KASI 2.000 aña pasá, riba e Pasku Hudiu di aña 33 di nos era, un hòmber inosente a muri pa otro hende por biba. Ken e hòmber ei tabata? E hòmber ei tabata Hesus di Názarèt. I ken por benefisiá di e akto noble ei? Henter humanidat por benefisiá. Un teksto bíbliko bon konosí ta resumí e sakrifisio ei ku ta salba bida asin’aki: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.”—Juan 3:16.

Maske e teksto ei ta bon konosí pa mayoria di hende, masha poko ta komprondé kiko e ta nifiká realmente. Nan ta puntra nan mes: ‘Pakiko nos tin mester di Kristu su sakrifisio? Kon morto di ún hende por reskatá humanidat for di morto eterno?’ Beibel ta kontestá e preguntanan aki na un manera kla i satisfaktorio.

Tin persona ta kere ku hende a ser kreá pa biba un tempu kòrtiku riba tera, pasa den problema, disfrutá di un poko felisidat, anto pa despues nan muri i bai na un lugá mas mihó. Segun e pensamentu aki, morto ta parti di Dios su propósito pa humanidat. Sin embargo, Beibel ta mustra ku morto ta afligí hende pa un otro motibu. E ta bisa: “Dor di ún hende piká a drenta den mundu, i morto dor di piká, i asina morto a pasa pa tur hende, pasobra tur a peka.” (Romanonan 5:12) E versíkulo aki ta mustra ku hende ta muri pa motibu di piká. Pero, ken ta e “ún hende” ku a kontagiá humanidat ku e efektonan di piká ku ta hiba na morto?

The World Book Encyclopedia ta remarká ku mayoria di sientífiko ta kere ku tur hende a bin di e mesun fuente, i Beibel ta identifiká e úniko fuente ei bon kla—“ún hende.” Na Génesis 1:27 nos ta lesa: “Dios a krea hende segun su mes imágen; segun e imágen di Dios el a krea hende; hòmber i muhé el a krea nan.” P’esei Beibel ta deklará ku loke a koroná Dios Todopoderoso su obra di kreashon ta e promé pareha humano.

E relato di Génesis ta duna mas detaye tokante bida humano despues ku Yehova Dios a kreá e promé hende. Ta interesante pa mira ku den henter e relato ei, e úniko biaha ku Dios ta menshoná morto ta komo konsekuensia di desobedensia. (Génesis 2:16, 17) E tabata ke pa hende biba felis i salú pa semper den un bunita paradeis riba tera. E no tabata ke pa nan sufri di e efektonan di edat avansá i finalmente muri. Pero dikon anto morto a poderá di humanidat?

Génesis kapítulo 3 ta relatá kon e promé pareha humano deliberadamente a disidí di desobedesé nan Dunadó di Bida, Yehova Dios. Komo konsekuensia, Dios a ehekutá e sentensia ku el a bisa nan di dje. El a bisa e hòmber: “Stòf bo ta, i na stòf lo bo bolbe.” (Génesis 3:19) Manera Dios su palabra a bisa, e dos hendenan desobediente a muri ku tempu.

Sin embargo, e daño ku e promé pareha a kousa no a afektá nan so. Pa motibu di nan desobedensia, nan desendientenan a pèrdè e speransa di disfrutá di un bida perfekto. Yehova a inkluí hende ku no a nase ainda den su propósito ora el a bisa Adam ku Eva: “Sea fruktífero i multipliká, i yena e tera i  hasi esaki someté na bo; i goberná riba e piskánan di laman i riba e paranan di shelu, i riba tur ser bibu ku ta move riba tera.” (Génesis 1:28) Ku tempu, e famia humano lo a yena e tera i disfrutá di un bida sumamente felis sin ku nan lo a muri. Pero nan antepasado Adam—e “ún hende”—a bende nan komo esklabo na piká, i komo resultado morto a bira inevitabel. Apòstel Pablo, un desendiente di e promé hòmber, a skirbi: “Ami ta di karni, bendí komo esklabo na piká.”—Romanonan 7:14.

Meskos ku vandalistanan a kousa daño na obranan di arte di balor inkalkulabel den añanan resiente, asina Adam, mediante su piká, a kousa daño serio na Dios su maravioso kreashon—humanidat. Adam su yunan a haña yu, despues nietu, asina mas generashon a bin aserka. Kada generashon ku a sigui a nase, krese, haña yu, anto finalmente muri. Dikon nan tur a muri? Pasobra nan tur tabata desendiente di Adam. Beibel ta bisa: “Dor di transgreshon di esun hende hopi hende a muri.” (Romanonan 5:15) Malesa, behes, e tendensia di hasi kos robes i morto mes ta konsekuensianan lamentabel di e echo ku Adam a traishoná su mes famia. Nos tur ta parti di e famia ei.

Den su karta na e kristiannan na Roma, apòstel Pablo a skirbi tokante e kondishon tristu di hende imperfekto, inkluyendo su mes, i di e lucha frustrante kontra e efektonan di piká. El a sklama: “Hende miserabel ku mi ta! Ken lo libra mi di e kurpa di morto aki?” Un bon pregunta, no ta asina? Ken lo ofresé Pablo—i tur otro hende ku ta deseá esei—un reskate for di sklabitut na piká i morto? Pablo mes a duna e kontesta: ‘Mi ta duna gradisimentu na Dios mediante Hesukristu, nos Señor!’ (Romanonan 7:14-25) Sí, nos Kreadó a hasi areglo pa reskatá nos mediante su Yu, Hesukristu.

Hesus a deskribí e papel ku el a hunga den reskatá humanidat for di sklabitut na piká ku ta hiba na morto. El a bisa: ‘E Yu di Hende a bin pa duna su bida komo preis di reskate pa hopi.’ (Mateo 20:28) Kon Hesus su bida ta  sirbi komo un reskate? Kon su morto ta benefisiá nos?

Beibel ta bisa ku Hesus ta “sin piká” i “separá for di pekadónan.” Durante henter su bida, Hesus a obedesé Dios su lei perfektamente. (Hebreonan 4:15; 7:26) P’esei, Hesus su morto no tabata e konsekuensia di piká i desobedensia manera tabata e kaso di Adam. (Ezekiel 18:4) Mas bien, Hesus a aseptá un morto ku e no a meresé. Pero el a hasié pa e por a kumpli ku e boluntat di su Tata pa reskatá humanidat for di piká i morto. Manera a ser menshoná kaba, Hesus boluntariamente a bin “pa duna su bida komo preis di reskate.” Ku un amor ku ningun hende hamas a yega di mustra, Hesus boluntariamente ‘a eksperensiá morto pa tur hende.’—Hebreonan 2:9.

E bida ku Hesus a sakrifiká tabata eksaktamente di e mesun balor ku e bida ku Adam a pèrdè ora el a peka. Kiko tabata e resultado di Hesus su morto? Yehova a aseptá e sakrifisio ei “komo e preis di reskate [korespondiente] pa tur hende.” (1 Timoteo 2:6) En realidat, Dios a usa e balor di Hesus su bida pa kumpra humanidat bèk, òf reskat’é, for di sklabitut na piká i morto.

Bes tras bes Beibel ta menshoná e gran akto di amor di e Kreadó di hende. Pablo a rekordá kristiannan ku nan “a wòrdu kumprá pa un preis.” (1 Korintionan 6:20; 7:23) Pedro a skirbi ku Dios no a usa ni oro ni plata, sino e sanger di su Yu pa liberá kristiannan for di un bida ku ta resultá den morto. (1 Pedro 1:18, 19) Ku Kristu su sakrifisio di reskate, Yehova a hasi areglo pa reskatá humanidat for di morto eterno.

Enkuanto e benefisionan di largu alkanse di Kristu su reskate, apòstel Juan a skirbi: “[Hesukristu] ta e propisiashon pa nos pikánan, i no pa di nos so, ma tambe pa esnan di henter mundu.” (1 Juan 2:2) Sí, Kristu su reskate ta disponibel pa henter humanidat. Esei ke men ku tur hende lo benefisiá outomátikamente for di e provishon di balor inkalkulabel aki? Nò. Pensa un ratu riba e hendenan ku a ser reskatá menshoná den e artíkulo anterior. E reskatistanan ku tabata purba salba e mineronan ku tabata atrapá a laga e liftkooi baha bai te abou, pero kada un di e hòmbernan mes mester a drenta den dje. Di un manera similar, esnan ku ta deseá di benefisiá di Kristu su sakrifisio di reskate no por djis sinta man krusá spera riba Dios su bendishon. Nan mester hasi algu.

Kiko Dios ta rekerí? Juan 3:36 ta bisa nos: “Esun ku kere den e Yu tin bida eterno; ma  esun ku no obedesé e Yu lo no mira bida, ma e furia di Dios ta keda riba dje.” Dios ta rekerí pa nos tin fe den e sakrifisio di Kristu. Pero tin mas rekisito. “Pa medio di esaki nos sa ku nos a konos’é [Hesus], si nos warda su mandamentunan.” (1 Juan 2:3) Pues, nos por mira bon kla ku pa nos ser reskatá for di piká i morto ta masha importante pa nos tin fe den e reskate di Kristu i obedesé su mandamentunan.

Un manera importante ku nos por demostrá fe den e reskate di Hesus ta dor di mustra apresio pa e echo ku el a muri pa nos. Nos por demostrá esei dor di konmemorá su morto manera el a manda. Promé ku el a muri, Hesus a instituí un sena ku nifikashon simbóliko ku el a selebrá huntu ku su apòstelnan fiel, i a bisa nan: “[Sigui] hasi esaki na mi rekuerdo.” (Lukas 22:19) Testigunan di Yehova ta konsiderá e amistat ku nan tin ku e Yu di Dios komo algu masha presioso i nan ta obedesé e mandamentu ku Hesus a duna. E aña aki, e Konmemorashon di e morto di Hesukristu lo ta riba djasabra 22 di mart, despues ku solo baha. Nos ta invitá bo kordialmente pa asistí na e reunion spesial aki manera Hesus a manda. Testigunan di Yehova den bo área por bisa bo ki ora i na unda e evento aki lo tuma lugá. Na e Konmemorashon lo bo haña mas detaye tokante kiko bo tin ku hasi pa e reskate di Kristu libra bo for di e efektonan mortífero di Adam su piká.

Masha poko hende awe ta komprondé i apresiá plenamente e gran sakrifisio ku nan Kreadó i su Yu a hasi pa reskatá nan for di destrukshon. Esnan ku ehersé fe den e sakrifisio di reskate ta disfrutá di un fuente di felisidat spesial. Apòstel Pedro a skirbi tokante su kompañeronan kristiannan: ‘Boso ta kere den Hesus, boso ta regosihá grandemente ku goso inekspresabel i yen di gloria, hañando komo resultado di boso fe e salbashon di boso alma.’ (1 Pedro 1:8, 9) Dor di kultivá amor pa Hesukristu i fe den su sakrifisio di reskate, bo por yena bo bida ku goso awor i spera ansiosamente e dia ku lo bo ser librá for di piká i morto.