Personanan Ku “e Disposishon Korekto” Ta Reakshoná Faborablemente

“Tur esnan ku tabatin e disposishon korekto pa bida eterno a bira kreyente.”—ECHO. 13:48, NW.

1, 2. Kon e promé kristiannan a reakshoná riba e profesia di Hesus ku a mustra ku e bon nobo lo a ser prediká den henter e tera habitá?

E BUKI bíbliko Echonan ta kontené e relato emoshonante di e manera ku e promé kristiannan a reakshoná riba e profesia di Hesus ku a mustra ku e evangelio òf bon nobo di Reino lo a ser prediká den henter e tera habitá. (Mat. 24:14) E predikadónan entusiasmá aki a pone un ehèmpel pa tur esnan ku lo a sigui nan. Komo resultado di e testimonio ferviente di Hesus su disipelnan den Yerusalèm, míles di hende, inkluso “un kantidat grandi di e saserdotenan” a djòin e kongregashon di promé siglo.—Echo. 2:41; 4:4; 6:7.

² Misioneronan den promé siglo a yuda hopi hende mas aseptá kristianismo. Felipe, por ehèmpel, a bai Samaria kaminda multitutnan a presta atenshon na su palabranan. (Echo. 8:5-8) Pablo a biaha bai hopi lugá huntu ku vários kompañero, predikando e mensahe kristian na Chipre, algun parti di Asia Menor, Masedonia, Gresia i Italia. Den e statnan kaminda el a prediká, multitut di hende tantu hudiu komo griego a bira kristian. (Echo. 14:1; 16:5; 17:4) Tito a kumpli ku su ministerio na Kreta. (Tito 1:5) Pedro tabata okupá na Babilonia i, pa e tempu ku el a skirbi su promé karta, rònt di aña 62 pa 64 di nos era, e aktividat di e kristiannan tabata bon konosí na Ponto, Galasia, Kapadosia, Asia i Bitinia. (1 Ped. 1:1; 5:13) Esta un tempu emoshonante eseinan tabata! E predikadónan di e promé siglo tabatin un entusiasmo asina grandi ku nan enemigunan a bisa ku nan “a pone mundu aribabou.”—Echo. 17:6; 28:22.

3. Ki resultadonan proklamadónan di Reino ta logrando awe den nan trabou di prediká, i kon esei ta laga bo sinti?

³ Den nos tempu tambe, e kongregashon kristian ta ser bendishoná ku un oumento remarkabel. Bo no ta sinti bo animá ora bo lesa e rapòrt anual di Testigunan di Yehova i ta mira e resultadonan ku ta ser lográ mundialmente? Bo no ta kontentu pa haña sa ku proklamadónan di Reino a kondusí mas ku seis mion estudio di Beibel durante e aña di sirbishi 2007? Ademas, e asistensia aña pasá na e Memorial di e morto di Hesukristu ta indiká ku tin mas o ménos 10 mion hende, ku no ta Testigu di Yehova, ku tabata sufisientemente interesá den e bon nobo pa asistí na e konmemorashon importante aki. Esaki ta indiká ku ainda tin hopi trabou pa hasi.

4. Ken ta reakshoná faborablemente na e mensahe di Reino?

⁴ Awe, meskos ku den promé siglo, “tur esnan ku [tin] e disposishon korekto pa bida eterno” ta reakshoná faborablemente riba e mensahe di e bèrdat. (Echo. 13:48, NW) Yehova ta atraé e hendenan ei  na su organisashon. (Lesa Hageo 2:7.) Ki aktitut nos mester tin pa ku e ministerio kristian pa nos por koperá plenamente ku e trabou di rekohementu aki?

Prediká sin Hasi Distinshon di Persona

5. Ki klase di hende tin Yehova su aprobashon?

⁵ E kristiannan di promé siglo a komprondé ku “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.” (Echo. 10:34, 35) Un persona ku ke tin un bon relashon ku Yehova mester ehersé fe den e sakrifisio di reskate di Hesus. (Juan 3:16, 36) I Yehova su boluntat ta pa “tur [“klase di,” NW] hende wòrdu salbá i yega na konosementu di e bèrdat.”—1 Tim. 2:3, 4.

6. Kiko predikadónan di Reino no tin ku hasi, i dikon?

⁶ Proklamadónan di e bon nobo no mester husga hende a base di nan rasa, posishon sosial, aparensia, religion òf kualke otro karakterístika. Pensa un ratu: Bo no ta kontentu ku e persona ku a papia ku bo e promé bes tokante bèrdatnan bíbliko no tabatin prehuisio? Pues anto, pakiko vasilá pa kompartí e mensahe, ku lo por salba bida, ku kualke hende ku ke skuch’é?—Lesa Mateo 7:12.

7. Dikon nos no mester husga hende ku nos ta prediká na dje?

⁷ Ta Hesus Yehova a nombra komo Hues; p’esei, nos no tin derecho di husga ningun hende. Esei ta bon tambe, pasobra—distinto for di Hesus—nos por husga solamente a base di “loke [nos] wowo ta mira” òf a base di “loke [nos] orea ta tende.” Pero Hesus por lesa e pensamentu- i rasonamentunan di mas íntimo di un hende su kurason.—Isa. 11:1-5; 2 Tim. 4:1.

8, 9. (a) Ki klase di hende Saulo tabata promé ku el a bira un kristian? (b) Kiko nos mester siña for di e eksperensia di apòstel Pablo?

⁸ Tin hende di kasi tur background ku a bira Testigu di Yehova. Un ehèmpel sobresaliente di esaki ta Saulo di Tarso, kende despues a bira konosí komo apòstel Pablo. Saulo, un fariseo, tabata un oponente kruel di e kristiannan. El a persiguí e kongregashon kristian pasobra e tabata sinseramente konvensí ku nan no tabata e berdadero adoradónan di Dios. (Gal. 1:13) Desde un punto di bista humano, lo a parse ku é lo tabata e último persona ku por a bira un kristian. Pero, Hesus a mira algu bon den Saulo su kurason i a skoh’é pa kumpli ku un asignashon spesial. I komo resultado di esei, Saulo a bira un di e miembronan di mas aktivo i entusiasmá di e kongregashon kristian di promé siglo.

⁹ Kiko e eksperensia di apòstel Pablo ta siña nos? Den nos teritorio, kisas tin gruponan di hende ku ta parse di ta kontra di nos mensahe. Ounke no ta parse masha probabel ku kualke un di nan lo por bira kristian berdadero un dia, nos mester sigui purba rasoná ku nan. Tin biaha asta e personanan ku nos no ta ferwagt ku nan lo ta interesá, ta skucha. Nos asignashon ta pa sigui prediká na tur hende [“sin stòp,” NW].—Lesa Echonan 5:42.

Bendishon Ta Spera Esnan Ku Ta Prediká “sin Stòp”

10. Dikon nos no mester vasilá pa prediká na hende ku ta parse intimidante? Relatá un eksperensia lokal.

¹⁰ Aparensia por gaña hende. Ignacio, * por ehèmpel, a kuminsá studia Beibel ku Testigunan di Yehova miéntras e tabata den prizon na un pais den Suramérika. Hende tabatin miedu di dje debí na su karakter violento. P’esei e prizoneronan, ku tabata traha kos i bende esakinan ku nan kompañeronan den prizon, tabata usa Ignacio pa kobra esnan ku tabata tarda pa paga nan debenan. Sin embargo, segun ku Ignacio tabata progresá spiritualmente i apliká loke e tabata siña, e persona ku un tempu tabata un abusadó violento a bira un persona bondadoso. Ounke niun hende no ta usa Ignacio mas pa kobra debe, e ta kontentu ku e bèrdatnan di Beibel i Dios su spiritu a kambia su personalidat. E ta kontentu tambe ku e publikadónan di Reino ku  a hasi esfuerso pa studia kuné no a hasi distinshon di persona.

11. Dikon nos ta sigui bishitá hende?

¹¹ Un di e motibunan pakiko nos ta sigui bishitá hende ku nos a yega di papia kuné kaba tokante e bon nobo ta pasobra nan aktitut i sirkunstansianan por i ta kambia. Desde nos último bishita, kisas algun hende a haña nan ku malesa grave, pèrdida di trabou òf morto di un ser kerí. (Ekl. 9:11, NW) Kisas susesonan di mundu ta motivá hende pa pensa seriamente riba nan futuro. E desaroyonan ei por pone un persona ku anteriormente tabata indiferente—asta kontra—reakshoná faborablemente. P’esei nos no mester vasilá pa kompartí e bon nobo ku otro hende na kualke okashon apropiá ku presentá.

12. Kon nos mester mira hende ku nos ta prediká na dje, i dikon?

¹² Ta parse ku hende tin e tendensia di kategorisá i husga otro. Sin embargo, Yehova ta wak kada persona individualmente. E ta mira e bon kualidatnan di kada un di nan. (Lesa 1 Samuel 16:7.) I nos tin ku hasi esfuerso pa hasi meskos den nos ministerio. Hopi eksperensia ta mustra e bon resultadonan ku nos ta logra debí ku nos tin un punto di bista positivo di tur hende ku nos ta prediká na dje.

13, 14. (a) Dikon un pionero no a mustra muchu interes den un hende muhé ku el a topa den sirbishi? (b) Kiko nos por siña for di e eksperensia aki?

¹³ Sandra, un ruman muhé pionero, tabata trahando den sirbishi di kas pa kas riba un isla den Caribe ora el a topa ku Ruth, kende tabata masha enbolbí den selebrashonnan di karnaval. Ruth a sali reina di karnaval di e isla dos bes. El a mustra interes sinsero den loke Sandra tabata bisa, pues nan a hasi areglo pa un estudio di Beibel. Sandra ta kòrda: “Ora mi a drenta su sala, mi a topa mi ku un potrèt grandi di Ruth den pleno trahe di karnaval i tambe e trofeonan ku el a gana. Eróneamente mi a pensa ku un persona asina popular i asina enbolbí den aktividatnan di karnaval lo no por tin interes den e bèrdat. Pues mi a stòp di bai serka dje.”

¹⁴ Algun tempu despues, Ruth a presentá na Salòn di Reino i ora e reunion a kaba, el a puntra Sandra: “Dikon bo no ta bin studia ku mi mas?” Sandra a diskulpá su mes i a hasi areglo pa sigui ku e estudio. Ruth a progresá masha lihé, el a kita su potrètnan di karnaval for di muraya, a kuminsá partisipá den tur e aktividatnan di kongregashon i a dediká su bida na Yehova. Ta klaru ku Sandra a rekonosé despues ku e manera ku el a reakshoná na prinsipio tabata robes.

15, 16. (a) Kiko tabata e resultado ora un publikadó a duna testimonio na un famia? (b) Dikon nos no mester laga e background di un famia stroba nos di dun’é testimonio?

¹⁵ Hopi publikadó ku a duna testimonio na miembronan di famia no-kreyente tambe a haña bon resultado, asta ora no a parse probabel ku e famianan aki lo a reakshoná faborablemente. Tuma por ehèmpel, e kaso di Joyce, un ruman muhé kristian na Merka. For di tempu ku su sua tabata tiner, e tabata drenta prizon i sali vários bes. Joyce a konta: “Hende tabata bisa ku e no ta sirbi pa nada, pasobra e tabata dil den droga, e tabata un ladron i tabata hasi hopi otro kos malu. Asina mes, ounke e situashon a parse imposibel, mi a sigui papia kuné tokante e bèrdatnan di Beibel pa 37 aña largu.” Joyce su esfuersonan i pasenshi pa yuda su famia a ser rikamente rekompensá ora ku finalmente su sua a kuminsá studia Beibel ku Testigunan di Yehova i a hasi kambionan drástiko den su bida. Resientemente, na edat di 50 aña, Joyce su sua a batisá na un kongreso di distrito na California, Merka. Joyce a bisa: “Mi a yora di alegria. Mi ta masha kontentu ku nunka mi no a entregá i legumai e!”

¹⁶ Podisé bo ta vasilá pa papia ku sierto di bo famianan tokante e bèrdatnan di Beibel debí na nan background. Pero, Joyce no a laga esei strob’é di papia ku su sua. Al fin al kabo, nos no sa kiko tin den un hende su kurason, no ta bèrdat? Kisas e persona ei ta buskando e religion berdadero sinseramente. P’esei, no vasilá pa dun’é e oportunidat pa hañ’é.—Lesa Proverbionan 3:27.

 Un Bon Buki pa Studia Beibel

17, 18. (a) Kiko informenan rònt mundu ta indiká tokante e balor di e buki Kiko Beibel Ta Siña Realmente? (b) Ki eksperensianan positivo bo tabatin usando e buki aki?

¹⁷ Informenan di paisnan rònt mundu ta mustra ku hopi hende sinsero ta reakshonando faborablemente riba e buki Kiko Beibel Ta Siña Realmente? Penni, un ruman muhé pionero na Merka, a kuminsá vários estudio di Beibel usando e buki aki. Dos di nan tabata ku hende di edat ku tabata miembro deboto di nan iglesia. Penni no tabata sa sigur kon nan lo a reakshoná riba e bèrdatnan bíbliko ku e buki Beibel Ta Siña ta presentá. Sin embargo, el a skirbi: “Debí n’e manera kla, lógiko i al kaso ku e buki ta presentá e informashon, tabata fásil pa nan aseptá loke nan tabata siña komo e bèrdat, sin diskutí òf sinti nan perturbá emoshonalmente.”

¹⁸ Pat, un publikadó na Gran Bretaña, a kuminsá un estudio di Beibel ku un señora ku tabata un refugiado for di un pais asiátiko. E señora a hañ’é obligá ta hui despues ku sòldánan rebelde a bai ku su kasá i dos yunan, i e no a mira nan nunka mas. E rebeldenan a menasá di mat’é, nan a kima su kas i un tras di otro nan a viol’é. Tur esaki a pon’é pensa ku su bida no tabatin propósito mas, i vários bes el a pensa di kometé suisidio. Sin embargo, e estudio di Beibel a dun’é speransa. Pat a skirbi: “E splikashon- i ilustrashonnan simpel den e buki Beibel Ta Siña a hasi un gran impakto riba dje.” E studiante a progresá rápidamente, a kualifiká pa bira publikadó no-batisá i a ekspresá su deseo pa batisá na e siguiente asamblea. Ta un gran goso pa yuda hende sinsero komprondé i apresiá e speransa ku e Skritura ta ofresé.

“No Laga Nos Kansa di Hasi Bon”

19. Dikon e trabou di prediká ta asina urgente?

¹⁹ Kada dia ku pasa, ta bira mas urgente pa nos kumpli ku nos asignashon di prediká i di hasi disipel. Tur aña míles di hende ku e disposishon korekto ta reakshoná faborablemente riba nos trabou di prediká. Sin embargo, “e gran dia di SEÑOR ta serka,” i esei ta nifiká ku esnan ku keda den skuridat spiritual “ta kore peliger di wòrdu matá.”—Sof. 1:14; Pro. 24:11.

20. Kiko nos kada un mester ta determiná pa hasi?

²⁰ Ainda nos por yuda e hendenan ei. Pero pa nos hasi esei ta masha importante pa nos imitá e kristiannan di promé siglo, kendenan “a sigui sin stòp siñando i deklarando e bon nobo tokante e Kristu Hesus.” (Echo. 5:42, NW) Sigui nan ehèmpel dor di perseverá apesar di kontratempu, dor di paga tinu na bo “arte di siña” i dor di prediká na tur hende sin hasi distinshon! “No laga nos kansa di hasi bon,” pasobra si nos perseverá, nos lo kosecha abundansia di bendishon ku Yehova su aprobashon ta trese kuné.—2 Tim. 4:2, NW; lesa Galationan 6:9.

[Nota]

Kon Lo Bo Kontestá?

• Ken ta reakshoná faborablemente na e bon nobo?

• Dikon nos tin ku evitá di husga hende ku nos ta prediká na dje?

• Ki resultado publikadónan ta logrando ku e buki Kiko Beibel Ta Siña Realmente?

[Preguntanan di Estudio]

[Plachi na página 20]

Míles di hende sinsero ta reakshoná faborablemente

[Plachi na página ]

Kiko nos por siña di e kambionan ku apòstel Pablo a hasi?

[Plachi na página 23]

Proklamadónan di e bon nobo no tin prehuisio