Sigui “Paga Atenshon na e Ministerio Ku Bo A Risibí den Señor”

“Paga atenshon na e ministerio ku bo a risibí den Señor, pa bo kumpli kuné.”—KOL. 4:17.

1, 2. Ki responsabilidat kristiannan tin pa ku humanidat?

NOS tin un responsabilidat serio pa ku e hendenan ku ta biba rònt di nos. Desishonnan ku nan ta tuma awor por nifiká bida òf morto pa nan durante ‘e tribulashon grandi.’ (Rev. 7:14) E eskritor inspirá di e buki Proverbionan a bisa: “Libra esnan ku ta wòrdu hibá na morto, i salba esnan ku ta kore peliger di wòrdu matá.” Eseinan realmente ta palabranan ku hopi nifikashon! Si nos no asumí nos responsabilidat i spièrta e hendenan ku nan tin oportunidat di skohe, esaki por resultá den kulpa di sanger. De echo, e mesun versíkulo ta sigui bisa: “Si bo bisa: ‘Mira, nos no tabata sa esaki,’ esun ku ta pisa kurason no ta ripará esei? Esun ku ta warda bo alma no sa esei? I e lo no paga hende segun nan obranan?” Ta klaru anto ku sirbidónan di Yehova no por bisa ku nan ‘no sa’ di e peliger ku e hendenan ei ta kore.—Pro. 24:11, 12.

² Bida tin hopi balor pa Yehova. P’esei e ta urgí su sirbidónan pa hasi tur esfuerso ku nan por pa yuda salba bida di mas tantu hende posibel. Tur minister di Dios tin ku proklamá e mensahe salbadó di bida ku e Palabra di Dios ta kontené. Nos tin e mesun asignashon ku un vigilante òf guardia ku ta bati alarma ora e ta mira peliger ta aserkando. Nos no ke pa sanger di esnan ku ta kore peliger di pèrdè nan bida bin riba nos kabes. (Eze. 33:1-7) P’esei, ta masha importante pa nos sigui hasi esfuerso pa “prediká e palabra”!—Lesa 2 Timoteo 4:1, 2 i 5.

3. Kua tópikonan nos lo trata den e artíkulo aki i den e dosnan siguiente?

³ E artíkulo aki lo konsiderá kon bo por vense opstákulonan den bo ministerio salbadó di bida i kon lo bo por yuda un kantidat mas grandi di hende. E siguiente artíkulo lo analisá kon bo por kultivá e arte di siña hende bèrdatnan masha importante. Anto e di tres artíkulo di estudio lo informá nos di algun resultado animador ku proklamadónan di Reino rònt mundu ta logrando. Sin embargo, promé ku nos trata e tópikonan aki, lo ta bon pa nos djis repasá e motibunan pakiko nos tempu ta asina trabahoso.

Dikon Hopi Hende Ta sin Speransa?

4, 5. Kiko humanidat ta eksperensiando, i kon hopi hende ta reakshoná?

⁴ Susesonan mundial ta indiká ku nos ta bibando den e “konklushon dje sistema di kosnan” i ku e fin ta masha serka. Humanidat ta eksperensiando e suseso- i kondishonnan ku Hesus i su disipelnan a indiká komo e señal di “e último dianan.” E “dolónan di parto” manera guera, skarsedat di kuminda, temblor i otro kalamidatnan ta afligí humanidat. Tur kaminda tin maldat, egoismo i hende ku ta desafiá Dios. Asta pa hende ku ta hasi esfuerso pa biba na armonia ku normanan bíbliko, esakinan ta “tempunan trabahoso.”—Mat. 24:3 [NW], 6-8, 12; 2 Tim. 3:1-5.

⁵ Sin embargo, e gran mayoria di humanidat no ta konsiente di e berdadero nifikashon di e susesonan di mundu. Esei ta pone ku  hopi di nan ta preokupá ku nan propio siguridat i esun di nan famianan. E pèrdida di sernan kerí ku a muri òf otro tragedianan personal ta kousa hopi hende doló. E hendenan aki ta sin speransa pasobra nan no tin konosementu eksakto di e motibu pakiko e kosnan ei ta pasa, ni nan no sa unda pa haña solushon.—Efe. 2:12.

6. Dikon ‘Babilonia e Grandi’ no por yuda su siguidónan?

⁶ ‘Babilonia e Grandi,’ e imperio mundial di religion falsu, a duna humanidat masha poko konsuelo. Al kontrario, mediante “e biña di su inmoralidat,” el a pone multitutnan tambaleá i a konfundí nan spiritualmente. Ademas, dor di aktua manera un prostituta, religion falsu a sedusí i dominá “e reinan di tera,” usando doktrinanan falsu i práktikanan spiritista pa mantené mayor parti di humanidat den un sumishon pasivo na nan gobièrnunan. Asina religion falsu a haña poder i influensia pero, na mesun tempu, el a rechasá bèrdat religioso.—Rev. 17:1, 2, 5; 18:23.

7. Kiko ta spera mayor parti di humanidat, pero kon algun di nan por ser yudá?

⁷ Hesus a siña hende ku e mayor parti di humanidat ta riba e kaminda hanchu ku ta hiba na destrukshon. (Mat. 7:13, 14) Tin hende ku ta riba e kaminda hanchu ei pasobra deliberadamente nan a skohe pa rechasá loke Beibel ta siña. Pero tin hopi otro hende riba e kaminda aki pasobra nan a ser engañá òf tení den skuridat sin ku nan a ser siñá loke Yehova realmente ta rekerí di nan. Podisé tin algun di nan ku lo kambia nan estilo di bida si nan haña motibunan bíbliko ku ta mustra nan bon kla pakiko hasi esei. Pero esnan ku keda den Babilonia e Grandi i ku ta sigui rechasá normanan bíbliko lo no ser salbá durante ‘e tribulashon grandi.’—Rev. 7:14.

Sigui Prediká “sin Stòp”

8, 9. Kon e kristiannan di promé siglo a reakshoná ora nan a haña nan ku oposishon, i dikon?

⁸ Hesus a bisa ku su disipelnan lo prediká e bon nobo di Reino i hasi disipel. (Mat. 28:19, 20) P’esei, kristiannan berdadero semper a konsiderá partisipashon den e trabou di prediká komo un asuntu di lealtat na Dios i un rekisito fundamental pa demostrá nan fe. Pa e motibu ei, Hesus su promé disipelnan a perseverá apesar di oposishon. Nan a dependé riba Yehova pa fortalesa i a hasi orashon pidié yuda nan sigui “papia [su] palabra ku tur konfiansa.” Komo kontesta, Yehova a yena nan ku spiritu santu, i ku tur frankesa òf kurashi nan a sigui prediká e palabra di Dios.—Echo. 4:18, 29, 31.

⁹ Hesus su siguidónan a vasilá den nan determinashon pa prediká e bon nobo ora nan oponentenan a bira violento? Di ningun manera. Molestiá debí n’e predikashon di e apòstelnan, lidernan religioso hudiu a arestá  e apòstelnan, menasá nan i suta nan. Apesar di esei, e apòstelnan a “sigui sin stòp siñando i deklarando e bon nobo tokante e Kristu Hesus.” Nan a komprondé bon kla ku nan mester a “obedesé Dios mas ku hende.”—Echo. 5:28, 29, 40, 41; 42 [NW].

10. Ki pruebanan kristiannan ta konfrontá awe, pero kiko lo por ta e resultado di nan kondukta ekselente?

¹⁰ Mayoria di sirbidó di Dios awe no tin ku soportá sota òf kastigu di prizon pa motibu di nan aktividatnan di prediká. Sin embargo, tur kristian berdadero ta konfrontá un òf otro tèst i prueba. Por ehèmpel, kisas bo konsenshi entrená bíblikamente ta impulsá bo pa komportá bo mes na un manera impopular òf ku ta laga bo mustra diferente. Bo kolega-, kompañeronan di skol òf bo bisiñanan por haña ku bo ta straño djis pasobra bo ta basa bo desishonnan riba prinsipionan bíbliko. Pero no laga nan reakshon negativo stroba bo. Ounke e mundu ta den skuridat spiritual, kristiannan tin ku ‘bria manera lus.’ (Fil. 2:15) Kisas algun opservadó sinsero lo por duna gloria na Yehova debí ku nan a mira i apresiá bo bon obranan.—Lesa Mateo 5:16.

11. (a) Kon algun hende lo por reakshoná riba e trabou di prediká? (b) Ki klase di oposishon apòstel Pablo a konfrontá, i kon el a reakshoná riba esaki?

¹¹ Nos mester tin kurashi pa nos por sigui prediká e mensahe di Reino. Algun hende, asta famianan, kisas ta tene mofa di bo òf ta purba den vários otro manera pa desanimá bo. (Mat. 10:36) Mas ku un biaha nan a suta apòstel Pablo pasobra e tabata kumpli ku su ministerio fielmente. Tuma nota kon el a reakshoná na oposishon asina: “Despues ku nos a sufri promé i tabata tratá insolentemente,” el a skirbi: “Nos a tuma un kurashi mediante nos Dios pa papia e bon nobo di Dios ku boso ku hopi lucha.” (1 Tes. 2:2, NW) Sin duda tabata un desafio pa Pablo por a sigui deklará e bon nobo despues ku nan a kaptur’é, sker su paña kita for di su kurpa, sut’é ku bara i bent’é den prizon. (Echo. 16:19-24) Kiko a dun’é e kurashi pa sigui? Su deseo ferviente pa kumpli ku e asignashon ku Dios a dun’é.—1 Kor. 9:16.

12, 13. Ki desafionan algun ruman ta konfrontá, i kon nan por vense nan?

¹² Pa nos tambe lo por ta un desafio pa mantené nos entusiasmo den e teritorionan kaminda masha poko biaha nos ta haña hende na kas òf kaminda masha poko hende ta reakshoná faborablemente riba e mensahe di Reino. Kiko nos por hasi den e situashonnan ei? Podisé ta nesesario pa nos tuma kurashi i hasi mas esfuerso pa duna testimonio informal. Ademas, kisas nos tin ku ahustá nos orario òf hasi mas esfuerso pa prediká den áreanan kaminda nos por haña mas hende.—Kompará ku Juan 4:7-15; Echonan 16:13; 17:17.

¹³ Otro difikultatnan ku hopi ruman tin ku lucha kuné ta behes i problema ku salú. Esakinan por limitá loke e rumannan aki rasonablemente por hasi den e trabou di prediká. Si esei ta bo kaso, no desanimá. Yehova ta bon konsiente di bo limitashon i e ta keda kontentu ku loke bo por hasi. (Lesa 2 Korintionan 8:12.) Sin importá e problema ku bo ta konfrontando—sea ta oposishon, apatia òf problema ku salú—hasi tur loke bo sirkunstansia ta permití bo pa kompartí e bon nobo ku otro hende.—Pro. 3:27; kompará ku Marko 12:41-44.

‘Sigui Paga Atenshon na Bo Ministerio’

14. Ki ehèmpel apòstel Pablo a pone pa su kompañeronan kristian, i ki konseho el a duna?

¹⁴ Apòstel Pablo a tuma su ministerio masha na serio, i el a animá su kompañeronan di fe pa hasi meskos. (Echo. 20:20, 21; 1 Kor. 11:1) Un persona ku Pablo a skohe pa duna animashon spesial tabata un kristian di promé siglo ku yama Arkipo. Den su karta na e kolosensenan, Pablo a skirbi: “Bisa Arkipo: ‘Paga atenshon na e ministerio ku bo a risibí den Señor, pa bo kumpli kuné.’” (Kol. 4:17) Nos no sa ken Arkipo tabata ni den ki sirkunstansia e tabata, pero evidentemente el a risibí òf aseptá un ministerio òf su asignashon pa  prediká. Si bo ta un kristian dediká, bo tambe a aseptá un ministerio. Bo ta sigui paga atenshon na e ministerio pa bo kumpli kuné?

15. Kiko dedikashon kristian ta enserá, i esaki ta hiba na kua preguntanan?

¹⁵ Mediante orashon sinsero, nos a dediká nos bida na Yehova promé ku nos a batisá. Esaki a nifiká ku nos tabata determiná pa hasi su boluntat. P’esei, ta bon pa nos puntra nos mes awor: ‘Hasimentu di e boluntat di Dios ta realmente e kos di mas importante den mi bida?’ Kisas nos tin vários responsabilidat—manera perkurá pa nos famia—ku Yehova ta ferwagt ku nos ta kumpli kuné. (1 Tim. 5:8) Pero kon nos ta usa e restu di nos tempu i energia? Kiko tin prioridat den nos bida?—Lesa 2 Korintionan 5:14 i 15.

16, 17. Ki posibilidatnan hóbennan kristian òf esnan ku tin relativamente poko responsabilidat lo por pensa riba dje?

¹⁶ Bo ta un hóben kristian di mas o ménos 18 aña ku a kaba skol òf ku ta serka di kaba skol? Probablemente, bo no tin responsabilidatnan pisá di famia ainda. Pues, kiko bo ta plania pa hasi ku bo bida? Kua desishonnan lo yuda bo kumpli mihó ku bo promesa pa hasi Yehova su boluntat? Hopi hóben a organisá nan asuntunan pa nan por traha pionero i nan a kosechá masha goso i satisfakshon komo resultado di esei.—Sal. 110:3; Ekl. 12:1.

¹⁷ Podisé bo ta un adulto hóben. Bo tin un trabou fultaim pero bo no tin masha responsabilidat i ta pa bo so bo tin ku perkurá. Sin duda bo ta gusta partisipá den e aktividatnan di kongregashon te na e grado ku bo programa ta permití. Lo bo por oumentá bo goso mas ainda? Bo a yega di pensa pa ekspandé bo ministerio? (Sal. 34:8; Pro. 10:22) Den algun teritorio, ainda tin hopi trabou pa hasi pa asina alkansá tur hende ku e mensahe di e bèrdat ku ta duna bida. Lo bo por hasi kambionan den bo bida, kisas pa bo bai sirbi den un área kaminda tin mas nesesidat di proklamadónan di Reino?—Lesa 1 Timoteo 6:6-8.

18. Ki ahustenan un pareha hóben a hasi i kiko tabata e resultadonan?

¹⁸ Konsiderá e ehèmpel di Kevin ku Elena di Merka. * Manera tabata usual pa parehanan hóben resien kasá, nan tambe a sinti ku nan mester a kumpra un kas. Nan tur dos tabata traha fultaim i nan por a hiba un estilo di bida kómodo. Sin embargo, nan orario di trabou i nan trabounan di kas a laga nan ku masha  poko tempu pa bai den sirbishi di vèlt. Nan a realisá ku nan tabata dediká kasi tur nan tempu i energia na nan poseshonnan material. Pero ora nan a opservá e estilo di bida simpel di un pareha pionero felis, Kevin ku Elena a disidí di pone otro prioridat den nan bida. Despues ku nan a buska Yehova su guia mediante orashon, nan a bende nan kas i a bai biba den un apartamento. Elena a redusí su oranan di trabou i a kuminsá traha pionero. Elena su eksperensianan den sirbishi a animá Kevin i e tambe a stòp di traha fultaim i a kuminsá traha pionero. Algun tempu despues nan a muda bai un pais na Suramérika pa sirbi kaminda tabatin mas nesesidat di predikadó di Reino. Kevin a bisa: “Semper nos tabatin un matrimonio felis, pero ora nos a traha pa logra metanan spiritual, nos a bira mas felis i a haña mas satisfakshon den bida.”—Lesa Mateo 6:19-22.

19, 20. Dikon e predikashon di e bon nobo ta e trabou di mas importante awe?

¹⁹ E trabou di prediká ta e trabou di mas importante ku ta wòrdu hasí awe riba tera. (Rev. 14:6, 7) E ta kontribuí na e santifikashon di e nòmber di Yehova. (Mat. 6:9) Beibel su mensahe ta mehorá bida di míles di hende ku ta asept’é tur aña, i esaki por hiba na nan salbashon. Pero, apòstel Pablo a puntra: “Kon nan lo tende sin un predikadó?” (Rom. 10:14, 15) Esei lo ta difísil, no ta bèrdat? P’esei anto, sea determiná pa hasi tur loke ta na bo alkanse pa kumpli ku bo ministerio.

²⁰ Un otro manera ku bo por yuda hende komprondé e importansia di e tempunan trabahoso aki i e konsekuensianan di e desishonnan ku nan ta tuma ta di mehorá bo abilidat di siña hende. E siguiente artíkulo lo mustra kon bo por hasi esaki.

[Nota]

Kon Lo Bo Kontestá?

• Ki responsabilidat kristiannan tin pa ku humanidat?

• Kon nos mester trata ku opstákulonan den nos trabou di prediká?

• Kon nos por kumpli ku e ministerio ku nos a aseptá?

[Preguntanan di Estudio]

[Plachi na página 12]

Nos mester tin kurashi pa prediká apesar di oposishon

[Plachi na página 14]

Kiko bo por hasi si bo ta prediká den teritorionan kaminda masha poko biaha bo ta haña hende na kas?