UN MINA DI KARBON den serkania di Pittsburgh, Pennsylvania, Merka, diripiente a keda inundá pa miónes di galòn di awa. Nuebe hende hòmber ku tabata traha den e mina a keda atrapá 73 meter bou di tera den un espasio chikí. Despues di tres dia nan a sali sano i salvo for di e mina. Kon nan a wòrdu reskatá?

Ku yudansa di mapa di e mina i GPS (Sistema pa Kalkulá Posishon Riba Tera), reskatistanan a bora un buraku di 65 centimeter hanchu i a laga un tipo di liftkooi chikitu (wak e plachi) baha bai te serka e hòmbernan ku tabata pèrtá riba otro. Un pa un, nan a saka e mineronan ku e liftkooi ei for di e lugá bou di tera ku por a bira nan graf. Nan tur tabata kontentu, aliviá i gradisidu ku nan a ser reskatá.

Mayoria di nos nunka lo no keda atrapá bou di tera manera e nuebe mineronan ei, ni nos lo no tin ku enfrentá morto den un katástrofe. Sin embargo, nos tur tin mester di un reskate, pasobra nos no por skapa di e konsekuensianan di malesa, behes i finalmente morto. Jòb, e patriarka ku a keda fiel na Dios, a deklará: “Hende ku a nase di muhé ta biba poko dia i ta yen di problema. Manera un flor e ta habri i ta marchitá. Manera un sombra e ta hui bai i no ta permanesé.” (Jòb 14:1, 2) Te awe, un 3.500 aña despues, e palabranan ei ta sierto. Pasobra kua di nos por skapa di bida su final, esta morto? Sin importá na unda nos ta biba òf kon bon nos ta kuida nos salú, nos tin mester di un reskate pa libra nos for di sufrimentu, behes i morto.

Sientífikonan i otro hende ta traha duru pa purba alargá bida di hende mas ayá di loke hende aktualmente ta konsiderá komo normal. Un organisashon ta deklará ku su mishon ta “pa vense e plaga di morto ku ta inevitabel” i “pa yuda su miembronan logra alkansá inmortalidat físiko pa hende.” Sin embargo, te asina leu e kombinashon di siensia avansá i un enorme forsa di boluntat no a logra alargá bida di hende mas ayá di e 70 òf 80 aña ku Moisés a menshoná 3.500 aña pasá.—Salmo 90:10.

Sea ku bo ta di akuerdo ku Jòb su sintimentu tokante bida i morto òf nò, segun ku aña ta pasa, bo tambe inevitablemente lo ‘hui bai manera un sombra,’ leu for di bo amigunan, famianan, bo kas i tur loke ku bo a logra—i finalmente muri. Salomon, e rei sabí di Israel di antigwedat a skirbi: “E bibunan sa ku nan lo muri, ma e mortonan no sa nada, ni nan no tin rekompensa mas, pasobra ningun hende no ta kòrda mas riba nan.”—Eklesiastés 9:5.

Manera Beibel ta splika, e realidat tristu ta ku “morto a reina” manera un gobernante kruel riba humanidat. Sí, morto ta e delaster enemigu for di kua humanidat mester ser reskatá. (Romanonan 5:14; 1 Korintionan 15:26) E reskatista mihó entrená i ekipá na mundu no por perkurá un eskape permanente pa bo. Sin embargo, e Kreadó di hende, Yehova Dios, sí a perkurá pa hustamente e tipo di reskate ei.