Di Unda Nos A Bin?

DIKON TA IMPORTANTE PA HAÑA E KONTESTA? Hopi hende ta ser siñá ku ta pa kasualidat tin bida riba tera. Nan ta ser bisá ku e rasa humano, ku tur su kapasidat emoshonal, intelektual i spiritual, a evolushoná mediante un seri di susesonan improbabel ku a tuma lugá pa kasualidat.

Pero konsiderá lo siguiente: Si en bèrdat nos a bin di evolushon i no tabatin un Kreadó, den un sentido, e rasa humano lo tabata un huérfano. Humanidat lo no tabatin un fuente di sabiduria superior pa akudí na dje, ni ningun persona pa yuda nos solushoná nos problemanan. Nos lo tabatin ku dependé di sabiduria humano pa prevení kalamidat ekológiko, pa solushoná konfliktonan polítiko i pa guia nos durante un krísis personal.

E idea ku nos lo tin ku dependé solamente riba pensamentu di hende ta duna bo pas mental? Si no ta asina, konsiderá e alternativa. E no ta solamente mas atraktivo, sino mas lógiko tambe.

Loke Beibel Ta Bisa

Beibel ta siña ku ta Dios mes a krea hende. Nos no ta produkto di evolushon, un teoria ku no por pensa ni sinti. Mas bien, nos ta yunan di un Tata inteligente i amoroso. Tuma nota di e siguiente deklarashonnan bon kla ku Beibel ta hasi:

Génesis 1:27. “Dios a krea hende segun su mes imágen; segun e imágen di Dios el a krea hende; hòmber i muhé el a krea nan.”

Salmo 139:14. “Mi ta alabá bo, pasobra mi ta trahá na un manera temerosamente maravioso; maravioso ta bo obranan, i mi alma sa esei masha bon.”

Mateo 19:4-6. “Boso no a lesa ku esun ku a krea hende for di prinsipio ‘a traha nan hòmber i muhé,’ i a bisa: ‘Pa e motibu aki un hòmber lo bandoná su tata i mama i lo uni ku su esposa; i nan dos lo bira ún karni’? Asina anto nan no ta dos mas, sino ún karni. P’esei loke Dios a uni, no laga ningun hende separá.”

Echonan 17:24, 25. “E Dios ku a traha mundu i tur kos ku tin den dje, siendo Señor di shelu i di tera, no ta biba den tèmpel trahá ku man; ni e no ta wòrdu sirbí dor di man di hende, komo si fuera e tabatin mester di kualke kos, komo ku e mes ta duna tur hende bida i rosea i tur kos.”

Revelashon 4:11. “Digno bo ta, nos Señor i nos Dios, pa risibí gloria i onor i poder; pasobra abo a krea tur kos, i pa motibu di bo boluntat nan tabata eksistí, i a wòrdu kreá.”

 Kontesta Bíbliko Ta Duna Berdadero Pas Mental

Ora un hende sa ku ‘henter e famia riba tera a haña su nòmber’ for di Dios, su manera di mira otro hende ta kambia. (Efesionan 3:15) Ademas, e konosementu ei ta influensiá e manera ku nos ta mira nos mes i nos problemanan. Lo e influensiá nos pensamentu den e siguiente maneranan:

Ora nos tin ku tuma desishonnan difísil, nos lo no bira demasiado preokupá tokante opinionnan kontradiktorio di hende. Mas bien, ku tur konfiansa nos lo dependé di konseho bíbliko. Dikon nos mester hasi esei? Pasobra “tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia, pa e hende di Dios por ta perfekto, ekipá pa tur bon obra.”—2 Timoteo 3:16, 17.

Klaru ku esfuerso i disipliná propio ta nesesario pa nos por apliká konseho bíbliko. Pa nos hasi esaki, tin biaha nos lo tin ku aktua na un manera ku ta parse nèt kontrali di nos inklinashonnan. (Génesis 8:21) Sin embargo, si nos aseptá ku ta un amoroso Tata selestial a krea nos, lo ta masha lógiko pa konkluí ku e sa kua ta e mihó manera pa nos aktua. (Isaias 55:9) P’esei, su Palabra ta duna nos e siguransa: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” (Proverbionan 3:5, 6) Si nos apliká e konseho ei, gran parti di nos preokupashonnan pa motibu di problema- i desishonnan ku nos tin ku tuma lo ser eliminá.

Ora nos konfrontá prehuisio, nos lo no laga sintimentu di inferioridat molestia nos, pensando ku, di un òf otro manera, nos tin ménos balor ku hende di un otro rasa òf kultura. En bes di esei, nos lo desaroyá e debido rèspèt propio. Dikon? Pasobra nos Tata, Yehova Dios, “no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.”—Echonan 10:34, 35.

Ademas, sabiendo esei lo yuda nos pa no laga prehuisio trose nos sintimentunan pa otro hende. Nos lo komprondé ku no tin niun base válido pa sinti ku nos ta mas ku hende di otro rasa, ya ku Dios ‘a traha for di ún hende tur nashon di hende pa biba riba henter mundu.’—Echonan 17:26.

Sin duda, e echo ku nos sa ku nos a ser kreá i ku nos Kreadó ta interesá den nos ta pone un fundeshi pa nos por haña berdadero pas mental. Pero mas kos ta nesesario si nos ke mantené pas mental.

[Komentario na página 4]

E rasa humano a evolushoná?

[Plachi na página 5]

E echo ku nos sa ku nos Kreadó ta interesá den nos por duna nos berdadero pas mental