Dikon e Sirbishi di Kas pa Kas Ta Importante Awe?

“Tur dia, den tèmpel i di kas pa kas, nan tabata sigui siña hende i prediká Hesus komo e Kristu.”​—ECHO. 5:42.

1, 2. (a) Testigunan di Yehova ta konosí pa ki método di prediká? (b) Kiko nos lo konsiderá den e artíkulo aki?

E TA un esena ku bo ta mira den kasi tur pais na mundu. Dos persona nèchi bistí ta aserká un kas i ta hasi esfuerso pa duna e doño di kas un mensahe bíbliko breve tokante e Reino di Dios. Si e doño di kas mustra interes den e mensahe, e publikadónan lo por ofres’é literatura basá riba Beibel i un estudio di Beibel grátis. Despues, nan ta bai n’e siguiente kas. Si bo ta partisipá den e trabou aki, probablemente bo ta ripará ku hopi bes hende ta rekonosé bo komo un Testigu di Yehova asta promé ku bo kuminsá papia. Sí, Testigunan di Yehova ta konosí pa e predikashon di kas pa kas.

² Nos ta usa vários método pa kumpli ku e asignashon di prediká i di hasi disipel ku Hesus a duna nos. (Mat. 28:​19, 20) Nos ta prediká den plasa, na skina di kaya i den otro áreanan públiko. (Echo. 17:17) Nos ta tuma kontakto ku hopi hende via telefòn i via karta. Nos ta kompartí bèrdatnan bíbliko ku hende ku nos ta topa durante nos aktividatnan diario. Nos tin asta un website ofisial ku ta duna hende akseso na informashon basá riba Beibel den mas ku 300 idioma. * Tur e métodonan aki ta produsí bon resultado. Sinembargo, den mayoria di lugá, nos método prinsipal di plama e bon nobo ta mediante e predikashon di kas pa kas. Kiko ta e base pa e método aki di predikashon? Kon bin e pueblo di Dios djawe ta us’é asina tantu? I dikon e ta importante awe?

E Método di e Apòstelnan

3. Ki instrukshon Hesus a duna su apòstelnan relashoná ku e trabou di prediká, i kiko esaki ta indiká tokante e manera ku nan mester a prediká?

³ E método di prediká di kas pa kas ta basá riba e Skritura. Ora Hesus a manda su apòstelnan bai prediká, el a instruí nan bisando: “Den kualke stat òf pueblito ku boso drenta, buska pa haña sa ta ken ta digno den dje.” Kon nan mester a buska e personanan digno? Hesus a manda nan bai kas di hende, bisando: “Ora boso drenta e kas, salud’é. I si e kas ta digno, laga boso pas bin riba dje.” Nan mester a warda pa e hendenan invitá nan na nan kas? Tuma nota di loke Hesus a sigui bisa: “I ken ku keda sin risibí boso, ni paga tinu na boso palabranan, ora boso sali bai for di e kas ei òf e stat ei, sagudí e stòf kita for di boso pia.” (Mat. 10:​11-14) E instrukshonnan aki ta mustra bon kla ku segun ku e apòstelnan a pasa dor di e teritorio “den tur e pueblitonan, predikando e evangelio,” nan mester a tuma inisiativa pa bishitá hende na nan kas.​—Luk. 9:6.

4. Unda Beibel ta menshoná predikashon di kas pa kas spesífikamente?

⁴ Beibel ta menshoná spesífikamente ku e apòstelnan a prediká di kas pa kas. Por ehèmpel, djis despues ku e kongregashon kristian a ser establesé na aña 33 di nos era, Echonan 5:42 ta bisa di nan: “Tur dia, den tèmpel i di kas pa kas, nan tabata sigui siña hende i prediká Hesus komo e Kristu.” Rònt di 20 aña despues, apòstel Pablo a rekordá e ansianonan den e kongregashon na Efeso: “Mi no a laga di deklará nada ku tabata di probecho pa boso i tabata siña boso públikamente i di kas pa kas.” Pablo  a bishitá e ansianonan ei promé ku nan a bira kristian? Ta parse ku sí, pasobra el a siña nan, entre otro,“di repentimentu pa ku Dios i di fe den nos Señor Hesukristu.” (Echo. 20:​20, 21) Komentando riba Echonan 20:20, Robertson su obra Word Plachinan in the New Testament ta bisa: “Ta bon pa nota ku e gran predikadó aki tabata prediká di kas pa kas.”

Un Ehérsito di Dalakochi den Nos Tempu

5. Kon e profesia di Joel ta deskribí e trabou di prediká?

⁵ E predikashon ku a tuma lugá den e promé siglo tabata djis un muestra adelantá di un trabou mas grandi ku mester ser hasí den nos tempu. Profeta Joel a kompará e predikashon di e kristiannan ungí ku un plaga devastador di insekto ku ta inkluí tirakochi, òf dalakochi. (Joel 1:4) Moviendo padilanti manera un ehérsito, e dalakochinan ta vense opstákulo, drenta kasnan i devorá tur loke nan topa den nan kaminda. (Lesa Joel 2:​2, 7-9.) Esei ta un deskripshon bibu di perseveransia i e manera kabal ku Dios su pueblo ta kumpli ku e trabou di prediká den nos tempu. E método di mas importante ku kristiannan ungí i nan kompañeronan di e “otro karnénan” ta usa pa kumpli ku e deskripshon profétiko aki ta e sirbishi di kas pa kas. (Juan 10:16) Kon bin nos, Testigunan di Yehova, a kuminsá usa e método ei di prediká di e apòstelnan?

6. Ki animashon pa prediká di kas pa kas a ser duná na 1922, pero kon algun persona a reakshoná?

⁶ For di 1919 padilanti, Yehova su organisashon a pone énfasis riba e echo ku tur kristian tin e responsabilidat di partisipá personalmente den e predikashon. Por ehèmpel, un artíkulo titulá “Sirbishi Ta Esensial,” den e Watch Tower di 15 di ougùstùs 1922, a rekordá kristiannan ungí di e importansia di partisipá “aktivamente den hiba e mensahe imprimí pa e hendenan i papia ku nan na nan kas, dunando testimonio ku e reino di shelu ta serka.” Bulletin (awor, Nos Ministerio di Reino) a duna presentashonnan en detaye. Apesar di esei, e kantidat di hende ku realmente tabata prediká di kas pa kas tabata poko na prinsipio. Algun no tabata hasi e trabou ei. Nan a bin ku vários opheshon, pero e problema básiko tabata ku  algun di nan a konsiderá nan mes muchu importante pa bai prediká di kas pa kas. Segun ku e énfasis riba sirbishi di vèlt a oumentá, gradualmente hopi di e personanan ei a stòp di asosiá ku Yehova su organisashon.

7. Ki nesesidat a bira bisto durante e dékada di 1950?

⁷ Durante e dékadanan ku a sigui, mas i mas hende a djòin e trabou di prediká. Sinembargo, a bira bisto tambe ku e publikadónan tabatin mester di mas entrenamentu personal pa hasi e trabou di prediká di kas pa kas. Tuma por ehèmpel, e situashon ku tabatin na Merka. Durante e promé añanan di e dékada di 1950, di tur e Testigunan den e pais ei, 28 porshento su aktividat di prediká a konsistí únikamente di distribuí pamfleta òf di para ofresé revista riba kaya. Mas ku 40 porshento tabata iregular den e trabou di prediká i tabata laga lunanan pasa sin ku nan a duna niun hende testimonio. Kiko por a ser hasí pa yuda tur kristian dediká prediká di kas pa kas?

8, 9. Ki programa di entrenamentu a kuminsá na 1953, i kiko tabata e resultadonan?

⁸ Durante un kongreso internashonal na New York na 1953, e sirbishi di kas pa kas a risibí atenshon spesial. Ruman Nathan H. Knorr, kende na e tempu ei tabata dirigí e trabou mundial, a deklará ku e trabou prinsipal di tur superintendente kristian mester ta pa yuda tur Testigu bira un minister ku ta prediká di kas pa kas regularmente. El a bisa: “Tur hende mester ta kapas pa prediká e bon nobo di kas pa kas.” I rònt mundu, un programa di entrenamentu a kuminsá pa logra e meta aki. Esnan ku ainda no tabata prediká di kas pa kas a risibí entrenamentu kon pa aserka hende na nan kas, rasoná ku nan for di Beibel i kontestá nan preguntanan.

⁹ E programa di entrenamentu aki a produsí resultadonan ekselente. Denter di un periodo di 10 aña, e kantidat di publikadó mundialmente a oumentá ku 100 porshento, e kantidat di rebishita ku 126 porshento i e kantidat di estudio di Beibel ku 150 porshento. Awe, kasi shete mion publikadó di Reino ta prediká e bon nobo rònt mundu. E oumento remarkabel aki ta un prueba ku Yehova ta bendishoná e esfuersonan di su pueblo den e sirbishi di kas pa kas.​—Isa. 60:22.

Markamentu di Hende pa Sobrebibí

10, 11. (a) Segun Ezekiel kapítulo 9, ki vishon Ezekiel a haña? (b) Kon e vishon ei ta kumpliendo den nos tempu?

¹⁰ Nos por mira e importansia di e sirbishi di kas pa kas den un vishon ku profeta Ezekiel a haña. Den e vishon ei, Ezekiel a mira seis hòmber ku arma den nan man i un di shete hòmber bistí ku paña di lino i ku un pòchi di enk di sekretario na su sintura. E di shete hòmber a haña òrdu pa “pasa duars dor di e stat” i “pone un señal riba frenta di e hòmbernan ku ta suspirá i keha pa motibu di tur e abominashonnan ku ta wòrdu hasí den dje.” Despues di e trabou di markamentu ei, e seis hòmbernan ku arma di destrukshon a haña e mandato pa mata tur hende ku no tabatin e señal, òf marka.​—Lesa Ezekiel 9:​1-6.

¹¹ Nos ta komprondé ku den kumplimentu di e profesia aki, e hòmber “bistí na paña di lino” ta representá e restu di kristiannan ungí ku spiritu. Mediante e trabou di prediká i di hasi disipel, e grupo di kristiannan ungí ta pone un marka simbóliko riba hende ku ta bira parti di Kristu su “otro karnénan.” (Juan 10:16) Kiko e marka aki ta? E ta e evidensia—komo si fuera algu bisto riba nan frenta—ku ta indiká ku e karnénan ei ta disipelnan dediká i batisá di Hesukristu i ku nan a bisti e personalidat nobo manera esun di Kristu. (Efe. 4:​20-24) E personanan semehante di karné aki ta forma un tou huntu ku  e kristiannan ungí i ta yuda nan den e trabou importante di sigui marka otro hende.​—Rev. 22:17.

12. Kon e vishon di Ezekiel tokante markamentu di frenta ta hala atenshon na e importansia di sigui buska hende semehante di karné?

¹² E vishon di Ezekiel ta hala atenshon na un motibu pakiko ta asina urgente pa nos sigui buska hende ku ta “suspirá i keha.” Bida di hende ta na peliger. Pronto, Yehova su forsanan selestial di ehekushon, representá pa e seis hòmbernan armá, lo destruí hende ku no tin e marka simbóliko. Relashoná ku e binidero huisio ei, apòstel Pablo a skirbi ku Señor Hesus, kompañá pa “su angelnan poderoso,” lo duna “pago meresí na esnan ku no konosé Dios i na esnan ku no ta obedesé e evangelio di nos Señor Hesus.” (2 Tes. 1:​7, 8) Tuma nota ku hende lo ser husgá a base di e manera ku nan ta reakshoná riba e evangelio, òf bon nobo. P’esei, e proklamashon di Dios su mensahe mester sigui sin stòp te na e fin. (Rev. 14:​6, 7) Esaki ta pone un responsabilidat serio riba tur sirbidó dediká di Yehova.​—Lesa Ezekiel 3:17-19.

13. (a) Ki responsabilidat apòstel Pablo a sinti ku e tabatin, i dikon? (b) Ki responsabilidat abo ta sinti pa ku e hendenan den bo teritorio?

¹³ Apòstel Pablo a sinti ku personalmente e tabatin un responsabilidat di prediká e bon nobo na otro hende. El a skirbi: “Mi ta debedó tantu di griego komo di bárbaro, tantu di e sabínan komo di esnan ku no ta sabí. P’esei, di mi parti, mi ta ansioso pa prediká e evangelio na boso tambe ku ta na Roma.” (Rom. 1:​14, 15) Gratitut pa e miserikòrdia ku Dios a mustra na dje a impulsá Pablo pa hasi esfuerso pa yuda otro hende pa nan tambe por benefisiá di e bondat inmeresí ei meskos ku é a benefisiá di dje. (1 Tim. 1:​12-16) Tabata komo si fuera e tabata debe kada persona ku el a topa. I e úniko manera ku e por a paga e debe ei ta dor di prediká e bon nobo na e persona ei. Abo ta rekonosé ku bo tin un debe asina pa ku e hendenan den bo teritorio?​—Lesa Echonan 20:26 i 27.

14. Kiko ta nos motibu prinsipal pa prediká públikamente i di kas pa kas?

¹⁴ Ounke preservashon di bida humano ta importante, tin un motibu muchu mas importante pakiko nos tin ku prediká di kas pa kas. Den e profesia registrá na Malakias 1:11, Yehova a deklará: “For di ora solo sali te ora ku e drenta, mi nòmber lo ta grandi meimei di e nashonnan, i . . . lo wòrdu ofresí na mi nòmber .  . . un ofrenda di maishi ku ta puru; pasobra mi nòmber lo ta grandi meimei di e nashonnan.” Kumpliendo ku e profesia aki, Yehova su sirbidónan dediká ta alabá su nòmber públikamente rònt mundu segun ku nan humildemente ta kumpli ku nan sirbishi, òf ministerio. (Sal. 109:30; Mat. 24:14) E motibu prinsipal pakiko nos ta prediká públikamente i di kas pa kas ta pasobra asina nos ta rindi “sakrifisio di alabansa” na Yehova.​—Heb. 13:15.

Susesonan Krusial Ta na Kaminda

15. (a) Kon e israelitanan a intensifiká nan aktividat segun ku nan tabata marcha rònt di Jeriko riba e di shete dia? (b) Kiko esaki ta indiká tokante nos trabou di prediká?

¹⁵ Kon e trabou di prediká lo sigui desaroyá den futuro? E sitiamentu di Jeriko, registrá den e buki di Josué, ta sirbi komo un ehèmpel. Kòrda ku djis promé ku Dios a destruí Jeriko, e israelitanan a haña instrukshon pa marcha un biaha pa dia rònt di e stat durante seis dia. Sinembargo, riba e di shete dia, nan mester a  oumentá nan aktividat di un manera remarkabel. Yehova a bisa Josué: “Boso mester marcha rònt di e stat shete biaha, i e saserdotenan mester supla e tròmpètnan. I lo sosodé ku ora nan dal un suplá largu riba e kachu di karné chubatu, . . . henter e pueblo mester dal un gritu duru; i muraya di e stat lo bash’abou.” (Jos. 6:​2-5) Ta posibel ku nos aktividat di prediká tambe lo oumentá di un manera similar. Sea ku esei lo sosodé òf nò, promé ku e destrukshon di e sistema di kosnan aktual tuma lugá, nos lo mira e testimonio di mas grandi relashoná ku Dios su nòmber i e Reino den historia di e mundu aki.

16, 17. (a) Kiko lo ser lográ promé ku ‘e tribulashon grandi’ terminá? (b) Kiko nos lo konsiderá den e siguiente artíkulo?

¹⁶ Por ta masha bon ku lo yega e tempu ku e mensahe ku nos ta proklamá ta manera “un gritu duru.” E buki di Revelashon ta deskribí mensahenan poderoso di huisio komo “piedranan di hagel masha grandi mes, di mas o ménos shen liber kada un.” * I Revelashon 16:21 ta bisa: “E plaga aki tabata masha pisá mes.” Ainda nos no sa ki ròl presis e sirbishi di kas pa kas lo hunga den e proklamashon kulminante di e mensahenan di huisio. Pero nos por ta sigur ku promé ku ‘e tribulashon grandi’ terminá, Yehova su nòmber lo a ser hasi konosí na un eskala sin presedente.​—Rev. 7:14; Eze. 38:23.

¹⁷ Segun ku nos ta spera riba e susesonan krusial ku ta na kaminda, laga nos sigui deklará e bon nobo di Reino ku zelo. Ki desafionan nos ta konfrontá den e sirbishi di kas pa kas segun ku nos ta kumpli ku nos asignashon, i kon nos por enfrentá nan? Nos lo konsiderá e preguntanan aki den e siguiente artíkulo.

[Nota]

Kon Lo Bo Kontestá?

• Kiko ta e base bíbliko pa e predikashon di kas pa kas?

• Kon e sirbishi di kas pa kas a ser enfatisá den nos tempu?

• Dikon sirbidónan dediká di Yehova tin un responsabilidat di prediká?

• Ki susesonan krusial ta na kaminda?

[Preguntanan di Estudio]

[Plachinan na página 12]

Bo ta sinti ku bo tin e responsabilidat di prediká na otro hende, meskos ku apòstel Pablo?

[Plachi na página 13]

Ruman Knorr, 1953