Bo Ta Mira Otro Hende Manera Yehova Ta Mira Nan?
Bo Ta Mira Otro Hende Manera Yehova Ta Mira Nan?
“No tin divishon den e kurpa . . . e miembronan [mester] tin e mesun perkurashon un pa otro.”—1 KOR. 12:25.
1. Kon bo a sinti ora ku na prinsipio bo a drenta den e paradeis spiritual?
NA PRINSIPIO, ora ku nos a sali for di e mundu malbado i a kuminsá asosiá ku e pueblo di Yehova, muy probablemente nos tabata masha enkantá ku e amor kaluroso i interes personal ku ta reina den nan. Ki un kontraste ku e hendenan brutu, odioso i buskadó di pleitu ku ta bou di kontròl di Satanas! Nos a drenta den e paradeis spiritual ku ta yen di pas i union.—Isa. 48:17, 18; 60:18; 65:25.
2. (a) Kiko por afektá nos manera di mira otro hende? (b) Kiko kisas nos lo tin ku hasi?
2 Sin embargo, segun tempu ta pasa, nos lo por kuminsá mira nos rumannan dor di e brel di imperfekshon. Nos imperfekshon por pone nos eksagerá e debilidatnan di nos rumannan en bes di mira tur e bon kualidatnan spiritual ku nan tin. Ku poko palabra, nos ta lubidá di mira nan manera Yehova ta mira nan. Si esaki ta pasando ku nos, ta tempu pa nos analisá nos manera di mira otro hende i armonisá esaki ku Yehova su manera kla di mira kosnan.—Eks. 33:13.
Kon Yehova Ta Mira Nos Rumannan?
3. Ku kiko Beibel ta kompará e kongregashon kristian?
3 Manera nos por lesa na 1 Korintionan 12:2-26, apòstel Pablo a kompará e kongregashon di kristiannan ungí ku un kurpa ku “hopi miembro.” Meskos ku kada órgano di kurpa ta distinto for di otro, asina miembronan di e kongregashon ta basta distinto for di otro pa loke ta personalidat i abilidat. Sin embargo, Yehova ta aseptá e variedat aki. E ta stima i apresiá kada miembro. P’esei tambe Pablo a bisa ku e miembronan di e kongregashon mester ‘perkurá pa otro,’ pues, mustra interes personal den otro. Esaki por ta difísil pasobra ta kada ken tin su mes personalidat.
4. Dikon nos kisas tin ku ahustá nos manera di mira nos rumannan?
4 Podisé nos tin asta e tendensia di enfoká riba e debilidatnan di nos rumannan. Bon mirá, si nos ta hasi esei, ta komo si fuera nos ta usa un kámara ku tin un lèns ku ta enfoká riba un área chikí so. Na kontraste, Yehova ta mira nos rumannan manera dor di un lèns di ángulo hanchu ku ta permitié mira tantu e persona komo e área rònt di dje. Kisas nos tin tendensia di enfoká òf “zoom” riba algu ku nos no ta gusta, miéntras ku Yehova ta mira henter e persona, inkluso tur su bon kualidatnan. Mas esfuerso nos hasi pa ta manera Yehova, mas nos por kontribuí na e spiritu di amor i unidat den kongregashon.—Efe. 4:1-3; 5:1, 2.
5. Dikon no ta bon pa husga otro hende?
5 Hesus tabata bon konsiente di e echo ku hende imperfekto hopi bes ta kla pa krítika òf husga otro. El a konsehá: “Stòp di husga pa boso no wòrdu husgá.” (Mat. 7:1, NW) Segun e idioma original, Hesus no a djis bisa: “No husga,” manera algun Beibel ta bisa. Mas bien e di “stòp di husga,” pasobra e tabata sa ku hopi di su oyentenan ya kaba tabatin e kustumber di krítika otro hende. Akaso nos tambe a kria e kustumber ei? Si nos tin e tendensia ei, nos lo tin ku traha duru pa hasi kambio pa nos no risibí un huisio desfaborabel. Realmente, ken nos ta pa husga un hende ku Yehova ta usando den un puesto nombrá òf pa bisa ku lo e no por ta parti di e kongregashon? Un ruman kisas tin un òf otro debilidat, pero si te ainda e ta bon pa Yehova, lo ta korekto pa nos rechas’é? (Juan 6:44) Di bèrdat nos ta kere ku Yehova ta dirigiendo su organisashon i ku si tin mester di ahuste, lo e tuma akshon na su debido tempu?—Lesa Romanonan 14:1-4.
6. Kon Yehova ta mira su sirbidónan?
6 Yehova tin e kapasidat maravioso di por mira den kada kristian kiko e por bira unabes e alkansá perfekshon den e mundu nobo. E sa tambe kuantu progreso el a hasi kaba den apliká loke el a siña for di Beibel. P’esei, e no tin motibu pa konsentrá riba su debilidatnan karnal. Nos ta lesa na Salmo 103:12: “Mes leu ku pariba ta for di pabou, mes leu el a alehá nos transgreshonnan for di nos.” Kada un di nos por ta masha gradisidu pa esei!—Sal. 130:3.
7. Kiko nos ta siña for di e manera ku Yehova a mira David?
7 Nos ta haña prueba den e Skritura ku Yehova tin e kapasidat ekstraordinario di enfoká riba e bon ku tin den un persona. Dios a deskribí David komo “mi sirbidó David, kende a warda mi mandamentunan i a sigui mi ku henter su kurason, pa hasi solamente loke tabata bon den mi bista.” (1 Rei. 14:8) Klaru ku nos sa ku David a hasi algun kos ku tabata malu. Sin embargo, Yehova a opta pa enfoká riba e bon kualidatnan di David pasobra e tabata sa ku su kurason tabata íntegro i rekto.—1 Kró. 29:17.
Mira Bo Rumannan Manera Yehova Ta Mira Nan
8, 9. (a) Den ki sentido nos por ta meskos ku Yehova? (b) Kon nos lo por ilustrá esaki, i ki lès e tin pa nos?
8 Yehova por lesa kurason, miéntras ku nos sí no por. Esaki riba su mes ta un bon motibu pa nos no ta kla pa kritiká òf husga otro. Nos no sa kiko ta tur e kosnan ku ta motivá un persona pa aktua. Nos mester purba imitá Yehova dor di no fiha nos atenshon riba imperfekshon humano, ya ku eseinan ku tempu lo no t’ei mas. Lo no ta un bon meta pa nos ta meskos kuné den e aspekto aki? Esei lo kontribuí mashá na relashonnan pasífiko ku nos rumannan.—Efe. 4:23, 24.
9 Pa ilustrá esaki, pensa riba un kas tur dekaí: e dak falta plachi, bentananan ta kibrá i awa a daña parti di e plafòn. Kisas mayoria di hende ku wak e kas ta haña ku mester bash’é abou; e ta un bista masha mahos. Pero podisé ta pasa un persona ku ta mir’é di henteramente un otro manera. E ta mira mas leu ku e problemanan superfisial i ta tuma nota ku e struktura ta sólido i ku por restorá e kas. E ta kumpra e kas, hasi algun trabou di reparashon i drecha e defektonan eksterior i e aparensia. Despues di esei, tur hende ku pasa ei banda ta komentá kon bunita e kas a keda. Nos por ta manera e persona aki ku a traha pa drecha òf restorá e kas? En bes di enfoká riba e defektonan superfisial di nos rumannan, ta posibel pa nos tuma nota di nan bon kualidatnan i realisá ku nan tin e potensial pa krese mas den sentido spiritual? Si ta asina, nos lo siña stima nos rumannan pa nan beyesa spiritual, meskos ku Yehova ta stima nan.—Lesa Hebreonan 6:10.
10. Kon e konseho ku nos ta haña na Filipensenan 2:3 i 4 por yuda nos?
10 Apòstel Pablo a duna algun konseho ku por yuda nos den nos relashon ku tur ruman den kongregashon. El a urgi kristiannan: “No hasi nada ku un aktitut di egoismo òf orguyo, ma ku humildat laga kada un di boso konsiderá e otro mas importante ku e mes; no buska boso interes personal so, ma buska tambe interes di otronan.” (Fil. 2:3, 4) Humildat lo yuda nos mira otro hende di e manera korekto. E kustumber di mustra interes personal den otro hende i di buska e bon den nan lo yuda nos mira nan manera Yehova ta mira nan.
11. Ki kambio a tuma lugá den algun kongregashon?
11 Den tempunan resien, desaroyonan mundial a resultá den mudansa masal di hende. Pues, den algun stat ta biba awor hende for di masha hopi pais. Algun di e hendenan nobo ku a bin biba den nos área a interesá den e bèrdat bíbliko, i nan a djòin nos den e adorashon di Yehova. E hendenan aki ta “di tur nashon i tur tribu i pueblo i lenga.” (Rev. 7:9) Komo resultado, hopi di nos kongregashonnan den un sentido a bira mas internashonal.
12. Kon nos mester mira otro, i dikon esaki tin biaha no ta fásil?
12 Den nos kongregashon, kisas nos tin ku paga mas tinu na mira otro na e manera korekto. Pa hasi esei nos mester kòrda riba e konseho di apòstel Pedro pa manifestá “amor sinsero” i pa “stima otro fervientemente di kurason.” (1 Ped. 1:22) Podisé no ta fásil pa kultivá amor i kariño sinsero den un ambiente kaminda tin hende for di diferente parti di mundu. E kultura di nos rumannan den fe kisas ta masha distinto for di nos kultura, i e diferensia por ta sinta tambe den e echo ku nan ta bin di un otro nivel di edukashon, situashon ekonómiko òf grupo étniko. Bo tin problema pa komprondé e manera di pensa òf di reakshoná di algun ruman di otro kultura? Kisas nan ta pensa meskos di bo. Apesar di esei, nos tur ta haña e instrukshon: “Stima henter e asosiashon di rumannan.”—1 Ped. 2:17, NW.
13. Kisas nos tin ku hasi ki ahustenan den nos manera di pensa?
13 Podisé nos lo tin ku hasi algun ahuste den nos manera di pensa pa asina amplia nos amor pa inkluí tur nos rumannan. (Lesa 2 Korintionan 6:12 i 13.) Por ehèmpel, sa sosodé ku nos ta bisa: “No ta diskriminá mi ta diskriminá, pero . . . ” i e ora ei nos ta menshoná algun karakterístika negativo ku nos ta konsiderá komun entre miembronan di un sierto grupo étniko? E tipo di sintimentunan ei ta revelá ku nos tin ku eliminá e prehuisio ku ainda nos tin den fondo di nos kurason. Nos lo por puntra nos mes: ‘Mi ta hasi esfuerso riba un base regular pa siña konosé hende di otro kultura?’ Tal eksaminashon propio lo por yuda nos bira mas habrí i amoroso ku nos rumannan di otro nashonalidat.
14, 15. (a) Menshoná algun persona ku a ahustá nan manera di mira otro hende. (b) Kon nos por imitá nan?
14 Beibel ta duna nos ehèmpelnan ekselente di personanan ku a hasi ahuste den nan manera di pensa. Un di nan tabata apòstel Pedro. Komo hudiu, Pedro lo a evitá di drenta kas di un hende no-hudiu. Djis imaginá kon el a sintié ora ku a pidié bishitá kas di Cornelio, un hòmber insirkunsidá i no-hudiu! Pedro a hasi ahuste, pasobra el a ripará ku tabata e boluntat di Dios pa hende di tur nashon forma parti di e kongregashon kristian. (Echo. 10:9-35) Saulo, kende despues a bira apòstel Pablo, tambe tabatin ku hasi kambio i eliminá prehuisio. El a atmití ku e tabata odia e kristiannan asina tantu, ku el a “persiguí e iglesia di Dios sin miserikòrdia i tabata trata di destruyé.” Sin embargo, ora Señor Hesus a korigí Pablo, el a hasi kambio grandi i asta a aseptá instrukshon for di e personanan ku anteriormente e tabata persiguí.—Gal. 1:13-20.
15 No tin duda ku nos por hasi ahuste den nos aktitut ku yudansa di e spiritu santu di Yehova. Si nos ripará ku ainda nos tin rastronan di prehuisio, laga nos traha pa eliminá nan i pa “preservá e unidat di e spiritu den e vínkulo di pas.” (Efe. 4:3-6) Beibel ta animá nos pa “bisti amor, kual ta e laso perfekto di unidat.”—Kol. 3:14.
Imitá Yehova den Nos Sirbishi
16. Kiko ta e boluntat di Dios relashoná ku hende?
16 Apòstel Pablo a skirbi ku “no tin distinshon di persona serka Dios.” (Rom. 2:11) Yehova su propósito ta pa inkluí hende di tur nashon den su sistema di adorashon. (Lesa 1 Timoteo 2:3 i 4.) Pa logra esei, el a perkurá pa e bon nobo òf “evangelio eterno” ser proklamá na “tur nashon i tribu i lenga i pueblo.” (Rev. 14:6) Hesus di: “E kunuku ta e mundu.” (Mat. 13:38) Kiko esei ta nifiká pa bo i pa bo famia yegá?
17. Kon nos por yuda tur klase di hende?
17 No ta tur kristian por bai na e partinan leu di mundu pa hiba e mensahe di Reino pa e hendenan einan. Loke sí nos lo por hasi ta hiba e mensahe aki na hende for di tur parti di tera ku ta biba den nos teritorio. Nos ta atento pa oportunidatnan pa duna testimonio na tur klase di hende, i no solamente na esnan ku nos tin años ta prediká na dje? Pakiko no pone bo pa prediká na e hendenan ku ainda no a haña un testimonio kabal?—Rom. 15:20, 21.
18. Ki interes i preokupashon Hesus a manifestá pa hende?
18 Hesus tabatin e sintimentu fuerte ku e mester a yuda un i tur. E no a prediká den un área so. Un relato di Beibel ta bisa nos ku el a “pasa den tur e statnan i pueblitonan.” Anto ora ku “el a mira e multitutnan, el a sinti kompashon pa nan” i a bisa ku mester yuda nan.—Mat. 9:35-37.
19, 20. Den ki manera asina nos por reflehá e interes i preokupashon ku Yehova i Hesus tin pa tur klase di hende?
19 Den ki manera asina abo por desplegá e mesun aktitut? Tin ruman a hasi esfuerso pa prediká den partinan di nan teritorio ku no ta ser trahá ku frekuensia. Esaki por enserá áreanan komersial, parkenan, paradanan di transporte públiko òf dilanti di bario- òf edifisionan residensial ku no ta fásil pa drenta. Otro rumannan a hasi esfuerso pa siña un idioma nobo pa asina nan por prediká na sierto gruponan étniko ku awor ta biba den nan área òf na gruponan ku anteriormente no tabata haña testimonio riba un base regular. Tin biaha, djis siña kon pa kumindá e hendenan ei den nan idioma nativo por mustra kaba ku bo ta masha interesá den nan bienestar. Si nos no ta den e posishon pa siña un otro idioma, nos lo por animá esnan ku sí ta hasiendo esei? Un kos ta sigur, nos lo no ke ta negativo ni kuestioná pakiko otro rumannan ta hasiendo tantu esfuerso asina pa prediká na hende di otro pais. Bida di tur hende ta presioso den bista di Dios, i nos ke tin e mesun punto di bista.—Kol. 3:10, 11.
20 Si nos ta mira hende manera Dios ta mira nan, esei ta nifiká tambe ku nos ta prediká na tur hende, sin importá nan sirkunstansia. Tin di nan por ta hende deskuidá, hende ku ta biba riba kaya òf ku opviamente ta hibando un bida inmoral. Si sierto personanan no trata nos bon, esei no ta motibu pa nos forma un opinion negativo di henter nan nashonalidat òf nan grupo étniko. Algun hudiu a trata Pablo masha malu, pero e no a laga esei stòp e di prediká na hende hudiu. (Echo. 14:5-7, 19-22) E tabatin e konfiansa ku algun di nan lo a reakshoná ku apresio.
21. Ora bo ta mira hende manera Yehova ta mira nan, kon esei ta yuda bo?
21 Awor ta mas kla ku nunka ku nos mester tin e manera korekto di mira otro hende, esta, manera Yehova ta mira nan. Esei ta konta pa ora nos ta trata ku nos rumannan lokal, ku nos hermandat internashonal i ku e hendenan den vèlt. Mas nos ta reflehá Yehova su manera di mira nan, mas nos lo yuda kontribuí na pas i union. Ademas, nos lo ta den mihó posishon pa yuda otro hende apresiá Yehova. E ta e Dios ku no ta hasi distinshon di persona òf ku “no ta duna preferensia,” sino mas bien ta demostrá interes amoroso den tur hende “pasobra nan tur ta obra di su mannan.”—Jòb 34:19.
Bo Por Kontestá?
• Nos mester hasi esfuerso pa evitá ki manera di mira nos rumannan?
• Kon nos por imitá Yehova den e manera ku nos ta mira nos rumannan?
• Ki lèsnan bo a siña tokante e manera di mira nos hermandat internashonal?
• Kon nos por imitá Yehova su manera di mira hende ora nos ta den sirbishi?
[Preguntanan di Estudio]
[Plachi na página ]
Kon bo por siña konosé hende di otro kultura?
[Plachi na página 30]
Den ki maneranan bo por alkansá mas hende ku e bon nobo?