Paga Tinu na Bo “Arte di Siña”
Paga Tinu na Bo “Arte di Siña”
“Prediká e palabra; . . . spièrta, reprendé, ekshortá, ku hopi pasenshi i instrukshon [òf, “arte di siña,” NW].”—2 TIM. 4:2.
1. Ki mandamentu Hesus a duna su disipelnan, i ki ehèmpel e mes a pone?
APESAR di e kurashonnan milagroso ku Hesus a hasi durante su ministerio riba tera, e tabata prinsipalmente konosí komo un maestro i no komo un kuradó òf un hasidó di milager. (Mar. 12:19; 13:1) Hesus a duna prioridat na e trabou di prediká e bon nobo di e Reino di Dios. I su siguidónan ta hasi meskos awe. Kristiannan tin un asignashon pa sigui ku e trabou di hasi disipel dor di siña hende kumpli ku tur loke Hesus a manda.—Mat. 28:19, 20.
2. Kiko nos mester hasi pa por kumpli ku nos asignashon di prediká?
2 Pa nos por kumpli ku nos asignashon pa hasi disipel, konstantemente nos tin ku buska maneranan pa mehorá nos abilidat di siña. Ora apòstel Pablo a skirbi Timoteo, su kompañero den e trabou di prediká, el a enfatisá e importansia di e abilidat aki. El a bisa: “Paga bon tinu na bo mes i na bo siñansa; perseverá den e kosnan aki; pasobra hasiendo esaki lo bo sigurá salbashon, tantu pa bo mes komo pa esnan ku ta tende bo.” (1 Tim. 4:16) E siñansa òf método di siña hende ku Pablo tabatin na mente no tabata djis duna informashon. Ministernan kristian efikas ta alkansá kurason di hende i ta motivá nan pa hasi kambio den nan bida. Esei ta un arte. Pues anto, kon nos por desaroyá e “arte di siña” ora nos ta presentá e bon nobo di e Reino di Dios na otro hende?—2 Tim. 4:2, NW.
Desaroyá e “Arte di Siña”
3, 4. (a) Kon nos por desaroyá e “arte di siña”? (b) Kon e Skol di Ministerio Teokrátiko ta yuda nos bira maestronan efikas?
3 Arte ta ser definí komo e abilidat ku un hende ta atkerí dor di estudio, práktika òf opservashon. Nos tin ku presta atenshon na tur e tres elementonan aki pa nos por bira maestronan efikas di e bon nobo. E úniko manera ku nos por haña un komprondementu korekto di nos tópiko ta dor di studi’é huntu ku orashon. (Lesa Salmo 119:27 i 34.) Dor di opservá ministernan kapas segun ku nan ta siña otro hende, nos por siña di nan métodonan i imitá nan. I ora nos ta hasi esfuerso pa regularmente praktiká loke nos ta siña, esaki lo yuda nos mehorá nos abilidatnan.—Luk. 6:40; 1 Tim. 4:13-15.
4 Yehova ta nos magnífiko Siñadó. Mediante e parti visibel di su organisashon, e ta perkurá guia pa su sirbidónan riba tera pa nan por sa kon nan tin ku kumpli ku nan asignashon di prediká. (Isa. 30:20, 21) Pa e propósito aki, tur kongregashon ta tene un Skol di Ministerio Teokrátiko semanalmente. E skol aki a ser prepará pa yuda tur esnan ku ta inskribí bira proklamadónan efikas di e Reino di Dios. E buki di instrukshon prinsipal di e skol aki ta Beibel. Yehova su Palabra inspirá ta bisa nos kiko pa siña hende. Ademas, Beibel ta indiká ki métodonan di siñansa ta efikas i apropiá. Regularmente e Skol di Ministerio Teokrátiko ta rekordá nos ku nos lo bira maestronan mas ábil si nos basa nos siñansa riba e Palabra di Dios, hasi bon uso di pregunta, siña hende na un manera simpel i mustra berdadero interes den otro hende. Laga nos analisá e puntonan aki un pa un. Kaba nos lo konsiderá kon pa alkansá kurason di un studiante.
Basa Bo Siñansa Riba e Palabra di Dios
5. Kiko mester ta e base di nos siñansa, i dikon?
5 Hesus, e maestro mas grandi ku tur e maestronan humano, a basa su siñansanan riba e Skritura. (Mat. 21:13; Juan 6:45; 8:17) E no a papia den su mes nòmber ma den e nòmber di Esun ku a mand’é. (Juan 7:16-18) Ta e ehèmpel ei nos ta sigui. Pues, kiko ku nos bisa—sea ta den e ministerio di kas pa kas òf na estudionan di Beibel—esaki mester enfoká riba e outoridat di e Palabra di Dios. (2 Tim. 3:16, 17) Ni maske ki rasonamentu sabí nos bini kuné, e no por igualá e efektividat i poder di e Skritura inspirá. Beibel tin outoridat. No ta importá kua punto nos ta hasi esfuerso pa yuda un studiante komprondé, e mihó método ku nos por usa ta di lag’é lesa loke e Skritura ta bisa tokante e asuntu.—Lesa Hebreonan 4:12.
6. Kon un maestro por hasi sigur ku e studiante ta ègt komprondé e informashon ku nan ta konsiderá?
6 Klaru ku esei no ta nifiká ku un maestro kristian no tin nodi di prepará pa un estudio di Beibel. Al kontrario, di antemano e tin ku disidí kuidadosamente kua di e tekstonan menshoná e mes òf e studiante lo lesa for di Beibel durante e estudio. Generalmente, ta bon pa lesa e tekstonan di Beibel ku ta e base di loke nos ta kere. Ademas, e maestro mester yuda e studiante komprondé kada teksto ku e lesa.—1 Kor. 14:8, 9.
Hasi Bon Uso di Pregunta
7. Dikon uso di pregunta ta un bon método di siña?
7 Ora nos hasi bon uso di pregunta, esei ta stimulá e studiante pa pensa i ta yuda e maestro alkansá kurason di e studiante. Pues, en bes di abo splika e studiante e tekstonan di Beibel, pidié pa e splika nan. Tin biaha bo tin ku hasi un òf asta un seri di pregunta adishonal pa yuda bo studiante yega na e komprondementu korekto. Ora bo ta enbolbé e studiante den e proseso di siña di e manera aki, bo no solamente ta yud’é komprondé e motibu pa kualke konklushon duná sino tambe bo ta yud’é pa e mes ta personalmente konvensí di e konklushon ei.—Mat. 17:24-26; Luk. 10:36, 37.
8. Kon nos por diserní loke tin den kurason di un studiante?
8 E método di siña ku nos publikashonnan ta usa ta esun di pregunta i kontesta. Sin duda lo no dura mashá ku e mayoria di hende ku bo ta studia Beibel kuné lo por usa e informashon den e paragrafnan korespondiente pa kontestá e preguntanan imprimí. Pero un maestro ku ke alkansá kurason di e studiante lo no keda satisfecho ku simplemente e kontesta korekto. Por ehèmpel, kisas un studiante por splika korektamente loke Beibel ta bisa tokante fornikashon òf inmoralidat. (1 Kor. 6:18) Sin embargo, preguntanan di punto di bista hasí ku takto por indiká kiko e studiante realmente ta pensa di loke e ta siñando. P’esei, e maestro lo por puntr’é: “Dikon Beibel ta kondená relashon seksual pafó di matrimonio? Kiko abo ta pensa di e restrikshon aki ku Dios a pone? Abo ta kere ku si nos biba segun e normanan moral di Dios, esaki ta benefisiá nos?” E studiante su kontesta riba e preguntanan ei por revelá loke tin den su kurason.—Lesa Mateo 16:13-17.
Siña Hende na un Manera Simpel
9. Kiko nos mester tene na mente ora nos ta kompartí informashon bíbliko?
9 Riba nan mes, mayoria dje bèrdatnan ku Dios su Palabra ta kontené ta relativamente simpel. Pero kisas, e personanan ku nos ta studia Beibel kuné a ser konfundí dor di doktrinanan di religion falsu. Nos papel komo maestro ta pa hasi Beibel fásil pa hende komprondé. Maestronan efikas ta transmití informashon na un manera simpel, kla i eksakto. Si nos ta sigui e prinsipio aki, nos lo no hasi e bèrdat mas kompliká ku ta nesesario. Evitá detayenan innesesario. No tin nodi di duna komentario riba tur aspekto di un teksto ku nos lesa. Simplemente enfoká riba e parti ku ta esensial pa klarifiká e punto ku nos konsiderá. Segun ku e studiante ta progresá, lo e bin komprondé bèrdatnan bíbliko mas profundo.—Heb. 5:13, 14.
10. Ki faktornan ta determiná kuantu informashon nos tin ku trata durante un estudio di Beibel?
10 Kuantu informashon nos mester trata durante un seshon di estudio? Nos mester tin disernimentu pa determiná esaki. Ounke abilidat i sirkunstansia di tantu e studiante komo e maestro ta varia, semper nos mester tene na mente ku nos meta komo maestro ta pa yuda nos studiante edifiká un fe sólido. Pues, nos tin ku dun’é sufisiente tempu pa lesa, komprondé i aseptá e bèrdatnan ku e Palabra di Dios ta presentá. Nos no ta konsiderá mas informashon ku e por kapta. Pero na e mesun tempu, nos mester kubri un kantidat di informashon ku ta rasonabel. Unabes nos studiante a komprondé un punto, nos ta sigui pa e siguiente.—Kol. 2:6, 7.
11. Ki lès nos por siña di e manera ku apòstel Pablo a siña hende?
11 Ora apòstel Pablo tabata papia ku hende resien interesá, e tabata transmití e mensahe di e bon nobo na un manera simpel. Ounke e tabata masha bon eduká, el a evitá di usa palabranan grandi i kompliká. (Lesa 1 Korintionan 2:1.) E simplesa di e bèrdat bíbliko ta atraé i satisfasé hende sinsero. Ningun hende no mester ta akadémiko pa komprondé e bèrdat.—Mat. 11:25; Echo. 4:13; 1 Kor. 1:26, 27.
Yuda Studiantenan Balorá Loke Nan Ta Siña
12, 13. Kiko lo por motivá un studiante pa aktua na armonia ku loke e ta siñando? Ilustrá.
12 Pa nos manera di duna siñansa ta efikas, e mester alkansá kurason di un studiante. E studiante tin ku komprondé kon e informashon ta apliká na dje personalmente, kon e ta benefisi’é i kon su bida lo mehorá si e sigui guia bíbliko.—Isa. 48:17, 18.
13 Por ehèmpel, kisas nos ta konsiderando Hebreonan 10:24 i 25. E tekstonan aki ta animá kristiannan pa reuní huntu ku nan kompañeronan di fe pa nan por risibí animashon basá riba Beibel i tambe disfrutá di asosiashon amoroso. Si un studiante no ta asistí ainda na e reunionnan di kongregashon, nos lo por duna un deskripshon breve di e manera ku nos reunionnan ta ser kondusí i di loke ta ser tratá. Nos lo por menshoná ku e reunionnan di kongregashon ta parti di nos adorashon i mustra ku nan ta benefisiá nos personalmente. Kaba, nos por invitá e studiante na e reunionnan. E mester sintié motivá pa reakshoná faborablemente riba Beibel su mandamentunan pasobra e ke obedesé Yehova i no pasobra e ke agradá e persona ku ta studia kuné.—Gal. 6:4, 5.
14, 15. (a) Kiko un studiante di Beibel por siña tokante Yehova? (b) Kon konosementu di Dios su personalidat por benefisiá un studiante di Beibel?
14 Un benefisio masha importante ku studiantenan ta saka ora nan ta studia Beibel i apliká su prinsipionan ta ku nan ta siña konosé Yehova i stim’é komo un persona. (Isa. 42:8) E no ta solamente un Tata amoroso i e Kreadó i Doño di e universo, sino tambe e ta revelá su personalidat i abilidatnan na hende ku ta stim’é i sirbié. (Lesa Eksodo 34:6 i 7.) Ora Moisés tabata bai guia e nashon di Israel pa saka nan for di koutiverio na Egipto, Yehova a identifiká su mes ku e ekspreshon: “Lo mi resultá di ta loke lo mi resultá di ta.” (Eks. 3:13-15, NW) Esaki a indiká ku Yehova lo a bira loke sea ta nesesario pa kumpli ku su propósito relashoná ku su pueblo skohí. P’esei, e israelitanan a siña konosé Yehova komo Salbadó, Guerero, Perkuradó, Kumplidó di promesa i tambe den otro ròlnan.—Eks. 15:2, 3; 16:2-5; Jos. 23:14.
15 Podisé nos studiantenan lo no eksperensiá ku Yehova ta yuda nan di un forma asina dramátiko manera tabata e kaso ku Moisés. Sin embargo, segun ku nos studiantenan su fe i apresio pa loke nan ta siña ta oumentá i nan ta kuminsá pone esei na práktika, sin duda nan lo mira e nesesidat di dependé riba Yehova pa nan por haña kurashi, sabiduria i guia. Miéntras nan ta hasi esei, nan tambe lo siña konosé Yehova komo un Konsehero sabí i konfiabel, komo Protektor i un Perkuradó generoso ku ta satisfasé tur nan nesesidatnan.—Sal. 55:22; 63:7; Pro. 3:5, 6.
Mustra Interes Amoroso
16. Dikon abilidat natural no ta e faktor di mas importante pa nos por ta un maestro efikas?
16 Si bo ta sinti ku bo no ta ábil den duna siñansa manera lo bo tabata ke, no desanimá. Yehova i Hesus ta supervisá e programa di edukashon ku ta ser ehekutá rònt mundu awe. (Echo. 1:7, 8; Rev. 14:6) Nan por bendishoná nos esfuersonan pa nos palabranan por tin e efekto deseá riba hende sinsero. (Juan 6:44) Un maestro su amor sinsero pa su studiante por kompensá kualke falta di abilidat natural ku e por tin. Apòstel Pablo a mustra ku el a komprondé e importansia di stima hende ku e tabata siña.—Lesa 1 Tesalonisensenan 2:7 i 8.
17. Kon nos por mustra interes amoroso den kada studiante di Beibel?
17 Di mes manera, nos por mustra interes sinsero den kada studiante di Beibel dor di tuma tempu pa siña konos’é. Segun ku nos ta studia prinsipionan bíbliko kuné, tin hopi chèns ku nos ta haña sa den ki kondishon e ta. Podisé nos ta ripará ku e ta bibando kaba na armonia ku algun di e kosnan ku el a siña for di Beibel. Kisas den otro áreanan e tin ku hasi kambio ainda. Dor di yuda e studiante mira kon e informashon presentá durante e seshonnan di estudio di Beibel ta apliká na dje personalmente, nos por yud’é na un manera amoroso pa bira un berdadero disipel di Kristu.
18. Dikon ta importante pa nos hasi orashon ku nos studiante i pidi p’e den e orashon?
18 Mas importante ku tur otro kos, nos por hasi orashon ku nos studiante i pidi p’e den e orashon. E studiante mester komprondé bon kla ku nos meta ta pa yud’é siña konosé su Kreadó mas íntimamente, hala mas serka Dje i benefisiá di Su guia. (Lesa Salmo 25:4 i 5.) Ora nos ta pidi Yehova bendishoná un studiante su esfuersonan pa apliká loke e ta siñando, e studiante lo mira e importansia di bira un ‘kumplidó di e palabra.’ (Sant. 1:22) Anto segun ku e studiante ta skucha nos orashonnan sinsero, e tambe lo siña kon pa hasi orashon. Ta realmente un goso pa yuda studiantenan di Beibel kultivá nan propio relashon ku Yehova!
19. Kiko nos lo trata den e siguiente artíkulo?
19 Ta un animashon pa sa ku tin mas ku seis mion i mei Testigu rònt mundu ta desaroyando e “arte di siña.” Nan ta hasi esaki ku e meta pa yuda hende sinsero kumpli ku tur loke Hesus a manda. Kiko ta e resultadonan di nos aktividat di prediká? Den e siguiente artíkulo nos lo trata e kontesta riba e pregunta aki.
Bo Ta Kòrda?
• Dikon kristiannan tin ku desaroyá e “arte di siña”?
• Kua métodonan nos por usa pa hasi nos manera di siña hende mas efikas?
• Kiko por kompensá kualke falta di abilidat natural pa siña hende ku nos por tin?
[Preguntanan di Estudio]
[Plachi na página 16]
Bo ta inskribí den e Skol di Ministerio Teokrátiko?
[Plachi na página 17]
Dikon ta importante pa nos pidi nos studiante pa lesa for di Beibel?
[Plachi na página 19]
Hasi orashon ku bo studiante i pidi p’e den e orashon