Skohe pa Sirbi Yehova den Bo Hubentut

“Kontinuá den e kosnan ku bo a siña i a keda konvensí di dje.”​—2 TIM. 3:14.

1. Kon Yehova ta konsiderá e sirbishi di su Testigunan hóben?

SIRBISHI sagrado di hóbennan ta asina importante pa Yehova ku el a inspirá un profesia relashoná ku nan. E salmista a kanta: “Bo pueblo lo pone su mes disponibel den e dia di bo poder; den e splendor di santidat, for di e matris di mardugá, bo hóbennan ta pa bo manera serena.” (Sal. 110:3) Sí, hóbennan ku ta dispuesto pa sirbi Yehova ta masha presioso p’e.

2. Ki preshon hóbennan ta konfrontá ora nan tin ku tuma desishon relashoná ku nan futuro?

² Hóbennan den e kongregashon kristian, boso a dediká boso mes na Yehova? Hopi hóben kisas tin difikultat pa disidí si nan lo sirbi e Dios berdadero òf no. Empresarionan, edukadónan i tin biaha miembronan di famia i amigunan ta animá hóbennan pa pone metanan materialista. Hopi bes ora hóbennan ta pone metanan relashoná ku nan adorashon na Yehova, e mundu ta tene mofa di nan. Pero echo ta ku e mihó manera di biba ta di sirbi e Dios berdadero. (Sal. 27:4) Relashoná ku esaki, pensa riba tres pregunta: Pakiko bo mester sirbi Dios? Kon bo por tin éksito komo un persona dediká na Dios apesar di loke otro hende por bisa òf hasi? Ki oportunidatnan maravioso di sirbishi sagrado por habri pa bo?

Sirbi Yehova Ta e Mihó Kos

3. Ki efekto e kreashon di Yehova mester tin riba nos?

³ Dikon bo tin ku sirbi e Dios bibu i berdadero? Revelashon 4:11 ta duna e motibu prinsipal: “Digno bo ta, nos Señor [Yehova] i nos Dios, pa risibí gloria i onor i poder; pasobra abo a krea tur kos, i pa motibu di bo boluntat nan tabata eksistí, i a wòrdu kreá.” Yehova ta e Kreador maravioso di tur loke ta eksistí. I ki bunita e tera ta! E palunan, e flornan, e bestianan, e oséanonan, e serunan i e watervalnan—ta Yehova a traha tur. Salmo 104:24 ta bisa: “Tera ta yen di loke [Dios] a krea.” Nos por ta masha gradisidu ku Yehova amorosamente a duna nos un kurpa i mente ku ta permití nos disfrutá di e tera i tur e bon kosnan riba dje! Apresio profundo p’e kreashon maravioso no mester motivá nos pa sirbi Yehova?

4, 5. Kua echonan divino a hala Josué serka Yehova?

⁴ Un otro motibu pa sirbi Yehova nos ta haña den e palabranan di e lider israelita Josué. Kasi na final di su bida, Josué a bisa e pueblo di Dios: “Boso sa di henter boso kurason i di henter boso alma ku ni un palabra di tur e bon palabranan ku SEÑOR boso Dios a papia tokante di boso no a faya; tur a keda kumplí pa boso.” Kon bin Josué por a ekspresá e palabranan ei?​—Jos. 23:14.

⁵ Komo mucha ku a lanta na Egipto, Josué mester a tende di e promesa di Yehova pa duna e israelitanan un tera pa nan mes. (Gén. 12:7; 50:​24, 25; Eks. 3:8) Despues, Josué a mira kon Yehova a kuminsá kumpli ku e promesa ei dor di trese e Dies Plaganan riba Egipto i obligá Fárao, kende tabata masha terko, pa laga e yunan di Israel bai. Josué tabata entre esnan ku a haña liberashon ora nan a pasa dor di Laman Kòrá, i despues el a mira kon Fárao i su ehérsito a hoga den e laman ei.  Durante e biahe largu den “e desierto grandi i teribel” di Sinaí, Josué a mira kon Yehova a perkurá pa tur loke e israelitanan tabatin mester. Ni un di nan no a muri di set òf di hamber. (Deu. 8:​3-5, 14-16; Jos. 24:​5-7) Ora e tempu a yega pa e israelitanan konkistá e nashonnan kananeo poderoso i tuma posishon di e Tera Primintí, Josué a mira kon e Dios ku é i e otro israelitanan a adorá a apoyá nan den e trabou aki.​—Jos. 10:​14, 42.

6. Kiko lo yuda bo kultivá e deseo pa sirbi Dios?

⁶ Josué tabata sa ku Yehova a kumpli ku Su promesanan. P’esei, Josué a deklará: ‘Pa loke ta ami i mi kas, nos lo sirbi Yehova.’ (Jos. 24:15) Kiko di abo? Ora bo pensa riba e promesanan ku e Dios berdadero a kumpli kuné kaba i esnan ku e tin ku kumpli kuné ainda, bo no ta haña gana di sirbié manera Josué a hasi?

7. Dikon boutismo den awa ta un paso importante ku nos mester dal?

⁷ Ora bo kontemplá Yehova su obranan di kreashon i ta meditá riba su promesanan maravioso i kompletamente konfiabel, nan mester motivá bo pa dediká bo mes na Yehova. Pero no solamente esei, nan mester motivá bo tambe pa simbolisá e dedikashon ei mediante boutismo den awa. Boutismo ta un paso masha importante ku esnan ku ke sirbi Dios mester dal. Nos Ehèmpel, Hesus, a mustra esaki bon kla. Djis promé ku el a kuminsá ku su trabou komo e Mesias, el a presentá su mes na Juan Boutista, pa Juan batis’é. Dikon Hesus a dal e paso ei? Despues el a bisa: “Mi a baha for di shelu, no pa hasi mi mes boluntat, sino e boluntat di esun ku a manda mi.” (Juan 6:38) Hesus a batisá pa demostrá ku el a presentá su mes pa kumpli ku e boluntat di su Tata.​—Mat. 3:​13-17.

8. Dikon Timoteo a skohe pa adorá Dios, i kiko abo tin ku hasi kisas?

⁸ Konsiderá tambe e kaso di Timoteo, un hóben kristian kende ku tempu a haña hopi trabou i privilegio serka Yehova. Dikon Timoteo a tuma e desishon di adorá e Dios berdadero? Beibel ta bisa nos ku tabatin ‘kosnan ku el siña i a keda konvensí di dje.’ (2 Tim. 3:14) Si bo a studia e Palabra di Dios i a keda konvensí ku su siñansanan ta bèrdat, bo ta den e mesun posishon ku Timoteo tabata. Awor bo tin ku tuma un desishon. Pakiko no papia ku bo mayornan tokante bo deseo? Huntu ku e ansianonan di kongregashon, nan por yuda bo komprondé kiko ta e rekisitonan bíbliko pa boutismo.​—Lesa Echonan 8:12.

9. Ki efekto bo boutismo lo por tin riba otro hende?

⁹ Bo boutismo ta un komienso ekselente pa sirbi e Dios berdadero. Ora bo dal e paso aki, bo ta kuminsá un kareda largu ku tin komo rekompensa bida eterno i e goso ku bo ta risibí ora bo ta hasi e boluntat di Dios. (Heb. 12:​2, 3) Ademas, esei lo ta un goso pa miembronan di bo famia ku ya kaba ta den e kareda i tambe pa bo amigunan den e kongregashon kristian. I mas importante ku tur kos, lo bo hasi Yehova su kurason kontentu. (Lesa Proverbionan 23:15.) Ta sierto ku otro hende kisas no ta komprondé dikon bo ta skohe pa adorá Yehova, i podisé nan ta  kuestioná bo desishon. Nan por asta bai kontra bo. Pero bo por superá e opstákulonan ei.

Ora Otro Hende Ta Interogá Bo òf Oponé Bo

10, 11. (a) Ki pregunta hende lo por hasi bo tokante bo desishon pa sirbi Dios? (b) Kiko bo por siña for di e manera ku Hesus a kontestá pregunta tokante adorashon berdadero?

¹⁰ Bo desishon pa sirbi Yehova lo por konfundí bo kompañeronan di skol, bisiña- i famianan. Podisé nan ta puntra bo dikon bo a skohe e kaminda ei i interogá bo tokante loke bo ta kere. Kon bo mester reakshoná? Klaru ku bo tin ku analisá bo pensamentu- i sintimentunan pa asina bo por ta kapas pa splika e motibunan di bo eskoho. I ora di kontestá pregunta tokante bo kreensianan, Hesus su ehèmpel ta esun mihó ku bo por sigui, no ta bèrdat?

¹¹ Ora e lidernan religioso hudiu a interogá Hesus tokante resurekshon, el a hala nan atenshon na un teksto di Beibel ku nan no a tene kuenta kuné. (Eks. 3:6; Mat. 22:​23, 31-33) Ora un eskriba a puntra Hesus kua tabata e mandamentu di mas grandi, el a sita e versíkulonan di Beibel apropiá p’e. E hòmber ei a keda gradisidu na Hesus pa e kontesta. (Lev. 19:18; Deu. 6:5; Mar. 12:​28-34) E manera ku Hesus a usa e Skritura i su manera di papia a kousa “un divishon den e multitut pa su motibu,” i su opositornan no por a hasié daño. (Juan 7:​32-46) Ora bo ta kontestá pregunta tokante bo fe, usa Beibel i reakshoná “ku suavedat i reverensia” òf rèspèt profundo. (1 Ped. 3:15) Si bo no sa e kontesta pa un pregunta, atmití esei i bisa ku lo bo bai hasi investigashon. Despues, buska e tópiko den Indèks di Publikashonnan Watch Tower òf den Watchtower Library riba CD-ROM si e ta disponibel den un idioma ku bo ta komprondé. Si bo hasi un bon preparashon, lo bo ‘sa kon bo mester kontestá.’​—Kol. 4:6.

12. Dikon bo no mester permití persekushon desanimá bo?

¹² Fuera di pregunta tokante bo posishon i kreensianan, tin mas kos ku bo por haña bo kuné. No lubidá ku Dios su enemigu, Satanas e Diabel, tin e mundu bou di su kontròl. (Lesa 1 Juan 5:19.) Lo ta irealístiko pa spera elogio i aprobashon di tur hende. Pues, lo bo por haña bo ku oposishon. Podisé algun hende ta kuminsá “kalumniá” bo i kisas lo sigui hasi esei. (1 Ped. 4:4) Pero kòrda ku no ta bo so. Hesukristu tambe a ser persiguí. Apòstel Pedro tambe, i el a skirbi: “Stimánan, no sea sorprendí pa motibu di e kandela di prueba [òf sufrimentu] ku tin meimei di boso, ku ta bin riba boso pa boso wòrdu probá, komo si fuera ta algu straño ta pasa ku boso; ma segun e midí ku boso ta kompartí e sufrimentunan di Kristu, sigui regosihá.”​—1 Ped. 4:12, 13.

13. Dikon kristiannan por alegrá ora nan ta ser persiguí?

¹³ Ora bo ta soportá persekushon komo un kristian, esei ta un motibu pa alegrá. Dikon? Pasobra si tur hende den e mundu ta di akuerdo ku bo estilo di bida, esaki lo ta un indikashon ku bo ta bibando na armonia ku e normanan di Satanas i no ku esnan di Dios.  Hesus a atvertí: “Ai di boso ora tur hende ta papia bon di boso, pasobra meskos nan tatanan tabata hasi ku e profetanan falsu.” (Luk. 6:26) Ora bo ta ser persiguí, esei ta indiká ku Satanas i su mundu ta rabiá ku bo pasobra bo ta sirbi Yehova. (Lesa Mateo 5:​11 i 12.) I ora bo ta “wòrdu reprochá pa e nòmber di Kristu,” bo tin motibu pa alegrá.​—1 Ped. 4:14.

14. Ki bon resultado por tin ora un persona keda fiel na Yehova apesar di persekushon?

¹⁴ Ora bo keda fiel na Yehova apesar di persekushon, esaki ta hiba na por lo ménos kuater resultado positivo. Bo ta duna testimonio tokante Dios i su Yu. Bo fiel perseveransia ta animá bo rumannan kristian. Algun persona ku opservá bo i ku no konosé Yehova kisas por sinti nan motivá pa busk’é. (Lesa Filipensenan 1:​12-14.) Anto segun ku bo ta eksperensiá kon Yehova ta duna bo e fortalesa pa soportá prueba, bo amor p’e ta krese.

“Un Porta Hanchu” Ta Habrí pa Bo

15. Kua “porta hanchu” a habri pa apòstel Pablo?

¹⁵ Relashoná ku su ministerio na Efeso, apòstel Pablo a skirbi: “A habri pa mi un porta hanchu [“ku ta hiba na aktividat,” NW].” (1 Kor. 16:​8, 9) Esaki tabata e porta ku a hiba na e gran aktividat di prediká e bon nobo i di hasi disipel den e stat ei. Dor di drenta dor di e porta òf aseptá e oportunidat ei, Pablo a yuda hopi hende siña tokante Yehova i ador’É.

16. Den ki sentido e restu ungí a drenta dor di “un porta habrí” na 1919?

¹⁶ Na 1919, Hesukristu glorifiká a pone “un porta habrí” dilanti e restu ungí. (Rev. 3:8) Nan a drenta dor di e porta ei i a kuminsá prediká e bon nobo, siñando hende bèrdat bíbliko ku mas fervor ku nunka promé. Ki fruta nan ministerio a produsí? Awor e bon nobo a alkansá e finnan di e tera, i ya tin rònt di shete mion hende ku e speransa di gana bida den Dios su mundu nobo.

17. Kon bo por drenta dor di “un porta hanchu ku ta hiba na aktividat”?

¹⁷ Ainda tin “un porta hanchu ku ta hiba na aktividat” habrí pa tur sirbidó di Yehova. Esnan ku drenta dor di dje ta haña goso i satisfakshon segun ku nan ta partisipá mas den e trabou di prediká e bon nobo. Boso, sirbidónan hóben di Yehova, kuantu boso ta balorá e privilegio inkomparabel di por yuda otro hende ehersé fe òf “kere e evangelio”? (Mar. 1:​14, 15) Bo a pensa riba e posibilidat di traha pionero regular òf pionero ousiliar? Konstrukshon di Salòn di Reino, sirbishi di Bètel i e kampo di misionero ta otro oportunidatnan ku por habri pa hopi di boso. Siendo ku Satanas su mundu malbado ta yegando su final, partisipashon den e rasgonan aki di e sirbishi di Reino ta birando mas urgente kada dia. Abo lo drenta dor di e “porta hanchu” miéntras ku tin tempu ainda?

‘Purba i Mira Ku Yehova Ta Bon’

18, 19. (a) Kiko a yuda David haña un deseo fuerte pa sirbi Yehova? (b) Kiko ta mustra ku nunka David a sinti duele ku el a sirbi Dios?

¹⁸ E salmista inspirá a invitá otro hende pa ‘purba i mira ku Yehova ta bon.’ (Sal. 34:8) Tempu ku Rei David di antiguo Israel tabata un hóben wardadó di karné, Yehova a skap’é di e atakenan di bestia salbahe. Dios a sosten’é den su lucha kontra Goliat i a reskat’é for di hopi otro kalamidat. (1 Sam. 17:​32-51; Sal. 18, introdukshon) Debí na Dios su gran bondat amoroso, David a sintié motivá pa  skirbi: “O SEÑOR mi Dios, hopi ta e maravianan ku bo a hasi, i bo pensamentunan pa ku nos; no tin ningun ku ta di kompará ku bo.”​—Sal. 40:5.

¹⁹ David a siña stima Yehova profundamente, i e kier a alab’É ku henter su kurason i mente. (Lesa Salmonan 40:​8-10.) Segun ku e añanan tabata pasa, nunka David a sinti duele ku el a usa su bida pa adorá e Dios berdadero. Su bida di deboshon na Dios tabata su tesoro di mas grandi—un fuente di felisidat sin igual. Ora David a bira bieu, el a bisa: “Bo ta mi speransa; o Señor DIOS, bo ta mi konfiansa for di mi hubentut. I asta ora mi bira bieu, ku kabei blanku, o Dios, no bandoná mi.” (Sal. 71:​5, 18) Ounke David su forsa físiko a mengua, su konfiansa den Yehova i e amistat ku e tabatin kunÉ a bira mas fuerte.

20. Dikon e mihó manera pa usa bo bida ta di sirbi Dios?

²⁰ E bida di Josué, David i Timoteo ta duna mas prueba ku e mihó manera pa usa bo bida ta di sirbi Yehova. E benefisionan material temporal di un karera den e mundu aki no ta di kompará ku e benefisionan duradero ku bo ta risibí ora bo ta ‘sirbi Yehova ku henter bo alma i kurason.’ (Jos. 22:5) Si ainda bo no a dediká bo mes na Yehova den orashon, puntra bo mes: ‘Kiko ta stroba mi di bira un Testigu di Yehova?’ Si bo ta un adoradó batisá di Yehova kaba, lo bo ke oumentá bo goso den bida? Si esei ta e kaso, ekspandé bo ministerio i sigui hasi progreso spiritual. E siguiente artíkulo lo mustra bo kon bo por progresá spiritualmente dor di sigui apòstel Pablo su ehèmpel.

Kon Lo Bo Kontestá?

• Menshoná dos motibu pakiko nos mester sirbi Dios.

• Kiko a yuda Timoteo tuma un desishon pa sirbi Dios?

• Dikon bo mester keda firme apesar di persekushon?

• Ki oportunidatnan pa sirbishi por ta habrí pa bo?

[Preguntanan di Estudio]

[Plachi na página 25]

E mihó manera di biba ta di sirbi Yehova

[Plachi na página 26]

Bo por kontestá pregunta tokante bo fe?