Aseptá Yehova Su Outoridat
Aseptá Yehova Su Outoridat
“Esaki ta e amor di Dios, ku nos ta warda su mandamentunan; i su mandamentunan no ta pisá.”—1 JUAN 5:3.
1, 2. (a) Dikon hopi hende awe no ta gusta e idea di someté nan mes na outoridat? (b) Hende ku no ke someté nan mes na outoridat di otronan ta independiente di bèrdat? Splika.
HOPI hende awe no ke someté nan mes na e boluntat di un otro persona. Hendenan asina ta bisa: “Niun hende no tin nada di bisa mi.” Pero, e personanan aki ta independiente di bèrdat? Klaru ku nò! Mayoria di nan ta simplemente sigui e normanan di un gran kantidat di hende ku ta biba “konforme e mundu aki.” (Rom. 12:2) Leu di ta independiente—pa sita e palabranan di Pedro, e apòstel kristian—nan ta “esklabo di korupshon.” (2 Ped. 2:19) Nan ta kana “segun e kurso di e mundu aki, segun e prens di e poder di laira,” Satanas e Diabel.—Efe. 2:2.
2 Un eskritor a broma: “Mi no ta permití mi mayornan ni pastor ni minister ni guru (lider religioso di hinduismo) ni Beibel disidí pa mi loke ta korekto.” Ta sierto ku algun hende kisas ta abusá di nan outoridat i podisé no ta meresé nos obedensia. Pero nos ta solushoná e problema ora nos nenga rotundamente ku nos tin mester di guia? Un konsiderashon breve di e titularnan di notisia den korant, na televishon òf na radio ta duna un kontesta desalentador riba e pregunta ei. Ta lamentabel ku nèt awor ku hende tin asina tantu mester di guia, mayoria di nan ta ménos inkliná ku nunka pa asept’é.
Nos Punto di Bista di Outoridat
3. Kon e kristiannan di promé siglo a demostrá ku nan no a obedesé outoridat humano siegamente?
3 Komo kristiannan, nos tin un punto di bista diferente for di esun di e mundu. Pero esei no ta nifiká ku siegamente nos ta hasi tur loke otro hende manda nos. Al kontrali, tin biaha nos tin ku nenga di someté nos mes na boluntat di otronan ounke nan ta den puesto di outoridat. Esaki tabata e kaso tambe ku e kristiannan di promé siglo. Por ehèmpel, ora e apòstelnan a haña òrdu pa stòp di prediká, miedu no a pone nan someté nan mes na e mandato di e sumo saserdote i otro outoridatnan ku a forma parti di e Sanedrin. Nan no a stòp di hasi loke ta korekto pa obedesé outoridat humano.—Lesa Echonan 5:27-29.
4. Menshoná ehèmpelnan for di e Skritura Hebreo ku ta mustra ku hopi sirbidó di Dios tabatin un estilo di bida impopular.
4 Hopi sirbidó di Dios den e era prekristian a aktua ku un determinashon similar. Por ehèmpel, Moisés “a nenga di wòrdu yamá yu di Fárao su yu muhé, skohiendo pa mas bien sufri maltrato huntu ku e pueblo di Dios” ounke esaki a lanta “e furia di rei.” (Heb. 11:24, 25, 27) Hosé a resistí e avansenan di Potifar su kasá, kende tabatin e poder di tuma vengansa i hasié daño. (Gén. 39:7-9) Daniel “a proponé den su kurason di no kontaminá su mes ku e mihó kuminda di rei” maske esaki no tabata algu fásil pa e funshonario prinsipal di korte di Babilonia aseptá. (Dan. 1:8-14) E ehèmpelnan ei ta mustra ku atraves di historia, e pueblo di Dios a tuma un posishon firme pa loke ta korekto, sin importá e konsekuensianan. Nan no a sukumbí na preshon djis pa haña aprobashon di hende; nos tampoko no mester hasi esei.
5. Ki diferensia tin entre nos punto di bista di outoridat i esun di e mundu?
5 Nos posishon firme i ku kurashi no ta djis un terkedat, ni e no ta un forma di rebeldiá, manera den kaso di algun hende, djis pa mustra ku nos no ta di akuerdo ku e sistema polítiko. Mas bien, nos ta determiná pa aseptá Yehova su outoridat riba esun di kualke hende. Ora hende su lei ta na konflikto ku e lei di Dios, no ta difísil pa nos disidí kiko pa hasi. Meskos ku e apòstelnan den e promé siglo, nos ta obedesé Dios komo gobernante mas bien ku hende.
6. Dikon semper ta mihó pa obedesé Yehova su mandamentunan?
6 Kiko a yuda nos aseptá Dios su outoridat? E echo ku nos ta di akuerdo ku loke Proverbionan 3:5 i 6 ta bisa, esta: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” Nos ta kere ku tur loke Dios ta rekerí di nos, finalmente, ta pa nos mes bon. (Lesa Deuteronomio 10:12 i 13.) Sí, Yehova a deskribí su mes na e israelitanan komo Esun ku “ta siña bo, pa bo prosperá, Kende ta guia bo den e kaminda ku bo mester kana.” Kaba, el a agregá: “Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera ola di laman.” (Isa. 48:17, 18) Nos tin konfiansa den e palabranan ei. Nos ta konvensí ku obedensia na Dios su mandamentunan semper ta mihó pa nos.
7. Kiko nos mester hasi asta si nos no ta komprondé kompletamente pakiko e Palabra di Dios ta manda nos hasi algu?
7 Nos ta aseptá Yehova su outoridat i ta obedes’é asta si nos no ta komprondé kompletamente e motibu di sierto rekisitonan ku su Palabra ta menshoná. Esaki no ta un fe siegu; mas bien, e ta e konfiansa ku nos tin. E ta reflehá nos konfiansa sinsero ku Yehova sa kiko ta bon pa nos. Ademas, nos obedensia ta un ekspreshon di nos amor, pasobra apòstel Juan a skirbi: “Esaki ta e amor di Dios, ku nos ta warda su mandamentunan.” (1 Juan 5:3) Pero tin un otro aspekto di nos obedensia ku nos no mester pasa por haltu.
Entrená Nos Mente
8. Kiko un “mente entrená” tin di haber ku aseptá Yehova su outoridat?
8 Beibel ta bisa ku nos mester tin nos “mente entrená pa diserní loke ta bon i loke ta malu.” (Heb. 5:14) P’esei, nos meta no ta pa obedesé Dios su leinan mekánikamente, sin pensa. Mas bien, nos ke tin e abilidat pa “diserní loke ta bon i loke ta malu” a base di e normanan di Yehova. Nos ke mira e sabiduria di Yehova su kamindanan pa asina nos por bisa meskos ku e salmista: “Bo lei ta den mi kurason.”—Sal. 40:8.
9. Kon nos por armonisá nos konsenshi ku e normanan di Yehova, i dikon ta importante pa nos hasi esei?
9 Pa nos por tin e mesun apresio ku e salmista tabatin pa Dios su leinan, nos tin ku meditá riba loke nos ta lesa den Beibel. Por ehèmpel, ora nos siña tokante un sierto rekisito di Yehova, nos lo por puntra nos mes: ‘Dikon esaki ta un mandamentu òf prinsipio sabí? Dikon si mi obedesé, e ta pa mi mes bon? Ki mal konsekuensianan personanan ku a ignorá Dios su konseho den e asuntu aki a haña nan kuné?’ Di e manera aki, nos ta armonisá nos konsenshi ku e kamindanan di Yehova i tin mas chèns di tuma desishonnan ku ta kuadra ku su boluntat. Nos por ‘komprondé kiko ta e boluntat di Yehova’ i kumpli ku esaki. (Efe. 5:17) Sin embargo, no ta tur biaha esaki ta fásil.
Satanas Ta Trata di Debilitá Dios Su Outoridat
10. Menshoná un área den kua Satanas ta trata di debilitá Dios su outoridat.
10 Pa hopi tempu kaba, Satanas ta trata di debilitá Dios su outoridat. Su aktitut independiente ta bisto den hopi manera. Tuma por ehèmpel, e falta di rèspèt pa Dios su areglo di matrimonio. Algun hende ta skohe pa biba huntu, miéntras ku otronan ta usa intriga pa kibra nan matrimonio. Personanan di ámbos grupo kisas ta di akuerdo ku un aktris bon konosí ku a deklará: “Monogamia ta algu imposibel pa tur dos sekso.” El a agregá: “Mi no konosé ningun hende ku ta fiel òf ku ke keda fiel.” Reflekshonando riba su propio relashonnan ku a frakasá, un aktor popular a deklará algu similar. El a bisa: “Mi no ta sigur ku realmente nos naturalesa ta pa keda ku e mesun persona pa e restu di nos bida.” Ta bon pa nos puntra nos mes: ‘Mi ta aseptá Yehova su outoridat den e asuntu di matrimonio, òf e mundu su aktitut liberal pa ku matrimonio a afektá mi manera di pensa?’
11, 12. (a) Dikon por ta difísil pa hóbennan aseptá Yehova su outoridat? (b) Relatá un eksperensia ku ta ilustrá e bobedat di desobedesé Yehova su lei- i prinsipionan.
11 Bo ta un hóben den e organisashon di Yehova? Si esei ta e kaso, bo por ta un blanko spesial di Satanas den su intentonan pa debilitá Yehova su outoridat. “E pashonnan di hubentut” kombiná ku e preshon di bo pareunan por pone bo pensa ku Dios su leinan ta difísil pa kumpli kuné. (2 Tim. 2:22) No laga esei pasa ku bo. Hasi esfuerso pa mira e sabiduria di Dios su normanan. Por ehèmpel, Beibel ta bisa bo pa “hui for di inmoralidat.” (1 Kor. 6:18) Den e kaso aki tambe, hasi bo mes e preguntanan aki: ‘Dikon esaki ta un mandamentu sabí? Kon obedensia den e asuntu aki lo benefisiá mi?’ Kisas bo konosé algun hende ku a ignorá Dios su konseho i ku despues mester a paga karu pa e eror ei. Nan ta realmente felis awor? Nan bida awor ta mihó ku ora nan tabata asosiá ku Yehova su organisashon? Realmente nan a haña sierto sekreto ku ta hiba na felisidat ku e restu di Dios su sirbidónan no sa di dje?—Lesa Isaias 65:14.
12 Konsiderá loke un kristian ku yama Sharon a deklará algun tempu pasá: “Debí ku mi no a obedesé Yehova su lei, mi a haña e malesa mortal AIDS. Hopi bes mi ta rekordá e hopi añanan felis ku mi a disfrutá di dje sirbiendo Yehova.” El a atmití ku el a kometé un bobedat dor di a desobedesé Yehova su leinan i ku e mester a rekonosé nan gran balor. Yehova su leinan ta pa nos propio protekshon. Sharon a muri apénas shete siman despues ku el a skirbi e palabranan sitá ariba. Manera Sharon su eksperensia trágiko ta mustra, Satanas no tin nada bon pa ofresé esnan ku bira parti di e sistema malbado aki. Komo “e tata di mentira,” e ta hasi hopi promesa. Pero, e no ta kumpli ku niun di su promesanan, meskos ku e no a kumpli ku e promesa ku el a hasi na Eva. (Juan 8:44) No tin duda, aseptá Yehova su outoridat semper ta mihó.
Tene Kuidou ku un Aktitut Independiente
13. Menshoná un área den kua nos tin ku tene kuidou ku un aktitut independiente.
13 Pa nos aseptá Yehova su outoridat, nos tin ku tene kuidou ku un aktitut independiente. Un aktitut orguyoso por pone nos pensa ku nos no tin mester di guia di ningun hende. Por ehèmpel, kisas nos ta nenga di aseptá konseho di esnan ku ta hiba delantera den e pueblo di Dios. Dios a establesé un areglo den kua un esklabo fiel i prudente ta perkurá alimento spiritual na e debido tempu. (Mat. 24:45-47) Nos mester ta humilde i rekonosé ku esei ta e medio ku Yehova ta usa pa perkurá pa su pueblo awe. Imitá e fiel apòstelnan. Ora ku algun disipel a sinti nan ofendí i a stòp di sigui Hesus, el a puntra e apòstelnan: “Boso tambe kier bai anto?” Pedro a kontest’é: “Señor, serka ken nos lo bai? Abo tin e palabranan di bida eterno.”—Juan 6:66-68.
14, 15. Dikon nos mester ta humilde i obedesé konseho di Beibel?
14 Aseptá Yehova su outoridat ta enserá aktua na armonia ku konseho basá riba su Palabra. Por ehèmpel, e esklabo fiel i prudente ta spièrtando nos pa “keda lantá i bon na tinu.” (1 Tes. 5:6, BPK) E konseho ei ta masha oportuno durante e último dianan aki den kua hopi hende ta “stimadó di nan mes [i] stimadó di plaka.” (2 Tim. 3:1, 2) E aktitutnan dominante ei por afektá nos? Sí. Metanan ku no tin di haber ku nos sirbishi na Dios por pone nos kabishá i pega soño spiritualmente, òf nos por bira materialista. (Luk. 12:16-21) P’esei, ta masha sabí pa nos aseptá Beibel su konseho i evitá e estilo di bida egoista ku ta asina komun den e mundu di Satanas.—1 Juan 2:16.
15 E ansianonan nombrá den e kongregashonnan lokal ta duna nos e kuminda spiritual ku ta bini di e esklabo fiel i prudente. Beibel ta urgi nos: “Obedesé boso lidernan i someté boso mes na nan; pasobra nan ta tene warda riba boso alma, komo esnan ku lo duna kuenta. Laga nan hasi esaki ku goso i no ku tristesa, pasobra esaki lo no ta bentahoso pa boso.” (Heb. 13:17) Esaki ta nifiká ku ansianonan di kongregashon no por faya? Klaru ku nò! Dios ta mira nan imperfekshonnan mihó ku kualke hende. I tòg, e ke pa nos ta sumiso na nan. Ora nos ta koperá ku e ansianonan, maske nan ta imperfekto, nos ta duna evidensia ku nos ta aseptá Yehova su outoridat.
E Importansia di Humildat
16. Kon nos por mustra rèspèt pa Hesus komo Kabes di e kongregashon kristian?
16 Semper nos tin ku kòrda ku Hesus ta e berdadero Kabes di e kongregashon. (Kol. 1:18) Esei ta un motibu pakiko nos mester someté nos mes humildemente na e guia di ansianonan nombrá, mustrando “masha hopi apresio pa nan.” (1 Tes. 5:12, 13) Klaru ku e ansianonan di kongregashon por demostrá ku nan tambe ta sumiso dor di hasi esfuerso kuidadoso pa transmití e mensahe di Dios na e kongregashon i no nan opinion personal. Nan “no [ta] pasa límite di loke tin skirbí” pa promové sierto idea personal.—1 Kor. 4:6, BPK.
17. Dikon un aktitut ambisioso ta peligroso?
17 Tur miembro di e kongregashon mester tene kuidou pa nan no ta buskando nan propio onor òf gloria. (Pro. 25:27) Evidentemente, esei tabata un trampa pa un sierto disipel ku apòstel Juan a topa. Juan a skirbi: “Diótrefes, kende ta gusta di ta e promé den nan, no ta aseptá loke nos bisa. Pa e motibu aki, si mi bin, lo mi hala atenshon riba su echonan ku e ta hasi, akusando nos inhustamente ku palabranan malisioso.” (3 Juan 9, 10) Esaki ta siña asta nos awe un lès. Nos tin bon motibu pa eliminá kualke rastro di ambishon ku nos lo por a nota na nos mes. Beibel ta bisa nos: “Orguyo ta bin promé ku destrukshon, i un spiritu arogante promé ku kaida.” (Pro. 11:2; 16:18) Esnan ku ta aseptá Dios su outoridat tin ku resistí e trampa di orguyo, pasobra di otro manera esaki lo hiba na desonor.—Pro. 11:2; 16:18.
18. Kiko lo yuda nos aseptá Yehova su outoridat?
18 Sí, pone komo bo meta pa resistí e mundu su aktitut independiente i pa aseptá Yehova su outoridat. De bes en kuando, meditá ku apresio riba e gran privilegio ku bo tin di sirbi Yehova. E echo ku bo ta parti di Dios su pueblo ta evidensia ku el a hala bo na su organisashon mediante su spiritu santu. (Juan 6:44) Nunka balotá bo relashon ku Dios! Hasi bo bèst pa den tur aspekto di bida bo demostrá ku bo ta rechasá un aktitut independiente i ku bo ta aseptá Yehova su outoridat.
Bo Ta Kòrda?
• Kiko aseptá Yehova su outoridat ta enserá?
• Kiko entrená nos mente tin di haber ku aseptá Yehova su outoridat?
• Den ki áreanan Satanas ta trata di debilitá Dios su outoridat?
• Dikon humildat ta importante pa aseptá Yehova su outoridat?
[Preguntanan di Estudio]
[Plachi na página 21]
“Nos mester obedesé Dios mas ku hende”
[Plachi na página 22]
Semper ta sabí pa sigui Dios su normanan