Konsiderá Digno di Risibí un Reino

“Esaki ta un indikashon bon kla di e huisio hustu di Dios, pa boso wòrdu konsiderá digno di e reino di Dios.”—2 TES. 1:5.

1, 2. Kiko ta Dios su propósito relashoná ku husgamentu, i ken lo hasi e husgamentu?

RÒNT di aña 50 di nos era, apòstel Pablo tabata na Atenas. El a sintié molestiá pa e idolatria ku el a mira tur kaminda einan. I esaki a motiv’é pa duna un ekselente testimonio. El a konkluí su diskurso ku un deklarashon ku mester a kapta atenshon di su oyentenan no-hudiu. El a bisa: “Awor [Dios] ta deklará na hende ku tur hende na tur kaminda mester repentí, pasobra el a fiha un dia den kual e lo husga mundu ku hustisia pa medio di un hòmber, kende el a apuntá, dunando prueba na tur hende dor di lant’é for di e mortonan.”—Echo. 17:30, 31.

² Dios a fiha un binidero dia di huisio pa humanidat. Esei ta un asuntu serio pa reflekshoná riba dje! Esun ku lo hasi e husgamentu ei lo ta e persona ku Pablo no a menshoná su nòmber den su diskurso na Atenas. Pero nos sí sa ku ta Hesukristu resusitá. E huisio di Hesus lo nifiká sea bida òf morto.

3. Dikon Yehova a sera un aliansa ku Abraham, i ken ta hunga un papel spesial den kumplimentu di e aliansa aki?

³ E Dia di Huisio ei lo dura 1.000 aña. Hesus komo Rei di e Reino di Dios lo hiba delantera den e nòmber di Yehova, pero lo e no ta su so. Yehova ta skohe otro personanan for di entre humanidat pa reina i husga huntu ku Hesus durante e dia ei ku lo dura mil aña. (Kompará ku Lukas 22:29 i 30.) Kasi 4.000 aña pasá, Yehova a pone e base pa e Dia di Huisio ei ora el a sera un pakto òf aliansa ku su fiel sirbidó Abraham. (Lesa Génesis 22:17 i 18.) Evidentemente e aliansa ei a drenta na vigor na aña 1943 promé ku nos era. Klaru ku Abraham no por a komprondé kompletamente kiko e aliansa ei lo a nifiká pa humanidat. Sin embargo, awe nos sí por mira ku, di akuerdo ku e rekisitonan di e aliansa, Abraham su desendientenan òf simia ta hunga un papel spesial den e kumplimentu di Dios su propósito pa husga humanidat.

4, 5. (a) Ken ta e parti prinsipal di e simia di Abraham, i kiko el a bisa tokante e Reino? (b) Na ki tempu e oportunidat a habri pa hende fiel bira parti di e Reino?

⁴ Hesus a resultá di ta e parti prinsipal di e simia di Abraham. Na aña 29 di nos era, el a wòrdu ungí ku spiritu santu i a bira e Mesias primintí òf Kristu. (Gal. 3:16) Despues di esei, durante tres aña i mei, Hesus a prediká e bon nobo di Reino na e nashon hudiu. Despues  ku nan a arestá Juan Boutista, Hesus a mustra ku otro hende tambe por tabatin e speransa di partisipá den e Reino ora el a bisa: “For di e dianan di Juan Boutista te awor, e reino di shelu ta e meta ku hende ta forsa pa alkansá, i esnan ku ta hasiendo esfuerso ta gar’é.”—Mat. 11:12, NW.

⁵ Ta interesante pa nota ku djis promé ku Hesus a papia di esnan ku lo ‘gara’ e Reino di shelu, el a bisa: “Di bèrdat mi ta bisa boso, entre esnan ku a nase for di muhé no a lanta ningun otro mas grandi ku Juan Boutista; sin embargo, esun di mas chikitu den e reino di shelu ta mas grandi kuné.” (Mat. 11:11) Dikon el a bisa asina? Pasobra ta te na e tempu ku spiritu santu a ser dramá na Pentekòste di aña 33 di nos era, e oportunidat a habri pa hende fiel bira parti di e Reino. Pa e tempu ei, Juan Boutista a muri kaba.—Echo. 2:1-4.

Abraham Su Simia A Ser Deklará Hustu

6, 7. (a) Den ki sentido Abraham su simia mester a bira “manera e streanan di e shelunan”? (b) Ki bendishon Abraham a risibí, i ki bendishon similar su simia ta risibí?

⁶ Yehova a bisa Abraham ku su simia òf desendientenan lo multipliká i bira “manera e streanan di e shelunan” i manera santu ku tin kantu di laman. (Gén. 13:16; 22:17) Ku otro palabra, den tempu di Abraham tabata imposibel pa hende haña sa di kuantu hende e simia ei lo a konsistí. Sin embargo, ku tempu e kantidat di su simia spiritual a ser revelá. Ademas di Hesus, lo e konsistí di 144.000 persona.—Rev. 7:4; 14:1.

⁷ Relashoná ku Abraham su fe, e Palabra di Dios ta bisa: “[Abraham] a kere den SEÑOR, i el a konta esaki komo hustisia p’e.” (Gén. 15:5, 6) Ta sierto ku no ta eksistí ningun hende ku ta kompletamente hustu. (Sant. 3:2) Apesar di esei, debí na Abraham su fe sobresaliente, Yehova a trata kuné komo si fuera e tabata un persona hustu i asta a yam’é su amigu. (Isa. 41:8) E personanan ku huntu ku Hesus ta forma parti di e simia spiritual òf primintí di Abraham tambe a ser deklará hustu. P’esei, nan ta haña bendishonnan asta mas grandi ku loke Abraham a risibí.

8. Ki bendishonnan ta posibel pa miembronan di e simia di Abraham?

⁸ Kristiannan ungí ta ser deklará hustu pasobra nan ta ehersé fe den e sakrifisio di reskate di Hesus. (Rom. 3:24, 28) Den bista di Yehova, nan ta ser librá di piká i por ser ungí ku spiritu santu pa asina bira yunan spiritual di Dios i rumannan di Hesukristu. (Juan 1:12, 13) Nan ta drenta e pakto òf aliansa nobo i ta forma un nashon nobo, “e Israel di Dios.” (Gal. 6:16; Luk. 22:20) Ki un privilegio magnífiko tur esei ta! Komo resultado di e aktonan aki ku Dios a hasi na fabor di kristiannan ungí, nan no tin e speransa di biba riba tera pa semper. Nan ta sakrifiká e speransa ei pa nan por tin e goso ineksplikabel di asosiá ku Hesus durante e Dia di Huisio i di goberná huntu kuné den shelu.—Lesa Romanonan 8:17.

9, 10. (a) Na ki tempu kristiannan a ser ungí pa promé biaha ku spiritu santu, i kiko ta spera nan? (b) Ki yudansa kristiannan ungí a risibí?

⁹ Na Pentekòste di aña 33 di nos era, un grupo di hende fiel a haña e oportunidat pa ta  entre esnan ku lo goberná huntu ku Hesus durante e Dia di Huisio. Rònt di 120 disipel di Hesus a ser batisá ku spiritu santu i asina nan a bira e promé kristiannan ungí. Sin embargo, esei tabata solamente e prinsipio. Di e tempu ei padilanti, nan mester a demostrá nan lealtat na Yehova apesar di tur e pruebanan ku Satanas lo a trese riba nan. Pa nan por risibí e korona di bida selestial, nan mester a keda fiel te na morto.—Rev. 2:10.

¹⁰ Pa yuda e kristiannan ungí logra esaki, Yehova a duna nan e konseho i animashon nesesario mediante su Palabra i e kongregashon kristian. Por ehèmpel, apòstel Pablo a skirbi e kristiannan ungí na Tesalónika: “Nos tabata ekshortá i enkurashá i roga kada un di boso, manera un tata su mes yunan, pa boso kana na un manera digno di e Dios, kende ta yama boso den su mes reino i gloria.”—1 Tes. 2:11, 12.

11. Ki provishon por eskrito Yehova a perkurá pa e miembronan di “e Israel di Dios”?

¹¹ Durante e dékadanan despues ku e promé miembronan di e kongregashon di kristiannan ungí a ser skohí, Yehova a perkurá algu mas pa nan. El a haña ku tabata oportuno pa prepará un registro permanente di Hesus su ministerio riba tera i tambe di e manera ku Hesus tabata trata i konsehá e kristiannan ungí di promé siglo. P’esei, Yehova a agregá e Skritura Griego Kristian inspirá na e Skritura Hebreo inspirá ku tabata eksistí kaba. Inisialmente e Skritura Hebreo a ser skirbí pa e nashon di Israel karnal durante e tempu ku nan tabatin un relashon spesial ku Dios. E Skritura Griego Kristian a ser skirbí prinsipalmente pa “e Israel di Dios,” esnan ku a ser ungí komo e rumannan di Kristu i e yunan spiritual di Dios. Ta klaru ku di ningun manera esaki no ta nifiká ku personanan no-israelita no por a saka gran benefisio ora nan a studia e Skritura Hebreo. Di mes manera, kristiannan ku no ta ungí ku spiritu santu tambe por saka masha hopi benefisio ora nan ta studia e Skritura Griego Kristian i ta biba di akuerdo ku su konseho.—Lesa 2 Timoteo 3:15-17.

12. Ki rekordatorio Pablo a duna kristiannan ungí?

¹² E kristiannan di promé siglo a ser deklará hustu i ungí ku spiritu santu pa asina nan por a risibí nan herensia selestial. E echo ku nan a ser ungí no a hasi nan rei riba otro kompañeronan ungí miéntras ku nan tabata riba tera ainda. Evidentemente, algun di e promé kristiannan a pèrdè e echo ei for di bista i a kuminsá buska prominensia inapropiá entre nan rumannan den e kongregashon. Esei a motivá Pablo pa bisa: “Ya boso ta yen kaba, boso a bira riku kaba, boso a bira rei sin nos; ai, mara bèrdè ku boso a bira rei, pa nos tambe por a reina huntu ku boso.” (1 Kor. 4:8) P’esei, Pablo a rekordá e kristiannan ungí den su tempu: “No ku nos tin dominio riba boso fe, ma nos ta trahadó huntu ku boso pa boso goso.”—2 Kor. 1:24.

Kompletando e Kantidat Profetisá

13. Kon e skohementu di e kristiannan ungí a sigui despues di aña 33 di nos era?

¹³ No ta tur e 144.000 kristiannan ungí a ser skohí den e promé siglo. E skohementu a sigui durante e periodo apostóliko, i despues di esei aparentemente tabatin masha poko hende ku a ser skohí. Sin embargo, durante e siglonan despues e skohementu a sigui te den nos tempu. (Mat. 28:20) Finalmente, despues ku Hesus a kuminsá goberná na 1914, kosnan a kuminsá move rápidamente.

14, 15. Kiko ta sosodé den nos tempu relashoná ku e skohementu di kristiannan ungí?

¹⁴ Pa kuminsá, Hesus a limpia shelu di tur rastro di oposishon kontra e gobièrnu di Dios. (Lesa Revelashon 12:10 i 12.) Despues di esei, el a dirigí su atenshon na rekohementu di e sobrá prospekto miembronan di su Reino pa asina kompletá e kantidat di 144.000. Pa meimei di e dékada di 1930, e tarea ei tabata práktikamente kla. Hopi di e hendenan ku tabata reakshoná faborablemente na e trabou di prediká no tabatin deseo di bai shelu. E spiritu  no tabata duna testimonio ku nan spiritu ku nan tabata yunan di Dios. (Kompará ku Romanonan 8:16.) Mas bien, nan tabata identifiká nan mes ku e “otro karnénan,” esta, esnan ku tin speransa di biba pa semper den un paradeis riba tera. (Juan 10:16) P’esei, despues di 1935 e trabou di prediká a konsentrá prinsipalmente riba rekohementu di “un multitut grandi,” esun ku apòstel Juan a mira den un vishon i ku lo sobrebibí ‘e tribulashon grandi.’—Rev. 7:9, 10, 14.

¹⁵ Apesar di esei, atraves di e añanan rònt di 1935, tabatin algun hende ku a ser skohí pa un speransa selestial. Dikon? Den algun kaso, esei por tabata pasobra nan a remplasá personanan ku tabata skohí anteriormente pero ku despues a bira infiel. (Kompará ku Revelashon 3:16.) Pablo asta a papia di algun hende ku e tabata konosé personalmente i ku a bandoná e bèrdat. (Fil. 3:17-19) Ken Yehova lo skohe pa remplasá e personanan ei? Klaru ku ta e ta disidí esei. Sin embargo, lo ta lógiko ku lo e no skohe personanan resien kombertí. Mas bien, lo e skohe personanan ku te na sierto grado a duna prueba kaba di nan lealtat, meskos ku e disipelnan ku Hesus a papia kuné ora el a inisiá e selebrashon di Memorial. *—Luk. 22:28.

16. Relashoná ku e ungínan, pakiko nos ta gradisidu, i kiko nos por kere ku konfiansa?

¹⁶ Sin embargo, ta parse ku no ta tur esnan ku a ser skohí pa e speransa selestial for di e dékada di 1930 tabata pa remplasá personanan ku a bandoná e bèrdat. Opviamente, Yehova a hasi sigur ku—durante e último dianan di e sistema di kosnan aki te na destrukshon di ‘Babilonia e Grandi’—nos lo tin kristiannan ungí entre nos. * (Rev. 17:5) I nos por tin konfiansa ku e kantidat di 144.000 miembro lo ser kompletá na Yehova su debido tempu i ku finalmente nan tur lo tuma nan posishon den e gobièrnu òf Reino. Ademas, nos por kere e Palabra profétiko ku a bisa ku e multitut grandi—ku konstantemente ta krese—komo grupo lo sigui duna prueba di ta fiel. Pronto e multitut aki lo ‘sali for di e tribulashon grandi’ ku lo bini riba e mundu di Satanas i nan lo drenta ku goso den Dios su mundu nobo.

Dios Su Gobièrnu Selestial Ta Kasi Kompletu!

17. Segun 1 Tesalonisensenan 4:15-17 i Revelashon 6:9-11, kiko a pasa ku kristiannan ungí ku a muri fiel?

¹⁷ For di aña 33 di nos era, míles di kristian ungí a manifestá fe fuerte i a perseverá fielmente te na morto. Eseinan a ser konsiderá digno di risibí e Reino kaba. I evidentemente, nan a risibí e rekompensa ei, ya ku e resurekshon pa bida selestial a kuminsá desde  e promé añanan di e presensia di Kristu.—Lesa 1 Tesalonisensenan 4:15-17; Revelashon 6:9-11.

18. (a) Ki konfiansa e rumannan ungí ku ta riba tera ainda tin? (b) Kon e otro karnénan ta mira nan rumannan kristian ungí?

¹⁸ E kristiannan ungí ku ta riba tera ainda tin pleno konfiansa ku si nan keda fiel, pronto nan tambe lo risibí e rekompensa pa nan fieldat. E otro karnénan ku ta míles di persona—ora nan kontemplá e fe di nan rumannan ungí—ta di akuerdo ku e palabranan di apòstel Pablo, kende a bisa di e kristiannan ungí na Tesalónika: “Nos mes ta gaba boso den e iglesianan di Dios pa boso perseveransia i fe den tur boso persekushonnan i aflikshonnan ku boso ta soportá. Esaki ta un indikashon bon kla di e huisio hustu di Dios, pa boso wòrdu konsiderá digno di e reino di Dios, pa kual di bèrdat boso ta sufri.” (2 Tes. 1:3-5) Ora e último miembro di e ungínan riba tera muri, sin importá na ki tempu esei lo sosodé, Dios su gobièrnu selestial lo ta kompletu. Esei sigur lo kousa masha goso, tantu den shelu komo riba tera!

[Nota]

Bo Por Splika?

• Kiko Dios a revelá na Abraham relashoná ku e Dia di Huisio?

• Dikon Abraham a ser deklará hustu?

• Kiko ta e resultado dje echo ku e simia òf desendientenan di Abraham a ser deklará hustu?

• Ki konfiansa tur kristian tin?

[Preguntanan di Estudio]

[Plachi na página 24]

Hesus a animá su siguidónan pa hasi esfuerso pa alkansá e Reino

[Plachi na página 25]

Na Pentekòste di aña 33, Yehova a kuminsá skohe e miembronan sekundario di e simia di Abraham

[Plachi na página 27]

E otro karnénan ta gradisidu ku e kristiannan ungí ta huntu ku nan durante e último dianan