a skoh’é personalmente. E títulonan Mesias i Kristu mes ta indiká esei. Tur e dos palabranan ei ta nifiká “E Ungí.” Pues anto, ta Yehova a ungí òf nombra e Rei aki p’e kumpli ku su asignashon spesial. Relashoná kuné, Dios a bisa: “Ata mi sirbidó ku mi ta sostené, mi skohí, den kende mi alma tin delisia. Mi a pone mi spiritu riba dje; E lo trese hustisia pa e nashonnan.” (Isaias 42:1; Mateo 12:17, 18) Ken sa mas mihó ku nos Kreadó ki klase di Gobernante nos tin mester?

5. E Gobernante di e Reino di Dios a duna prueba na henter humanidat ku e ta digno. Hesus di Názarèt a resultá di ta e Mesias ku Beibel a profetisá. El a nase den e liña di desendensia ku Dios a skohe. (Génesis 22:18; 1 Krónikanan 17:11; Mateo 1:1) Ora e tabata riba tera, el a kumpli ku hopi profesia relashoná ku e Mesias ku a ser registrá siglonan promé. For di shelu tambe el a ser identifiká komo e Mesias. Kon asina? Wèl, Dios a papia for di shelu i a identifik’é komo Su propio Yu; angelnan a indiká ku Hesus tabata e Mesias ku Beibel a profetisá; i Hesus a hasi milagernan—hopi bes dilanti di sentenáres òf asta míles di hende—ku a mustra bon kla ku el a risibí poder di Dios. * Bes tras bes Hesus a mustra ki klase di Gobernante lo el a bira. E tabatin tantu e poder komo e deseo pa yuda hende. (Mateo 8:1-3) E tabata un persona inegoista, humilde, ku kompashon i kurashi. E relato di su bida riba tera ta den Beibel i tur hende por les’é.

6. E Reino di Dios ta konsistí di Kristu i 144.000 ko-gobernante. Hesus a bisa ku lo tin otronan, inkluso su apòstelnan, ku lo goberná huntu kuné den shelu. El a yama e grupo aki e “tou chikitu.” (Lukas 12:32) Despues, apòstel Juan a ser bisá ku e tou chikitu aki lo a konsistí di 144.000 persona. Nan lo tin un asignashon interesante den shelu pa goberná komo rei i sirbi komo saserdote huntu ku Kristu.—Revelashon 5:9, 10; 14:1, 3.

7. E Reino di Dios, ku ta gobernando awor den shelu, ta kla pa kuminsá goberná henter e tera. E último echo verídiko  aki ta un di esnan mas emoshonante ku nos por siña. Beibel ta duna hopi evidensia ku Hesus a risibí su outoridat komo Rei den shelu. E ta reinando einan awor—den nos tempu—i lo no dura mashá ku lo e ekstendé su gobernashon riba henter e tera i kumpli ku e magnífiko profesianan ku nos a menshoná kaba. Pero kon nos por ta sigur ku e Reino di Dios ta gobernando awor? Na ki tempu lo e kuminsá goberná e tera?

[Nota]