Sea Rasonabel i Balansá

“Sigui rekordá nan . . . pa ta rasonabel.”—TITO 3:1, 2, NW.

1, 2. Kiko e Skritura ta bisa tokante ser rasonabel, i dikon ta importante pa nos aktua di e manera ei?

YEHOVA, nos amoroso Tata selestial, ta infinitamente sabí. Komo ku ta e a krea nos, nos ta akudí na dje pa haña guia den bida. (Sal. 48:14) Disipel kristian Santiago a skirbi ku “e sabiduria djariba ta na promé lugá puru, despues pasífiko, rasonabel, kla pa obedesé, yen di miserikòrdia i bon fruta, sin hasi distinshon parsial, sin hipokresia.”—Sant. 3:17, NW.

² Apòstel Pablo a konsehá: “Laga tur hende sa ku boso ta rasonabel.” * (Fil. 4:5, NW) Kristu Hesus ta Señor i Kabes di e kongregashon kristian. (Efe. 5:23) Ta masha importante pa kada un di nos sigui Kristu su guia i aktua na un manera rasonabel i balansá den nos trato ku otro hende.

3, 4. (a) Ilustrá kon nos ta benefisiá ora nos ta aktua na un manera rasonabel i no ta insistí riba nos derechonan. (b) Kiko nos lo bai konsiderá?

³ Nos ta saka benefisio ora nos ta mustra ku nos ta rasonabel dor di duna prioridat na interesnan di otro hende i someté nos mes na outoridat na un manera balansá. Konsiderá e siguiente ilustrashonnan: Despues ku a deskubrí un supuesto plan terorista na Gran Bretaña, pasaheronan di mayoria di airoliña a parse di ta dispuesto pa sigui reglanan ku a prohibí nan di subi abordo di avion ku sierto kosnan ku anteriormente sí tabata permití. Ora nos ta kore outo, tin bes nos ta sinti e nesesidat pa kore na un velosidat mas abou ku e velosidat máksimo ku lei ta permití pa por evitá un aksidente.

⁴ Pa hopi di nos, no ta fásil pa semper aktua na un manera rasonabel. Pa yuda nos den esaki, laga nos konsiderá tres aspekto di ser rasonabel, esta, nos motivashon, nos aktitut pa ku outoridat i e grado ku nos mester ta sumiso i rasonabel.

E Motivashon Korekto

5. Kiko por a motivá un esklabo bou di Lei di Moisés pa skohe pa keda serka su doño?

⁵ Un ehèmpel di tempu prekristian ta enfoká riba e motibu korekto pa ser sumiso, un aspekto di ser rasonabel. Bou di Lei di Moisés, hebreonan ku a bira esklabo mester a haña nan libertat durante e di shete aña di nan sklabitut òf durante e aña di Hubileo, dependiendo kua di e añanan aki yega promé. Pero e esklabo por a skohe tambe pa keda un esklabo. (Lesa Eksodo 21:5 i 6.) Kiko por a motivá un esklabo pa hasi esaki? Amor a motivá e esklabo pa keda den e situashon ei, bou di outoridat di su doño bondadoso.

6. Kiko amor tin di haber ku e echo ku nos ta rasonabel?

⁶ Di un manera similar, nos amor pa Yehova ta motivá nos pa dediká nos bida na dje i pa kumpli ku nos dedikashon. (Rom. 14:7, 8) Apòstel Juan a skirbi: “Esaki ta e amor di Dios, ku nos ta warda su mandamentunan; i su mandamentunan no ta pisá.” (1 Juan 5:3) E klase di amor aki no ta buska su propio interes. (1 Kor. 13:4, 5) Ora nos ta trata ku otro hende, amor pa próhimo ta motivá nos pa ta rasonabel i duna prioridat na nan interesnan. Sí, en bes di laga egoismo prevalesé, nos ta buska e interes di otro hende.—Fil. 2:2, 3.

7. Ki papel un aktitut rasonabel ta hunga den nos ministerio?

⁷ Loke nos ta papia i hasi no mester pone otro hende trompeká. (Efe. 4:29) Mas bien, amor lo motivá nos pa evitá di hasi kualke kos ku lo por stroba hende di un otro background i kultura di progresá i sirbi Yehova. Hopi bes, esaki ta rekerí pa nos ta rasonabel i no insistí riba nos derechonan. Por ehèmpel, ruman muhénan misionero ku a kustumbrá di usa kosmétika òf bisti mea di  nailen no ta insistí pa usa nan na lugánan kaminda hende por haña e impreshon ku nan ta inmoral i pone e hendenan ei trompeká.—1 Kor. 10:31-33.

8. Kon amor pa Yehova por yuda nos komportá nos mes komo esnan menor òf ‘esnan di mas chikitu’?

⁸ Nos amor pa Yehova ta yuda nos vense orguyo. Despues ku Hesus su disipelnan tabatin un pleitu tokante ken ta esun mas grandi òf esun mas importante, el a pone un mucha para meimei di nan. El a splika nan: “Ken ku risibí e mucha aki den mi nòmber, ta ami e ta risibí; i ken ku risibí mi, ta risibí esun ku a manda mi; pasobra esun di mas chikitu den boso, ta esei ta esun di mas grandi.” (Luk. 9:48; Mar. 9:36) Individualmente, kisas ta difísil pa nos komportá nos mes komo esun menor òf “esun di mas chikitu.” Imperfekshon heredá i un tendensia di ta orguyoso kisas ta motivá nos pa buska prominensia. Pero humildat ta yuda nos ser rasonabel i duna prioridat na interesnan di otro hende.—Rom. 12:10.

9. Kiko nos tin ku rekonosé pa nos por ta sumiso?

⁹ Manera a ser menshoná anteriormente, ser rasonabel ta enserá tambe ser sumiso. Pues, nos tin ku rekonosé e outoridat di personanan ku Dios a nombra. Tur kristian berdadero ta rekonosé e prinsipio importante di hefatura. Apòstel Pablo a deskribí esaki bon kla den su karta na e korintionan: “Mi kier pa boso komprondé ku Kristu ta e kabes di tur hòmber, i e hòmber ta e kabes di e muhé, i Dios ta e kabes di Kristu.”—1 Kor. 11:3.

10. Kiko nos sumishon na Yehova su outoridat ta demostrá?

¹⁰ Sumishon na Dios su outoridat ta demostrá ku nos ta konfia den dje komo nos Tata amoroso. E ta konsiente di tur loke ta pasa ku nos, i e por rekompensá nos di akuerdo ku esei. Ta bon pa nos tene esei na mente ora ku hende no ta trata nos ku rèspèt òf ta rabia i papia malu ku nos. Pablo a skirbi: “Si ta posibel, asina leu ku ta dependé di boso, sea na pas ku tur hende.” Pablo a enfatisá e konseho ei ku e instrukshon aki: “Nunka no venga boso mes, stimánan, ma laga lugá pa e furia di Dios, pasobra ta pará skirbí: ‘Ta di mi vengansa ta, ami lo paga bèk, Señor [Yehova] ta bisa.’”—Rom. 12:18, 19.

11. Kon nos por mustra ku nos ta sumiso na Kristu su hefatura?

¹¹ Nos mester ta sumiso tambe na outoridat di personanan ku Yehova a nombra den e kongregashon kristian. Revelashon kapítulo 1 ta presentá Kristu ku e “streanan” di e kongregashon tení den su man drechi. (Rev. 1:16, 20) Ounke e “streanan” aki direktamente ta representá e kuerponan di ansiano ungí, e mesun prinsipio ta apliká na e kuerponan di ansiano di e otro karnénan den e kongregashonnan. E superintendentenan nombrá ei ta sumiso na e liderato di Kristu i ta imitá su manera bondadoso di trata ku hende. Tur hende den e kongregashon ta someté nan mes na e areglo ku Hesus a hasi pa “e esklabo fiel i prudente” perkurá alimento spiritual na e debido tempu. (Mat. 24:45-47) Awe, e echo ku nos ta dispuesto pa studia i apliká e informashon aki den nos bida ta demostrá ku nos personalmente ta sumiso na Kristu su hefatura. I esaki ta kontribuí na pas i union.—Rom. 14:13, 19.

Ser Sumiso i Rasonabel—Te na Ki Grado?

12. Dikon ser sumiso tin su límite?

¹² Ounke ser rasonabel ta enserá ser sumiso na outoridat, e no ta nifiká sí ku nos mester komprometé nos fe òf nos prinsipionan bíbliko. Ki posishon e promé kristiannan a tuma ora lidernan religioso a ordená nan pa stòp di prediká den nòmber di Hesus? Pedro i e otro apòstelnan a bisa ku kurashi: “Nos mester obedesé Dios mas ku hende.” (Echo. 4:18-20; 5:28, 29) P’esei awe, ora outoridatnan gubernamental ta purba obligá nos di stòp di prediká e bon nobo, nos no ta stòp. Pero kisas nos ta ahustá nos métodonan pa asina nos por trata ku e situashon na un manera diskreto. Si nan ta prohibí nos ministerio di kas pa kas, nos lo por buska otro alternativa pa drenta den kontakto ku e doñonan di kas i asina sigui kumpli ku e asignashon ku Dios a duna nos. Asina tambe, ora “e outoridatnan ku ta goberná” prohibí nos reunionnan, nos ta reuní na un manera diskreto den gruponan chikitu.—Rom. 13:1; Heb. 10:24, 25.

13. Kiko Hesus a bisa relashoná ku sumishon na outoridat?

 ¹³ Den Hesus su Sermon Riba Seru, el a hasi hende konsiente di e nesesidat di someté nan mes na outoridat. El a bisa: “Si un persona kier hiba bo dilanti korte i bira doño di bo bistí interior, lag’é bai ku bo bistí eksterior tambe; i si un hende bou di outoridat ta obligá bo bai un mia di sirbishi, bai dos mia kuné.” (Mat. 5:40, 41, NW) * Konsiderashon pa ku otro hende i un deseo pa yuda nan tambe ta motivá nos pa bai un mia èkstra, esta, hasi mas pa nan di loke ta ser rekerí di nos.—1 Kor. 13:5; Tito 3:1, 2.

14. Dikon nunka nos no mester apoyá e ideanan di hende apóstata òf someté nos mes na nan?

¹⁴ Sin embargo, nos deseo pa ta sumiso nunka mester pone ku nos ta apoyá e ideanan di hende apóstata òf someté nos mes na nan. Nos mester tin un posishon kla i firme relashoná ku e asuntu aki pa asina konserbá e puresa di e bèrdat i e union di e kongregashon. Relashoná ku “rumannan falsu,” Pablo a skirbi: “Nos no a someté nos na nan ni pa ún ora so, pa e bèrdat di evangelio por keda serka boso.” (Gal. 2:4, 5) E poko biahanan ku apostasia ta aparesé, kristiannan deboto ta para firme na banda di loke ta korekto.

Superintendentenan Mester Ta Rasonabel

15. Den ki manera superintendentenan kristian por ta rasonabel ora nan ta reuní huntu?

¹⁵ Un di e rekisitonan pa esnan nombrá pa sirbi komo superintendente ta ku nan mester ta rasonabel, loke ta nifiká entre otro ku nan mester ta dispuesto pa sede. Pablo a skirbi: “Pues, e superintendente mester ta . . . rasonabel.” (1 Tim. 3:2, 3, NW) E kualidat aki ta masha importante, spesialmente ora hòmbernan nombrá ta reuní pa trata asuntunan di kongregashon. Promé ku nan tuma un desishon, kada ansiano presente ta liber pa ekspresá bon kla loke e ta pensa. Pero no ta nesesario pa nan tur duna komentario. Durante e konsiderashon ei, un persona su punto di bista por kambia ora e tende e otro ansianonan hala atenshon na prinsipionan bíbliko ku ta aplikabel den e asuntu ei. En bes di rechasá punto di bista di otronan i keda insistí riba su opinion personal, un ansiano maduro ta sede. Na prinsipio kisas nan tabatin opinionnan kontradiktorio, pero meditashon huntu ku orashon ta promové union entre ansianonan rasonabel i modesto.—1 Kor. 1:10; Lesa Efesionan 4:1-3.

16. Ki aktitut un ansiano kristian mester desplegá?

¹⁶ Den tur loke e ta hasi, un ansiano kristian mester hasi esfuerso pa demostrá ku e ta rasonabel dor di apoyá areglo teokrátiko. E tin ku desplegá e aktitut ei asta ora e ta pastoriá e tou, i esei ta yud’é mustra kariño i konsiderashon pa ku otro hende. Pedro a skirbi: “Pastoriá e tou di Dios meimei di boso, hasiendo e trabou di kuidadó, no fòrsá, ma boluntariamente, segun e boluntat di Dios; i no pa ganashi desonesto, sino ku hopi afan.”—1 Ped. 5:2.

17. Kon tur hende den e kongregashon por desplegá e aktitut korekto den nan trato ku otro hende?

¹⁷ Miembronan di edat avansá di e kongregashon ta gradisidu pa e yudansa balioso di esnan mas hóben i ta trata nan ku dignidat. E hóbennan, na nan turno, ta respetá esnan di mas edat ku tin añanan di eksperensia den e sirbishi di Yehova. (1 Tim. 5:1, 2) Ansianonan kristian ta buska hòmbernan kualifiká na kendenan nan por delegá sierto responsabilidatnan i ta entrená nan pa asina nan por yuda perkurá pa e tou di Dios. (2 Tim. 2:1, 2) Kada kristian individualmente mester balorá Pablo su konseho inspirá: “Obedesé boso lidernan i someté boso mes na nan; pasobra nan ta tene warda riba boso alma, komo esnan ku lo duna kuenta. Laga nan hasi esaki ku goso i no ku tristesa, pasobra esaki lo no ta bentahoso pa boso.”—Heb. 13:17.

Ser Rasonabel den Bida di Famia

18. Dikon ta apropiá pa miembronan di famia ta sumiso i rasonabel?

¹⁸ Miembronan di famia tambe mester ta sumiso i rasonabel. (Lesa Kolosensenan 3:18-21.) Beibel ta duna un deskripshon di e respektivo papelnan di e vários miembronan di un famia kristian. E tata ta kabes di su esposa i a la bes esun ku ta prinsipalmente responsabel pa instruí e yunan. E esposa mester rekonosé e outoridat di su  esposo, i e yunan mester hasi nan bèst pa nan ta obedesidu, lokual ta agradá Señor. Kada miembro di e famia por kontribuí na e union i pas di e hogar dor di ser rasonabel i sumiso den un manera apropiá i balansá. Beibel ta kontené algun ehèmpel ku ta yuda ilustrá e punto aki.

19, 20. (a) Usa e ehèmpel di Elí pa mustra dikon ser demasiado komplasiente òf permisivo no ta rasonabel. (b) Ki lès mayornan por siña for di Yehova su trato ku su angelnan? (c) Kon tur miembro di famia por aktua na un manera rasonabel i balansá?

¹⁹ Ser rasonabel no ke men ser demasiado komplasiente òf permisivo. Konsiderá un ehèmpel: Tempu ku Samuel tabata mucha, Elí tabata sirbi komo sumo saserdote den Israel. Sin embargo, Elí su yu hòmbernan, Ofni i Fínehas, tabata “malechornan di bèrdè” ku “no tabatin kunes ku” Yehova. Elí a tende mal informe tokante nan, inkluso ku nan tabata kometé fornikashon ku muhénan ku tabata sirbi na entrada di e tènt di reunion. Kon el a reakshoná? Elí a bisa nan ku si nan a peka kontra Yehova, no tabatin ningun hende pa hasi orashon pa nan. Pero e no a korigí nan ni disipliná nan. P’esei, Elí su yu hòmbernan a sigui kometé malecho. Finalmente, Yehova korektamente a disidí ku nan a meresé pena di morto. Ora Elí a tende ku su yunan a muri, e mes tambe a muri. Ki un resultado tristu! Klaramente, e echo ku Elí tabata demasiado tolerante pa ku nan malechonan—den e sentido ku el a permití nan sigui ku nan maldat—no tabata korekto.—1 Sam. 2:12, BPK; 13-17, 22-25, 34, 35; 4:17, 18.

²⁰ Awor, konsiderá un ehèmpel di ser balansá i rasonabel na e manera korekto: Dios su trato ku su yunan angelikal. Profeta Mikaias tabatin un vishon remarkabel di un reunion ku Yehova tabatin ku Su angelnan. Yehova a puntra kua di e angelnan por a nèk Rei Akab di Israel i asina okashoná ruina di e rei malbado. Yehova a skucha sugerensia di vários yu spiritual. E ora ei, un di e angelnan a bisa ku lo e hasié i Yehova a puntr’é kon lo e bai hasié. Satisfecho ku su kontesta, Yehova a manda e angel bai hasi loke el a proponé. (1 Rei. 22:19-23) Den hende su kaso, miembronan di famia no por siña un lès tokante ser rasonabel i balansá for di e relato ei? Ta bon pa un esposo i tata kristian tene kuenta ku idea- i sugerensianan di su esposa i yunan. Di otro banda, esposa- i yunan mester komprondé ku ounke nan a ekspresá nan opinion òf preferensia, nan tin ku ser sumiso i respetá guia di e esposo, esun ku bíblikamente tin e outoridat pa tuma desishon.

21. Kiko nos lo konsiderá den e siguiente artíkulo?

²¹ Nos ta masha gradisidu na Yehova pa su rekordatorionan amoroso i sabí ku ta yuda nos aktua na un manera rasonabel i balansá! (Sal. 119:99, NW) Nos lo konsiderá den e siguiente artíkulo kon un aktitut asina ta yuda hende haña goso den matrimonio.

[Nota]

Kon Lo Bo Kontestá?

• Ki bon resultado un aktitut rasonabel i balansá por produsí?

• Kon superintendentenan por desplegá un aktitut rasonabel?

• Kon nos por ta rasonabel i balansá den bida di famia?

[Preguntanan di Estudio]

[Plachi na página 14]

Ansianonan ta imitá Kristu su manera bondadoso di trata ku hende

[Plachi na página 14]

Ora ansianonan di kongregashon ta reuní, meditashon huntu ku orashon i un aktitut rasonabel ta promové union