Mantené Lealtat ku un Kurason Kompletu

“Lo mi kana den bo bèrdat; uni mi kurason pa teme bo nòmber.”​—SAL. 86:11.

1, 2. (a) Segun Salmo 86:​2 i 11, kiko lo yuda nos keda fiel na Yehova apesar di prueba òf tentashon? (b) Na ki tempu nos tin ku kultivá lealtat sinsero?

DIKON algun kristian ku a keda fiel pa hopi aña apesar di enkarselashon òf persekushon despues ta kai pa motibu di materialismo? E kontesta tin di haber ku nos kurason figurativo—loke nos ta di paden. Salmo 86 ta konektá lealtat ku un kurason “uní,” esta, un kurason kompletu, un kurason ku no ta dividí. E salmista David a pidi den orashon: “Preservá mi alma, pasobra mi ta un hòmber deboto [“leal,” NW]; Abo, o mi Dios, salba bo sirbidó ku ta konfia den bo.” David a resa tambe: “Siña mi bo kaminda, o SEÑOR; lo mi kana den bo bèrdat; uni mi kurason pa teme bo nòmber.”​—Sal. 86:​2, 11.

² Si nos no ta konfia den Yehova ku henter nos kurason, fásilmente otro asuntu i relashon ku otro hende por debilitá nos lealtat na e Dios berdadero. Deseonan egoista ta manera minanan di tera skondí bou di kaminda riba kua nos ta kana. Ounke nos kisas a keda fiel na Yehova bou di sirkunstansianan difísil, tòg nos por bira víktima di Satanas su triki- òf trampanan. P’esei, ta masha importante pa nos kultivá lealtat di kurason na Yehova for di awor, promé ku nos haña nos ku prueba òf tentashon! Beibel ta bisa: “Warda bo kurason riba tur kos.” (Pro. 4:23) Nos por siña lèsnan balioso relashoná ku esaki for di loke a sosodé ku un profeta di Huda ku Yehova a manda serka Rei Jeroboam di Israel.

 “Lo Mi Duna Bo un Rekompensa”

3. Kon Jeroboam a reakshoná riba e mensahe di huisio ku e profeta di Dios a deklará?

³ Imaginá bo e esena akí. Un hòmber di Dios a kaba di deklará un mensahe fuerte na Rei Jeroboam, kende a establesé adorashon di bisé den e reino di nort di 10 tribu di Israel. E rei a bira furioso i a duna su hòmbernan òrdu pa kapturá e mensahero. Pero Yehova tabata ku su sirbidó. Mesora, e man ku e rei a saka den su rabia a bira seku milagrosamente, i e altar ku nan tabata usa pa adorashon di dios falsu a habri for di otro. Diripiente, Jeroboam su aktitut a kambia. El a supliká e hòmber di Dios: “Pa fabor, roga SEÑOR bo Dios i hasi orashon pa mi, pa mi man bolbe bira bon.” E profeta a hasi orashon, i e rei su man a bira bon.​—1 Rei. 13:​1-6.

4. (a) Dikon e rei su oferta tabata realmente un prueba pa e profeta su lealtat? (b) Kiko e profeta a kontestá?

⁴ Despues Jeroboam a bisa e hòmber di e Dios berdadero: “Ban kas ku mi i refreská bo kurpa, i lo mi duna bo un rekompensa.” (1 Rei. 13:7) Kiko e profeta mester a hasi awor? E mester a rechasá e rei su hospitalidat, ya ku el a kaba di dun’é un mensahe di kondenashon? (Sal. 119:113) Òf e mester a aseptá e rei su invitashon pasobra a parse ku e rei a repentí? Jeroboam tabata hopi riku, i siguramente lo e por a duna su amigunan regalonan kostoso. Si e profeta di Dios tabatin kualke deseo skondí pa kos material, e rei su oferta lo tabata un gran tentashon p’e. Sinembargo, Yehova a ordená e profeta: “No kome pan ni bebe awa, ni bolbe pa e mesun kaminda ku bo a bin.” Pues, na un manera ku no ta laga duda, e profeta a kontestá: “Ni maske bo a duna mi mitar di bo kas, lo mi no a bai ku bo, ni lo mi no a kome pan ni bebe awa na e lugá akí.” I e profeta a bandoná Bètel via un otro kaminda. (1 Rei. 13:​8-10) Ki lès tokante lealtat sinsero nos ta siña for di e profeta su desishon?​—Rom. 15:4.

“Sea Kontentu”

5. Kiko materialismo tin di haber ku lealtat?

⁵ Por parse ku materialismo no tin nada di haber ku lealtat; pero nan tin relashon ku otro sí. Nos ta konfia den Yehova su promesa ku lo e perkurá loke nos realmente tin mester? (Mat. 6:33; Heb. 13:5) Nos por biba sin sierto kosnan material ku ta hasi bida mas kómodo, si aktualmente nos no por afòrt nan? Òf nos ta hasi esfuerso pa kueste loke kueste nos haña nan? (Lesa Filipensenan 4:​11-13. *) Nos tin e tendensia di sakrifiká e oportunidat pa hasi mas den e kongregashon òf den nos sirbishi na Dios pa asina nos haña loke nos ke awor? Sirbishi leal na Dios ta na promé lugá den nos bida? Nos kontestanan lo dependé prinsipalmente di e manera ku nos ta sirbi Dios, si ta di henter kurason òf nò. Apòstel Pablo a skirbi: “Santidat akompañá pa kontentamentu ta di gran ganashi. Pasobra nos no a trese nada den mundu, i nos no por hiba nada for di dje tampoko. I si nos tin kuminda i paña pa bisti, ku esakinan nos mester ta kontentu.”​—1 Tim. 6:​6-8.

6. Oferta di ki “rekompensa” nos lo por haña, i kiko lo yuda nos disidí si nos ta aseptá nan òf nò?

⁶ Por ehèmpel, kisas nos doño di trabou ta ofresé nos un promoshon ku mihó pago i otro benefisionan. Òf podisé nos ta realisá ku nos por gana mas plaka si nos muda bai un otro pais òf region pa buska trabou. Na promé bista, e oportunidatnan ei por parse di ta un bendishon di Yehova. Pero, promé ku nos tuma un desishon, nos mester analisá nos motivashonnan, no ta bèrdat? E pregunta prinsipal ku nos mester hasi nos mes ta: “Ki efekto mi desishon lo tin riba mi relashon ku Yehova?”

7. Dikon ta importante pa nos eliminá deseonan materialista kompletamente?

⁷ Satanas su sistema di kosnan ta promové materialismo persistentemente. (Lesa 1 Juan 2:​15 i 16.) Diabel su meta ta pa korumpí nos kurason. P’esei, nos mester ta atento pa identifiká i eliminá deseo materialista kompletamente for  di nos kurason. (Rev. 3:​15-17) Hesus no tabatin problema pa rechasá Satanas su oferta ora esaki a ofres’é tur e reinonan di mundu. (Mat. 4:​8-10) El a spièrta: “Tene kuidou, i warda boso di tur golosidat; pasobra bida di hende no ta konsistí di e abundansia di e kosnan ku e tin.” (Luk. 12:15) Lealtat lo yuda nos dependé riba Yehova i no riba nos mes.

Un Profeta Bieu “A Gañ’é”

8. Kon e lealtat di e profeta di Dios a ser poné na prueba?

⁸ Kos lo a bai bon ku e profeta di Dios si el a sigui ku su biahe pa kas. Sinembargo, kasi mesora, el a hañ’é ku un otro prueba. Beibel ta bisa: “Tabata biba un profeta bieu na Bètel; i su yu hòmbernan a bin kont’é” tur loke a pasa mas promé riba e dia ei. Ora el a tende e informe, e hòmber bieu a pidi nan siya su buriku p’e pa asina e por a sali i alkansá Dios su profeta na kaminda. Djis despues, el a haña e profeta sintá ta sosegá bou di un palu grandi, i el a bis’é: “Ban kas ku mi i kome pan.” Ora e hòmber di e Dios berdadero a rechasá e invitashon, e hòmber bieu a kontestá: “Ami tambe ta un profeta meskos ku bo, i un angel a papia ku mi dor di e palabra di SEÑOR, bisando: ‘Tres’é bèk serka bo na bo kas, pa e kome pan i bebe awa.’” Pero e Skritura ta bisa: “Ta gaña el a gañ’é.”​—1 Rei. 13:​11-18.

9. Kiko e Skritura ta bisa tokante hende mentiroso, i na ken nan ta hasi daño?

⁹ Nos no sa kiko a motivá e profeta bieu, pero el a gaña. Podisé un tempu e tabata un profeta fiel di Yehova. Sinembargo, na e okashon akí el a saka un mentira. E Skritura ta kondená e proseder ei fuertemente. (Lesa Proverbionan 6:​16 i 17.) Hende mentiroso ta daña no solamente nan propio relashon ku Dios, sino hopi bes nan ta kousa daño tambe na otro hende su relashon ku Dios.

“El A Bai Bèk” ku e Hòmber Bieu

10. Kon Dios su profeta a reakshoná riba invitashon di e hòmber bieu i kiko tabata e resultado?

¹⁰ E profeta di Huda mester por a komprondé ku e profeta bieu a gañ’é. E por a puntra su mes: ‘Dikon Yehova lo manda un angel serka un otro hende ku instrukshon nobo pa mi?’ E profeta por a pidi Yehova klarifiká e instrukshon, pero e Skritura no ta indiká ku el a hasi esei. Mas bien, “el a bai bèk ku [e hòmber bieu], i a kome pan na su kas i a bebe awa.” Yehova no a keda kontentu kuné. Finalmente, ora ku e profeta ku a wòrdu engañá tabata riba kaminda pa bai bèk Huda, un leon a hañ’é i a mat’é. Esei sí tabata un fin trágiko na su karera komo profeta!​—1 Rei. 13:19-25. *

11. Ki bon ehèmpel Ahias a pone?

¹¹ Di otro banda, profeta Ahias, kende Yehova a manda pa ungí Jeroboam komo rei, sí a keda fiel asta ora el a bira bieu. Ora Ahias tabata bieu i siegu, Jeroboam a manda su kasá bai puntra Ahias tokante e salú di nan yu hòmber ku tabata malu. Ku kurashi Ahias a profetisá ku Jeroboam su yu hòmber lo a muri. (1 Rei. 14:​1-18) Un di e hopi bendishonnan ku Ahias a risibí ta ku el a haña e privilegio di por a kontribuí na Dios su Palabra inspirá. Kon asina? Despues saserdote Esdras a usa loke Ahias a skirbi komo fuente di informashon.​—2 Kró. 9:29.

12-14. (a) Ki lès nos por siña for di e insidente ku a enbolbé e profeta mas yòn? (b) Ilustrá dikon nos tin ku hasi orashon i pensa seriamente riba konseho basá riba Beibel ku ansianonan ta duna.

¹² Beibel no ta bisa dikon e profeta mas yòn no a konsultá ku Yehova promé ku el a desviá i a bai kome i bebe ku e profeta bieu. Akaso e hòmber mas bieu a bis’é loke e tabata ke tende? Ki lès nos por saka for di esaki? Nos mester ta plenamente konvensí ku Yehova su rekisitonan ta hustu. I maske kiko ku pasa, nos mester ta determiná pa kumpli ku nan.

¹³ Algun hende ta tende loke nan ke tende ora ta trata di konseho. Por ehèmpel, podisé un publikadó ta haña un oferta pa un trabou ku lo por pone ku e tin ku dediká ménos tempu na su famia i na aktividatnan teokrátiko. Kisas e ta pidi un ansiano konseho. E ansiano lo por kuminsá remarká ku e no ta den un posishon pa bisa e ruman hòmber kon e tin ku sostené su famia. Despues di esei, e ansiano lo por repasá huntu ku e  ruman hòmber algun di e peligernan spiritual ku e por hañ’é kuné si e aseptá e trabou. Kiko e ruman hòmber lo hasi? Lo e kòrda solamente e promé remarkenan di e ansiano, òf lo e pensa seriamente riba loke e ruman a bisa despues? Ta opvio ku e ruman hòmber mester determiná kiko ta mihó p’e den sentido spiritual.

¹⁴ Konsiderá un otro situashon ku por presentá. Kisas un ruman muhé ta puntra un ansiano si e mester separá di su esposo ku no ta Testigu. Sin duda, e ansiano lo splika e ruman muhé ku ta e mes tin ku disidí si e ta separá for di su kasá òf nò. Despues di esei, lo e por repasá algun konseho bíbliko relashoná ku e asuntu. (1 Kor. 7:10-16) E ruman muhé lo pensa seriamente riba loke e ansiano a bis’é? Òf el a disidí kaba ku e ta bai laga su kasá? Ora e ta tuma su desishon, lo ta sabí pa e hasi orashon i pensa seriamente riba e konseho bíbliko.

Sea Humilde

15. Kiko nos ta siña for di e eror di Dios su profeta?

¹⁵ Kiko mas nos por siña for di e eror di e profeta di Huda? Proverbionan 3:5 ta bisa: “Konfia den SEÑOR ku henter bo kurason, i no dependé riba bo mes komprondementu.” En bes di sigui dependé riba Yehova manera el a hasi den pasado, na e okashon akí e profeta di Huda a konfia riba su propio huisio. Su eror a kost’é su bida i su bon nòmber serka Dios. Loke a sosodé kuné ta ilustrá bon kla e importansia di ser humilde i leal den nos sirbishi na Yehova.

16, 17. Kiko lo yuda nos keda leal na Yehova?

¹⁶ E inklinashon egoista di nos kurason tin e tendensia di desviá nos. “E kurason ta mas engañoso ku tur kos i ta totalmente korupto.” (Jer. 17:9) Pa keda leal na Yehova, nos tin ku traha duru pa kita e personalidat bieu ku su tendensia di ser arogante i independiente. Nos tin ku bisti e personalidat, òf hende nobo, “ku a wòrdu kreá segun Dios den hustisia i santidat [“lealtat,” NW] berdadero.”​—Lesa Efesionan 4:​22-24.

¹⁷ Proverbionan 11:2 ta bisa: “Sabiduria ta serka e humildenan.” Ora nos ta dependé humildemente riba Yehova, esei ta yuda nos evitá di kometé erornan serio. Por ehèmpel, fásilmente desanimashon por stroba nos di mustra sano huisio. (Pro. 24:10) Nos por kansa di sierto rasgo di sirbishi sagrado i kuminsá sinti ku nos a hasi sufisiente atraves di añanan, pensando ku kisas ta tempu pa otronan tuma e karga over. Òf kisas nos por deseá di hiba un bida mas “normal.” Sinembargo, si nos hasi “esfuerso” vigoroso i ‘semper abundá den e trabou di Señor,’ nos lo protehá nos kurason.​—Luk. 13:24; 1 Kor. 15:58.

18. Kiko nos por hasi si nos no sa ki desishon nos mester tuma?

¹⁸ Tin biaha, nos tin ku tuma desishonnan difísil, i kisas e kaminda korekto no ta bisto mesora. Nos lo sinti gana e ora ei di hasi loke nos ta kere ta mihó? Ki ora ku nos haña nos den e situashonnan ei, ta sabí pa nos pidi Yehova yuda nos. Santiago 1:5 ta bisa: “Si kualke di boso falta sabiduria, lag’é pidi Dios, kende ta duna na tur hende generosamente.” Nos Tata selestial lo duna nos e spiritu santu ku nos tin mester pa nos por tuma bon desishon.​—Lesa Lukas 11:​9 i 13.

Sea Determiná pa Keda Leal

19, 20. Kiko nos mester ta determiná pa hasi?

¹⁹ E añanan turbulento ku a sigui despues ku Salomon a desviá for di adorashon berdadero a pone e lealtat di Dios su sirbidónan seriamente na prueba. En bèrdat hopi di nan a komprometé nan fe di un òf otro manera. Ma algun sí a keda leal na Yehova.

²⁰ Tur dia, nos ta haña nos ku eskoho i desishonnan ku ta pone nos lealtat na prueba. Nos tambe por duna prueba ku nos ta leal. Laga nos keda semper leal na Yehova segun ku nos ta uni nos kurason ku e pleno konfiansa ku ‘Yehova lo aktua den lealtat ku un persona leal.’​—2 Sam. 22:26, NW.

[Nota]

Kon Lo Bo Kontestá?

• Dikon nos mester hasi esfuerso pa eliminá deseo materialista kompletamente for di nos kurason?

• Kiko lo yuda nos keda leal na Yehova?

• Kon humildat por yuda nos keda leal na Dios?

[Preguntanan di Estudio]

[Plachinan na página 18]

Bo tin problema pa resistí tentashon?

[Plachinan na página 18]

Abo lo hasi orashon i pensa seriamente riba konseho bíbliko?