Mantené “Bo Promé Amor”

“Tene firme na loke bo tin.”​—REV. 3:11.

1, 2. Kon bo a sinti ora bo a keda konvensí ku loke bo tabata siña tokante Yehova ta e bèrdat?

BO TA kòrda e promé bes ku bo a siña tokante e speransa maravioso ku Yehova ta ofresé humanidat obediente? Si anteriormente bo tabata miembro di un otro religion, kon bo a sinti ora Testigunan di Yehova a usa Beibel pa spliká bo kiko ta e propósito di Dios, òf ora nan a splika bo siñansanan ku ántes tabata difísil pa bo komprondé? Kisas bo a realisá ku bo religion no a siña bo e bèrdat tokante Dios. Pero awor, bo ta masha kontentu ku bo a siña e bèrdat! Si bo a lanta den kas ku mayornan kristian, bo ta kòrda kon bo a sinti ora ku bo a keda konvensí ku loke bo tabata siña tokante Yehova ta e bèrdat i a disidí di biba na armonia kuné?​—Rom. 12:2.

² Hopi di bo rumannan spiritual lo bisa bo ku ora nan a keda konvensí di e bèrdat, nan a sinti nan serka di Yehova, masha kontentu i gradisidu ku el a hala nan na su kongregashon. (Juan 6:44) Nan goso a motivá nan pa partisipá den aktividatnan kristian. Nan tabatin asina tantu goso ku nan kier a kompartí loke nan tabata sinti ku tur hende. Abo tambe a sinti asina?

3. Ki situashon a reina den e kongregashon di Efeso ora Hesus a manda un mensahe pa nan?

³ Ora Hesus a dirigí su mes na e kongregashon kristian di Efeso den e promé siglo, el a papia di “bo promé amor.” E kristiannan na Efeso tabatin hopi kualidat bon, pero e amor ku nan tabatin un tempu pa Yehova a fria. P’esei, Hesus a bisa e kongregashon: “Mi konosé bo obranan i bo trabou duru i perseveransia, i ku bo no por soportá hende malbado, i bo ta pone na prueba esnan ku ta yama nan mes apòstel, ma ku no ta, i bo a haña sa ku nan ta falsu; i bo tin perseveransia i a soportá pa motibu di mi nòmber, i no a kansa. Ma mi tin esaki kontra bo, ku bo a bandoná bo promé amor.”​—Rev. 2:​2-4.

4. Dikon e mensahe ku Hesus a manda p’e efesionan ta importante pa nos awe?

⁴ En bista di e kondishonnan ku tabata eksistí desde 1914 padilanti entre e kristiannan ungí, Hesus su konseho na e efesionan i e otro kongregashonnan, ku el a dirigí su mes na dje den e buki di Revelashon, tabata oportuno. (Rev. 1:10) Sin embargo, asta awe tin  posibilidat ku algun kristian por pèrdè nan “promé amor” pa Yehova i p’e bèrdat kristian. Ku esei na mente, laga nos analisá kon dor di kòrda i meditá riba bo propio eksperensianan, bo por mantené, renobá i fortifiká e amor i zelo ku na prinsipio bo a sinti pa Dios i pa e bèrdat.

Kiko A Konvensé Bo Ku Esaki Ta e Bèrdat?

5, 6. (a) Di kiko kada kristian mester konvensé su mes? (b) Kiko a konvensé abo ku Testigunan di Yehova ta siña e bèrdat? (c) Kiko por yuda un persona renobá e amor ku e tabatin na prinsipio?

⁵ Tur hende ku dediká nan mes na Yehova tin ku “komprobá” pa nan mes promé kiko ta “e bon i agradabel i perfekto boluntat di Dios.” (Rom. 12:​1, 2) En parte, esaki ta enserá ku nan tin ku siña e bèrdat di Beibel. Loke ta konvensé un persona ku Testigunan di Yehova ta siña e bèrdat por ta diferente for di loke ta konvensé un otro persona. Tin hende ta kòrda ku loke a konvensé nan ta e echo ku nan a lesa e nòmber di Dios den Beibel òf e echo ku nan a komprondé den ki kondishon e mortonan ta. (Sal. 83:18, NW; Ekl. 9:​5, 10) Loke a impreshoná otronan tabata e amor ku ta reina den e pueblo di Yehova. (Juan 13:​34, 35) Tin otronan tambe ku a keda impreshoná ku loke no ser parti di mundu ta nifiká. Nan a yega na e konklushon ku kristiannan berdadero no mester partisipá den konfliktonan polítiko ni den guera di ningun nashon.​—Isa. 2:4; Juan 6:15; 17:​14-16.

⁶ Pa hopi hende, ta loke nan a siña tokante e tópikonan menshoná den e paragraf anterior i otro bèrdatnan a lanta nan promé amor pa Dios. Tuma tempu pa rekordá kiko a konvensé abo ku esaki ta e bèrdat. Debí ku kada persona tin su propio sirkunstansia i personalidat, probablemente bo motibunan básiko pa stima Yehova i kere den su promesanan ta diferente for di esnan di otro hende. Ku tur probabilidat, awe e motibunan ei tin e mesun balor pa bo ku ora bo a haña sa di nan pa promé bes. E bèrdat no a kambia. P’esei, un manera ku bo por renobá bo promé amor pa e bèrdat ta di sigui pensa òf reflekshoná riba e motibunan ei.​—Lesa Salmo 119:151 i 152; 143:5.

Fortifiká Bo “Promé Amor”

7. Dikon nos tin ku fortifiká nos promé amor, i kon nos por hasi esei?

⁷ Kisas hopi kos a kambia den bo bida desde e tempu ku bo a dediká bo mes na Yehova. Bo promé amor pa e bèrdat tabata importante. Pero, segun ku tempu tabata pasa, bo mester a fortifiká bo amor pa por enfrentá e desafionan nobo ku a pone bo fe na prueba. Sin embargo, Yehova a sostené bo. (1 Kor. 10:13) Pues, bo eksperensianan atraves di añanan tambe ta masha balioso pa bo. Nan a yuda bo fortifiká e amor ku bo tabatin na prinsipio, i nan ta yuda bo komprobá pa bo mes kiko ta e bon i agradabel boluntat di Dios.​—Jos. 23:14; Sal. 34:8.

8. Kon Yehova a identifiká su mes na Moisés, i kon e israelitanan a siña konosé Dios mas djaserka?

⁸ Pa ilustrá esei, konsiderá e situashon ku e israelitanan a haña nan mes aden ora Yehova a deklará su propósito pa libra nan for di sklabitut na Egipto. Dios a identifiká su mes na Moisés ora el a bisa: “Lo mi resultá di ta loke lo mi resultá di ta.” (Eks. 3:​7, 8, 13 14, NW) Básikamente, Yehova a bisa ku lo el a bira loke sea ku tabata nesesario pa libra su pueblo. Durante e susesonan ku a sigui, i segun ku e sirkunstansianan a rekerí, e israelitanan a mira kon Yehova a revelá diferente aspekto di su personalidat. El a resultá di ta e Todopoderoso, Hues, Lider, Libertador, Guerero i Perkurador.​—Eks. 12:12; 13:21; 14:​24-31; 16:4; Neh. 9:​9-15.

9, 10. Ki klase di situashon por yuda un persona konosé Dios, i dikon ta bon pa rekordá e eksperensianan ei?

⁹ Bo situashon no ta meskos ku esun di e israelitanan di antigwedat. Pero apesar di esei, probablemente bo tin bo propio eksperensianan ku a konvensé bo ku Dios ta interesá den abo personalmente, i esaki a fortalesé bo fe. Kisas Yehova a aktua di un òf otro manera komo un Perkurador, Konsolador òf Siñadó pa bo. (Lesa Isaias 30:​20b i 21.) Òf podisé bo a mira bon kla kon el a kontestá bo orashon. Kisas bo tabata den un situashon difísil, i un kompañero kristian a yuda bo. Òf kisas, durante bo estudio personal, bo a haña tekstonan di Beibel ku bo por a apliká den bo situashon.

 ¹⁰ Si bo konta e eksperensianan ei na otro hende, kisas algun lo no keda masha impreshoná. Al fin i al kabo, no ta trata aki di susesonan milagroso. Pero pa abo sí nan tin hopi nifikashon. Sí, Yehova a resultá di ta nèt loke e mester tabata pa abo. Pensa riba e añanan ku bo tin den e bèrdat. Bo por kòrda mas ku un okashon ku bo a sinti ku Yehova ta interesá den bo personalmente? Si esaki ta e kaso, dor di rekordá e susesonan ei i kon nan a laga bo sinti por lanta den bo kurason e mesun sintimentunan di amor pa Yehova ku bo a sinti e tempu aya. Atesorá e eksperensianan ei. Meditá riba nan. Nan ta prueba ku Yehova ta interesá den abo personalmente, i ningun hende no por stòp bo di kere esei.

Analisá Bo Mes

11, 12. Si un kristian su amor pa e bèrdat a mengua, kiko por ta e kousa, i ki konseho Hesus a duna?

¹¹ Si bo amor pa Dios i e bèrdat no a keda meskos ku ántes, esei no ta pasobra algu a kambia di Yehova su banda. E no ta kambia nunka. (Mal. 3:6; Sant. 1:17) E tempu ei, e tabata interesá den bo, i te awe e ta interesá den bo manera semper. Pues, si tin algu ku a kambia den bo relashon ku Yehova, kiko esei por ta? Akaso bo ta sinti ku bo ta bou di mas preshon, mas preokupá ku ansiedat di bida? Podisé ántes bo orashonnan tabata mas sinsero, bo tabata studia na un manera mas diligente i tabata meditá ku mas frekuensia. Bo tabata mas aktivo den e ministerio i mas regular na e reunionnan di kongregashon ku awor?​—2 Kor. 13:5.

¹² Podisé bo no ta ripará ku bo a kambia den niun di e aspektonan aki. Pero si bo a nota kambio, kiko a pone bo kambia? Akaso preokupashonnan hustifiká relashoná ku asuntunan, manera kon pa perkurá apropiadamente pa bo famia, pa kuida bo salú òf kosnan asina a pone bo pèrdè noshon di e urgensia pa ku e dia di Yehova ku ta serka? Hesus a bisa su apòstelnan: “Tene kuidou pa boso kurason no ta kargá pa kousa di paranda i buracheria i e preokupashonnan di bida, i e dia ei no bin diripiente riba boso manera un trampa; pasobra e lo bin riba tur esnan ku ta biba riba superfisie di henter mundu. Ma sea alerta tur ora bai, hasiendo orashon pa boso por tin forsa pa skapa di tur e kosnan aki ku ta bai tuma lugá.”​—Luk. 21:34-36.

13. Ku kiko Santiago a kompará Dios su Palabra?

¹³ Santiago, e eskritor inspirá di Beibel, a urgi su kompañeronan di fe pa usa Dios su Palabra pa analisá nan mes onestamente. Santiago a skirbi: “Sea kumplidónan di e palabra i no solamente tendedónan ku ta gaña nan mes. Pasobra si un hende ta tendedó di e palabra i no kumplidó, e ta manera un hende ku ta wak su kara natural den spil; pasobra unabes ku el a wak su mes i a bai, el a lubidá mesora kon e tabata. Ma esun ku fiha su bista riba e lei perfekto, e lei di libertat, i ta permanesé den dje, sin bira un tendedó lubidadó, sino un kumplidó berdadero, e hende aki lo ta bendishoná den loke e ta hasi.”​—Sant. 1:​22-25.

14, 15. (a) Kon Beibel por yuda bo mehorá bo relashon ku Yehova? (b) Riba kua preguntanan bo por reflekshoná?

¹⁴ Un persona por usa un spil pa hasi sigur ku e ta presentabel. Por ehèmpel, si un hòmber ripará ku su dashi ta skùin, e por drech’é. Si un hende muhé mira ku su kabei no ta bon, e por drech’é. Di mes manera, e Skritura ta yuda nos analisá nos mes i wak kon nos kondukta ta. Ora nos ta kompará nos mes ku loke Beibel ta bisa ku nos mester ta, e ora ei nos ta usando Beibel komo un spil. Lo no tin sentido pa wak den spil si nos no ta hasi nada pa korigí un defekto ku nos a mira, no ta bèrdat? Nos ta sabí si nos ta aktua na armonia ku loke nos ta mira den Dios su “lei perfekto,” i asina bira ‘kumplidó’ di e lei. P’esei, ken ku ripará ku e amor ku nan tabatin na prinsipio pa Yehova i pa e bèrdat a mengua ta hasi bon di pensa riba e preguntanan aki: ‘Ki preshonnan mi ta konfrontá den bida, i kon mi ta reakshoná riba nan? Kon mi tabata reakshoná den pasado? Tin algu ku a kambia?’ Si e análisis personal ei revelá algun defisiensia, no ignorá nan. Si bo tin ku hasi kambio, hasi sigur di hasi nan sin tarda.​—Heb. 12:​12, 13.

 ¹⁵ Ademas, meditashon di e manera ei por yuda bo pone metanan rasonabel pa asina bo por progresá spiritualmente. Apòstel Pablo a duna Timoteo, su kompañero di trabou, konseho inspirá pa mehorá su ministerio. Pablo a urgi e hòmber mas yòn kuné: “[“Reflekshoná riba,” NW] e kosnan aki; sea dediká na nan, pa bo progreso por ta bisto pa tur hende.” Nos tambe mester usa e Palabra di Dios pa reflekshoná pa asina mira kon nos por progresá.​—1 Tim. 4:15.

16. Ki peliger bo tin ku tene kuenta kuné ora bo ta usa e Skritura pa analisá bo mes?

¹⁶ Si bo analisá bo mes onestamente, probablemente lo bo realisá ku bo tin algun debilidat. Esakinan por laga un persona sintié desanimá, pero no laga esei sosodé ku bo. Kòrda ku e meta di un análisis personal ta pa mira unda bo por mehorá. Klaru ku Satanas lo gusta pa un kristian sinti ku e no ta bal nada debí na su imperfekshonnan. De echo, el a pretendé ku Dios ta menospresiá tur esfuerso ku hende ta hasi pa sirbiÉ. (Jòb 15:​15, 16; 22:3) Esei ta un mentira ku Hesus a rechasá enérgikamente; nos kada un ta balioso pa Dios. (Lesa Mateo 10:​29-31. *) Mas bien, e echo ku bo sa kiko ta bo debilidatnan, esei mester yuda bo pa ta humilde i determiná pa mehorá ku e yudansa di Yehova. (2 Kor. 12:​7-10) Si malesa òf edat avansá ta limitá loke bo por hasi, pone metanan rasonabel pero no entregá ni laga bo amor mengua.

Nos Tin Hopi Kos pa Ta Gradisidu

17, 18. Ki benefisio bo ta saka segun ku bo ta fortifiká bo promé amor?

¹⁷ Segun ku bo ta sigui fortifiká bo promé amor, bo por saka hopi benefisio. Bo por profundisá bo konosementu di Dios i bo apresio pa su guia amoroso. (Lesa Proverbionan 2:​1-9; 3:​5 i 6.) “Obedensia na [Yehova su desishonnan hudisial] ta trese gran rekompensa kuné,” e salmista a bisa. ‘E testimonio di Yehova ta fiel, e ta hasi hende simpel bira sabí.’ Ademas, “Bendishoná ta esnan ku nan kaminda ta sin mancha, ku ta kana den e lei di SEÑOR.”​—Sal. 19:7, 11; 119:1.

¹⁸ Siguramente bo ta di akuerdo ku bo tin hopi motibu pa ta gradisidu. Bo ta komprondé pakiko sierto susesonan den e mundu ta tumando lugá. Bo ta benefisiá di e kuido i atenshon den sentido spiritual ku Dios ta duna su pueblo awe. No tin duda ku bo ta gradisidu tambe pa e echo ku Yehova a hala bo na su kongregashon mundial i a duna bo e privilegio di ser ún di su Testigunan. Konta bo bendishonnan! Si bo mester a traha un lista di nan, probablemente lo e bira un lista largu. Si bo ta konta bo bendishonnan regularmente, esei sin duda lo yuda bo sigui e konseho: “Tene firme na loke bo tin.”​—Rev. 3:11.

19. Ademas di meditá riba bo relashon ku Dios, kiko mas ta importante pa bo keda salú den sentido spiritual?

¹⁹ Meditá riba e manera ku bo fe a desaroyá atraves di tempu ta solamente un di e pasonan ku por yuda bo pa tene firme na loke bo tin. Bes tras bes, e revista aki a hala atenshon na otro pasonan importante ku por yuda bo keda salú den sentido spiritual. Nan ta, entre otro, orashon, asistensia i partisipashon na reunionnan kristian i partisipashon diligente den e trabou di prediká. E kosnan aki por yuda bo sigui renobá, refreská i fortifiká bo promé amor.​—Efe. 5:10; 1 Ped. 3:15; Hudas 20, 21.

[Nota]

Kon Lo Bo Kontestá?

• Kon e motibunan ku a pone bo stima Yehova por ta un fuente di animashon pa bo awor?

• Di kiko bo por ser konvensí ora bo reflekshoná riba bo propio eksperensianan atraves di añanan?

• Dikon bo mester analisá bo amor pa Dios?

[Preguntanan di Estudio]

[Plachi na página 23]

Kiko di e bèrdat a atraé bo i konvensé bo?

[Plachi na página 26]

Bo ta mira kosnan na bo mes ku bo tin ku korigí?