E Palabra di Yehova Ta Bibu

Puntonan Sobresaliente di e Kartanan na e Korintionan

APÒSTEL Pablo tabata masha preokupá pa e bienestar spiritual di e kongregashon na Korinto. El a tende ku tabatin desunion entre e rumannan einan. Nan tabata tolerá inmoralidat. Ademas, e kongregashon a skirbi Pablo i a hasié pregunta tokante sierto asuntunan. P’esei, rònt di aña 55 di nos era, ora Pablo tabata na Efeso durante su di tres biahe di misionero, el a skirbi e promé di su dos kartanan dirigí na e korintionan.

Su di dos karta, ku aparentemente el a skirbi djis algun luna despues di esun promé, ta un kontinuashon di esun promé. E kondishonnan ku a eksistí tantu pafó komo paden di e kongregashon di Korinto den promé siglo tabata hopi similar na esnan den nos tempu. P’esei, Pablo su kartanan na e korintionan ta di gran balor pa nos.​—Heb. 4:12.

‘SEA ALERTA, PARA FIRME, SEA FUERTE’

(1 Kor. 1:1–16:24)

Pablo a ekshortá: “Boso tur papia e mesun kos.” (1 Kor. 1:10) Fuera di fe den Hesukristu, no tin otro fundeshi riba kua kualidatnan kristian ta ser edifiká. (1 Kor. 3:​11-13) Relashoná ku un fornikadó ku tabata den e kongregashon, Pablo a bisa: “Saka e hòmber malbado for di meimei di boso.” (1 Kor. 5:13) El a bisa tambe: “E kurpa no ta pa inmoralidat, ma pa Señor.”​—1 Kor. 6:13.

Komo kontesta riba “e kosnan di kual [nan] a skirbi,” Pablo a duna konseho bon i práktiko relashoná ku matrimonio i solteria. (1 Kor. 7:1) Despues ku Pablo a hasi algun remarke tokante e areglo di hefatura den e kongregashon kristian, tokante e manera korekto i ordená ku e reunionnan mester tabata i enkuanto e speransa sigur di resurekshon, el a duna e ekshortashon aki: “Sea alerta, para firme den fe, aktua manera hòmber, sea fuerte.”​—1 Kor. 16:13.

Kontesta Riba Pregunta Bíbliko:

1:21​—Yehova realmente ta usa “lokura” pa salba esnan ku ta kere? Nò, e no ta hasi esei. Sinembargo, debí ku e “mundu dor di su mes sabiduria no a konosé Dios,” loke Yehova ta usa pa salba hende ta parse lokura pa e mundu.​—Juan 17:25.

5:5​—Kiko ke men “entregá un hende [malbado] na Satanas pa destrukshon di su karni, pa [e] spiritu wòrdu salbá”? Ora un praktikadó di piká serio ku no a arepentí ser ekspulsá for di e kongregashon, e ta bira parti di e mundu malbado di Satanas atrobe. (1 Juan 5:19) P’esei, Beibel ta bisa ku e ta ser entregá na Satanas. E persona su ekspulshon ta eliminá òf destruí su mal influensia for di e kongregashon i asina ta konserbá e kongregashon su spiritu òf aktitut dominante.​—2 Tim. 4:22.

7:​33, 34​—Kiko ta “e kosnan di mundu” ku un hòmber òf muhé kasá ta kibra su kabes kuné? Pablo tabata referí na asuntunan relashoná ku e bida diario, ku kristiannan kasá mester preokupá kuné. Esakinan ta, entre otro, kuminda, paña i kas. Pero, Pablo no a referí na e kosnan malu di e mundu aki ku kristiannan ta evitá.​—1 Juan 2:​15-17.

11:26​—Pablo a bisa “kada bes” Hesus su morto mester ser konmemorá. Kuantu biaha ta kada bes, i “te” ki tempu mester konmemor’é? Pablo tabata ke men ku ki ora ku kristiannan ungí tuma di e emblemanan di Memorial, esta, un biaha pa aña, riba 14 di nisan, nan ta “proklamá e morto di Señor.” Nan ta hasi esaki “te ora ku e bin,” esta, te ora ku e  risibí nan den shelu mediante un resurekshon.​—1 Tes. 4:​14-17.

13:13​—Den ki sentido amor ta mas ekselente ku fe i speransa? Fe i speransa no ta sigui hunga e mesun papel despues ku e “kosnan ku hende ta spera” bira realidat. (Heb. 11:1) Amor ta mas ekselente ku fe i speransa den e sentido ku e ta permanesé pa semper.

15:29​—Kiko ke men wòrdu “batisá pa e mortonan”? Pablo no tabata sugerí pa hende bibu batisá na lugá di esnan ku a muri sin batisá. Akinan, Pablo tabata papia di e echo ku kristiannan ungí ku spiritu ta ser batisá, òf ta drenta, den un bida den kua nan ta mantené nan integridat te na morto i despues ta ser resusitá na bida selestial. Ta p’esei, e Tradukshon di Mundu Nobo ta bisa ku nan ta ser “batisá ku e propósito di ser hende morto.”

Lès pa Nos:

1:​26-​31; 3:​3-9; 4:7. Ora nos ta mustra humildat i ta gaba den Yehova i no ta gaba nos mes, esaki ta promové union den e kongregashon.

2:​3-5. Kisas ora Pablo tabata prediká na Korinto, un sentro di filosofia i siñansa griego, e tabata preokupá ku si lo e tabata kapas pa persuadí, òf konvensé, su oyentenan. Sinembargo, e no a permití ningun debilidat ni miedu ku kisas e tabatin strob’é di kumpli ku su ministerio ku Dios a dun’é. Di mes manera, nos no mester permití sirkunstansianan difísil òf ku nos no ta kustumbrá kuné stroba nos di deklará e bon nobo di Dios su Reino. Ku konfiansa, nos por akudí na Yehova pa yudansa meskos ku Pablo a hasi.

2:16. Pa nos por tin “e mente di Kristu,” nos tin ku sa kon e ta pensa i dikon e ta pensa asina, i a la bes pensa manera e ta pensa, konosé su personalidat i imitá su ehèmpel. (1 Ped. 2:21; 4:1) Pues, ta masha importante pa nos studia Hesus su bida i ministerio kuidadosamente.

3:​10-15; 4:17. Nos mester analisá i mehorá nos abilidat di siña hende i di hasi disipel. (Mat. 28:​19, 20) Si nos no ta siña nos studiante bon, kisas e no ta sobrebibí pruebanan di fe, i nos lo por sufri un pèrdida asina doloroso ku nos salbashon lo por ta manera di hende “ku a pasa dor di kandela.”

6:18. “Hui for di inmoralidat” ta nifiká evitá no solamente aktonan di por·néi·a sino tambe pornografia, impuresa moral, fantasianan inmoral, flirtmentu i kualke kos ku por hiba na fornikashon òf inmoralidat.​—Mat. 5:28; Sant. 3:17.

7:29. Parehanan kasá mester tene kuidou pa nan no ta asina preokupá ku nan bida matrimonial ku interesnan di Reino ta haña e segundo lugá den nan bida.

10:​8-11. Yehova a sintié masha ofendí ora Israel a murmurá kontra Moisés i Aaron. Ta sabí pa nos tene kuidou pa nos no kultivá e kustumber di murmurá.

16:2. Nos kontribushonnan finansiero pa promové e interesnan di Reino por ta konsistente  si nos ta plania esei di antemano i ta kontribuí sistemátikamente.

SIGUI ‘SER REAHUSTÁ’

(2 Kor. 1:​1–13:14)

Pablo a bisa e korintionan ku bondadosamente nan mester ‘pordoná i konsolá’ un malechor arepentí ku tabata ekspulsá. Ounke su promé karta a hasi nan tristu, Pablo a ekspresá goso pasobra nan “a bira tristu te na e punto di repentimentu.”​—2 Kor. 2:​6, 7; 7:​8, 9.

Pablo a animá e korintionan pa nan ‘abundá den obra di grasia,’ òf dunamentu, ‘meskos ku nan a abundá den tur kos.’ Despues ku el a kontestá e opositornan, el a duna e konseho final aki na tur hende: “Regosihá, [“sea reahustá,” NW], konsolá boso, sea di akuerdo ku otro, biba na pas.”​—2 Kor. 8:7; 13:11.

Kontesta pa Preguntanan Bíbliko:

2:​15, 16​—Kon bin nos ta “un holó dushi di Kristu”? Esei ta asina pasobra nos ta obedesé loke Beibel ta bisa i ta prediká su mensahe. Maske ku pa hendenan inhustu e “fragansia” ei kisas ta un holó malu, pa Yehova i hende sinsero, e ta un holó dushi.

5:16​—Den ki sentido kristiannan ungí “no ta rekonosé [“konosé,” NW] ningun hende segun karni”? Nan no ta wak hende desde un punto di bista karnal den e sentido ku nan no ta mustra faboritismo na hende pa motibu di nan rikesa, rasa, orígen étniko òf nashonalidat. Loke ta importante pa e kristiannan ei ta nan relashon spiritual ku nan kompañeronan di fe.

11:​1, 16; 12:11, NW​—Pablo tabata irasonabel pa ku e korintionan? Nò, esei no tabata e kaso. Sinembargo, kisas pa algun hende por a parse ku e tabata gaba i ku e tabata irasonabel debí na loke el a hañ’é obligá ta bisa pa defendé su posishon komo apòstel.

12:​1-4​—Ta ken “a wòrdu hibá den paraiso”? Siendo ku Beibel no ta papia di niun otro persona ku tabatin un vishon asina, i e pasashi ei ta bini djis despues di e versíkulonan den kua Pablo a defendé su posishon komo apòstel, probablemente e tabata relatá su propio eksperensia. Kisas e apòstel a haña un vishon di e paradeis spiritual ku e kongregashon kristian ta disfrutá di dje den “e tempu di e fin.”​—Dan. 12:4.

Lès pa Nos:

3:5. Den un sentido amplio, e versíkulo aki ta bisa nos ku Yehova ta kapasitá kristiannan, mediante su Palabra, su spiritu santu i su organisashon riba tera, pa efektuá e ministerio. (Juan 16:7; 2 Tim. 3:​16, 17) Ta bon pa nos studia Beibel i publikashonnan basá riba Beibel diligentemente, hasi orashon sin kansa pa pidi spiritu santu, asistí i partisipá regularmente na reunionnan kristian.​—Sal.1:​1-3; Luk. 11:​10-13; Heb. 10:​24, 25.

4:16. Siendo ku Yehova ta ‘renobá nos hende interior dia pa dia,’ nos mester hasi uso regularmente di Yehova su provishonnan. Esei ta nifiká ku nos no ta permití niun dia pasa sin ku nos ta hasi algu pa fortifiká nos relashon ku Yehova.

4:​17, 18. Ora nos kòrda ku nos tribulashon, òf ‘aflikshon, ta leve i pa un momento so,’ esaki por yuda nos keda fiel na Yehova durante tempu di difikultat.

5:​1-5. Na un manera masha bunita Pablo ta ekspresá e sintimentunan di kristiannan ungí pa ku nan speransa di bida selestial.

10:13. Pa regla, nos mester prediká solamente den e teritorio ku ta asigná na nos kongregashon, a ménos ku nos a ser asigná pa yuda kaminda tin mas nesesidat.

13:5. Pa nos analisá òf ‘saminá nos mes pa wak si nos ta den e fe,’ nos tin ku wak si nos kondukta ta kuadra ku loke nos ta siña for di Beibel. Pa [‘duna prueba di loke nos ta,’ NW], nos tin ku evaluá kon fuerte nos relashon ku Dios ta, kon bon nos abilidat pa usa nos “mente” ta i kuantu i ki tipo di obra di fe nos ta efektuá. (Heb. 5:14; Sant. 1:​22-25) Dor di apliká Pablo su konseho sano, nos por sigui kana den e kaminda di e bèrdat.

[Plachi na página 30, 31]

Kiko e palabranan “kada bes ku boso kome e pan aki i bebe e kopa aki” ta nifiká?​—1 Kor. 11:26