Kon Nos Mester Trata Otro Hende?

“Meskos ku boso kier pa hende hasi ku boso, boso tambe hasi ku nan.”​—LUK. 6:31.

1, 2. (a) Kiko e Sermon Riba Seru ta? (b) Kiko nos lo konsiderá den e artíkulo aki i den esun siguiente?

HESUKRISTU tabata realmente e Gran Maestro. Ora su enemigunan religioso a manda hòmbernan pa arest’é, e funshonarionan a regresá man bashí i a bisa: “Nunka un hende no a papia manera e hòmber aki ta papia.” (Juan 7:​32, 45, 46) Un di Hesus su diskursonan sobresaliente tabata e Sermon Riba Seru. E ta registrá den kapítulo 5 te ku 7 di e Evangelio di Mateo, i Lukas 6:​20-49 ta presentá un informashon similar. *

² Kisas e deklarashon mas konosí den e sermon ei ta esun ku hopi bes hende ta yama e Regla di Oro. E tin di haber ku e manera ku nos ta trata otro hende. Hesus a bisa: “Meskos ku boso kier pa hende hasi ku boso, boso tambe hasi ku nan.” (Luk. 6:31) I en bèrdat el a hasi hopi kos bon pa hende! El a kura hende enfermo i asta a lanta hende for di morto. Sin embargo, e hendenan a ser bendishoná spesialmente ora nan a aseptá e evangelio òf bon nobo ku el a kompartí ku nan. (Lesa Lukas 7:​20-22.) Komo Testigunan di Yehova, nos ta masha kontentu ku nos por partisipá den un aktividat similar di prediká e Reino. (Mat. 24:14; 28:​19, 20) Den e artíkulo aki i esun siguiente, nos lo konsiderá loke Hesus a bisa tokante e trabou aki i tambe otro puntonan den e Sermon Riba Seru ku ta mustra kon nos mester trata otro hende.

Sea di Genio Suave

3. Kon lo bo definí genio suave?

³ Hesus a bisa: “Felis ta esnan di genio suave, ya ku nan lo heredá e tera.” (Mat. 5:5, NW) Den e Skritura, genio suave no tin nada di haber ku debilidat. Un persona di genio suave ta papia i aktua ku un suavedat ku ta na armonia ku e rekisitonan di Dios ku nos ta haña den Beibel. Nos ta reflehá e aktitut aki den nos kondukta pa ku nos próhimo. Por ehèmpel, nos no ta “paga malu ku malu na ningun hende.”​—Rom. 12:​17-19.

4. Dikon personanan di genio suave ta felis?

⁴ Personanan di genio suave ta felis pasobra “nan lo heredá e tera.” Hesus, kende tabata “mansu [òf “di genio suave,” NW] i humilde di kurason,” a ser ‘nombrá komo heredero di tur kos.’ I ta p’esei, e ta e Heredero prinsipal di e tera. (Mat. 11:29; Heb. 1:2; Sal. 2:8) Beibel a profetisá ku e “yu di hende” Mesiániko lo tin ko-gobernantenan den e Reino selestial. (Dan. 7:​13, 14, 21, 22, 27) Komo “ko-heredero ku Kristu,” 144.000 persona ungí i di genio suave lo heredá e tera huntu ku Hesus. (Rom. 8:​16, 17; Rev. 14:1) E otro personanan di genio suave lo ser bendishoná ku bida eterno den e region terenal di e Reino.​—Sal. 37:11.

5. Ora nos ta imitá Kristu su suavedat, ki efekto esaki tin riba nos personalidat?

⁵ Si nos ta personanan severo, probablemente nos lo pone pasenshi di otro hende na prueba, i nan lo alehá for di nos. Sin embargo, ora nos ta personanan di genio suave manera Kristu, nos lo ta miembronan agradabel i spiritualmente edifikante di e kongregashon. Mansedumbre òf suavedat ta forma parti di e fruta ku Dios su forsa aktivo ta produsí den nos si nos ta ‘biba i kana segun e spiritu.’ (Lesa Galationan 5:​22-25.) Siguramente nos ke ta kontá entre e personanan di genio suave ku Yehova su spiritu santu ta guia!

Felis Ta Esnan Miserikòrdioso!

6. Ki kualidatnan sobresaliente “esnan miserikòrdioso” tin?

⁶ Den Hesus su Sermon Riba Seru, el a bisa: “Bendishoná [òf “felis,” NW] ta esnan miserikòrdioso, pasobra nan lo risibí miserikòrdia.” (Mat.  5:7) “Esnan miserikòrdioso” tin tierno kompashon, ta mustra konsiderashon bondadoso i asta ta sinti duele di hende ménos privilegiá. Hesus a aliviá hende na un manera milagroso di nan sufrimentu pasobra el “a sinti kompashon” pa nan òf “a haña duele” di nan. (Mat. 14:14; 20:34, BPK) P’esei anto, kompashon i duele pa ku otro hende mester motivá nos tambe pa mustra miserikòrdia.​—Sant. 2:13.

7. Kiko kompashon a motivá Hesus pa hasi?

⁷ Ora un multitut a topa Hesus na kaminda pa bai sosegá un poko, “el a sinti kompashon pa nan, pasobra nan tabata manera karné sin wardadó.” Konsekuentemente, “el a kuminsá siña nan hopi kos.” (Mar. 6:34) Nos ta sinti un gran goso ora nos, di un manera similar, ta kompartí e mensahe di Reino ku otro hende i ta konta nan tokante Dios su gran miserikòrdia.

8. Dikon hende miserikòrdioso ta felis?

⁸ Hende miserikòrdioso ta felis pasobra nan “lo risibí miserikòrdia.” Ora nos ta trata hende ku miserikòrdia, generalmente nan ta reakshoná di e mesun manera. (Luk. 6:38) Ademas, Hesus a bisa: “Si boso pordoná hende nan transgreshonnan, boso Tata selestial tambe lo pordoná boso.” (Mat. 6:14) Ta hende miserikòrdioso so lo haña pordon di nan pikánan i e aprobashon di Dios, i esaki ta hiba na felisidat.

Dikon “Esnan Ku Ta Hasi Pas” Ta Felis?

9. Kon nos lo aktua si nos ta hende ku ta hasi pas?

⁹ Menshonando un otro kousa di felisidat, Hesus a bisa: “[“Felis,” NW] ta esnan ku ta hasi pas, pasobra nan lo wòrdu yamá yunan di Dios.” (Mat. 5:9) Si nos ta hende ku ta hasi pas, nos lo no aprobá ni partisipá den nada ku por “separá amigunan íntimo.” Nos lo evitá, por ehèmpel, kalumnia. (Pro. 16:28) Ku echo i palabra, nos lo hasi esfuerso pa nos ta na pas ku hende paden i pafó di e kongregashon kristian. (Heb. 12:14) I riba tur kos, nos lo hasi tur esfuerso pa nos ta na pas ku Yehova Dios.​—Lesa 1 Pedro 3:​10-12.

10. Dikon “esnan ku ta hasi pas” ta felis?

¹⁰ Hesus a bisa ku “esnan ku ta hasi pas” ta felis, “pasobra nan lo wòrdu yamá yunan di Dios.” Debí ku kristiannan ungí ta ehersé fe den Hesus komo e Mesias, nan ta risibí e “derecho pa bira yunan di Dios.” (Juan 1:12; 1 Ped. 2:24) Kiko di Hesus su “otro karnénan” ku ta hasi pas? Nan lo tin Hesus komo nan “Tata Eterno” durante su Reinado di Mil Aña ku lo e kompartí ku su ko-herederonan selestial. (Juan 10:​14, 16; Isa. 9:6; Rev. 20:6) Na fin di Hesus su Reino di Mil Aña, e personanan pasífiko ei lo bira Dios su yunan terenal den e sentido kompletu dje palabra.​—1 Kor. 15:​27, 28.

11. Kon nos lo trata otro hende si nos ta ser guiá pa “e sabiduria di ariba”?

¹¹ Pa nos por tin un relashon íntimo ku Yehova, “e Dios di pas,” nos tin ku imitá su kualidatnan. I esaki ta enserá ku nos tambe mester ta personanan pasífiko. (Fil. 4:9) Si nos permití “e sabiduria di ariba” guia nos, nos lo trata otro hende den un manera pasífiko. (Sant. 3:17) Sí, nos lo ta hendenan felis ku ta hasi pas.

“Laga Boso Lus Bria”

12. (a) Kiko Hesus a bisa tokante lus spiritual? (b) Kon nos por laga nos lus bria?

¹² Nos ta trata hende den e mihó manera posibel ora nos ta yuda nan haña e lus di e bèrdat ku ta bini di Dios. (Sal. 43:3) Hesus a bisa su disipelnan ku nan ta “e lus di mundu.” I el a urgi nan pa laga nan lus bria pa asina hende por a mira nan “bon obranan” òf e bon kosnan ku nan tabata hasi pa otro hende. Esaki lo a sirbi komo un iluminashon spiritual “dilanti di hende” òf pa benefisio di  humanidat. (Lesa Mateo 5:​14-16.) Awe nos ta laga nos lus bria dor di hasi bon na nos próhimo i dor di partisipá den e trabou di prediká e bon nobo “den henter mundu,” esta, “na tur nashon.” (Mat. 26:13; Mar. 13:10) Esaki ta un gran privilegio!

13. Ora hende mira nos kiko ta hala nan atenshon?

¹³ Hesus a bisa: “Un stat situá riba un seru no por keda skondí.” Ta fásil pa mira kualke stat ku ta situá riba un seru. Di mes manera, nos obranan ekselente komo proklamadónan di Reino i nos kualidatnan manera modestia i puresa ta hala atenshon di hende.​—Tito 2:​1-14.

14. (a) Kon lo bo deskribí e lampinan di promé siglo? (b) Kiko ke men ku nos no ta skonde lus spiritual bou di un “kaha di midi trigu”?

¹⁴ Hesus a papia di sende un lampi i pon’é, no bou di un kaha, sino riba un kándela pa asina e por lusa pa tur hende den kas. Un lampi ku mayoria hende tabata usa den promé siglo tabata un wea di klei ku tin un mecha ku tabata chupa líkido (generalmente zeta di oleifi) pa alimentá e kandela. Hopi bes nan tabata pone e lampi riba un kándela di palu òf di metal, i e tabata “lusa pa tur ku ta den kas.” Hende lo no a sende un lampi i pon’é bou di un “kaha di midi trigu.” Hesus no tabata ke pa su disipelnan skonde nan lus spiritual bou di un kaha di midi trigu figurativo. P’esei, nos tin ku laga nos lus bria i nunka permití oposishon òf persekushon pone nos skonde e bèrdat bíbliko òf ten’é pa nos mes.

15. Kon nos “bon obranan” por influensiá algun hende?

¹⁵ Ta despues ku Hesus a menshoná un lampi ku ta bria, el a bisa su disipelnan: “Laga boso lus bria dilanti di hende di tal manera ku nan por mira boso bon obranan i glorifiká boso Tata ku ta den shelu.” Debí na nos “bon obranan,” algun hende ta ‘duna gloria’ na Dios dor di bira su sirbidónan. Esei mester stimulá nos pa sigui “bria manera lusnan den mundu”!​—Fil. 2:15.

16. Kiko ser “e lus di mundu” ta rekerí di nos?

¹⁶ Pa nos por ta “e lus di mundu,” nos tin ku partisipá den e trabou di prediká e Reino i di hasi disipel. Pero, e ta rekerí algu mas tambe di nos. Apòstel Pablo a skirbi: ‘Kana komo yunan di lus, pasobra e fruta di e lus ta konsistí di tur bondat i hustisia i bèrdat.’ (Efe. 5:​8, 9) Nos kondukta semper mester ta ehemplar, esta, na armonia ku Dios su normanan haltu. Sí, nos tin ku hasi kaso di e konseho di apòstel Pedro, kende a bisa: “Laga boso kondukta ta ekselente meimei di e paganonan, asina ku ora nan kalumniá boso komo malechor, nan por, pa medio di boso bon obranan ku nan ta opservá, glorifiká Dios den e dia di bishitashon.” (1 Ped. 2:12) Pero kiko mester sosodé ora surgi problema entre kompañeronan di fe?

“Rekonsiliá ku Bo Ruman”

17-19. (a) Kiko e “ofrenda” menshoná na Mateo 5:23 i 24 tabata? (b) Dikon ta importante pa nos rekonsiliá ku nos ruman, i kon Hesus a mustra esaki?

¹⁷ Den Hesus su Sermon Riba Seru, el a spièrta su disipelnan pa nan no despresiá nan ruman ni warda renkor. Mas bien, nan mester ta lihé pa buska pas ku un ruman ku ta sintié ofendí. (Lesa Mateo 5:​21-25.) Tuma bon nota di Hesus su konseho. Kiko bo mester a hasi si bo tabata presentando bo ofrenda na altar, i einan bo a kòrda ku bo ruman tabatin algu kontra bo? Bo mester a laga bo ofrenda dilanti e altar i bai rekonsiliá ku bo ruman. Despues ku bo a kaba di hasi esei, bo por a regresá i ofresé bo ofrenda.

 ¹⁸ Hopi bes, e “ofrenda” tabata un sakrifisio ku un persona por a presentá na e tèmpel di Yehova. Dios a manda pa Israel hasi sakrifisio di animal komo parti di nan adorashon bou di e Lei di Moisés. Pues, e sakrifisionan aki tabata masha importante. Pero si bo a kòrda ku bo ruman tabatin algu kontra bo, drecha e asuntu ei tabata asta mas urgente ku ofresé bo ofrenda. Hesus a bisa: “Laga bo ofrenda ayanan dilanti di altar, i bai; rekonsiliá ku bo ruman promé, i despues bin presentá bo ofrenda.” Tabata masha importante pa un persona rekonsiliá ku su ruman promé ku el a presentá e sakrifisio ku e Lei a manda.

¹⁹ E deklarashon ku Hesus a hasi no a konta solamente pa sierto ofrenda- i fayonan spesífiko. P’esei, si un persona a kòrda ku su ruman tabatin algu kontra dje, e mester a posponé kualke ofrenda ku e tabata bai presentá. Si e ofrenda tabata un animal bibu, e mester a lag’é komo si fuera “dilanti di altar” di ofrendanan kimá den e patio di saserdotenan di e tèmpel. Despues ku e problema tabata resolvé, esun ku a ofendé su ruman por a bolbe i e sakrifisio por a ser hasí.

20. Dikon nos tin ku aktua lihé pa drecha asuntu si nos ta rabiá ku un ruman?

²⁰ Desde Dios su punto di bista, nos relashon ku nos rumannan ta un parti importante di adorashon berdadero. Sakrifisio di bestia no tabatin ningun balor pa Yehova si esnan ku tabata ofresé nan no a trata nan próhimo korektamente. (Mik. 6:​6-8) P’esei, Hesus a urgi su disipelnan pa nan “pura drecha asuntu.” (Mat. 5:25) Pablo a skirbi algu similar: “Rabia, ma no hasi piká; no laga solo baha riba boso rabia, i no duna Diabel oportunidat.” (Efe. 4:​26, 27) Si nos tabatin motibu hustifiká pa rabia, nos mester aktua lihé pa drecha e asuntu pa nos no keda den un estado provoká i asina duna Diabel oportunidat di probechá di nos.​—Luk. 17:​3, 4.

Semper Trata Otro Hende ku Rèspèt

21, 22. (a) Kon nos por apliká e konsehonan di Hesus ku nos a kaba di konsiderá? (b) Kiko nos lo konsiderá den e siguiente artíkulo?

²¹ E echo ku nos a repasá sierto deklarashonnan di Hesus den su Sermon Riba Seru mester yuda nos trata otro hende ku bondat i rèspèt. Ounke nos tur ta imperfekto, nos por apliká Hesus su konseho pasobra ni e ni nos Tata selestial no ta ferwagt pa nos hasi mas di loke nos por. Ku esfuerso sinsero, orashon i Yehova Dios su bendishon, nos por ta personanan di genio suave, miserikòrdioso i ku ta hasi pas. Nos por reflehá e lus spiritual ku ta bria pa e gloria di Yehova. Ademas, nos por rekonsiliá ku nos ruman ora esei ta nesesario.

²² Pa nos adorashon na Yehova por ta aseptabel, nos mester trata nos próhimo korektamente. (Mar. 12:31) Den e siguiente artíkulo, nos lo konsiderá otro deklarashonnan den e Sermon Riba Seru ku mester yuda nos sigui hasi bon na otro hende. Sin embargo, despues ku nos a meditá riba e puntonan menshoná anteriormente, saká for di Hesus su diskurso sobresaliente, nos tin ku puntra nos mes: ‘Kon bon ami ta trata otro hende?’

[Nota]

Kon Lo Bo Kontestá?

• Kiko ke men ser di genio suave?

• Dikon “esnan miserikòrdioso” ta felis?

• Kon nos por laga nos lus bria?

• Dikon nos mester ta lihé pa ‘rekonsiliá ku nos ruman’?

[Preguntanan di Estudio]

[Plachi na página 13]

Un manera importante pa laga nos lus bria ta dor di deklará e mensahe di Reino

[Plachi na página 14]

Kristiannan mester ta un ehèmpel den kondukta ku ta na armonia ku Dios su normanan haltu

[Plachi na página 15]

Hasi bo bèst pa rekonsiliá ku bo ruman