Hesukristu​—E Misionero di Mas Importante

“Mi ta bin for di dje, i El a manda mi.”—JUAN 7:29.

1, 2. Kiko ta un misionero, i ken nos por yama e Misionero di mas importante?

KIKO ta bini na bo mente ora bo tende e palabra “misionero”? Algun hende ta pensa riba misioneronan di kristiandat, di kua hopi ta mete den asuntunan polítiko i ekonómiko di e paisnan kaminda nan ta sirbi. Sin embargo, komo un Testigu di Yehova, probablemente bo ta pensa riba e misioneronan ku e Kuerpo Gobernante ta manda pa bai prediká e bon nobo den vários pais rònt mundu. (Mat. 24:14) Di un manera inegoista, e misioneronan aki ta usa nan tempu i energia pa hasi e trabou onorabel di yuda hende hala serka Yehova Dios i disfrutá di un relashon masha spesial kuné.—Sant. 4:8.

² Yehova ta e gran Proklamadó di Evangelio òf e Fuente di e bon nobo. I su yu ta e Misionero di mas importante ku el a yega di manda. Relashoná ku su Tata selestial, Hesukristu a bisa: “Mi ta bin for di dje, i el a manda mi.” (Juan 7:29) Demostrando su gran amor pa humanidat, Yehova a manda su Yu unigénito na tera. (Juan 3:16) Nos por yama Hesus e Misionero di mas importante, esta, e mihó Misionero, pasobra un motibu pakiko el a ser mandá na tera ta pa “duna testimonio di e bèrdat.” (Juan 18:37) E tabatin éksito total den proklamá e bon nobo di e Reino, i ainda nos ta benefisiá di su ministerio. Por ehèmpel, sea ku nos ta asigná komo misionero òf nò, nos por apliká su métodonan di siña hende den nos ministerio.

3. Ki preguntanan nos ta bai konsiderá?

³ Hesus su papel komo proklamadó di Reino ta lanta preguntanan manera esakinan: Kiko Hesus a eksperensiá ora e tabata riba tera? Dikon su manera di siña hende tabata efikas? Kiko a hasi su ministerio eksitoso?

Un Aktitut Dispuesto den un Ambiente Diferente

4-6. Menshoná algun kambio ku Hesus a konfrontá ora Dios a mand’é na tera.

⁴ Podisé misioneronan di tempu aktual i algun kristian ku a muda bai na lugánan kaminda tin nesesidat pa mas proklamadó di Reino, tin ku adaptá nan mes na un nivel di bida mas abou ku nan ta akustumbrá. Pero nos no por ni imaginá e diferensia entre e ambiente ku Hesus a biba aden na tera i esun den shelu. Den shelu el a biba huntu ku su Tata i entre kriaturanan angelikal ku a sirbi Yehova ku motibunan puru. (Jòb 38:7) P’esei, pa el a biba entre hende pekadó den un mundu korupto tabata algu masha diferente! (Mar. 7:20-23) Hesus tabatin ku soportá asta e rivalidat  ku tabatin entre su disipelnan mas yegá. (Luk. 20:46; 22:24) Naturalmente, el a trata perfektamente ku tur loke el a konfrontá riba tera.

⁵ No ta di un manera milagroso Hesus a kuminsá papia un idioma di hende; ta for di chikitu el a kuminsá siñ’é. Esei tabata un kambio masha grandi kompará ku duna instrukshon na angelnan den shelu! Ora Hesus tabata riba tera, el a papia por lo ménos un “lenga di hende.” I esei tabata kompletamente diferente for di e ‘lenga di angel.’ (1 Kor. 13:1) Apesar di esei, pa loke ta palabranan bunita òf agradabel, ningun hende no a yega di ekspresá nan mes manera Hesus.—Luk. 4:22.

⁶ Konsiderá otro maneranan ku kosnan a kambia masha tantu pa e Yu di Dios ora el a bini na tera. Ounke Hesus no a heredá piká di Adam, El a bira un hende meskos ku esnan ku despues lo a bira su “rumannan” òf siguidónan ungí. (Lesa Hebreonan 2:17 i 18.) Riba e último anochi di Hesus su bida riba tera, e no a pidi su Tata selestial manda “mas ku diesdos legion di angel.” Pero djis pensa riba e kantidat di kriaturanan angelikal ku e tabatin outoridat riba dje komo Miguel e Arkangel! (Mat. 26:53; Hudas 9) Sí, Hesus a hasi milager. Pero, loke el a hasi ora e tabata riba tera tabata limitá kompará ku loke lo e por a hasi den shelu.

7. Kon e hudiunan a aktua relashoná ku e Lei?

⁷ Durante Hesus su eksistensia prehumano komo “e Palabra,” kisas ta e a sirbi komo e Bosero di Dios ku a guia e israelitanan atraves di e desierto. (Juan 1:1; Eks. 23:20-23) Sin embargo, nan a “risibí e Lei manera angelnan a ordená i tòg no a ward’é.” (Echo. 7:53; Heb. 2:2, 3) De echo, lidernan religioso hudiu di promé siglo no a komprondé e berdadero nifikashon di e Lei. Konsiderá por ehèmpel, e lei di Sabat. (Lesa Marko 3:4-6.) E eskriba- i fariseonan “a neglishá loke ta mas importante di e Lei: hustisia, miserikòrdia i fieldat.” (Mat. 23:23) Apesar di esei, Hesus no a entregá i stòp di deklará e bèrdat.

8. Dikon Hesus por yuda nos?

⁸ Hesus tabatin un aktitut dispuesto pa yuda. Amor pa hende a motiv’é i e tabatin un deseo intenso pa yuda nan. Nunka el a pèrdè su deseo i entusiasmo pa prediká e evangelio. I debí ku Hesus a keda fiel na Yehova ora e tabata riba tera, “el a bira pa tur esnan ku ta obedes’é, e outor di salbashon eterno.” Es mas, “komo ku e mes a wòrdu tentá den loke el a sufri, e por bin na yudansa di esnan [manera nos] ku ta wòrdu tentá.”—Heb. 2:18; 5:8, 9.

Un Maestro Bon Entrená

9, 10. Ki klase di entrenamentu Hesus a risibí promé ku Dios a mand’é na tera?

⁹ Promé ku manda kristiannan di nos tempu bai sirbi komo misionero, e Kuerpo Gobernante ta perkurá pa nan haña entrenamentu. Hesukristu a risibí entrenamentu? Sí, pero e no a asistí na e skolnan rabíniko promé ku el a ser ungí komo e Mesias, ni e no a wòrdu eduká na pia di sierto lidernan religioso famoso. (Juan 7:15; kompará ku Echonan 22:3.) Kon bin anto, Hesus tabata asina bon kualifiká pa siña hende?

¹⁰ Sin importá loke Hesus kisas a siña for di su mama, Maria, i di su tata di kriansa, Hosé, el a risibí su entrenamentu prinsipal pa e ministerio for di e Fuente di mas haltu ku tin. Relashoná ku esaki, Hesus a bisa: “No ta ku mi mes outoridat mi a papia, ma e Tata ku a manda mi a duna mi mandamentu, kiko pa bisa i kiko pa papia.” (Juan 12:49) Tuma nota ku e Yu a haña instrukshon spesífiko tokante kiko pa siña hende. Promé ku Hesus a bini na tera, sin duda el a pasa hopi tempu skuchando instrukshon di su Tata. Un mihó entrenamentu e no por a haña, no ta bèrdat?

11. Te na ki grado Hesus a reflehá e aktitut di su Tata pa ku humanidat?

 ¹¹ For di e tempu ku e Yu a ser kreá, e tabatin un relashon íntimo ku su Tata. Durante Hesus su eksistensia prehumano, el a diserní kiko ta Dios su aktitut pa ku hende debí ku el a opservá kon Yehova a trata ku nan. E Yu a reflehá Dios su amor pa humanidat asina tantu ku, komo sabiduria personifiká, e por a bisa: “Mi delisia tabata den e yunan di hende.”—Pro. 8:22, 31.

12, 13. (a) Kiko Hesus a siña dor di opservá e manera ku su Tata a trata e israelitanan? (b) Kon Hesus a usa e entrenamentu ku el a risibí?

¹² Ademas, e entrenamentu ku e Yu a risibí a enserá opservá kon su Tata a trata ku situashonnan difísil. Por ehèmpel, pensa riba e manera ku Yehova a trata ku e israelitanan desobediente. Nehemias 9:28 ta bisa: “Asina ku nan tabatin sosiegu, nan a bolbe hasi malu bo dilanti [Yehova]; p’esei bo a laga nan den man di nan enemigunan, asina ku nan tabatin dominio riba nan. Ora nan a bolbe sklama na bo, bo a tende for di shelu, i hopi biaha bo a reskatá nan konforme bo miserikòrdia.” Trahando huntu ku Yehova i dor di opserv’é, Hesus a kultivá un kompashon similar pa e hendenan kaminda el a prediká, esta, na Israel.—Juan 5:19.

¹³ Hesus a pone loke el a siña na práktika segun ku e tabata trata su disipelnan ku kompashon. E anochi promé ku su morto, tur e apòstelnan ku e tabata stima asina tantu “a bandon’é i a hui bai.” (Mat. 26:56; Juan 13:1) Apòstel Pedro a asta nenga ku e konosé Kristu tres bes! Apesar di esei, Hesus a laga kaminda habrí pa su apòstelnan por a bolbe serka dje. El a bisa Pedro: “Ami a hasi orashon pa bo, pa bo fe no faya; i abo, unabes ku bo [“bolbe,” NW], fortalesé bo rumannan.” (Luk. 22:32) Israel spiritual a ser fundá ku éksito riba “e apòstelnan i e profetanan.” I e piedranan di fundeshi di e muraya di Yerusalèm Nobo ta karga nòmber di e 12 fiel apòstelnan di e Lamchi, Hesukristu. Te awe, kristiannan ungí huntu ku nan kompañeronan dediká, e “otro karnénan,” ta prosperá den nan trabou di prediká e Reino bou di e man poderoso di Dios i e liderato di su Yu stimá.—Efe. 2:20; Juan 10:16; Rev. 21:14.

E Manera Ku Hesus A Siña Hende

14, 15. Den ki sentido Hesus su manera di siña hende tabata kompletamente diferente for di esun di e eskriba- i fariseonan?

¹⁴ Kon Hesus a pone su entrenamentu na práktika ora e tabata siña su siguidónan? Ora nos kompará e manera ku Hesus a instruí hende ku e manera ku e lidernan religioso hudiu a hasié, nos ta mira bon kla ku esun di Hesus ta superior. E eskriba- i fariseonan ‘a hasi e palabra di Dios inefektivo pa kousa di nan tradishon.’ Na kontraste ku esei, Hesus no a papia di su mes; el a pega na e palabra òf mensahe di Dios. (Mat. 15:6; Juan 14:10) Esei ta loke nos tambe mester hasi.

¹⁵ Tabatin un otro faktor ku tambe a hasi Hesus kompletamente diferente for di e lidernan religioso. Relashoná ku e eskriba- i fariseonan, el a bisa: “Tur loke nan bisa boso, hasié i kumpli kuné, ma no hasi segun nan obranan, pasobra nan ta papia, ma nan no ta hasi.” (Mat. 23:3) Hesus sí a praktiká loke el a siña. Laga nos konsiderá un ehèmpel ku ta proba ku esaki ta bèrdat.

16. Dikon lo bo bisa ku Hesus a biba na armonia ku su palabranan registrá na Mateo 6:19-21?

 ¹⁶ Hesus a urgi su disipelnan pa “montoná tesoro . . . den shelu.” (Lesa Mateo 6:19-21.) Hesus mes a biba na armonia ku e konseho aki? Sí, pasobra relashoná ku su persona, e por a bisa onestamente: “Zoro tin kueba i para di shelu tin nèshi, ma e Yu di hende no tin ningun lugá pa pone su kabes.” (Luk. 9:58) Hesus a hiba un bida simpel. El a okupá su mes prinsipalmente ku e proklamashon di e bon nobo di Reino. Ademas, el a demostrá kiko ta nifiká ser liber di e ansiedatnan ku montoná tesoro riba tera ta trese kuné. Hesus a mustra ku ta muchu mas mihó pa montoná tesoro den shelu, “kaminda ni mòt ni frustu no ta destruí nan, i kaminda ladron no ta kibra drenta ni hòrta.” Abo ta sigui Hesus su konseho pa montoná tesoro den shelu?

Kualidatnan Ku A Pone Hende Haña Kariño pa Hesus

17. Ki kualidatnan a hasi Hesus un predikadó di evangelio ekstraordinario?

¹⁷ Ki kualidatnan a hasi Hesus un predikadó di evangelio ekstraordinario? Un di nan tabata su aktitut pa ku e hendenan ku el a yuda. Algun di e ekselente kualidatnan di Yehova ku Hesus a reflehá tabata entre otro, humildat, amor i kompashon. Tuma nota kon e kualidatnan aki a atraé hopi hende na Hesus.

18. Dikon nos por bisa ku Hesus tabata humilde?

¹⁸ Debí ku Hesus a aseptá e asignashon pa bini na tera, el “a bandoná su mes gloria, tumando forma di un sirbidó, siendo trahá den e semehansa di hende.” (Fil. 2:7) Esei tabata un akto di humildat. Ademas, Hesus no a menospresiá hende. E no tabatin e aktitut di: ‘Ta for di shelu mi a bin, pues boso mester skucha mi.’ Distinto di e mesiasnan falsu ku a nombra nan mes, Hesus no a kana broma ku su posishon komo e berdadero Mesias. Tabatin biaha ku el a bisa hende pa no bisa otronan ken e tabata òf kiko el a hasi. (Mat. 12:15-21) Hesus tabata ke pa hende tuma nan desishon pa siguié basá riba loke nan mes a mira. Su disipelnan tabata bendishoná pasobra nan Señor no a ferwagt pa nan tabata manera e angelnan perfekto ku el a asosiá kuné den shelu.

19, 20. Kon amor i kompashon a motivá Hesus pa yuda hende?

¹⁹ Hesukristu a ekspresá amor tambe, un kualidat prinsipal di su Tata selestial. (1 Juan 4:8) Amor a motivá Hesus pa siña su oyentenan. Tuma komo ehèmpel su sintimentunan pa un sierto gobernante hóben. (Lesa Marko 10:17-22.) Hesus “a stim’é” i kier a yud’é, pero e gobernante hóben no a bandoná su propiedatnan abundante pa asina e por a bira un siguidó di Kristu.

²⁰ Un otro kualidat atraktivo di Hesus tabata su kompashon. Meskos ku tur hende imperfekto, e personanan ku a reakshoná faborablemente na su siñansa tabatin hopi problema. Konsiente di esaki, Hesus a siña nan ku kompashon i konsiderashon. E siguiente ehèmpel ta ilustrá esei: Na un okashon, Hesus i su apòstelnan tabata asina okupá ku nan no tabatin tempu ni pa kome. Sin embargo, kon Hesus a reakshoná ora el a mira ku un multitut di hende a bini huntu? “El a sinti kompashon pa nan, pasobra nan tabata manera karné sin wardadó; i el a kuminsá siña nan hopi kos.” (Mar. 6:34) Hesus a ripará ku e hendenan di Israel tabata den un kondishon deplorabel, i el a hasi hopi esfuerso pa siña nan i a hasi milager pa benefisiá nan. Su palabranan a konmové algun ku a sinti nan mes atraí na dje pa motibu di su kualidatnan ekselente, i nan a bira su disipel.

21. Kiko nos lo konsiderá den e siguiente artíkulo?

²¹ Manera nos siguiente artíkulo lo mustra, tin hopi kos mas ku nos por siña tokante Hesus su ministerio riba tera. Den ki maneranan mas nos por imitá Hesukristu, e Misionero di mas importante?

Kon Lo Bo Kontestá?

• Ki entrenamentu Hesus a risibí promé ku el a bini na tera?

• Den ki sentido Hesus su manera di siña hende tabata superior na esun di e eskriba- i fariseonan?

• Ki kualidatnan a pone hende haña kariño pa Hesus?

[Preguntanan di Estudio]

[Plachi na página 23]

Kon Hesus a siña e multitut?