Abo Ta Prepará pa Defendé Bo Fe?

BO A yega di haña bo den un situashon den kua bo a sinti ku bo tabatin ku defendé bo fe? Wak kiko a pasa ku Susana, un ruman muhé di Paraguay ku tin 16 aña. E ta bai skol sekundario i durante lès di sosiologia, a bin padilanti ku Testigu di Yehova no ta aseptá “Tèstamènt Nobo,” ni Hesukristu, ni Maria. Tambe nan a bisa ku Testigunan ta hendenan fanátiko ku ta preferá di muri en bes di aseptá kuido médiko. Kon abo lo a reakshoná?

Susana a hasi orashon na Yehova i a hisa su dede. Bèl tabata serka di bati, p’esei el a puntra e maestra si e tin mag di duna un presentashon tokante su kreensianan komo un Testigu di Yehova. E maestra a bai di akuerdo mesora. Durante e siguiente dos simannan, Susana a prepará un spreekbeurt, usando e foyeto titulá Testigonan di Jehova​—Ken Nan Ta? Kico Ta Nan Creencianan?

E dia pa duna e spreekbeurt a yega. Susana a splika dikon nos ta karga e nòmber Testigu di Yehova. Tambe el a splika kiko ta nos speransa pa futuro i dikon nos no ta aseptá transfushon di sanger. Despues el a animá e klas pa hasi pregunta. Mayoria di e studiantenan a hisa nan dede. E maestra a keda impreshoná ku e kontestanan bíbliko ku e hóben tabata duna.

Un studiante a komentá, “Mi a yega di bai Salòn di Reino un biaha, i no tabatin ni ún santu.” E maestra tabata ke sa ta dikon. Susana a lesa Salmo 115:​4-8 i Eksodo 20:4. Sorprendí, e maestra a bisa, “Kon bin nos misanan ta yen di imágen siendo ku Beibel ta kondená nan?”

E studiantenan a sigui hasi pregunta pa 40 minüt. Ora Susana a puntra e klas si nan ke mira e vidio Sin Sanger​—Medisina Ta Aseptá e Reto, nan tur a kontesta ku sí. Pues e maestra a skèdjel e presentashon p’e siguiente dia. Ora nan a kaba di wak e vidio, Susana a splika kua ta e tratamentunan sin sanger ku Testigu di Yehova sa aseptá. Tokante esei, e maestra a komentá: “Mi no tabata sa ku tin asina hopi tratamentu sin sanger; ni mi no tabata sa kiko ta e benefisionan di tratamentu sin sanger. Ta pa Testigunan di Yehova so e tratamentunan aki ta?” Ora el a tende ku nan ta pa tur hende, e maestra a bisa, “E siguiente biaha ku Testigu di Yehova bin mi kas, lo mi papia ku nan.”

E presentashon di 20 minüt ku Susana a prepará na final di kuenta a dura tres ora. Un siman  despues, otro studiantenan a duna un presentashon tokante nan kreensianan komo miembronan di iglesia. Na final, hopi pregunta a lanta, pero e studiantenan en kuestion no por a defendé nan fe. E maestra a puntra nan, “Kon bin boso no por defendé boso fe manera boso kompañero di klas ku ta un Testigu di Yehova?”

E kontesta tabata: “Nan realmente ta studia Beibel. Nos nò.”

E maestra a bira wak Susana i a bisa: “Boso realmente ta studia Beibel i ta hasi un esfuerso pa apliká loke e ta bisa. Boso meresé elogio.”

Susana por a keda ketu. Sin embargo, e no a keda ketu i a sigui e bon ehèmpel di un hobensita israelita ku e sirionan a kue prezu. Beibel no ta menshoná nòmber di e hobensita ei. El a bira esklaba den kas di e general sirio Naaman, kende tabatin un malesa di kueru askeroso. E hobensita israelita no a keda ketu, el a bisa esposa di su shon: “Mara mi shon Naaman tabata serka e profeta ku ta na Samaria! E ora ei é lo a kur’é di su lepra.” E hobensita a sinti ku e mester a papia tokante e Dios berdadero. Komo resultado su doño, Naaman, a bira un adoradó di Yehova.​—2 Rei. 5:​3, 17.

Asina tambe, Susana no por a keda sin duna testimonio tokante Yehova i su pueblo. Ora su kreensianan tabata bou di atake, el a tuma inisiativa pa defendé su fe. Susana a obedesé e mandamentu bíbliko: “Santifiká Kristu komo Señor den boso kurason, i sea semper dispuesto pa duna kontesta na kada un ku pidi boso pa duna kuenta di e speransa ku tin den boso, sin embargo ku suavedat i reverensia.” (1 Ped. 3:15) Abo ta kla pa defendé bo fe i pa tuma inisiativa ora e oportunidat presentá?

[Plachi na página 28]

Loke por yuda bo defendé bo fe