Kiko Ta Hasi Bida Bale la Pena?

“Teme Dios i warda su mandamentunan.”​—EKL. 12:13.

1, 2. Kon nos por benefisiá di un konsiderashon di e buki di Eklesiastés?

IMAGINÁ bo un hòmber ku aparentemente tin tur kos. E ta un famoso hefe di estado, un di e hendenan mas riku na mundu i esun di mas sabí di su generashon. Ma apesar di tur su logronan, e ta puntra su mes: ‘Kiko ta hasi bida bale la pena?’

² Un hòmber asina a biba di bèrdat un tres mil aña pasá. E tabata yama Salomon, i den e buki di Eklesiastés, nos ta haña un deskripshon di su búskeda pa haña satisfakshon. (Ekl. 1:13) Nos por siña hopi kos for di e eksperensia di Salomon. De echo, e sabiduria ku nos ta haña den e buki di Eklesiastés por yuda nos pone metanan ku lo duna nos bida berdadero propósito.

“Korementu Tras di Bientu”

3. Ki punto serio tokante bida humano nos tur tin ku konfrontá?

³ Salomon a splika ku Dios a krea un abundansia di kos bunita riba tera—un fuente inagotabel i asombroso di kosnan interesante i maravioso ku nunka nos ta kansa di disfrutá di dje. Sin embargo, apénas nos por kuminsá eksplorá e kreashon di Dios pasobra nos bida ta muchu kòrtiku. (Ekl. 3:11; 8:17) Manera Beibel ta bisa, nos dianan ta poko i ta pasa masha lihé. (Jòb 14:​1, 2; Ekl. 6:12) E punto aki ta algu serio i mester motivá nos pa usa nos bida na un manera sabí. Esei no ta fásil, pasobra e mundu di Satanas kisas ta dirigí nos pa bai den e direkshon robes.

4. (a)Kiko e palabra “banidat” ta impliká? (b) Ki aktividatnan den bida nos lo konsiderá?

⁴ Pa enfatisá e peliger ku nos ta kore di desperdisiá nos añanan di bida, Salomon usa e palabra “banidat” un 30 biaha asina den Eklesiastés. E palabra hebreo tradusí “banidat” ta referí na algu ku ta bashí, inútil, sin sentido, sin supstansia òf sin balor duradero. (Ekl. 1:​2, 3) Algun biaha Salomon a usa e palabra “banidat” komo ekivalente di “korementu tras di bientu.” (Ekl. 1:14; 2:11) Ta mas ku klaru ku kualke intento pa kue bientu tene ta enbano. Ken ku purba hasié ta gara den bashí. Korementu tras di metanan ku no ta sabí lo resultá di ta mesun frustrante. Bida den e sistema aktual ta muchu kòrtiku pa nos desperdisiá nos mihó añanan di bida na aktividatnan ku ta laga nos man bashí. P’esei, pa yuda nos evitá di kometé e eror ei, laga nos konsiderá algun ehèmpel ku Salomon a duna di aktividatnan komun den bida. Di promé, nos lo konsiderá e korementu tras di plaser i kos material. Despues di esei, nos lo trata e balor di trabou.

Korementu Tras di Plaser Lo Hasi Nos Felis?

5. Den kiko Salomon a buska satisfakshon?

⁵ Meskos ku hopi hende awe, Salomon a purba haña satisfakshon dor di kore tras di un bida di plaser. El a informá: “Mi no a nenga mi kurason ningun plaser.” (Ekl. 2:10) Den kiko el a buska plaser? Segun Eklesiastés kapítulo 2, el a ‘stimulá su kurpa ku biña’—manteniendo su  dominio propio—i a okupá su mes ku aktividatnan manera diseñá hardin i palasio, skucha muzik i kome bon kuminda.

6. (a)Pakiko no ta malu pa disfrutá di algun di e bon kosnan di bida? (b) Den e asuntu di rekreo, ki balansa nos mester tin?

⁶ Akaso Beibel ta kontra pa nos pasa un tempu agradabel ku nos amigunan? Niun ora so! Por ehèmpel, Salomon a remarká ku e echo ku nos por disfrutá di un kuminda den un ambiente relahá despues di un dia pisá di trabou ta un regalo di Dios. (Lesa Eklesiastés 2:24; 3:​12 i 13.) Ademas, Yehova mes ta invitá hóbennan pa alegrá i ‘laga nan kurason sinti plaser’ na un manera responsabel. (Ekl. 11:9) Nos tin mester di tempu pa relahá i rekreá na un manera sano. (Kompará ku Marko 6:31.) Sin embargo, rekreo no mester bira e propósito prinsipal di nos bida. Al kontrario, rekreo mester ta manera e postre na final di un kuminda, no e plato prinsipal di e kuminda. Bo mes sa ku maske kuantu bo gusta kos dushi, lo bo kansa masha lihé di dje si ta esei so bo ta kome; ademas kos dushi lo no duna bo masha nutrishon. Asina tambe, Salomon a deskubrí ku un bida enfoká riba plaser tabata “korementu tras di bientu.”​—Ekl. 2:​10, 11.

7. Dikon nos mester skohe nos rekreo ku kuidou?

⁷ Ademas, no ta tur tipo di rekreo ta sano. Hopi di nan ta sumamente perhudisial, tantu den sentido spiritual komo moral. Kuantu miónes di hende no a hinka nan mes den miseria simplemente pasobra nan ‘kier a gosa di bida’ dor di usa droga, bebe di mas òf hunga wega di plaka? Yehova bondadosamente ta spièrta nos ku si nos laga nos kurason i nos wowo hiba nos den direkshon di kosnan perhudisial, nos mester ferwagt e konsekuensianan.​—Gal. 6:7.

8. Dikon ta sabí pa reflekshoná riba nos kurso di bida?

⁸ Banda di esei, korementu deskabeyá tras di plaser lo stroba nos di presta e atenshon nesesario na asuntunan di mas peso. No lubidá ku bida ta pasa masha lihé, i nos no tin niun garantia ku den nos bida kòrtiku semper nos lo tin bon salú i ta liber di problema. Ta p’esei, manera Salomon a komentá mas aleu, nos lo por saka mas benefisio di asistí na un entiero—spesialmente di un fiel ruman kristian—ku di bai na un “kas di plaser.” (Lesa Eklesiastés 7:​2 i 4.) Dikon? Segun ku nos ta skucha e diskurso di entiero i ta reflekshoná riba e kurso di bida di e fiel sirbidó di Yehova ku a muri, nos lo por sinti nos motivá pa analisá nos propio bida. Komo resultado, nos lo por konkluí ku nos tin ku ahustá nos metanan afin di usa e tempu di bida ku a resta nos na un manera sabí.​—Ekl. 12:1.

Kos Material Lo Duna Nos Satisfakshon?

9. Kiko Salomon a deskubrí relashoná ku rikesa?

⁹ Salomon tabata un di e hendenan di mas riku riba tera ora el a skirbi Eklesiastés. (2 Kró. 9:22) E tabatin e moda pa kumpra tur loke e tabata ke. El a skirbi: “Mi no a nenga mi wowonan nada di loke nan tabata deseá.” (Ekl. 2:10) No opstante, el a deskubrí ku kos material riba su mes no ta duna satisfakshon. El a konkluí: “Esun ku ta stima plaka lo no keda satisfecho ku plaka, ni esun ku ta stima abundansia, ku su entrada.”​—Ekl. 5:10.

10. Kiko ta hiba na berdadero satisfakshon i berdadero rikesa?

¹⁰ Apesar di e balor pasahero di kos material, tòg rikesa por tin un atrakshon masha fuerte. Den un enkuesta resien na Merka, 75 porshento di tur studiante di promé aña di universidat a bisa ku nan meta prinsipal den bida ta pa nan ta “hopi bon pará finansieramente.” Asta si nan logra nan meta, nan lo ta realmente felis? No nesesariamente. Investigadónan a ripará ku ora hende ta pone énfasis riba materialismo, esei de echo ta stroba nan di haña felisidat i satisfakshon. Hopi tempu pasá, Salomon ya kaba a yega na e mesun konklushon. El a skirbi: “Mi a montoná plata i oro pa mi mes, i e tesoro di reinan . . . I mira, tur tabata banidat i korementu tras di bientu.” * (Ekl. 2:​8, 11) Na kontraste, si nos usa nos bida pa sirbi Yehova di henter nos kurason i asina risibí su bendishon, nos lo optené berdadero rikesa.​—Lesa Proverbionan 10:22.

 Ki Klase di Trabou Ta Duna Berdadero Satisfakshon?

11. Kiko e Skritura ta indiká tokante e balor di trabou?

¹¹ Hesus a bisa: “Mi Tata ta traha te awor i mi tambe ta traha.” (Juan 5:17) No tin duda ku Yehova i Hesus ta haña satisfakshon den trabou. Beibel ta indiká e satisfakshon ku Yehova a haña di su obra di kreashon ora e ta bisa: “Dios a mira tur loke el a traha, i ata, tur kos tabata masha bon.” (Gén. 1:31) E angelnan “tabata grita di alegria” ora nan a mira tur loke Dios a traha. (Jòb 38:​4-7) Salomon tambe a apresiá e balor di trabou ku tin un propósito importante.​—Ekl. 3:13.

12, 13. (a) Kon dos persona a ekspresá e satisfakshon ku nan ta haña di trabou onrado? (b) Dikon nos trabou tin biaha por ta frustrante?

¹² Hopi hende ta mira e balor di trabou onrado. Por ehèmpel, José, un pintor eksitoso, a bisa: “Ora bo logra pinta riba e lona e kuadro ku bo tin den bo mente, bo ta sinti komo si fuera bo a logra yega na tòp di un seru haltu.” Miguel, * un komersiante, a remarká: “Trabou ta duna satisfakshon pasobra e ta hasi posibel ku bo por perkurá pa bo famia. E por duna bo tambe un sentido di logro.”

¹³ Di otro banda, hopi trabou ta laf, monótono, i no ta duna hende muchu chèns pa ta kreativo. Tin biaha ta na e lugá di empleo mes hende ta haña nan mes ku frustrashon i asta inhustisia. Manera Salomon a indiká, e persona floho kisas ta kosechá e rekompensa di e trahadó diligente, podisé pasobra e floho ta hasi uso di su kontaktonan ku tin puesto klave. (Ekl. 2:21) Otro faktornan tambe por hiba na desepshon. Loke a kuminsá komo un oportunidat di negoshi supuestamente lukrativo por bin terminá den frakaso debí na kaida di ekonomia òf susesonan imprevisto. “Mi a bolbe pa mira ku bou di solo no ta hende lihé tin e kareda, ni hende fuerte e bataya, ni hende sabí tampoko tin e kuminda, ni hende entendido tampoko tin e rikesa, ni sikiera hende ku tin konosementu tin e fabor; pasobra tempu i suseso imprevisto ta kai riba nan tur.” (Eklesiastés 9:​11, NW) Hopi biaha, e persona ku ta lucha duru pa alkansá éksito ku tempu ta bira amargá i frustrá, i ta realisá ku el a “traha mata kurpa pa bientu.”​—Ekl. 5:16.

14. Kua trabou semper ta duna berdadero satisfakshon?

¹⁴ Tin un tipo di trabou ku nunka lo desepshoná nos? José, e pintor menshoná anteriormente, a komentá: “Segun añanan ta pasa, kuadronan por pèrdè òf daña. Esei no ta e kaso ku e kosnan spiritual ku nos ta produsí. Dor di obedesé Yehova i prediká e bon nobo, mi a yuda edifiká algu permanente, esta, kristiannan ekselente i temeroso di Dios. Esei no tin preis.” (1 Kor. 3:​9-11) Miguel tambe a bisa ku predikashon di e mensahe di Reino ta dun’é hopi mas satisfakshon ku su trabou normal. El a bisa: “Nada no por remplasá e goso ku bo ta sinti ora bo kompartí un bèrdat bíbliko ku un persona i bo sinti ku esei a toka e persona su kurason.”

 ‘Tira Bo Pan Riba Awa’

15. Kiko ta hasi bida realmente bale la pena?

¹⁵ Kiko realmente anto ta hasi bida bale la pena? Nos lo sinti berdadero satisfakshon si nos usa e tempu kòrtiku ku nos tin den e sistema di kosnan aki pa hasi bon na nos próhimo i agradá Yehova. Nos por forma un relashon íntimo ku Dios, nos por siña nos yunan norma i balor spiritual, nos por yuda otro hende konosé Yehova, i nos por sera amistatnan duradero ku nos rumannan. (Gal. 6:10) Tur e esfuersonan aki tin balor permanente i ta trese bendishon pa esnan ku logra nan. Salomon a usa un komparashon masha interesante pa deskribí e balor di hasi bon na nos próhimo. El a bisa: “Tira bo pan riba superfisie di e awanan, pasobra lo bo hañ’é despues di hopi dia.” (Ekl. 11:1) Hesus a urgi su disipelnan: “Duna, i lo wòrdu duná na boso.” (Luk. 6:38) Ademas, Yehova mes a primintí di rekompensá esnan ku hasi bon na nan próhimo.​—Pro. 19:17; lesa Hebreonan 6:10.

16. Ki ora ta e tempu ideal pa plania e rumbo di nos bida?

¹⁶ Beibel ta urgi nos pa miéntras nos ta yòn ainda pa nos tuma desishonnan sabí relashoná ku kon nos lo usa nos bida. Di e manera ei, nos lo no tin nodi yora malai despues. (Ekl. 12:1) Lo ta masha tristu si nos mester desperdisiá e mihó añanan di nos bida koriendo tras di e atrakshonnan di mundu, anto pa na final resultá ku esei no tabata nada mas ku korementu tras di bientu!

17. Kiko lo yuda bo skohe e mihó kaminda den bida?

¹⁷ Meskos ku kualke tata amoroso, Yehova ke pa bo gosa di bida, hasi bon na bo próhimo i evitá doló di kurason innesesario. (Ekl. 11:​9, 10) Kiko lo yuda bo hasi esei? Fiha metanan spiritual i traha duru pa logra nan. Kasi 20 aña pasá, Javier mester a skohe entre un karera prometedor den medisina i sirbishi di tempu kompletu. El a bisa: “Ounke e trabou di dòkter por duna satisfakshon, nada por a para banda di e goso ku mi a sinti ora mi a yuda vários hende siña konosé e bèrdat. Sirbishi di tempu kompletu a yuda mi disfrutá di bida plenamente. Úniko kos ku mi ta lamentá ta ku mi no a kuminsá mas promé.”

18. Dikon e bida di Hesus riba tera a resultá di ta realmente bale la pena?

¹⁸ Kiko anto ta e kos di mas balioso ku nos mester hasi esfuerso pa nos tin? E buki di Eklesiastés ta bisa: “Un bon nòmber ta mihó ku un bon ungwento, i e dia di un hende su morto ta mihó ku e dia di su nasementu.” (Ekl. 7:1) E mihó ehèmpel di esei ta e bida di Hesus. E sigur a traha un nòmber ekselente serka Yehova. Ora Hesus a muri fielmente, el a vindiká e soberania di su Tata i a perkurá e sakrifisio di reskate ku a habri kaminda pa nos haña salbashon. (Mat. 20:28) Durante Hesus su estadia kòrtiku riba tera, el a perkurá e ehèmpel perfekto di un bida ku realmente ta bale la pena; un ehèmpel ku nos ta hasi esfuerso pa imitá.​—1 Kor. 11:1; 1 Ped. 2:21.

19. Ki konseho sabí Salomon a duna?

¹⁹ Nos tambe por traha un bon nòmber serka Dios. Un bon reputashon den bista di Yehova ta hopi mas balioso pa nos ku rikesa. (Lesa Mateo 6:​19-21.) Tur dia nos por haña maneranan pa hasi loke ta bon den bista di Yehova i esei lo enrikesé nos bida. Por ehèmpel, nos por kompartí e bon nobo ku otro hende, fortifiká nos matrimonio i nos famia, i mehorá nos relashon ku Yehova mediante estudio personal i asistensia na reunion. (Ekl. 11:6; Heb. 13:16) Pues anto, bo ke disfrutá di un bida ku realmente ta bale la pena? Si ta asina, sigui apliká e konseho aki di Salomon: “Teme Dios i warda su mandamentunan, pasobra esaki ta aplikabel na kada persona.”​—Ekl. 12:13.

[Nota]

Kon Lo Bo Kontestá?

• Kiko mester motivá nos pa pensa seriamente riba nos metanan den bida?

• Kon nos mester mira e korementu tras di plaser i kos material?

• Ki klase di trabou lo duna nos satisfakshon duradero?

• Ki kos balioso nos tin ku hasi esfuerso pa nos tin?

[Preguntanan di Estudio]

[Plachi na página 30]

Ki lugá rekreo mester tin den nos bida?

[Plachi na página 31]

Dikon e trabou di prediká ta duna satisfakshon profundo?