Bo No Sa Unda Lo E Tin Éksito!

“Sembra bo simia mainta, i no keda sin hasi nada atardi; pasobra bo no sa si sembramentu di mainta òf di atardi lo tin éksito.”​—Ekl. 11:6.

1. Dikon e proseso di kresementu ta asombroso pa mira i kon bin e ta laga nos realisá kon insignifikante nos ta?

UN KUNUKERO mester tin pasenshi. (Sant. 5:7) Despues ku el a sembra e simia, e tin ku warda p’e nase i krese. Tiki-tiki, ora e kondishonnan ta faborabel, planchinan ta kuminsá sprùit i sali riba superfisie di e tera. Despues nan ta bira matanan ku ta produsí tapushi di grano. Ku tempu, e kunukero tin un kunuku kla pa kosechá. Ki asombroso ta pa mira e milager di kresementu! Ademas, ora nos realisá ken ta e Fuente di e kresementu aki, nos ta ripará kon insignifikante nos ta. Nos por kultivá e simia. Nos por yuda muh’é. Pero, ta Dios so por duna kresementu.​—Kompará ku 1 Korintionan 3:6.

2. Ki puntonan tokante kresementu spiritual Hesus a siña hende den e ilustrashonnan ku nos a konsiderá den e artíkulo anterior?

² Manera e artíkulo anterior a mustra, Hesus a kompará e trabou di prediká e Reino ku sembramentu di simia. Den e ilustrashon di e diferente tiponan di tera, Hesus a enfatisá ku ounke e kunukero ta sembra bon simia, ta e kondishon di un persona su kurason ta determiná si e simia lo krese i alkansá madures. (Mar. 4:​3-9) Den e ilustrashon di e sembradó ku ta drumi, Hesus a  resaltá e echo ku e kunukero no ta komprondé kompletamente e proseso di kresementu, esta kon un persona ta bira disipel. Esaki ta asina pasobra kresementu ta sosodé mediante e poder di Dios i no mediante esfuerso humano. (Mar. 4:​26-29) Awor, laga nos konsiderá tres ilustrashon mas di Hesus: esun di e simia di mòster, di zürdeg i esun di e reda. *

E Ilustrashon di e Simia di Mòster

3, 4. Ki aspektonan relashoná ku e mensahe di Reino e ilustrashon di e simia di mòster ta enfatisá?

³ E ilustrashon di e simia di mòster, ku tambe ta registrá den Marko kapítulo 4, ta enfatisá dos kos. Di promé, e gran oumento di e kantidat di hende ku ta presta atenshon na e mensahe di Reino. Di dos, e protekshon ku esnan ku ta aseptá e mensahe ta risibí. Hesus a bisa: “Ku kiko nos lo kompará e reino di Dios, òf ku kual parábola nos lo present’é? E ta manera un simia di mòster ku, ora ku e wòrdu sembrá den tera, ta mas chikitu ku tur otro simia ku tin riba tera, ma despues ku el a wòrdu sembrá, ta krese i ta bira mas grandi ku tur e matanan di hòfi, i ta saka ramanan grandi, asina ku e paranan di shelu por traha nèshi den su sombra.”​—Mar. 4:​30-32.

⁴ E ilustrashon aki ta deskribí e kresementu relashoná ku “e reino di Dios.” E kresementu aki ta bisto na e plamamentu di e mensahe di Reino i na e ekspanshon di e kongregashon kristian for di Pentekòste di aña 33 di nos era padilanti. Un pipita di mòster ta un simia masha chikitu, i e por representá algu masha chikitu. (Kompará ku Lukas 17:6.) Sinembargo, ku tempu, un mata di mòster por alkansá un haltura di 3 pa 5 meter i haña ramanan fuerte. P’esei, kasi bo por konsider’é komo un palu.​—Mat. 13:​31, 32.

5. Kon e kongregashon kristian a krese den e promé siglo?

⁵ E kongregashon kristian a kuminsá krese for di un grupo chikitu di mas o ménos 120 disipel ku a ser ungí ku spiritu santu na aña 33 di nos era. Denter di un periodo relativamente kòrtiku, e kongregashon chikitu aki tabata konsistí di míles di kreyente. (Lesa Echonan 2:41; 4:4; 5:28; 6:7; 12:24; 19:20.) Denter di tres dékada, e kantidat di kosechadónan a bira asina tantu ku apòstel Pablo por a bisa e kongregashon na Kolosas ku e bon nobo a ser prediká kaba “den henter kreashon bou di shelu.” (Kol. 1:23) Ki un kresementu asombroso!

6, 7. (a) Ki ekspanshon a tuma lugá desde 1914? (b) Kon e kresementu lo sigui?

⁶ For di tempu ku e Reino di Dios a ser establesí den shelu na 1914, e ramanan di e “palu” di mòster a ekspandé fuera di tur ekspektativa. Asina, Dios su pueblo a mira e kumplimentu literal di e profesia ku Isaias a registrá: “Esun di mas chikitu lo bira un tribu, i esun di mas ménos lo bira un nashon poderoso.” (Isa. 60:22) E grupo chikitu di kristiannan ungí ku tabata partisipá den e trabou di prediká na prinsipio di siglo 20 lo no por a imaginá nan ku na aña 2008 lo tin rònt di shete mion Testigu ta partisipá den e trabou aki den mas ku 230 pais. Esei realmente ta un gran kresementu, komparabel ku esun di e simia di mòster den Hesus su ilustrashon!

⁷ Pero ta einan e kresementu ta keda? Nò. Ku tempu, tur hende ku ta biba riba tera lo ta súpditonan di Dios su Reino. Tur opositor lo ser eliminá. Esaki lo no sosodé komo resultado di esfuersonan humano, sino debí na e intervenshon di e Señor Soberano Yehova den asuntunan di tera. (Lesa Daniel 2:​34 i 35.) E ora ei, nos lo mira e kumplimentu final di un otro profesia ku Isaias a registrá: “Tera lo ta yen di e konosementu di SEÑOR, manera awa ta tapa laman.”​—Isa. 11:9.

8. (a) Ken e paranan den Hesus su ilustrashon ta representá? (b) Di kiko nos ta ser protehá asta for di awor?

 ⁸ Hesus a bisa ku e paranan di shelu por traha nan nèshi, òf haña hospedahe, den e sombra di e palu di mòster simbóliko, esta, e Reino. E paranan aki no ta representá enemigunan di e Reino ku ta purba kome e bon simianan manera tabata e kaso den e ilustrashon di e hòmber ku a sembra simia riba diferente tipo di tera. (Mar. 4:4) Mas bien, den e ilustrashon aki, e paranan ta representá personanan sinsero ku ta buska protekshon den e kongregashon kristian. Asta for di awor, e personanan aki ta ser protehá di práktikanan sushi di e mundu malbado aki i di mal kustumbernan ku lo stroba nan di tin un bon relashon ku Dios. (Kompará ku Isaias 32:​1 i 2.) Di mes manera, Yehova a kompará e Reino Mesiániko ku un palu i a deklará profétikamente: “Riba e seru haltu di Israel lo mi plant’é, pa e produsí taki i karga fruta i bira un palu di seda mahestuoso. Para di tur sorto lo biba bou di dje. Nan lo biba den e sombra di su ramanan.”​—Eze. 17:23.

E Ilustrashon di Zürdeg

9, 10. (a) Ki punto Hesus a enfatisá den e ilustrashon di zürdeg? (b) Kiko zürdeg ta simbolisá hopi bes den Beibel, i ki pregunta tokante e manera ku Hesus a usa e palabra zürdeg nos lo konsiderá?

⁹ No ta tur biaha hende por mira e proseso di kresementu. Den Hesus su siguiente ilustrashon, el a enfatisá e punto aki. El a bisa: “E reino di shelu ta manera zürdeg ku un muhé a kohe i a skonde den tres midí di hariña, te ora ku esaki a bira kompletamente zür.” (Mat. 13:33) Kiko e zürdeg aki ta representá, i kiko e tin di haber ku e kresementu relashoná ku e Reino?

¹⁰ Hopi bes, Beibel ta usa zürdeg komo símbolo di piká. Apòstel Pablo a referí den e manera aki na zürdeg ora el a papia di e influensia dañino di un pekadó den e kongregashon na Korinto di antigwedat. (1 Kor. 5:​6-8) Hesus a usa zürdeg den e kaso aki pa simbolisá e kresementu di algu negativo?

11. Kon hende a usa zürdeg den Israel di pasado?

¹¹ Promé ku nos kontestá e pregunta ei, nos tin ku tuma nota di tres echo básiko. Di promé, ounke Yehova no a permití hende usa zürdeg durante e fiesta di Pasku Hudiu, el a aseptá sakrifisionan ku a kontené zürdeg na otro okashonnan. E israelitanan tabata usa zürdeg en konekshon ku ofrendanan di komunion pa duna gradisimentu. Asina, esun ku ta presentá e ofrenda boluntariamente por a mustra su gratitut na Yehova pa e hopi bendishonnan ku el a risibí. Esaki tabata un komementu ku a duna e partisipantenan goso.​—Lev. 7:​11-15.

12. Kiko nos por siña for di e manera ku Beibel ta usa símbolo?

¹² Di dos, ounke na un okashon un símbolo por tin un konotashon negativo den e Skritura, na un otro okashon, Beibel por usa e mesun símbolo ei pa representá algu positivo. Por ehèmpel na 1 Pedro 5:8, Beibel ta kompará Satanas ku un leon debí na su karakterístikanan peligroso i kruel. Pero na Revelashon 5:5, Hesus ta ser kompará ku un leon: “E Leon ku ta di e tribu di  Huda.” Den e último kaso, leon ta ser usá komo un símbolo di hustisia kompañá ku kurashi.

13. Kiko Hesus su ilustrashon di zürdeg ta mustra tokante kresementu spiritual?

¹³ Di tres, den Hesus su ilustrashon, e no a bisa ku e zürdeg a daña henter e mansa di manera ku e no a sirbi mas. El a simplemente referí na e proseso normal di traha pan. Konsientemente, e ama di kas a agregá e zürdeg, i esaki tabatin bon resultado. E zürdeg tabata skondí den e mansa. Pues, e ama di kas no por a mira kon e proseso di fermentashon a tuma lugá. Esaki ta laga nos kòrda riba e hòmber ku ta sembra simia i ta bai drumi anochi. Hesus a bisa ku “e simia ta nase i ta krese, di ki manera e [hòmber] mes no sa.” (Mar. 4:27) Esei ta un manera simpel pa ilustrá e proseso invisibel den kua un hende ta krese spiritualmente, òf ta bira disipel di Kristu. Kisas nos no ta mira kon e kresementu ta kuminsá, pero ku tempu, su resultado ta bira bisto.

14. E echo ku zürdeg ta fermentá henter e mansa ta ilustrá ki aspekto di e trabou di prediká?

¹⁴ E kresementu aki no solamente ta invisibel pa wowo di hende, pero e ta tumando lugá rònt parti di mundu tambe. Esaki ta un otro aspekto ku e ilustrashon di zürdeg ta enfatisá. E zürdeg ta fermentá henter e mansa, tur e “tres midí di hariña.” (Luk. 13:21) Meskos ku zürdeg, e trabou di prediká e Reino a pone ku e disipelnan a oumentá te ku awor e Reino ei ta ser prediká “te na e parti mas alehá di mundu.” (Echo. 1:8; Mat. 24:14) Nos tin e maravioso privilegio di por kontribuí na e oumento asombroso aki di e trabou di Reino.

E Reda

15, 16. (a) Resumí e ilustrashon di e reda. (b) Kiko e reda ta representá, i na ki aspekto di kresementu relashoná ku e Reino e ilustrashon aki ta referí?

¹⁵ Loke ta mas importante ku e kantidat di hende ku ta bisa ku nan ta disipel di Hesukristu ta e kalidat di e disipelnan ei. Hesus a referí na e aspekto aki di e kresementu relashoná ku e Reino ora el a duna un otro ilustrashon, esun di e reda. El a bisa: “Tambe e reino di shelu ta manera un reda tirá den laman, ku ta kohe tur sorto di piská.”​—Mat. 13:47.

¹⁶ E reda, ku ta representá e trabou di prediká e Reino, ta kohe tur sorto di piská. Hesus a sigui bisa: “Ora ku e [reda] tabata yen, nan a hal’é trese na kantu, i nan a kai sinta abou i a rekohé e bon piskánan warda nan den barí, ma esnan malu nan a tira afó. Asina lo ta na [“e konklushon dje sistema di kosnan,” NW]; e angelnan lo bin i separá e malbadonan for di meimei di e hustunan, i lo tira nan den e fòrnu di kandela. Lo tin yoramentu i mordementu riba djente.”​—Mat. 13:​48-50.

17. Den kua tempu e separashon ku e ilustrashon di e reda ta menshoná ta tuma luga?

¹⁷ E separashon aki ta referí na e huisio final di e karné- i kabritunan ku Hesus a bisa lo sosodé ora e yega den su gloria? (Mat. 25:​31-33) Nò. E huisio final ei lo tuma lugá ora Hesus bini durante e gran tribulashon. Na kontraste ku esei, e separashon ku e ilustrashon di e reda ta referí na dje ta tuma lugá durante “e konklushon dje sistema di kosnan.” * Esaki ta e tempu den kua nos  ta bibando awor, un tempu ku lo kulminá den e tribulashon grandi. Pues anto, kon e trabou di separashon ta tumando lugá awor?

18, 19. (a) Kon e trabou di separashon ta tumando lugá awor? (b) Ki paso hende sinsero tin ku tuma? (Mira nota na pia di página.)

¹⁸ Literalmente, miónes di piská simbóliko for di e laman di humanidat a ser atraí na Yehova su kongregashon djawe. Algun ta asistí na e Memorial, otronan ta bini na nos reunionnan i tin otronan tambe ku ta aseptá pa studia Beibel. Pero ta tur e personanan aki ta kristiannan berdadero? Podisé a ‘hala nan trese na kantu,’ pero Hesus a bisa nos ku ta solamente “e bon piskánan” ta ser rekohé i wardá den barí, ku ta representá kongregashonnan kristian. Esnan malu ta ser tirá afó, i ku tempu, nan ta ser tirá den un fòrnu di kandela simbóliko ku ta referí na e binidero destrukshon.

¹⁹ Manera ta e kaso ku piská malu, hopi hende ku a yega di studia Beibel ku e pueblo di Yehova a stòp di studia. Algun ta yunan di mayornan kristian i ku nunka kier a ègt sigui e pasonan di Hesus. Nan no tabata dispuesto pa tuma e desishon di sirbi Yehova òf despues ku nan a sirbié pa un temporada, nan a stòp di hasi esei. * (Eze. 33:​32, 33) Sinembargo, ta masha importante pa tur hende sinsero permití nan mes ser rekohé den e kongregashonnan, ku ta manera barí, promé ku e dia final di huisio i keda den un lugá di siguridat.

20, 21. (a) Kiko nos a siña for di e repaso di Hesus su ilustrashonnan relashoná ku kresementu? (b) Kiko abo ta determiná pa hasi?

²⁰ Pues, kiko nos a siña for di nos repaso breve di Hesus su ilustrashonnan relashoná ku kresementu? Di promé, meskos ku e simia di mòster ta krese, tabatin un gran oumento den e kantidat di hende ku a mustra interes den e mensahe di Reino. Nada no por stroba Yehova su trabou di ekspandé! (Isa. 54:17) Ademas, E ta perkurá protekshon spiritual pa esnan ku a buska hospedahe den e “sombra” di e palu. Di dos, ta Dios ta duna kresementu. Meskos ku e zürdeg skondí a fermentá henter e mansa, e trabou di prediká e Reino, ku ta sigui ekspandé, ta pone ku un kantidat oumentante di hende ta krese spiritualmente. No ta tur biaha hende ta mira ni komprondé kon e kresementu aki ta tuma lugá. Pero, e ta sosodé! Di tres, no ta tur hende ku ta reakshoná riba e mensahe di Reino ta duna prueba ku nan ta apto. Algun ta resultá di ta manera e piskánan malu den Hesus su ilustrashon.

²¹ Apesar di esei, ta masha animador pa mira kuantu hende apto òf bon Yehova a hala serka dje. (Juan 6:44) Esaki a resultá den oumentonan espektakular den un pais tras di otro. Tur gloria òf mérito pa e kresementu aki ta bai pa Yehova Dios. Siendo ku nos ta testigu di e kresementu aki, nos kada un mester sinti nos motivá pa obedesé e konseho ku a ser skirbi hopi siglo pasá: “Sembra bo simia mainta, . . . pasobra bo no sa si sembramentu di mainta òf di atardi lo tin éksito, òf si nan tur dos lo ta bon.”​—Ekl. 11:6.

[Nota]

Kon Lo Bo Kontestá?

• Kiko Hesus su ilustrashon tokante e simia di mòster ta siña nos di kresementu relashoná ku e Reino i di protekshon spiritual?

• Kiko e zürdeg den Hesus su ilustrashon ta representá, i ki bèrdat tokante kresementu relashoná ku e Reino Hesus a enfatisá?

• Ki aspekto di kresementu relashoná ku e Reino e ilustrashon di e reda ta señalá na dje?

• Kon nos por hasi sigur ku nos ta keda entre esnan ku a ser ‘rekohé i wardá den barí’?

[Preguntanan di Estudio]

[Plachinan na página 26]

Kiko e ilustrashon di e simia di mòster ta siña nos tokante oumento relashoná ku e Reino?

[Plachi na página 27]

Kiko nos ta siña for di e ilustrashon di zürdeg?

[Plachi na página 28]

Kiko e separashon di bon piská for di piská malu a prefigurá?