“Ken Entre Boso Ta Sabi i Huisioso?”

“Ken entre boso ta sabí i huisioso? Laga é mustra dor di su bon kondukta su obranan den suavedat di sabiduria.”—SANT. 3:13.

1, 2. Kiko bo por bisa di hopi hende ku mundu ta konsiderá sabí?

ORA bo ta papia di hende ku ta berdaderamente sabí, riba ken bo ta pensa? Tal bes riba bo mayornan, un hende di edat òf kisas un profèser di universidat? Bo pasado i sirkunstansianan personal por tin hopi di haber ku ken abo ta haña ta sabí. Sin embargo, sirbidónan di Dios ta prinsipalmente interesá den sú kriterio di ken ta sabí.

² No ta tur hende ku mundu ta konsiderá sabí ta berdaderamente sabí den bista di Dios. Por ehèmpel, Jòb a papia ku hende ku den nan mes bista tabata papia palabranan di sabiduria, pero Jòb a deklará: “Mi no ta haña ni ún hende sabí meimei di boso.” (Jòb 17:10) Relashoná ku algun persona ku a rechasá e konosementu di Dios, apòstel Pablo a skirbi: “Profesando di ta sabí, nan a bira bobo.” (Rom. 1:22) I pa medio di profeta Isaias, Yehova mes a bisa enfátikamente: “Ai di esnan ku ta sabí . . . den nan mes bista!”—Isa. 5:21.

3, 4. Pa un hende ta berdaderamente sabí, kiko e tin ku hasi?

³ Ta bon kla anto ku nos tin ku determiná kiko ta hasi un hende berdaderamente sabí, i asina, haña e aprobashon di Dios. Proverbionan 9:10 ta laga nos komprondé lo siguiente: “E temor di SEÑOR ta e prinsipio di sabiduria, i e konosementu di Esun Santu ta komprondementu.” Hende sabí mester tin un temor apropiá di Dios i rèspèt pa su normanan. Sin embargo, nos tin ku bai mas aleu ku djis aseptá mentalmente ku Dios ta eksistí i ku e tin su normanan. Disipel Santiago a duna nos kos pa pensa ariba. (Lesa Santiago 3:13.) Tuma nota di e ekspreshon: “Laga é mustra dor di su bon kondukta su obranan.” Pues, berdadero sabiduria mester ta bisto den loke bo ta bisa i hasi tur dia.

⁴ Berdadero sabiduria ta enserá mustra sano huisio, apliká konosementu na un manera eksitoso, komprondé loke ta rekto i biba di akuerdo ku esei. Ki akshonnan lo revelá ku nos ta poseé tal sabiduria? Santiago a menshoná algun kos ku lo ta bisto den e akshonnan di hende ku ta sabí. * Kiko el a bisa ku lo por yuda nos mantené un bon relashon ku nos rumannan den fe, i tambe ku hende pafó di e kongregashon?

Nos Akshonnan Ta Mustra Ku Nos Ta Berdaderamente Sabí

5. Kon un persona berdaderamente sabí lo komportá su mes?

⁵ Ta bon pa bolbe menshoná ku Santiago a konektá sabiduria ku bon kondukta. Komo ku temor di Yehova ta e prinsipio di sabiduria, un persona sabí ta trata di komportá su mes na armonia ku e kaminda- i normanan di Dios. Nos no a nase ku e sabiduria ku ta resultá den e aprobashon di Dios, pero sí nos por hañ’é ora nos ta studia Beibel regularmente i meditá riba dje. Esei lo yuda nos hasi loke Efesionan 5:1 ta manda nos hasi: “Sea imitadónan di Dios.” Mas nos komportá nos mes na armonia ku e personalidat di Yehova, mas nos lo manifestá sabiduria den nos akshonnan. Yehova su kamindanan ta muchu mas superior ku esnan di hende. (Isa.  55:8, 9) Pues, segun ku nos ta imitá Yehova su manera di hasi kosnan, hende pafó di e kongregashon lo mira ku nos ta diferente.

6. Dikon un hende suave ta duna prueba ku e ta imitando Dios, i kiko e kualidat aki ta enserá?

⁶ Santiago ta mustra ku un manera ku un persona por imitá Yehova ta ora e tin un “suavedat [ku ta pertenesé na] sabiduria.” Un persona suave ta un persona trankil. Pero si ta trata di un kristian, e mester tin tambe fortalesa moral, lokual ta yud’é aktua na un manera balansá. Ounke Dios su poder no tin límite, e ta suave i nos no tin miedu di aserk’é. E Yu di Dios a reflehá e suavedat di su Tata asina bon ku e por a bisa: “Bin serka mi tur ku ta kansá i kargá, i lo mi duna boso sosiegu. Tuma mi yugo riba boso, i siña di mi, pasobra mi ta mansu [“di genio suave,” NW] i humilde di kurason; i boso lo haña sosiegu pa boso alma.”—Mat. 11:28, 29; Fil. 2:5-8.

7. Pakiko nos por mira Moisés komo un bon ehèmpel di suavedat?

⁷ Beibel ta papia di mas hende ku tabata bon ehèmpel den ser suave òf mansu. Moisés tabata un di nan. Ounke e tabatin hopi responsabilidat, Beibel ta deskribié komo “masha humilde [òf, “mansu,”NW], mas ku tur hòmber ku tabatin riba superfisie di tera.” (Num. 11:29; 12:3) I kòrda riba e kurashi ku Yehova a duna Moisés pa el a kumpli ku Su boluntat. Yehova tabatin deleite den usa hende suave pa kumpli ku su propósito.

8. Kon hende imperfekto por desplegá e ‘suavedat ku ta pertenesé na sabiduria’?

⁸ Tur kos ta mustra ku ta posibel anto pa hende imperfekto desplegá e ‘suavedat ku ta pertenesé na sabiduria.’ Kiko di nos? Kon nos por mehorá den mustra e kualidat aki? Ser suave òf mansu ta parti di e fruta di Yehova su spiritu santu. (Gal. 5:22, 23) Nos por pidi pa haña su spiritu i hasi un esfuerso spesífiko pa desplegá su fruta, ku e konfiansa ku Dios lo yuda nos mehorá den mustra suavedat. Nos ta haña un motivashon fuerte pa hasi esei den e garantia ku e salmista a duna: “[Dios lo] siña e mansunan su kaminda.”—Sal. 25:9, NW.

9, 10. Kuantu esfuerso nos tin ku hasi pa desplegá e suavedat ku ta resultá den e aprobashon di Dios, i pakiko?

⁹ Sin embargo, podisé nos tin ku hasi hopi esfuerso pa mehorá riba e punto aki. Pa motibu di e ambiente den kua nos a lanta, kisas algun di nos di naturalesa no ta suave. Ademas, hende rònt di nos kisas ta fomentá nèt un punto di bista kontrali i bisa ku hende mester ‘paga kandela ku kandela,’ na moda di papia. Pero ta sabí pa hasi esei? Si un kandela chikitu kuminsá den bo kas, ku kiko lo bo purba pag’é? Ku gasolin òf ku awa? Gasolin ta pone e kandela bira mas grandi, miéntras ku si bo purba pag’é ku awa, bo tin mas chèns di logra e resultado deseá. Meskos tambe, Beibel ta konsehá nos: “Un kontesta suave ta kita rabia, ma un palabra skèrpi ta lanta rabia.” (Pro. 15:1, 18) E siguiente biaha ku nos sinti nos provoká, sea den kongregashon òf pafó di dje, nos por mustra ku nos tin berdadero sabiduria dor di reakshoná na un manera suave.—2 Tim. 2:24.

¹⁰ Manera nos a menshoná anteriormente, hopi hende ku ta bou di influensia di e spiritu di mundu sigur no ta suave, pasífiko i kalmu. Al kontrario, nos ta kontra ku hopi hende brutu i arogante. Santiago tabata konsiente di esaki, i el a spièrta miembronan di kongregashon pa nan no laga e spiritu ei kontaminá nan. Kiko mas nos por siña for di e konseho ku el a duna?

Karakterístika di Hende Ku No Ta Sabí

11. Ki karakterístikanan ta bai kontra e sabiduria ku ta bini di Dios?

¹¹ Santiago tabata masha franko tokante e karakterístikanan ku ta bai direktamente kontra e sabiduria ku ta bini di Dios. (Lesa Santiago 3:14.) Envidia i egoismo [“pleitamentu,” NW] ta karakterístikanan karnal, no spiritual. Wak kiko ta pasa ora pensamentu karnal ta prevalesé. Tin seis grupo di “kristian” ta manehá partinan di e Misa di e Graf Santu na Yerusalèm, konstruí supuestamente na e lugá kaminda nan a mata i dera Hesus. Ta kontinuamente e gruponan aki ta pleita ku otro. Na 2006, e revista Time a konta di un insidente anterior kaminda algun frater einan a “pleita ku otro pa oranan largu, . . . batiendo otro  ku kandelá grandi.” Nan deskonfiansa den otro ta asina grandi ku mester laga un mòslem warda e yabi di e misa.

12. Kaminda no tin sabiduria, kiko lo por sosodé?

¹² Den e kongregashon kristian berdadero sigur no mester tin e manifestashonnan ekstremo ei di pleitamentu. Esei no ta kita sí ku imperfekshon sa pone algun ruman bira terko den nan manera di mira kosnan, lokual por hiba na algun diskushon i desakuerdo. Apòstel Pablo a tuma nota di esaki den e kongregashon na Korinto, i p’esei el a skirbi: “Komo ku ta eksistí envidia, pleitu i divishon entre boso, no ta karnal boso ta, i no ta manera tur hende boso ta kana?” (1 Kor. 3:3) E situashon lamentabel ei en bèrdat a eksistí pa un tempu den e kongregashon aki di promé siglo. P’esei nos mester tene kuidou pa e spiritu ei no penetrá den kongregashon awe.

13, 14. Kon asina un spiritu karnal por manifestá su mes?

¹³ Kon un spiritu asina por ‘slùip’ drenta? E por kuminsá ku kosnan chikitu. Por ehèmpel, ora rumannan ta konstruí un Salòn di Reino, por surgi diferensia di opinion riba kon mester hasi sierto kos. Kisas un ruman ta duna un sugerensia ku e otronan no ta aseptá. Esei ta pone e ruman kuminsá piki pieu, i e por bai asina leu di keda kritiká tur desishon ku ser tumá. E por asta nenga di sigui traha riba e proyekto! Un persona ku aktua asina ta lubidá ku realisashon di un proyekto ku tin di haber ku e kongregashon por lo general ta dependé mas di e spiritu pasífiko di e kongregashon ku di e método spesífiko ku ta ser usá. Loke Yehova ta bendishoná ta un spiritu di suavedat, no di pleitamentu.—1 Tim. 6:4, 5.

¹⁴ Konsiderá un otro ehèmpel: Kisas e ansianonan di un kongregashon ta ripará ku ounke un ansiano den e kuerpo tin algun aña ta sirbi kaba, ta bisto ku e no ta kumpliendo mas ku e rekisitonan bíbliko. Mirando ku e ruman a risibí konseho spesífiko kaba den pasado i no a mehorá, e superintendente di sirkuito ku ta bishitando e kongregashon ta pensa meskos i ta bai di akuerdo pa rekomendá pa baha e ruman komo ansiano. Kon e ansiano en kuestion lo mira esei? Lo e aseptá konseho di Beibel i e desishon unánime di e ansianonan ku un aktitut humilde i suave, i keda determiná pa traha pa kumpli ku e rekisitonan bíbliko pa asina e por bolbe sirbi komo ansiano? Òf lo e karga renkor i envidia pa motibu ku e no tin e privilegio mas ku un tempu e tabatin? Pakiko un ruman lo aktua komo si fuera e ta kualifiká komo ansiano siendo ku en realidat esei no ta e kaso? Ta muchu mas sabí pa mustra humildat i sano huisio!

15. Pakiko bo ta haña e konseho inspirá di Santiago 3:15 i 16 asina importante?

¹⁵ Klaru ku tin otro situashonnan ku por hiba na un aktitut similar. Pero sea kual sea e situashon ku presentá, nos tin ku hasi esfuerso pa evitá e karakterístikanan ei. (Lesa Santiago 3:15 i 16.) Disipel Santiago a yama e aktitutnan ei  “terenal” pasobra nan ta karnal, i no ta basá riba e sabiduria djariba. Nan ta “natural” [òf, “animal,” NW] den e sentido ku nan ta produkto di inklinashonnan karnal, manera karakterístikanan di bestia ku no por rasoná. E aktitutnan ei ta “diabóliko,” pasobra nan ta reflehá e karakterístikanan di e kriaturanan spiritual ku ta enemigu di Dios. E karakterístikanan ei sigur no ta pas pa un kristian!

16. Podisé nos tin ku hasi ki ahustenan, i kon nos por logra esei?

¹⁶ Lo ta bon pa kada miembro di kongregashon saminá su mes i hasi esfuerso pa eliminá e karakterístikanan ei. Komo maestro den e kongregashon, superintendentenan tambe mester hasi esfuerso pa eliminá e aktitutnan negativo aki. Pa motibu di nos imperfekshon i e influensia di e mundu aki, no ta fásil pa logra esaki. Ta meskos ku ora nos ta purba subi un seritu tur na lodo i ku ta slep. Si no tin nada pa tene na dje, nos por slep bai abou bèk. Sin embargo, si nos ‘tene’ estrechamente na e konseho ku nos ta haña den Beibel i tambe aseptá e yudansa di e kongregashon mundial di Dios, nos por bai dilanti.—Sal. 73:23, 24.

Kualidatnan Ku Hende Sabí Ta Trata na Desplegá

17. Por lo general, kon hende sabí ta reakshoná ora nan haña nan konfrontá ku maldat?

¹⁷ Lesa Santiago 3:17. Ta bon pa nos analisá algun di e kualidatnan ku ta bini komo resultado di desplegá “e sabiduria di ariba.” Ser puru ta enserá ser limpi i sin mancha den nos akshon- i motivashonnan. Nos tin ku rechasá kos malu mesora; nos reakshon mester ta outomátiko. Por ehèmpel, si un hende purba hinka dede den bo wowo, kiko bo ta hasi? Bo ta reakshoná mesora halando bo kabes atras òf blòkiando su man. Bo ta hasi esei outomátikamente; bo no tin nodi pensa pa hasié. Ta meskos tambe ora nos ta ser tentá pa kometé maldat. Nos puresa i nos konsenshi entrená a base di Beibel mester pone nos rechasá outomátikamente loke ta malu. (Rom. 12:9) Beibel ta duna ehèmpel di personanan ku a reakshoná den e forma aki, tal komo Hosé i Hesus.—Gén. 39:7-9; Mat. 4:8-10.

18. Kiko ta nifiká (a) ser pasífiko? (b) ser un hasidó di pas?

¹⁸ Sabiduria divino ta rekerí tambe pa nos ta pasífiko. Esaki ta enserá evitá agresividat, un aktitut di ta kla pa bringa, òf akshonnan ku por desbaratá pas. Santiago a amplia riba e punto aki ora el a bisa: “E simia, kual su fruta ta hustisia, ta wòrdu sembrá den pas dor di esnan ku ta hasi pas.” (Sant. 3:18) Ripará e ekspreshon “hasi pas.” Den kongregashon, nos tin e fama di ta hasidó di pas òf kibradó di pas? Ta kada bes nos tin desakuerdo ku otro hende, den kua nos ta sinti nos fásilmente ofendí òf nos ta ofendé otro hende? Nos ta insistí ku otro hende mester aseptá nos manera nos ta, òf nos ta traha humildemente pa eliminá karakterístikanan di nos personalidat ku ta duna otro hende motibu pa nan sinti nan ofendí? Nos ta konosí komo personanan ku semper ta hasi esfuerso pa promové pas, siendo kla pa pordoná i lubidá fayo di otro? Ta bon pa nos analisá nos mes frankamente. Esei por yuda nos mira si nos mester mehorá den desplegá sabiduria divino riba e punto aki.

19. Kon bo por haña e reputashon di ta un persona rasonabel?

¹⁹ Santiago a inkluí ser rasonabel den e deskripshon di loke ta reflehá e sabiduria di ariba. Nos ta konosí komo un persona ku ta dispuesto na sede ora no tin prinsipio bíbliko enbolbí, i ku no ta insistí muchu riba nos preferensianan? Nos tin e reputashon di ta suave i fásil pa papia kuné? Esakinan ta indikashonnan ku nos a siña pa ta rasonabel.

20. Kiko lo ta e resultado si nos manifestá e kualidatnan ku ta agradá Dios, manera esnan ku nos a kaba di analisá?

²⁰ Ora rumannan ta hasi mas i mas esfuerso pa desplegá e kualidatnan ku ta agradá Dios—esnan ku Santiago a menshoná—lo reina un dushi ambiente den kongregashon. (Sal. 133:1-3) Ora nos ta suave, pasífiko i rasonabel ku otro, sin duda nos relashon ku otro lo bira mihó i pa tur hende lo ta bisto ku nos tin “e sabiduria di ariba.” Den e siguiente artíkulo nos lo analisá kon nos por kultivá e kualidatnan ei ora nos siña mira otro hende manera Yehova ta mira nan.

[Nota]

Bo Por Splika?

• Kiko ta hasi un kristian berdaderamente sabí?

• Kon nos por mehorá den mustra e sabiduria ku ta bini di Dios?

• Ki karakterístika nos ta mira den hende ku no ta desplegá “e sabiduria di ariba”?

• Ki kualidatnan bo ta determiná pa kultivá mas i mas?

[Preguntanan di Estudio]

[Plachi na página 26]

Kon un spiritu di pleita por slùip drenta awe?

[Plachi na página 26]

Bo reakshon outomátiko ta di rechasá maldat?