Kana den e Kamindanan di Yehova
Kana den e Kamindanan di Yehova
“Bendishoná ta tur esnan ku ta teme SEÑOR, ku ta kana den su kamindanan.”—SAL. 128:1.
1, 2. Dikon nos por ta sigur ku hende por logra berdadero felisidat?
FELISIDAT ta algu ku tur hende ke. Pero sin duda, lo bo ta di akuerdo ku deseá i asta buska felisidat no ta meskos ku eksperensi’é.
2 Apesar di esei, hende por logra berdadero felisidat. Salmo 128:1 ta bisa: “Bendishoná [òf, “felis,” NW] ta tur esnan ku ta teme SEÑOR, ku ta kana den su kamindanan.” Nos por ta felis si nos ta adorá Dios i ta kana den su kamindanan dor di hasi su boluntat. Ki efekto esaki por tin riba nos kondukta i e kualidatnan ku nos ta desplegá?
Demostrá Ku Bo Ta Konfiabel
3. Kiko e echo ku nos ta kumpli ku nos promesanan tin di haber ku nos dedikashon na Dios?
3 Hende ku ta teme Yehova ta kumpli ku nan promesanan meskos ku e ta hasi. Yehova a kumpli ku tur promesa ku el a hasi na Israel di antigwedat. (1 Rei. 8:56) Ora nos a dediká nos mes na Dios, nos a hasi e promesa di mas importante den nos bida, i orashon riba un base regular ta yuda nos kumpli kuné. Nos por hasi orashon manera e salmista David: “Abo, o Dios, a tende mi promesanan . . . Asina lo mi kanta alabansa na bo nòmber pa semper, pa dia tras dia mi paga mi promesanan.” (Sal. 61:5, 8; Ekl. 5:4-6) Pa nos por ta amigu di Dios, nos tin ku kumpli ku nos promesanan.—Sal. 15:1, 4.
4. Kon Jefte i su yu muhé a aktua relashoná ku e promesa ku Jefte a hasi na Yehova?
4 Den e tempu di e Huesnan di Israel, Jefte a primintí ku si Yehova dun’é viktoria riba e amonitanan, lo e presentá e promé persona ku bin kontr’é ora e bolbe di e bataya, komo “un ofrenda kimá.” E persona ei a resultá di ta Jefte su yu muhé, su úniko yu. Ku fe den Yehova, tantu Jefte komo su yu muhé soltera a kumpli ku e promesa ku Jefte a hasi. Ounke kasamentu i hañamentu di yu tabata di gran balor den Israel, boluntariamente Jefte su yu muhé a keda soltera i a disfrutá di e privilegio di partisipá den sirbishi sagrado na e santuario di Yehova.—Hues. 11:28-40.
5. Den ki manera Ana a demostrá di ta un persona konfiabel ku a kumpli ku su promesa?
5 Ana, e muhé temeroso di Dios, a demostrá di ta un persona konfiabel ku a kumpli ku su promesa. El a biba huntu ku su esposo levita, Elkana i, esaki su otro esposa, Penina, den e region di seru di Efrain. Penina a haña vários yu i e tabata hasi bofon di Ana ku no tabatin yu, spesialmente ora e famia tabata bai n’e tabernakel. Na un di e okashonnan ei, Ana a primintí Yehova ku si e duna lus na un yu hòmber, lo e dun’é e yu. Djis despues di esei, el a sali na estado i a duna lus na un yu hòmber ku nan a yama Samuel. Despues ku Ana a kita Samuel for di pechu, el a present’é na Dios na Silo, i asina a dediká Samuel na Yehova “tur e dianan di su bida.” (1 Sam. 1:11) Asina Ana a kumpli ku su promesa na Dios ounke e no tabata sa ku despues lo el a haña mas yu.—1 Sam. 2:20, 21.
6. Kon Tikiko a demostrá ku e tabata konfiabel?
6 Sirbidónan di Dios mester ta konfiabel. E kristian di promé siglo ku yama Tikiko tabata un hòmber konfiabel i un “sirbidó fiel.” (Kol. 4:7) Tikiko a biaha huntu ku apòstel Pablo for di Gresia via Masedonia, bai Asia Menor i kisas a sigui bai te na Yerusalèm. (Echo. 20:2-4) Podisé ta e tabata “e ruman” ku huntu ku Tito tabata enkargá ku e obra di grasia òf regalo ku a ser mandá pa kompañeronan di fe den nesesidat na Hudea. (2 Kor. 8:18, 19; 12:18) Ora Pablo tabata enkarselá na Roma pa promé bes, Tikiko tabata su representante konfiabel ku a hiba su kartanan pa e rumannan den fe na Efeso i Kolosas. (Efe. 6:21, 22; Kol. 4:8, 9) Ora Pablo tabata enkarselá pa di dos bes na Roma, el a manda Tikiko bai Efeso. (2 Tim. 4:12) Si nos ta hende konfiabel, nos tambe lo haña asignashon den e sirbishi di Yehova.
7, 8. Dikon nos por bisa ku David ku Jonatan tabata berdadero amigu?
7 Dios ta ferwagt ku nos ta amigunan konfiabel. (Pro. 17:17) Jonatan, yu hòmber di Rei Saul, a bira amigu di David. Ora Jonatan a tende ku David a mata Goliat, “alma di Jonatan a keda uní ku alma di David, i Jonatan tabata stima David manera su mes.” (1 Sam. 18:1, 3) Jonatan a asta spièrta David ora ku Saul kier a mat’é. Despues ku David a hui, Jonatan a bai serka dje i a sera un aliansa kuné. Ora Jonatan a papia ku Saul tokante David, el a hera di pèrdè su bida, pero e dos amigunan a bolbe topa i a renobá nan laso di amistat. (1 Sam. 20:24-41) Durante nan último enkuentro, Jonatan a enkurashá David pa buska forsa “den Dios.”—1 Sam. 23:16-18.
8 Jonatan a muri den un bataya kontra e filisteonan. (1 Sam. 31:6) Den un kantika di lamento David a kanta: “Mi ta angustiá pa bo motibu, mi ruman Jonatan; bo tabata masha amabel pa mi. Bo amor pa mi tabata mas maravioso ku e amor di muhé.” (2 Sam. 1:26) E amor aki tabata un kariño entre dos amigu sin ningun konotashon seksual. David ku Jonatan tabata berdadero amigu.
Sea Semper “Humilde”
9. Kon Huesnan kapítulo 9 ta mustra e importansia di humildat?
9 Pa nos por ta amigu di Dios, nos tin ku ser “humilde.” (1 Ped. 3:8; Sal. 138:6) Huesnan kapítulo 9 ta mustra e importansia di humildat. Gideon su yu hòmber Jotam a bisa: “Un dia e palunan a bai pa ungi un rei pa reina riba nan.” El a menshoná e palu di oleifi, e palu di figu i e mata di wendrùif. Nan a representá personanan digno ku no tabata aspirá pa goberná riba nan kompañeronan israelita. Pero e mata di sumpiña—útil solamente komo kombustibel—a representá e reinado di e rei orguyoso Abimelek, un asesino ku tabata ansioso pa dominá otro hende. Ounke “Abimelek a goberná tres aña riba Israel,” el a muri un morto prematuro. (Hues. 9:8-15, 22, 50-54) Ta muchu mas mihó pa ta “humilde”!
10. Kiko bo a siña dje echo ku Herodes a keda sin “duna Dios e gloria”?
10 Den e promé siglo di nos era, tabatin tenshon entre e orguyoso Rei Herodes Agripa di Hudea i e habitantenan di Tiro i Sidon ku kier a sera pas kuné. Na un okashon ora Herodes tabata duna un diskurso, e hendenan a grita: “Ta bos di un dios i no di un hende!” Herodes no a rechasá e gloria ku hende a dun’é, i un angel di Yehova a dal é i el a muri un morto teribel “pasobra e no a duna Dios e gloria.” (Echo. 12:20-23) Awor, kiko si nos ta un oradó òf maestro ábil di e bèrdatnan di Beibel? E ora ei, laga nos duna gloria na Dios pa loke e ta permití nos hasi.—1 Kor. 4:6, 7; Sant. 4:6.
Sea Fuerte i Tene Kurashi
11, 12. Kon e eksperensia di Enok ta mustra ku Yehova ta duna su sirbidónan kurashi i fortalesa?
11 Si nos ta kana humildemente den e kamindanan di Yehova, lo e duna nos kurashi i fortalesa. (Deu. 31:6-8, 23) Ku kurashi, Enok, e di shete hòmber den liña di desendensia di Adam, a kana ku Dios dor di hiba un bida rekto meimei di su kontemporáneonan malbado. (Gén. 5:21-24) Yehova a duna Enok fortalesa p’e hiba un mensahe poderoso na e hendenan aki pa motibu di nan palabra- i echonan malbado. (Lesa Hudas 14 i 15.) Abo tin e kurashi nesesario pa deklará e huisionan di Dios?
12 Den tempu di Noe, Yehova a ehekutá huisio riba e malbadonan mediante un Diluvio mundial. Sin embargo, e profesia di Enok ta un animashon pa nos pasobra pronto Dios lo bini ku hopi míles di su angelnan santu pa destruí e hendenan malbado den nos tempu. (Rev. 16:14-16; 19:11-16) Komo kontesta riba nos orashonnan, Yehova ta duna nos kurashi pa deklará su mensahe, sea ku e tin di haber ku su huisionan òf ku su bendishonnan ku nos lo haña bou di e Reino.
13. Dikon nos por ta sigur ku Dios por duna nos e kurashi i fortalesa ku nos tin mester pa trata ku problemanan ku ta deprimí nos?
13 Nos tin mester di e kurashi i fortalesa ku Dios ta duna pa nos por trata ku problemanan ku ta deprimí nos. Ora Esau a kasa ku dos hende muhé heteo, “nan a trese amargura den bida di [su mayornan] Isaak i Rebeka.” Rebeka a asta lamentá: “Mi ta fadá di mi bida pa motibu di e yu muhénan di Hèt; si [nos yu hòmber] Jakòb tuma un esposa manera esakinan, for di e yu muhénan di Hèt, for di e yu muhénan di e tera, pakiko biba ainda anto?” (Gén. 26:34, 35; 27:46) Isaak a tuma akshon i a manda Jakòb bai buska un esposa entre e adoradónan di Yehova. Ounke Isaak i Rebeka no por a kambia loke Esau a hasi, Dios a duna nan e sabiduria, kurashi i fortalesa pa keda fiel na Dje. Si nos hasi orashon pa haña e yudansa nesesario, Yehova lo hasi meskos pa nos.—Sal. 118:5.
14. Kon e hobensita israelita a demostrá kurashi?
14 Siglonan despues, tabatin un mucha muhé chikitu israelita ku un grupo di bandidu a kohe komo katibu i ku a bira kriá den kas di e kapitan di ehérsito sirio, Naaman, un hòmber ku tabatin lepra. E mucha muhé a tende di e milagernan ku Dios a hasi mediante e profeta Eliseo. P’esei, ku kurashi el a bisa e esposa di Naaman: ‘Si mi shon Naaman bai Israel, e profeta di Yehova lo kur’é di su lepra.’ I Naaman a bai Israel i el a ser kurá milagrosamente. (2 Rei. 5:1-3) E mucha muhé ei a pone un ekselente ehèmpel pa hóbennan ku ta dependé riba Yehova pa nan por haña kurashi pa duna testimonio na maestro-, koleganan di skol i otro hende.
15. Ki akto di kurashi Abdias e mayordomo di Akab a efektuá?
15 E kurashi ku Dios ta duna ta yuda nos soportá persekushon. Pensa riba Rei Akab su mayordomo, Abdias, un kontemporáneo di profeta Elias. Ora Reina Jezabel a duna òrdu pa mata e profetanan di Dios, Abdias a skonde 100 profeta “na sinkuenta-sinkuenta den un kueba.” (1 Rei. 18:13; 19:18) Abo tambe lo tin e kurashi pa yuda bo kompañeronan kristian ku ta ser persiguí, meskos ku Abdias a yuda profetanan di Yehova?
16, 17. Kon Aristarko i Gayo a reakshoná ora nan a haña nan ku persekushon?
16 Si nos ta ser persiguí, nos por tin e konfiansa ku Yehova lo ta ku nos. (Rom. 8:35-39) Den e teatro na aire liber na Efeso, Pablo su kompañeronan di trabou, Aristarko i Gayo, a haña nan konfrontá ku un multitut violento ku probablemente a konsistí di míles di persona. E platé Demetrio a instigá un lantamentu. E i su kompañeronan di fishi tabata traha tèmpelnan chikitu di plata di e diosa Artémis. I nan negoshi lukrativo tabata kore peliger pasobra Pablo su trabou di prediká a pone ku hopi di e habitantenan di e stat a stòp di adorá ídolo. E multitut a lastra Aristarko i Gayo hiba nan den e teatro i a sigui grita: “Grandi ta Artémis di e efesionan!” Probablemente Aristarko i Gayo a pensa ku nan lo muri, pero e registradó òf sekretario di e stat a kalma e multitut.—Echo. 19:23-41.
17 Si ta abo mester a pasa den un eksperensia asina, lo bo a buska un manera di biba ku ta mas fásil i ku ménos problema? No tin ningun indikashon ku Aristarko òf Gayo a pèrdè kurashi. Siendo ku Aristarko a bini di Tesalónika, e tabata sa ku proklamashon di e bon nobo por a resultá den persekushon. Algun tempu mas promé, a surgi un disturbio einan ora Pablo tabata prediká. (Echo. 17:5; 20:4) Debí ku Aristarko ku Gayo tabata kana den e kamindanan di Yehova, nan tabatin e fortalesa i kurashi ku Dios ta duna hende pa soportá persekushon.
Buska Interes di Otronan
18. Kon Prisila i Akila a “buska” interes di otro hende?
18 Sea ku nos ta ser persiguí awor òf nò, nos mester ta interesá den nos kompañeronan kristian. Prisila i Akila a “buska” interes di otro hende. (Lesa Filipensenan 2:4.) Podisé e pareha kasá ehemplar ei a duna hospedahe na Pablo na Efeso, kaminda e platé Demetrio a provoká e lantamentu menshoná anteriormente. Kisas ta e situashon ei a motivá Akila i Prisila pa “riska nan bida” pa Pablo. (Rom. 16:3, 4; 2 Kor. 1:8) Awendia, interes den nos rumannan ku ta ser persiguí ta hasi nos “kouteloso manera kolebra.” (Mat. 10:16-18) Nos ta kumpli ku nos trabou koutelosamente i ta nenga di traishoná nos rumannan dor di divulgá nan nòmber òf otro informashon na e persiguidónan.
19. Ki bon kosnan Dorkas a hasi pa otro hende?
19 Tin vários manera pa buska interes di otro hende. Algun kristian tin nesesidatnan ku kisas nos por satisfasé. (Efe. 4:28; Sant. 2:14-17) Den e kongregashon di promé siglo na Jope, tabatin un hende muhé generoso ku yama Dorkas. (Lesa Echonan 9:36-42.) Dorkas “tabata abundá den echonan di karidat i bon obra” ku evidentemente a inkluí kosementu di paña pa biudanan den nesesidat. Su morto na aña 36 di nos era a kousa masha tristesa entre e biudanan. Dios a usa apòstel Pedro pa resusitá Dorkas, i ta parse ku el a pasa e restu di su bida riba tera ku goso predikando e bon nobo i hasiendo kos bon pa otro hende. Nos ta masha kontentu ku entre nos awe tambe nos tin rumannan muhé kristian generoso asina!
20, 21. (a) Kiko enkurashamentu tin di haber ku buska interes di otro hende? (b) Kiko abo por hasi pa enkurashá otronan?
20 Nos ta buska interes di otro hende dor di enkurashá nan. (Rom. 1:11, 12) Pablo su ko-trahadó Silas tabata un fuente di enkurashamentu. Rònt di aña 49, despues ku e kuerpo gobernante na Yerusalèm a tuma un desishon enkuanto e kuestion di sirkunsishon, el a manda representantenan ku un karta pa e kreyentenan ku tabata biba na otro lugá. Silas, Hudas, Barnabas i Pablo a hiba e karta Antiokia. Einan, Silas i Hudas a “enkurashá i fortifiká e rumannan ku hopi palabra,” esta, ku vários diskurso.—Echo. 15:32.
21 Mas despues, Pablo ku Silas a ser enkarselá na Filipos, pero debí na un temblor, nan a haña e oportunidat di duna testimonio i mira kon e wardadó di prezu i su famia a bira kreyente. Promé ku Silas i Pablo a bandoná e stat, nan a enkurashá e rumannan. (Echo. 16:12, 40) Meskos ku Pablo i Silas, hasi esfuerso pa enkurashá otro hende mediante bo komentario-, diskursonan i partisipashon den sirbishi di vèlt ku entusiasmo. I ora bo tin “un palabra di ekshortashon” òf un palabra pa enkurashá otronan, no vasilá, “papia numa.”—Echo. 13:15.
Sigui Kana den e Kamindanan di Yehova
22, 23. Kon nos por benefisiá realmente di relatonan bíbliko?
22 Nos mester ta masha gradisidu pa e relatonan di bida real registrá den e Palabra di Yehova, e “Dios di tur animashon”! (2 Kor. 1:3, Byington) Si nos ke benefisiá di e eksperensianan ei, nos tin ku apliká e lèsnan bíbliko ku nan ta kontené den nos bida i permití Dios su spiritu santu guia nos.—Gal. 5:22-25.
23 Meditashon riba relatonan di Beibel lo yuda nos desplegá kualidatnan ku ta agradá Dios. Ademas, lo e fortalesé nos relashon ku Yehova, kende ta duna nos “sabiduria i konosementu i goso.” (Ekl. 2:26) I nos, na nos turno, por alegrá kurason di nos Dios amoroso. (Pro. 27:11) Laga nos ta determiná pa hasi esei dor di sigui kana den e kamindanan di Yehova.
Kon Lo Bo Kontestá?
• Kon bo por demostrá ku bo ta konfiabel i ta kumpli ku bo promesanan?
• Dikon nos mester ta “humilde”?
• Kon relatonan bíbliko por yuda nos tene kurashi?
• Den ki maneranan nos por buska interes di otro hende?
[Preguntanan di Estudio]
[Plachi na página 18]
Fiel Jefte i su yu muhé a kumpli ku Jefte su promesa, ounke esaki tabata difísil
[Plachi na página 18]
Hóbennan, kiko boso a siña di e mucha muhé israelita?
[Plachi na página 19]
Kon Dorkas a satisfasé e nesesidatnan di su kompañeronan kristian?