Nos Lektornan Ta Puntra

Desasternan Natural Ta Kastigu di Dios?

Dios no ta usa desasternan natural pa kastigá hende. Nunka el a hasi algu asina ni lo e no hasié tampoko. Dikon nò? Pasobra Beibel ta bisa na 1 Juan 4:8 ku “Dios ta amor.”

Amor ta e fuente di tur loke Dios ta hasi. Amor no ta kousa daño na hende inosente, pasobra Beibel ta bisa ku “amor no ta hasi daño na próhimo.” (Romanonan 13:10) I na Jòb 34:12, Beibel ta bisa: “Di bèrdat, Dios no ta aktua na manera inhustu.”

Ta sierto ku Beibel a profetisá ku den nos tempu lo tin desasternan, manera “temblornan grandi.” (Lukas 21:11) Pero Yehova no ta responsabel pa e daño ku e desasternan ei ta kousa, meskos ku un meteorólogo no ta responsabel pa e daño kousá pa orkan ku el a pronostiká. Si Dios no ta e fuente di sufrimentu humano ku desasternan natural ta kousa, ta ken òf kiko ta kousa esaki anto?

Beibel ta revelá ku “henter mundu ta bou di kontròl di e malbado,” Satanas e Diabel. (1 Juan 5:19) Satanas tabata un matadó for di tempu ku el a rebeldiá kontra Dios na kuminsamentu di hende su eksistensia, i el a keda asina te awe. (Juan 8:44) Satanas ta mira bida humano komo algu sin balor. E ta aktua motivá pa ambishon egoista; p’esei, no ta nada straño ku el a establesé un sistema mundial dominá pa egoismo. Den e mundu djawe, hende egoista a obligá hopi hende indefenso bai biba na lugánan kaminda nan bida ta na peliger, ya ku desaster natural òf ku hende ta kousa por asotá e lugánan ei. (Efesionan 2:2; 1 Juan 2:16) P’esei, ta hende golos ta responsabel pa algun di e kalamidatnan ku ta afektá e personanan ku ta bira víktima. (Eklesiastés 8:9) Dikon nos ta bisa asina?

Pasobra un kantidat sorprendente di desaster ta por lo ménos parsialmente kousá pa hende. Konsiderá, por ehèmpel, e problemanan ku a afligí e habitantenan di e stat New Orleans, na Merka, ora ku nan stat a ser inundá debí na orkan, òf e kasnan ku a ser destruí debí na un avalancha di lodo ku a basha for di e serunan na kosta di Venezuela. Den e kasonan ei i otronan, fenómenonan natural, manera áwaseru i bientu, a bira un desaster prinsipalmente debí ku hende tabata falta konosementu di medio ambiente, a traha konstrukshon inferior òf di mal kalidat, no a plania bon i a ignorá spièrtamentu, i debí ku hende den puesto di outoridat a kometé erornan atministrativo.

Konsiderá un desaster ku a tuma lugá den tempu bíbliko. Den e tempu ku Hesus tabata riba tera, un toren a kai diripiente i a mata 18 hende. (Lukas 13:4) E desaster ei por tabata e resultado di fayo humano òf di “tempu i suseso imprevisto” òf tur dos—pero sigur no un resultado di Dios su huisio.​—Eklesiastés 9:11, NW.

Tabatin desasternan ku Dios a yega di kousa? Sí. Pero kontrario na desasternan natural òf kousá pa hende, den e desasternan ku Yehova a kousa, é a disidí ken lo a keda na bida i ken lo a ser destruí. E desasternan ei tabata susesonan ku un propósito i ku rara bes a tuma lugá. Dos ehèmpel di e susesonan ei tabata: E Diluvio global den tempu di e patriarka Noe i e destrukshon di e statnan Sodoma i Gomora den tempu di Lòt. (Génesis 6:​7-9, 13; 18:​20-32; 19:24) E huisionan divino ei a kaba ku hendenan malbado ku no kier a repentí pero a preservá bida di e personanan ku tabata hustu den bista di Dios.

Echo ta ku Yehova Dios tin e abilidat, e deseo i e poder pa kaba ku tur sufrimentu i libra hende di tur e efektonan di desasternan natural. Relashoná ku Dios su Rei nombrá, Hesukristu, Salmo 72:12 a profetisá: “E lo libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é.”