Kualidatnan Ku Nos Tin Ku Buska

“Buska hustisia, [“deboshon na Dios,” NW], fe, amor, perseveransia i mansedumbre.”​—1 Tim. 6:11.

1. Na ki aktividatnan hende ta dediká nan bida?

NA KI aktividatnan hende den e mundu djawe ta dediká nan bida? Manera Beibel ta mustra, hopi hende ta kore tras di metanan bano. Algun ta “stimadó di plaka” ku e pensamentu ku kos material ta hiba na felisidat. Otronan ta “stimadó di plaser” i ta hasi plaser i entretenimentu e kosnan prinsipal den nan bida. (2 Tim. 3:​2, 4) Pero maske kuantu esfuerso hende hasi pa logra e metanan aki, en realidat, nan ta ‘koriendo tras di bientu.’​—Ekl. 1:14.

2. (a) Ki premio Dios a animá algun kristian pa buska pa alkansá? (b) Ki prospekto Yehova ta ofresé mayoria di kristian awe?

² Na kontraste ku esei, apòstel Pablo a indiká un meta balioso ku kristiannan mester buska pa alkansá ora el a skirbi: “Mi ta hasi tur esfuerso pa alkansá e meta, pa haña e premio di e yamada selestial di Dios den Kristu Hesus.” (Fil. 3:14) Beibel ta mustra ku un total di 144.000 kristian ungí, inkluso Pablo, ta risibí e premio ei di bida selestial. Nan lo goberná e tera huntu ku Hesukristu durante su Reinado di Mil Aña. Esta un meta maravioso Dios ta animá e personanan ei pa alkansá! Sin embargo, e gran mayoria di kristiannan awe tin un otro speransa òf meta. Di un manera amoroso, Yehova ta ofresé nan loke Adam ku Eva a pèrdè, esta, e prospekto di bida eterno ku salú perfekto riba un tera kombertí den paradeis.​—Rev. 7:​4, 9; 21:​1-4.

3. Kon nos por mustra gratitut pa Dios su bondat inmeresí?

³ Hende pekaminoso no por gana bida eterno mediante nan esfuerso imperfekto pa hasi loke ta bon. (Isa. 64:6) E úniko manera ku hende por haña bida eterno ta dor di ehersé fe den e perkurashon amoroso di Dios pa salbashon mediante Hesukristu. Kiko nos por hasi pa mustra nos gratitut pa e bondat inmeresí ei di Dios? Un kos ku nos por hasi ta di obedesé e mandamentu aki: “Buska hustisia, [“deboshon na Dios,” NW], fe, amor, perseveransia i mansedumbre.” (1 Tim. 6:11) Un konsiderashon di e kualidatnan aki lo por yuda kada un di nos pa ta mas determiná pa sigui buska i desplegá nan “mas plenamente.”​—1 Tes. 4:​1, NW.

“Buska Hustisia”

4. Dikon nos por ta sigur ku ta importante pa buska “hustisia,” i kiko ta e promé pasonan ku un persona tin ku dal pa logra esei?

⁴ Den tur e dos kartanan ku apòstel Pablo a skirbi Timoteo, el a menshoná kualidatnan ku kristiannan mester buska. I tur dos biaha, el a menshoná “hustisia” promé. (1 Tim. 6:11; 2 Tim. 2:22) Ademas, den otro pasashinan, bes tras bes, Beibel ta animá nos pa buska òf sigui hustisia. (Pro. 15:9; 21:21; Isa. 51:1) Un manera ku nos por kuminsá hasi esei ta dor di siña “konosé . . . e úniko Dios berdadero, i Hesukristu, kende [el] a manda.” (Juan 17:3) Ora un persona ta buska hustisia, esaki lo motiv’é pa tuma akshon—pa repentí di pikánan di pasado i “kombertí” pa e por hasi Dios su boluntat.​—Echo. 3:19.

5. Kiko nos tin ku hasi pa haña i mantené un posishon hustu dilanti di Dios?

⁵ Miónes di hende ku sinseramente ta buskando hustisia a dediká nan bida na Yehova i a simbolisá e dedikashon ei mediante boutismo den awa. Si bo ta un kristian batisá, bo a pensa riba e echo ku bo estilo di bida mester revelá ku kontinuamente bo ta buska hustisia? I probablemente e ta revelá esei. Un aspekto di un bida asina ta e echo ku bo ta diserní desde e punto di bista bíbliko “loke ta bon i loke ta malu” ora bo tin ku tuma desishonnan importante den bida. (Lesa Hebreonan 5:14.) Por ehèmpel, si bo ta un  kristian soltero ku tin e edat pa kasa, bo ta kompletamente determiná pa evitá kualke relashon romántiko ku un persona ku no ta un kristian batisá? Si bo ta buska hustisia, esei lo ta bo determinashon.​—1 Kor. 7:39.

6. Kiko buska hustisia sinseramente ta enserá?

⁶ Ser hustu ta diferente for di ser hustu den bo mes bista òf ser “demasiado hustu.” (Ekl. 7:16) Hesus a spièrta hende kontra hasimentu di “obranan di karidat [‘praktikamentu di hustisia,’ NW]” djis pa duna e impreshon ku bo ta mihó ku otro hende. (Mat. 6:1) Ora un persona sinseramente ta buska hustisia, esei ta enbolbé e kurason ya ku esaki ta enserá ku e persona ta korigí su pensamentu-, aktitut-, motivashon- i deseonan robes. Si nos ta sigui hasi esfuerso pa logra esaki, ta improbabel ku nos lo kometé pikánan serio. (Lesa Proverbionan 4:23; kompará ku Santiago 1:​14 i 15.) Ademas, Yehova lo bendishoná nos i yuda nos den nos esfuersonan pa buska i desplegá otro kualidatnan kristian importante.

“Buska . . . Deboshon na Dios”

7. Kiko ta “deboshon na Dios”?

⁷ Un persona deboto ta un persona kompletamente dediká i leal. Manera un dikshonario bíbliko ta bisa, e palabra griego tradusí komo “deboshon na Dios” ta enserá un aktitut sano di ta masha kuidadoso pa no laga nada debilitá nos temor pa Dios. E aktonan di desobedensia di e israelitanan, asta despues ku Dios a libra nan for di Egipto, a demostrá ku hopi bes nan no a desplegá e klase di deboshon ei.

8. (a) Ki pregunta Adam su piká a lanta? (b) Kon e kontesta pa e “sekreto sagrado” aki a ser revelá?

⁸ Despues di míles di aña ku e hòmber perfekto Adam a peka, a keda e pregunta: “Tin un hende ku por desplegá deboshon perfekto na Dios?” Atraves di siglonan, no tabatin ningun hende pekadó ku por a hiba un bida di deboshon perfekto na Dios. Pero na su debido tempu, Yehova a revelá e kontesta pa e “sekreto sagrado” aki. El a transferí e bida di su Yu unigénito selestial pa e matris di Maria pa asina e por a nase komo un hende perfekto. Durante Hesus su bida riba tera i inkluso su morto humiante, el a demostrá kiko ke men ser un persona kompletamente dediká i leal na e Dios berdadero. Su orashonnan a revelá su rèspèt profundo pa su amoroso Tata selestial. (Mat. 11:25; Juan 12:​27, 28) P’esei, Yehova a inspirá Pablo pa papia di “deboshon na Dios” ora el a deskribí Hesus su bida ehemplar.​—Lesa 1 Timoteo 3:16. *

9. Kon nos por buska deboshon na Dios?

⁹ Debí na nos kondishon pekaminoso, nos no por desplegá deboshon perfekto na Dios. Pero nos por hasi esfuerso pa despleg’é sí. Esaki ta rekerí pa nos sigui Kristu su ehèmpel mas tantu posibel. (1 Ped. 2:21) Asina nos lo no ta manera e hipókritanan ku “tin aparensia di ta religioso bèrdè [òf tin un forma di deboshon na Dios],  ma ku ta nenga su poder.” (2 Tim. 3:5) Esaki no ta nifiká sí ku berdadero deboshon na Dios no tin nada di haber ku aparensia. Definitivamente, e ta enbolbé nos aparensia. Por ehèmpel, sea ku nos ta skohe un bistí di kasamentu òf ta disidí kiko pa bisti ora di bai hasi kompra, nos aparensia semper mester ta na armonia ku loke nos ta bisa, esta, ku nos ta “teme Dios.” (1 Tim. 2:​9, 10) Sí, buska i desplegá deboshon na Dios ta rekerí pa nos tene kuenta ku Dios su normanan hustu den nos bida diario.

“Buska . . . Fe”

10. Kiko nos tin ku hasi pa mantené nos fe fuerte?

¹⁰ Lesa Romanonan 10:17. * Pa un kristian kultivá i mantené un fe fuerte, e tin ku sigui meditá riba e bèrdatnan presioso ku tin den e Palabra di Dios. “E esklabo fiel i prudente” a perkurá hopi publikashon ekselente. Tres buki eksepshonal ku el a publiká ta: E homber mas importante cu hamás a biba, Siña for di e Gran Maestro i “Bin, Sigui Mi.” E bukinan aki a ser prepará pa yuda nos siña konosé Kristu mihó i asina kapasitá nos pa imit’é. (Mat. 24:​45-47) E esklabo fiel i prudente a hasi areglo tambe pa reunion-, asamblea- i kongresonan ku hopi bes ta resaltá “e palabra tokante Kristu.” Bo ta mira algun manera ku lo bo por probechá mas di esakinan segun ku bo ta presta “muchu mas atenshon” na loke Dios ta perkurá?​—Heb. 2:1.

11. Ki papel orashon i obedensia ta hunga den nos buskamentu di fe?

¹¹ Orashon ta un otro yudansa pa edifiká un fe fuerte. Un biaha, Hesus su siguidónan a rog’é: “Oumentá nos fe!” Ku humildat, nos tambe por pidi Dios hasi meskos pa nos. (Luk. 17:5) Pa nos fe por oumentá, nos mester resa pidi Dios yudansa di su spiritu santu, pasobra fe ta un aspekto di e “fruta di e spiritu.” (Gal. 5:22) Ademas, ora nos ta obedesé Dios su mandamentunan, esaki ta fortalesé nos fe. Por ehèmpel, si nos hasi esfuerso pa partisipá mas tantu den e trabou di prediká, esei probablemente lo hasi nos mas felis. I segun ku nos ta reflekshoná riba e bendishonnan ku nos ta haña debí ku nos ta “buska promé e reino di Dios i Su hustisia,” nos fe lo oumentá.​—Mat. 6:33.

“Buska . . . Amor”

12, 13. (a) Kiko ta e mandamentu nobo di Hesus? (b) Den ki maneranan importante nos tin ku buska i desplegá amor manera Kristu a hasi?

¹² Lesa 1 Timoteo 5:​1 i 2. Pablo a duna konseho práktiko riba e manera ku kristiannan por mustra amor pa otro. Nos deboshon na Dios mester inkluí obedensia na Hesus su mandamentu nobo pa “stima otro” manera e a stima nos. (Juan 13:34) Apòstel Juan a indiká: “Ken ku tin e biennan di mundu, i ta mira su ruman den nesesidat i ta sera su kurason p’e, ta kon e amor di Dios ta permanesé den dje?” (1 Juan 3:17) Bo por kòrda okashonnan ku bo a desplegá amor na un manera práktiko?

¹³ Un otro manera ku nos por buska i desplegá amor ta dor di pordoná i no warda renkor kontra nos rumannan. (Lesa 1 Juan 4:20.) Mas bien, nos ke sigui e konseho inspirá aki: “Boso soportá otro i pordoná otro, si un di boso tin un keho kontra un otro; meskos ku Señor [Yehova] a pordoná boso, asina boso tambe mester hasi.” (Kol. 3:13) Tin un persona den e kongregashon ku bo por apliká e konseho aki pa kuné? Lo bo pordon’é?

“Buska . . . Perseveransia”

14. Kiko nos por siña for di e kongregashon di Filadelfia?

¹⁴ Pa hasi nos bèst pa alkansá un meta riba término kòrtiku ta un kos. Pero, ta henteramente un otro asuntu ora e meta ta difísil pa alkansá òf mas leu ku nos a kere. Ta klaru anto ku sigui tras di e meta di bida eterno ta rekerí perseveransia. Señor Hesus a bisa e kongregashon na Filadelfia: “Pasobra bo a warda mi mandamentu pa perseverá, ami tambe lo warda bo di e ora di prueba.” (Rev. 3:10) Sí, Hesus a siña hende tokante e nesesidat di perseveransia—un kualidat ku ta yuda nos pa no entregá ora nos haña nos ku prueba i tentashon. E rumannan den e kongregashon  di promé siglo na Filadelfia lo mester tabata ehemplar den e manera ku nan a demostrá perseveransia durante e hopi pruebanan di fe ku nan a pasa aden. P’esei, Hesus a sigurá nan ku nan lo a haña mas yudansa durante e pruebanan mas grandi ku lo a presentá.​—Luk. 16:10.

15. Kiko Hesus a siña hende tokante perseveransia?

¹⁵ Hesus tabata sa ku su siguidónan lo a ser odiá dor di nan famianan no-kreyente i e mundu en general. P’esei na por lo ménos dos okashon, el a animá nan ku e palabranan aki: “Esun ku perseverá te na fin, esei lo ta salbá.” (Mat. 10:22; 24:13) Hesus a mustra tambe kon su disipelnan por a haña e fortalesa nesesario pa perseverá na e tempu ei. Den un ilustrashon, el a kompará tera yen di piedra ku hende ku ta “risibí e palabra [di Dios] ku goso” pero ku ta kai ora nan haña nan ku prueba di fe. Sin embargo, su fiel siguidónan, el a kompará ku bon tera ya ku nan ta “retené” e palabra di Dios i “ta duna fruta ku perseveransia.”​—Luk. 8:​13, 15.

16. Ki perkurashon amoroso a yuda miónes di hende perseverá?

¹⁶ Bo a ripará kiko ta e sekreto pa buska i logra perseveransia? Nos tin ku “retené” Dios su palabra dor di manten’é bibu den nos mente i kurason. E echo ku Beibel ta disponibel den mas i mas idioma ta hasi esaki posibel i tambe fásil. Si nos ta meditá tur dia riba un porshon di e Palabra di Dios, esaki lo yuda nos haña e fortalesa nesesario pa sigui duna fruta “ku perseveransia.”​—Sal. 1:​1, 2.

“Buska . . . Mansedumbre” i Pas

17. (a) Dikon “mansedumbre” ta asina importante? (b) Kon Hesus a demostrá ku e ta un persona mansu?

¹⁷ Niun hende no ta gusta pa otronan akus’é di algu ku e no a bisa òf hasi. Ta normal pa hende rabia i nenga e akusashon ora otronan kritiká nan inhustamente. Pero ta muchu mas mihó pa desplegá “mansedumbre,” òf suavedat. (Lesa Proverbionan 15:1.) Sin embargo, pa bo demostrá suavedat ora di trata ku krítika inhustu, bo mester ta fuerte. Hesukristu a pone un ehèmpel perfekto den esaki. “Ora ku el a wòrdu zundrá, e no a zundra bèk; ora ku el a sufri, e no a menasá, ma a konfia su mes na esun ku ta husga ku hustisia.” (1 Ped. 2:23) Ounke nos no por spera di tin e mesun éksito ku Hesus den e asuntu aki, nos por mehorá den e manera ku nos ta mustra mansedumbre, òf suavedat?

18. (a) Kiko nos ta logra dor di desplegá un genio suave? (b) Ki otro kualidat Beibel ta urgi nos pa buska?

¹⁸ Imitando Hesus, laga nos ta “semper dispuesto pa duna kontesta” riba kualke pregunta tokante nos kreensianan pero “ku suavedat i reverensia,” òf rèspèt profundo. (1 Ped. 3:15) Sí, ora nos ta desplegá un genio suave, nos por evitá ku diferensianan di opinion ta eskalá bira diskushonnan fuerte, sea ku hende ku nos topa den nos sirbishi òf ku nos kompañeronan kreyente. (2 Tim. 2:​24, 25) Suavedat ta hiba na goso i pas. Podisé ta p’esei Pablo, den su di dos karta na Timoteo, a menshoná “pas” entre e kualidatnan ku nos tin ku buska i desplegá. (2 Tim. 2:22; kompará ku 1 Timoteo 6:11.) Sí, “pas” ta un otro kualidat ku Beibel ta animá nos pa buska.​—Sal. 34:14; Heb. 12:14.

19. Despues di a konsiderá e shete kualidatnan kristian aki, kiko bo ta determiná pa buska i desplegá, i dikon?

¹⁹ Nos a konsiderá brevemente shete kualidat kristian ku Beibel ta animá nos pa buska: hustisia, deboshon na Dios, fe, amor, perseveransia, mansedumbre i pas. Ora rumannan den tur kongregashon ta buska i desplegá e kualidatnan presioso aki mas plenamente, esei ta resultá den hopi bendishon. Esaki lo onra Yehova i ta permitié moldia nos kada un pa su alabansa.

[Nota]

Puntonan pa Meditashon

• Kiko buska hustisia i deboshon na Dios ta enserá?

• Kiko lo yuda nos buska fe i perseveransia?

• Ki efekto amor mester tin riba e manera ku nos ta trata otro?

• Dikon nos tin ku buska mansedumbre i pas?

[Preguntanan di Estudio]

[Plachi na página 16]

Hesus a spièrta hende kontra hasimentu di kos djis pa duna e impreshon di ta hustu

[Plachi na página 16]

Nos por buska fe dor di meditá riba bèrdatnan di e Palabra di Dios

[Plachi na página 16]

Nos por buska i desplegá amor i mansedumbre