Un Petishon Ku Hende Ta Hasi Rònt Mundu

IMAGINÁ bo e situashon aki: Tin sentenáres di miónes di hende, asta míles di miónes di hende i tur ta pidiendo pa e mesun kos. Nan ta pidi e outoridat di mas haltu den universo pa kumpli ku un petishon spesífiko. Sin embargo, ta masha poko di nan sa eksaktamente kiko nan ta pidiendo. Algu asina ta realmente posibel? En realidat, e ta sosodé tur dia. Kiko tur e hendenan aki ta pidiendo? E binida di e Reino di Dios!

Segun un kálkulo, tin mas o ménos 37.000 religion ku ta yama nan mes kristian i ku ta bisa ku Hesukristu ta nan Lider. Huntu, e religionnan aki tin mas ku dos mil mion miembro. Un gran kantidat di nan ta resa loke hopi bes hende ta yama e Orashon di Nos Tata. Abo konosé e orashon aki? Manera Hesus a siña su siguidónan, e ta kuminsá asin’aki: “Nos Tata ku ta den shelu, bo nòmber sea santifiká. Ku bo reino bin. Ku bo boluntat sosodé na tera meskos ku den shelu.”—Mateo 6:9, 10.

Pa hopi siglo kaba, adoradónan ta ripití e palabranan ei ku masha rèspèt den nan iglesianan. Komo famia i individualmente tambe, nan ta resitá e palabranan aki for di kabes tantu den tempu bon komo den tempu malu. Nan ta ekspresá e palabranan aki sinseramente i asta ku fervor. Hopi otro hende a siña e palabranan aki for di kabes i ta ekspresá nan sin pensa mashá òf sin pensa mes riba nan nifikashon. E miembronan di e religionnan di kristiandat aki no ta e úniko personanan ku ta spera òf resa pa e binida di e Reino di Dios.

Religionnan No-Kristian Ta Hasi un Petishon Similar

Un orashon bon konosí di e religion hudiu ta e Kaddish. Nan ta hasi e orashon aki ora un ser kerí muri. Ounke e orashon no tin masha di haber ku morto òf tristesa, generalmente nan ta us’é den e temporada ei. E orashon ta pidi: “Ku e [Dios] establesé su Reino durante bo bida . . .  rápidamente.” * Un otro orashon ku nan tabata hasi den snoa den antigwedat ta papia di e speransa pa e Reino di e Mesias for di e kas di David.

E idea di e Reino di Dios a atraé otro hende ku ta miembro di religionnan no-kristian. Segun e korant The Times of India, un lider religioso prominente di India di siglo 19, ku tabata interesá pa haña un base komun entre e religionnan hindú, mòslem i kristian, a bisa: “Ta si ost i wèst ta uní so e berdadero reino di Dios lo bira realidat.” I resientemente e kabes di un skol islámiko na Strathfield, Oustralia, a skirbi pa un korant: “Meskos ku tur mòslem, mi ta kere [ku] Hesus lo bolbe i establesé e berdadero Reino di Dios.”

No tin duda, aktualmente tin míles di miónes di hende ta spera riba e Reino di Dios i ta pidi p’e. Pero pensa riba e siguiente fenómeno interesante.

Probablemente bo sa ku nos komo Testigunan di Yehova, kendenan ta publiká e revista aki, ta bai di kas pa kas den bo bisindario pa papia ku hende tokante Beibel. Na momento ku a skirbi e artíkulo aki, ya nos tabata hasi e  trabou ei den 236 pais rònt mundu i den mas ku 400 idioma. E tema prinsipal di nos predikashon ta e Reino di Dios. De echo, tuma nota ku e título kompletu di e revista aki ta E Toren di Vigilansia Anunsiando e Reino di Yehova Dios. Hopi bes nos ta puntra hende si nan ta resa pidi pa e Reino ei. Hopi di nan ta kontestá ku sí. Sin embargo, ora nos puntra nan kiko e Reino ei ta, bon mirá, mayoria di hende ta kontestá: “Mi no sa.” Òf nan ta duna kontestanan vago i insigur.

Dikon asina tantu hende ta pidi pa algu ku nan no sa ta kiko? Esei ta pasobra e Reino di Dios ta un konsepto kompliká i vago? Nò. Beibel ta duna un splikashon kompletu i kla di kiko e Reino ta. Es mas, Beibel su mensahe tokante e Reino por duna bo un berdadero speransa den e tempunan skur aki. Den e siguiente artíkulo nos lo mira kon Beibel ta splika e speransa ei. Kaba nos lo mira na ki tempu Hesus su orashon pa e Reino bin lo haña kontesta.

[Nota]