Ta Importá Kon Nos Ta Adorá Dios?

“RELIGION ta profundamente ankrá den naturalesa humano.” Esei ta loke Profèser Alister Hardy ta bisa den e buki The Spiritual Nature of Man (E Naturalesa Spiritual di Hende). E resultado di un enkuesta resien hasí aparentemente ta apoyá e konklushon aki. E ta revelá ku rònt di 86 porshento di e poblashon di mundu ta bisa ku nan ta praktiká un òf otro religion.

Tambe e enkuesta a revelá ku e kreyentenan ta pertenesé na 19 religion prinsipal i ku esnan ku ta bisa ku nan ta kristian ta pertenesé na e kantidat sorprendente di alrededor di 37.000 diferente denominashon. Esaki no ta pone bo puntra bo mes si Dios ta aseptá tur e diferente maneranan di adorashon aki? Ku otro palabra, ta importá kon nos ta ador’é?

Ta mas ku klaru ku den e asuntu importante aki nos no por djis sigui tras di sintimentu ni opinion personal. Ta lógiko anto ku nos mester haña sa kiko Dios mes ta pensa di e asuntu aki. I pa nos haña sa esaki nos mester akudí na e Beibel, e Palabra di Dios. Dikon? Pasobra Hesukristu mes a bisa den orashon na Dios: “Bo palabra ta bèrdat.” (Juan 17:17) I Pablo, un apòstel fiel a testifiká: “Tur Skritura ta inspirá pa Dios i ta útil pa siñansa, pa reprendementu, pa korekshon.”​—2 Timoteo 3:16.

Beibel ta mustra ku Dios no ta aseptá tur adorashon. Atraves di historia nos ta haña ehèmpelnan di e klase di adorashon ku Dios a aseptá i esnan ku el a rechasá. Si nos eksaminá e ehèmpelnan ei kuidadosamente, nos por haña sa kiko nos mester hasi i kiko nos no mester hasi pa nos adorashon agradá Dios.

Un Ehèmpel di Ántes

Mediante profeta Moisés, Yehova Dios a duna e israelitanan leinan ku a siña nan kon pa adorá Dios na un manera aseptabel. Ora e pueblo a kumpli ku e leinan ei, yamá generalmente Lei di Moisés, Dios a aseptá nan komo su pueblo i bendishoná nan. (Eksodo 19:​5, 6) Maske nan tabatin e fabor di Dios, tòg e nashon di Israel no a keda fiel na e adorashon ku Dios tabata aseptá. Bes tras bes, nan a bira lomba pa Yehova i a sigui e práktikanan religioso di e habitantenan di e nashonnan rònt di nan.

Den e dianan di profeta Ezekiel i Jeremias, den siglo 7 promé ku nos era, hopi israelita a ignorá e Lei di Dios i a bira amigu íntimo di e nashonnan rònt di nan. Debí ku e israelitanan tabata sigui e kustumbernan di e nashonnan ei i tabata partisipá den nan fiestanan, e israelitanan tabata praktiká adorashon miksto. Hopi di e israelitanan tabata bisa: “Nos kier ta meskos ku e nashonnan, meskos ku e tribunan di e paisnan ku ta sirbi palu i piedra.” (Ezekiel 20:32; Jeremias 2:28) Nan tabata bisa ku nan ta adorá Yehova Dios, pero na mes momento nan tabata venerá “ídolonan” di mèst, i asta nan tabata sakrifiká nan yunan na nan.​—Ezekiel 23:​37-39; Jeremias 19:​3-5.

Arkeólogonan ta yama e tipo di adorashon aki sinkretismo religioso, esta, adorashon di vários dios pareu. Òf nan ta djis referí na dje komo religion popular òf folklóriko. Awendia, hopi hende ta pensa ku den nos sosiedat den kua tin un kantidat di grupo ku kreensianan ku ta diferensiá for di otro, nos mester aseptá tur kos, inkluso religion. P’esei, nan ta pensa ku no ta nada malu si hende ta adorá Dios na nan manera. Esei ta bèrdat? Esaki ta simplemente un asuntu di ser tolerante òf liberal? Konsiderá algun aspekto di e religion popular ku e israelitanan infiel tabata praktiká, i mira na kiko e práktikanan ei a hiba.

Israel Su Adorashon Miksto

E sentronan di adorashon miksto di e israelitanan tabata “e lugánan haltu,” òf lugá di adorashon lokal ekipá ku altar, altar di kima sensia, pilánan di piedra i aparentemente imágennan di palu ku ta simbolisá Asera, un diosa kananeo di fertilidat. Tabatin masha hopi sentro asina den Huda. Segundo Reinan 23:​5 i 8 ta menshoná “lugánan haltu den e statnan di Huda i den e lugánan rònt di Yerusalèm,  . . . for di Geba [frontera nort] te na Beerseba [frontera zùit].”

Na e lugánan haltu ei, e israelitanan tabata “kima sensia pa Baal, pa solo, pa luna i pa e signonan di zodiak i pa henter e ehérsito di shelu.” Nan tabatin kasnan pa “sodomitanan . . . den e kas di SEÑOR” i tabata ofresé nan yunan komo sakrifisio “dor di kandela pa Molok.”​—2 Reinan 23:​4-10.

Arkeólogonan a haña sientos di imágen chikí di terracotta na Yerusalèm i Huda, prinsipalmente den e ruinanan di kasnan privá. Mayoria tabata imágennan chikitu di hende muhé desnudo ku pechu eksagerá. Eruditonan ta identifiká e imágennan aki ku e diosanan di fertilidat Asera i Astarot. Nan ta kere ku e imágennan tabata “amuleto ku a yuda hende sali na estado i haña yu.”

Kon e israelitanan a konsiderá e sentronan lokal pa adorashon miksto aki? Profèser Ephraim Stern na Universidat Hebreo a nota ku hopi di e lugánan haltu ei probablemente “tabata dediká na Yahweh [Yehova].” Inskripshonnan ku arkeólogonan a haña na diferente sitio ta apoyá e punto di bista aki. Por ehèmpel, un di e inskripshonnan ta bisa: “Mi ta bendishoná bo mediante Yahweh di Samaria i mediante su [imágen di] Asera,” i un otro ta bisa, “Mi ta bendishoná bo mediante Yahweh di Teman i mediante su [imágen di] Asera!”

E ehèmpelnan aki ta mustra kon e israelitanan a meskla adorashon puru di Yehova Dios ku práktikanan pagano bergonsoso. Komo resultado nan moralidat a bai atras i nan adorashon a ser kontaminá. Kon Dios a mira e tipo di adorashon miksto aki?

Dios Su Reakshon Riba Adorashon Miksto

Dios a ekspresá su indignashon i denunsiashon kontra e forma di adorashon degradá di e israelitanan mediante su profeta Ezekiel, bisando: “Den tur boso lugánan di biba statnan lo keda ruiná i e lugánan haltu lo keda desolá, asina ku boso altarnan lo keda ruiná i desolá, boso ídolonan kibrá i destruí, boso altarnan di sensia bashá abou, i loke boso a traha lo wòrdu kitá kompletamente.” (Ezekiel 6:6) No tin duda ku pa Yehova e tipo di adorashon ei tabata totalmente inaseptabel i p’esei el a rechas’é!

Yehova Dios a predisí kon e destrukshon lo tuma lugá. “Lo mi manda . . . mi sirbidó Nabukodonosor, rei di Babilonia, i trese nan kontra e tera aki i kontra su habitantenan, i kontra tur e nashonnan aki tur rònt. Lo mi destruí nan kompletamente . . . I henter e tera aki lo keda un desolashon.” (Jeremias 25:​9-11) I manera a ser profetisá, na aña 607 promé ku nos era, e babilonionan a bin kontra Yerusalèm, i nan a destruí e stat i su tèmpel kompletamente.

Enkuanto e destrukshon di Yerusalèm, Profèser Stern, ku nos a menshoná anteriormente, a bisa ku e ruinanan arkeológiko “ta un refleho bon kla di fuentenan bíbliko (2 Reinan 25:8; 2 Krónikanan 36:​18, 19) ku ta deskribí ku e kasnan i murayanan a ser destruí, kimá i a basha den otro.” El a sigui bisa: “Por konsiderá e evidensia arkeológiko di e periodo aki di Yerusalèm su historia . . . komo esun di mas dramátiko pa loke ta trata sitionan bíbliko.”

Ki Lès Nos Por Saka?

E lès di mas importante ku nos por saka ta ku Dios no ta aseptá adorashon ku ta purba meskla siñansanan basá riba Beibel ku dògma, tradishon òf ritonan di otro religion. Ta bisto ku apòstel Pablo a tuma e lès aki masha na pechu. El a lanta komo fariseo hudiu, vèrsá den e lei di e sekta. Ora ku na dado momento el a siña ku Hesus tabata e Mesias primintí i a rekonosé esei, kiko el a hasi? El a bisa: “Tur kos ku tabata ganashi pa mi, e kosnan ei mi a konsiderá komo pièrdè pa kousa di Kristu.” El a kambia su bida i a bira un siguidó deboto di Kristu.​—Filipensenan 3:​5-7.

Komo un misionero biahero, Pablo tabata konosé e práktikanan religioso i kreensianan filosófiko di diferente pueblo bon. P’esei, el a skirbi e kristiannan den Korinto: “Ki komunion lus tin ku skuridat? Òf ki armonia Kristu tin ku Belial, òf kiko un kreyente tin komun ku un inkrédulo? Òf ki kombenio e tèmpel di Dios tin ku ídolo? . . . ‘P’esei, sali for di meimei di nan i separá boso mes, SEÑOR ta bisa. I no mishi ku loke ta impuru; i lo mi risibí boso.’”​—2 Korintionan 6:​14-17.

Awor ku nos sa ku ta importá Dios kon nos ta ador’é, podisé nos ta puntra nos mes: ‘Ki tipo di adorashon Dios ta aprobá? Kon mi por hala serka Dios? I kiko mi mester hasi personalmente pa adorá Dios den un manera aseptabel?’

Testigunan di Yehova gustosamente lo ke yuda bo haña kontesta pa e preguntanan aki i kualke otro pregunta bíbliko. Nos ta animá bo pa tuma kontakto ku e Testigunan na e Salòn di Reino lokal òf skirbi e editornan di e revista aki pa pidi un estudio di Beibel grátis na un ora i lugá ku ta kumbiniente pa bo.

[Plachi na página 9]

Un Lugá Kaminda Ántes Tabata Adorá Ídolo na Tel Arad, Israel

[Rekonosementu]

Garo Nalbandian

[Plachi na página 9]

Imágen di Astarot di Kasnan di Huda di Antigwedat

[Rekonosementu]

Potrèt © Museo di Israel, Yerusalèm; kortesia di Israel Antiquities Authority