Imitá e Misionero di Mas Importante
Imitá e Misionero di Mas Importante
“Sea imitadónan di mi, meskos ku ami tambe ta di Kristu.”—1 KOR. 11:1.
1. Dikon nos mester imitá Hesukristu?
APÒSTEL Pablo a imitá Hesukristu, e Misionero di mas importante. Ademas, Pablo a urgi su kompañeronan kristian: “Sea imitadónan di mi, meskos ku ami tambe ta di Kristu.” (1 Kor. 11:1) Despues ku Hesus a duna su disipelnan un ehèmpel práktiko di humildat dor di laba nan pianan, el a bisa nan: “Mi a duna boso un ehèmpel, pa boso tambe hasi manera ami a hasi ku boso.” (Juan 13:12-15) Komo kristiannan djawe, nos tin e obligashon di imitá Hesukristu den loke nos ta papia i hasi i tambe den e kualidatnan ku nos ta desplegá.—1 Ped. 2:21.
2. Ki aktitut bo por tin ounke e Kuerpo Gobernante no a nombrá bo komo un misionero?
2 Den e artíkulo anterior, nos a siña ku un misionero ta un persona ku a ser mandá komo un predikadó di evangelio, un persona ku ta hiba bon nobo pa otro hende. Relashoná ku esei, Pablo a hasi algun pregunta interesante. (Lesa Romanonan 10:11-15.) Tuma nota ku e apòstel a puntra: “Kon nan lo tende sin un predikadó?” I despues, el a sita e palabranan di e profesia di Isaias: “Ki bunita ta e pianan di esnan ku ta prediká e evangelio di pas, esnan ku ta trese notisianan alegre di kosnan bon!” (Isa. 52:7) Asta si bo no a ser nombrá i mandá pa sirbi komo un misionero den estranheria, bo por tin e aktitut di un persona ansioso pa prediká e evangelio dor di imitá Hesus komo un proklamadó di e bon nobo ku entusiasmo. Aña pasá, 6.957.854 publikadó di Reino a ‘hasi e trabou di predikadó di evangelio’ den 236 pais.—2 Tim. 4:5, NW.
“Nos A Bandoná Tur Kos i A Sigui Bo”
3, 4. Kiko Hesus a laga atras den shelu, i kiko nos tin ku hasi pa por ta su siguidó?
3 Pa Hesus por a kumpli ku su asignashon riba tera, el “a bandoná su mes gloria, tumando forma di un sirbidó,” lagando su bida selestial atras. (Fil. 2:7) Maske kon nos imitá Kristu, loke nos hasi no por ser kompará ku loke Hesus a hasi ora e tabatin ku bin na tera. Pero nos por keda firme komo su siguidónan, sin anhelá loke nos a laga atras den e mundu di Satanas.—1 Juan 5:19.
4 Na un okashon apòstel Pedro a bisa Hesus: “Ata nos a bandoná tur kos i a sigui bo.” (Mat. 19:27) Ora Hesus a invitá Pedro, Andres, Santiago i Juan pa siguié, mesora nan a bandoná nan redanan. Nan a bandoná e negoshi di piskamentu i a hasi e ministerio nan trabou prinsipal. Di akuerdo ku e relato di e Evangelio di Lukas, Pedro a bisa: “Mira, nos a bandoná loke ta di nos, i a sigui bo.” (Luk. 18:28) Mayoria di nos no tabatin ku laga tur “loke ta di nos” atras pa por sigui Hesus. Sin embargo, nos mester a ‘nenga nos mes’ pa por a bira siguidónan di Kristu i sirbidónan di Yehova di henter nos kurason. (Mat. 16:24) E proseder ei a resultá den hopi bendishon. (Lesa Mateo 19:29.) Si nos tin e mesun entusiasmo ku Kristu tabatin pa prediká e evangelio, nos lo tin goso. Esaki ta asina, spesialmente ora nos a kontribuí maske ta un tiki pa yuda un persona hala serka Dios i su Yu stimá.
5. Relatá un eksperensia ku ta demostrá ki desishon un imigrante kisas ta tuma ora e siña e bèrdat di Beibel.
5 Valmir, un hòmber di Brazil ku ta biba den interior di Sürnam, tabata mina oro. E tabata un alkohóliko ku a hiba un bida inmoral. Un biaha ku e tabata den stat, Testigunan di Yehova a kuminsá studia Beibel kuné. El a studia tur dia, hasi hopi kambio i djis despues el a batisá. Ora ku el a ripará ku su trabou tabata strob’é di biba na armonia ku su fe nobo, el a bende su derecho di hasi e trabou lukrativo ei, i el a muda bai Brazil bèk pa yuda su famia haña tesoronan spiritual. Ora nan siña e bèrdat di Beibel, hopi imigrante boluntariamente ta bandoná nan trabounan den paisnan próspero i regresá nan pais natal ku e propósito di yuda nan famia i otro hende spiritualmente. E publikadónan di Reino ei ta demostrá ku nan ta realmente entusiasmá pa prediká e evangelio.
6. Kiko nos por hasi si nos no por muda bai kaminda tin mas nesesidat pa proklamadó di Reino?
6 Vários Testigu por a muda bai den áreanan kaminda tin mas nesesidat pa predikadó di Reino. Algun ta bai sirbi asta den estranheria. Podisé personalmente nos no ta den e posishon pa muda, pero nos por imitá Hesus dor di semper hasi nos bèst den e ministerio.
Yehova Ta Duna Entrenamentu Nesesario
7. Kua skolnan ta duna entrenamentu na rumannan ku ke mehorá nan abilidat komo proklamadó di Reino?
7 Meskos ku Hesus a risibí entrenamentu di su Tata, nos tambe por benefisiá di e edukashon ku Yehova ta perkurá awendia. Hesus mes a bisa: “Ta pará skirbí den e Profetanan: ‘I nan tur lo wòrdu siñá dor di Dios.’” (Juan 6:45; Isa. 54:13) Awe, tin skolnan spesialmente prepará pa ekipá nos komo proklamadónan di Reino. Sin duda, nos tur a benefisiá di un òf otro manera di e Skol di Ministerio Teokrátiko den nos kongregashonnan lokal. Pioneronan tin e privilegio di asistí na e Skol di Sirbishi di Pionero. Un kantidat di pionero eksperensiá tabatin e plaser di asistí na e skol ei pa di dos bes. Ansiano- i sirbidónan ministerial a asistí na e Skol di Ministerio di Reino pa mehorá nan abilidat di siña hende i e manera ku nan ta sirbi nan kompañeronan di fe. Hopi ansiano i sirbidó ministerial soltero a bai e Skol di Entrenamentu Ministerial, ku ta ekipá nan pa yuda otro hende den e trabou di prediká. I hopi ruman hòmber i muhé ku a haña asignashon pa sirbi komo misionero den estranheria a risibí entrenamentu na e Skol Bíbliko di Galaad di Watchtower.
8. Ki kambio algun ruman tabata dispuesto pa hasi pa mustra ku nan ta balorá e entrenamentu ku Yehova ta duna?
8 Hopi Testigu di Yehova ta hasi kambio pa nan por asistí na e skolnan aki. Yugu a kita for di trabou pa e por a asistí na e Skol di Entrenamentu Ministerial na Canada pasobra su doño di trabou no kier a dun’é liber. Yugu a bisa: “E no ta duel mi. De echo, si nan a hasi un eksepshon pa mi i duna mi liber, kisas nan lo a ferwagt ku lo mi a mustra mi lealtat na e kompania dor di keda traha einan pa semper. Pero awor mi ta disponibel pa kualke asignashon ku lo mi por haña di Yehova.” Pa nan por benefisiá di e entrenamentu ku Dios ta duna, hopi ruman tabata dispuesto pa sakrifiká loke un tempu nan tabata konsiderá di gran balor.—Luk. 5:28.
9. Duna un ehèmpel ku ta mustra e resultado di siñansa basá riba Beibel i esfuerso sinsero.
9 Siñansa basá riba Beibel i esfuerso sinsero por yuda hende hasi progreso remarkabel. (2 Tim. 3:16, 17) Wak kiko a sosodé den kaso di Saulo na Guatemala. El a nase ku un desabilidat mental leve. P’esei, un di su maestronan a bisa su mama ku e no mester forsa e mucha p’e siña lesa ya ku e úniko kos ku lo e logra dor di hasi esei ta frustra e mucha. Saulo a stòp di bai skol sin ku e por a lesa. Sin embargo, un Testigu di Yehova sí a siña Saulo lesa. Ku tempu, Saulo a progresá te ku e tabata duna parti den e Skol di Ministerio Teokrátiko. Mas despues, ora Saulo su mama tabata den sirbishi di kas pa kas, el a topa ku e maestra. Ora e maestra a tende ku Saulo a siña lesa, el a pidi e mama pa bin kuné e siguiente siman. E siguiente siman, e maestra a puntra Saulo: “Kiko bo ta bai siña mi?” Saulo a kuminsá lesa un paragraf for di e buki Kiko Beibel Ta Siña Realmente? E maestra a bisa: “Mi no por kere ku abo ta esun ku ta siña mi awor.” E no por a kontené su lágrimanan, i el a brasa Saulo.
Siñansa Ku Ta Konmové Kurason
10. Kua buki ekselente nos tin na nos disposishon pa siña hende e bèrdat bíbliko?
10 Hesus a basa su siñansa riba loke Yehova a siñ’é direktamente i riba instrukshon ku Dios su Palabra skirbí ta kontené. (Luk. 4:16-21; Juan 8:28) Nos ta imitá Hesus dor di apliká su konseho i pega na e Skritura. P’esei, nos tur ta papia i pensa na armonia ku otro i esaki ta kontribuí na nos union. (1 Kor. 1:10) Nos ta masha gradisidu ku “e esklabo fiel i prudente” ta perkurá publikashonnan basá riba Beibel pa yuda nos keda uní den loke nos ta siña hende i di kumpli ku nos trabou komo predikadó di evangelio. (Mat. 24:45; 28:19, 20) Un di e publikashonnan aki ta e buki Beibel Ta Siña, i awor e ta disponibel den 179 idioma.
11. Kon un ruman muhé na Etiopia a usa e buki Beibel Ta Siña pa vense oposishon?
11 Un estudio di e Skritura mediante e buki Beibel Ta Siña por kambia kurason di asta hende ku ta oponé nos. Na un okashon, Lula, un ruman muhé pionero na Etiopia, tabata kondusí un estudio di Beibel. Diripiente un famia di e studiante a drenta paden na un manera brutu i a bisa ku nan no tin mester di un estudio di Beibel. Na un manera kalmu, Lula a usa e ilustrashon tokante plaka falsu den kapítulo 15 di e buki Beibel Ta Siña pa rasoná ku e famia. E señora a kalma i a permití nan sigui ku e estudio. De echo, e tabata presente pa e siguiente estudio i a pidi su propio estudio di Beibel. El a asta ofresé pa paga p’e! Djis despues, e tabata studia tres bes pa siman i tabata progresá bon den e bèrdat.
12. Duna un ehèmpel ku ta mustra kon hóbennan por tin éksito den siña hende e bèrdat bíbliko.
12 Hóbennan por usa e buki Beibel Ta Siña pa yuda otro hende. Ora Keanu di 11 aña di edat na Hawai tabata lesa e buki aki na skol, un di su kompañeronan di klas a puntr’é: “Dikon bo no ta selebrá dianan di fiesta?” Keanu a lesa e kontesta dirèkt for di e tópiko di e apèndiks: “Nos Mester Selebrá Dianan di Fiesta?” Despues el a bai na e página di kontenido i a puntra e mucha hòmber kua tópiko a interes’é mas. Asina Keanu a kuminsá un estudio di Beibel ku e hóben. Durante e último aña di sirbishi, Testigunan di Yehova a kondusí 6.561.426 estudio di Beibel. I hopi di e estudionan aki tabata for di e buki Beibel Ta Siña. Abo ta usa e buki aki pa studia Beibel ku otro hende?
13. Den ki manera un estudio di Beibel por tin influensia fuerte riba hende?
13 Un estudio di e Skritura mediante e buki Beibel ta Siña por ehersé un influensia fuerte riba esnan ku ke hasi Dios su boluntat. Un pareha kasá ku ta pionero spesial na Norwega a kuminsá un estudio di Beibel ku un famia di Zambia. E pareha di Zambia tabatin tres yu muhé, i nan no tabata ke mas yu. P’esei, ora e señora a sali na estado, nan a disidí ku nan lo kometé aborto. Un par di dia promé ku nan a bai dòkter, nan a studia e kapítulo titulá “Mira Bida Manera Dios Ta Mir’é.” E potrèt di un yu den barika di su mama, den e kapítulo ei, tabatin un efekto asina profundo riba nan kurason ku nan a disidí di no kometé aborto. Nan a sigui progresá spiritualmente i a duna nan yu hòmber resien nasí e nòmber di e ruman hòmber ku tabata studia ku nan.
14. Splika kon e echo ku nos ta biba na armonia ku loke nos ta siña hende por produsí bon resultado.
14 Un aspekto importante di Hesus su manera di siña hende tabata e echo ku el a biba na armonia ku loke el a siña hende. Hopi hende ta keda impreshoná ku e kondukta ekselente di Testigunan di Yehova, kendenan ta imitá Hesus den e aspekto aki. Nan a kibra drenta den e outo di un negoshante na Nueva Zelandia i a hòrta su maletin. El a hasi denunsia di esaki, i e polis a bis’é: “E úniko chèns ku bo tin di haña bo propiedat bèk ta si un Testigu di Yehova haña e maletin.” Un Testigu ku ta parti korant a haña e maletin. Ora e doño a ser informá di esaki, el a bai kas di e ruman muhé. El a haña un alivio ora el a ripará ku un dokumento di masha balor p’e tabata den e maletin ainda. E ruman muhé a bis’é: “E úniko proseder korekto ta pa mi debolbé e propiedat, spesialmente pasobra mi ta un Testigu di Yehova.” E negoshante a keda masha asombrá pasobra el a kòrda loke e polis a bis’é e mesun mainta ei. Ta opvio ku kristiannan berdadero ta imitá Hesus i ta biba di akuerdo ku e siñansanan ku Beibel ta kontené.—Heb. 13:18.
Imitá Hesus Su Aktitut pa ku Hende
15, 16. Kon nos por atraé hende na e mensahe ku nos ta prediká?
15 E aktitut ku Hesus tabatin pa ku hende a atraé nan na su mensahe. Por ehèmpel, su amor i humildat a atraé hopi hende humilde na dje. El a mustra kompashon pa hende ku a bin serka dje i a konsolá nan ku palabranan bondadoso i a kura nan enfermedatnan. (Lesa Marko 2:1-5.) Nos no por hasi milager, pero nos por mustra amor, humildat i kompashon. E kualidatnan aki ta yuda atraé hende na e bèrdat.
16 Kompashon a hunga un papel importante ora un pionero spesial ku yama Tariua a yama na kas di un hòmber di edat avansá ku yama Beere, kende ta biba riba un di e islanan aislá di Kiribati den Oséano Sur Pasífiko. Ounke e hòmber a indiká ku e no tabata dispuesto pa skucha, Tariua a sinti kompashon p’e pasobra el a ripará ku e tabata parsialmente paralisá. El a puntra e hòmber: “Mener a yega di tende loke Dios a primintí di hasi pa hende malu i hende di edat avansá?” Kaba el a lesa un pasashi for di e profesia di Isaias. (Lesa Isaias 35:5 i 6.) Fasiná, e hòmber a bisa: “Mi tin añanan ta lesa Beibel i un misionero di mi religion tin hopi aña ta bishita mi, pero nunka mi a mira e promesa ei den Beibel.” El a kuminsá un estudio di Beibel ku Beere, kende a progresá bon spiritualmente. Sí, e tabata basta desabilitá, pero awor e ta un ruman batisá, e ta hiba delantera perkurando pa un grupo isolá, i e ta kana prediká e bon nobo riba henter e isla.
Sigui Imitá Kristu
17, 18. (a) Kon bo por bira un predikadó di evangelio eksitoso? (b) Kiko ta spera tur esnan ku ta tuma nan ministerio na serio?
17 Manera e eksperensianan gososo den e ministerio ta demostrá bes tras bes, si nos kultivá i desplegá e kualidatnan ku Hesus a manifestá, nos por tin éksito komo predikadónan di evangelio. P’esei anto, ta masha apropiá pa nos imitá Kristu komo predikadónan di evangelio ku ta semper entusiasmá i kla pa prediká!
18 Ora algun hende a bira disipel di Hesus den e promé siglo, Pedro a puntra: “Kiko anto nos lo haña?” Hesus a kontest’é: “Tur hende ku a bandoná kasnan òf ruman hòmbernan òf ruman muhénan òf tata òf mama òf yunan òf kunukunan pa kousa di mi nòmber, lo risibí hopi bes mas tantu, i lo heredá bida eterno.” (Mat. 19:27-29) Si nos sigui imitá Hesukristu, e Misionero di mas importante, e tekstonan ei lo kumpli den nos kaso tambe.
Kon Lo Bo Kontestá?
• Kon Yehova ta entrená nos pa bira predikadó di evangelio?
• Dikon e buki Beibel Ta Siña ta duna bon resultado den nos ministerio?
• Kon nos por imitá Hesus den nos aktitut pa ku hende?
[Preguntanan di Estudio]
[Plachi na página 25]
Ora Hesus a invitá Pedro, Andres, Santiago i Juan pa siguié, nan a reakshoná mesora
[Plachi na página 25]
Publikashonnan manera e buki “Beibel Ta Siña” ta yuda nos keda uní den loke nos ta siña hende