Un Solushon Ingenioso

TRES yònkuman na Afrika Sentral kier a bai un kongreso di distrito den nan pais. Kon nan lo por a yega aya? Pa yega na e lugá, nan mester a biaha kasi 90 kilometer riba kamindanan di tera ku tabata masha malu mes. I nan no tabatin transpòrt. Nan a disidí pa fia tres baiskel, pero nan no por a haña niun baiskel den bon kondishon pa hasi un biahe largu asina.

Un ansiano di e kongregashon lokal a mira ku nan tabatin un problema i a ofresé nan su baiskel ku tabata bieu pero den bon kondishon. E ansiano a splika nan kiko é i otronan a yega di hasi den pasado pa por a bai un kongreso. El a sugerí pa nan tres usa ún baiskel. Esei tabata un solushon simpel pero ku a eksigí bon planiamentu. Kon tres hende por usa un baiskel so?

Pa evitá di biaha den solo kayente, e hóbennan aki a topa otro mainta trempan i a pone tur nan ekipahe riba e baiskel. Un di nan a kore e baiskel miéntras ku e dos otronan a kana lihé su tras. Despues di a kore mas o ménos 500 meter, esun riba e baiskel a stòp i a lèn e baiskel, kargá ku e ekipahe, kantu di un palu. Naturalmente, el a sòru pa pone e baiskel kaminda e dos otronan por a mir’é i asina a evitá ku un hende deskonosí lo a “fia” e baiskel. Despues, esun ku a kaba di kore e baiskel a sigui su kaminda na pia.

Ora e dos otronan a yega na e baiskel, un di nan a kor’é, i e otro a sigui kana un 500 meter mas promé ku el a tuma su turno. Pues ku bon planiamentu i determinashon, e tres hóbennan a logra redusí e distansia ku nan mester a kana, esta di 90 pa 60 kilometer. Nan esfuerso tabata bale la pena. Nan a asistí huntu ku nan rumannan kristian na e kongreso i a disfrutá dje bankete spiritual. (Deu. 31:12) Abo lo hasi tur loke bo por e aña aki pa bo asistí na e kongreso den bo área?