Onra Yehova dor di Desplegá Dignidat

“[Yehova] su obra ta glorioso i mahestuoso.”​—SAL. 111:3.

1, 2. (a) Kon lo bo definí e palabra “dignidat”? (b) Ki preguntanan nos lo konsiderá den e artíkulo akí?

DEN e teksto original di Beibel, e palabra tradusí komo ‘gloria’ na Salmo 111:3 ta nifiká “dignidat.” E palabra hebreo pa “dignidat” por ser tradusí tambe komo “splendor,” “mahestat,” “gloria” i “onor.” Salmo 104:1 ta bisa ku Dios ta “bistí ku splendor [“dignidat,” NW].” Den kaso di hende, nan sa bisa ku un hende ta mustra dignidat ora e ta bon bistí. Por ehèmpel, apòstel Pablo a deseá pa hende muhé kristian “dòrna nan mes ku bistí apropiá, desente i moderá, no ku kabei tur na flègtu i oro òf pèrla òf bistí kostoso.” (1 Tim. 2:9) Pero un kondukta digno ku ta onra Yehova su ‘gloria i mahestat’ ta bai mas aleu ku esei.​—Sal. 111:3.

² No tin ningun persona ku meresé mas onor i apresio ku Yehova. P’esei, komo su sirbidónan dediká, nos mester papia i aktua na un manera ku ta duna onor na dje. Pero kiko ta permití hende desplegá dignidat? Den kiko Yehova su dignidat i splendor ta bisto? Ki efekto Yehova su dignidat mester tin riba nos? Kiko Hesukristu por siña nos enkuanto desplegá dignidat? I kon nos por komportá nos mes ku dignidat den nos adorashon na Dios?

Kiko Ta Permití Hende Desplegá Dignidat?

3, 4. (a) Kon nos mester reakshoná riba e echo ku Yehova ta onra nos? (b) Na ken e profesia di Salmo 8:​5-9 ta señalá? (Wak nota na pia di página.) (c) Ken Yehova a onra den pasado?

³ Debí ku hende ta kreá den e imágen di Dios, nan tur tin e kapasidat di desplegá dignidat. Yehova a onra e promé hòmber dor di nombr’é komo kuidadó di e tera. (Gén. 1:​26, 27) Asta ora hende no tabata perfekto mas, Yehova a reafirmá hende su responsabilidat en konekshon ku e tera. Pues, ainda Dios ta ‘koroná’ hende ku dignidat. (Lesa Salmo 8:​5-9.) * E echo ku Yehova ta duna nos dignidat, òf ta onra nos, ta rekerí pa nos reakshoná na un manera digno, esta, alabá Yehova su nòmber mahestuoso ku rèspèt profundo i dignidat.

⁴ Yehova ta onra hende ku ta ador’é. El a onra Abel dor di aseptá su sakrifisio, pero a rechasá esun di Kain, Abel su ruman hòmber. (Gén. 4:​4, 5) Moisés a haña instrukshon pa ‘pone algu di su dignidat’ riba Josué, esun ku mester a siguié komo lider di e israelitanan. (Num. 27:20, NW) Relashoná ku Salomon,  yu hòmber di David, Beibel ta bisa: “SEÑOR a halsa Salomon masha haltu mes den bista di henter Israel, i a dun’é tal mahestat real ku ningun rei promé kuné no tabatin na Israel.” (1 Kró. 29:25) Na un manera grandioso, Dios lo onra kristiannan ungí ku resusitá, kendenan fielmente a deklará ‘e mahestat glorioso di su reino.’ (Sal. 145:​11-13) E grupo kresiente di e “otro karnénan” di Hesus ku ta alabá Yehova tambe ta ser onrá.​—Juan 10:16.

Yehova Su Dignidat i Splendor Ta Bisto

5. Kon grandi Yehova su dignidat ta?

⁵ Den un kantika ku ta mustra ku hende no ta nada na komparashon ku e grandesa di Dios, David a kanta: “O SEÑOR, nos Señor, ki mahestuoso bo nòmber ta riba henter mundu, abo ku a pone bo splendor mas ariba di e shelunan!” (Sal. 8:1) For di promé ku e kreashon di “shelunan i tera” te despues di e gran kumplimentu di Dios su propósito pa hasi e tera un paradeis i elevá hende na perfekshon—di eternidat pa eternidat—Yehova ta e Personahe di mas mahestuoso i digno di universo.​—Gén. 1:1; 1 Kor. 15:​24-28; Rev. 21:​1-5.

6. Dikon e salmista a bisa ku Yehova ta bistí ku splendor?

⁶ E salmista temeroso di Dios lo a keda masha konmoví ora el a kontemplá e grandesa silensioso di shelu djanochi yen di strea ku tabata dòrná ku “hoyanan” briante. Asombrá pa e manera ku Dios a “span e shelunan manera lona [“tela,” NW] di tènt,” e salmista a deskribí Yehova komo bistí ku splendor, pa motibu di Su abilidatnan magnífiko di krea. (Lesa Salmo 104:1 i 2.) E dignidat i splendor di e Kreador todopoderoso i invisibel ta bisto den su obranan visibel.

7, 8. Ki evidensia di Yehova su dignidat i splendor nos ta mira den shelu?

⁷ Tuma por ehèmpel e galaksia Via Láktea. Entre e inmenso kantidat di strea, planeta i sistema solar ku e ta kontené, e tamaño di planeta Tera ta mustra mes insignifikante ku un pipita di santu riba un playa largu. Imaginá bo, e galaksia akí so ta kontené mas ku 100 mil mion strea! Si bo por a konta un strea pa sekònde sin stòp durante un dia di 24 ora, lo tuma bo mas ku 3.000 aña pa alkansá 100 mil mion.

⁸ Si Via Láktea so ta kontené 100 mil mion strea, kiko di e restu di universo? Segun kálkulo di astrónomonan, Via Láktea ta un di e 50 pa 125 mil mion galaksianan ku tin. Kuantu strea tin den henter universo? E sifra ei ta muchu grandi pa nos mente kapta. Sinembargo, Yehova “ta determiná e kantidat di e streanan; e ta yama nan tur na nan nòmber.” (Sal. 147:4) Awor ku bo ta komprondé den ki sentido Yehova ta bistí ku dignidat i splendor, bo no ta sinti bo motivá pa halsa su gran nòmber?

9, 10. Kon e manera ku nos Kreador ta perkurá pa pan ta engrandesé su sabiduria?

⁹ Awor, laga nos kita nos bista for di e shelunan mahestuoso i dirigié na algu mas komun manera pan. Yehova ta no solamente e “Kreador di shelu i tera” sino tambe Esun ku “ta duna pan na esnan ku tin hamber.” (Sal. 146:​6, 7) Dios su “dignidat i splendor” ta ser reflehá den su gran obranan, inkluso e manera ku e ta krea matanan for di kua hende ta traha pan. (Lesa Salmo 111:​1-5.) Hesus a siña su siguidónan resa: “Duna nos awe nos pan di kada dia.” (Mat. 6:11) Pan tabata un alimento básiko di hopi hende di antigwedat, inkluso e israelitanan. Ounke pan ta ser konsiderá komo un alimento simpel, e proseso kímiko ku ta transformá algun ingrediente básiko den pan delisioso no ta niun tiki simpel.

¹⁰ Tempu ku Beibel a ser skirbí, e israelitanan tabata usa hariña di trigu òf puspas i awa pa traha pan. Tin biaha nan tabata pone ist, den e mansa. E meskla di e supstansianan simpel akí ta produsí un kantidat asombroso di komponentenan kímiko ku ta konektá ku otro. Hende no por kaba di komprondé ki relashon e komponentenan akí tin ku otro. Ademas, e manera ku nos kurpa ta digerí pan ta  un otro proseso masha kompliká. No ta nada straño ku e salmista a kanta: “O SEÑOR, ki numeroso bo obranan ta! Ku sabiduria bo a traha tur”! (Sal. 104:24) Abo tambe ta sinti bo konmoví pa alabá Yehova?

Ki Efekto Dios Su Dignidat i Splendor Tin Riba Bo?

11, 12. Ki efekto meditashon riba Dios su obranan di kreashon por tin riba nos?

¹¹ Nos no mester ta un astrónomo pa atmirá shelu anochi ni un kímiko pa disfrutá di pan. Sinembargo, pa apresiá e splendor, òf grandesa, di nos Kreador sí nos tin ku tuma tempu pa meditá riba su obranan. Kiko meditashon asina por yuda nos kuné? E tin e mesun efekto ku meditashon riba kualke otro obra di Yehova.

¹² Relashoná ku e gran obranan ku Yehova a efektuá na benefisio di Su pueblo, David a kanta: “Lo mi meditá den e splendor glorioso di bo mahestat, i den bo obranan maravioso.” (Sal. 145:5) Siguiendo David su ehèmpel, nos ta studia Beibel i ta tuma tempu pa meditá riba loke nos ta lesa. Ki efekto e meditashon akí tin riba nos? Nos ta haña mas apresio pa Dios su dignidat i splendor. E ora ei, siguramente nos lo sinti nos motivá pa meskos ku David nos tambe onra Yehova i bisa: “Lo mi konta di bo grandesa.” (Sal. 145:6) Meditashon riba Dios su obranan maravioso mester fortalesé nos relashon ku Yehova i motivá nos pa papia ku otro hende tokante dje ku entusiasmo i determinashon. Abo ta deklará e bon nobo ku zelo i yuda hende apresiá e dignidat, splendor i mahestat di Yehova Dios?

Hesus Ta Reflehá Dios Su Dignidat Perfektamente

13. (a) Segun Daniel 7:​13 i 14, kiko Yehova a duna su Yu? (b) Komo Rei, kon Hesus ta trata su súpditonan?

¹³ Dios su Yu, Hesukristu, a proklamá e bon nobo ku zelo i a onra su mahestuoso Tata selestial. Yehova a onra su Yu unigénito na un manera spesial dor di dun’é gobernashon, òf ‘dominio, i reino.’ (Lesa Daniel 7:​13 i 14.) Apesar di esei, Hesus no ta un persona arogante ni inaserkabel. Al kontrali! E ta un Gobernante kompasivo ku ta komprondé e limitashonnan di su súpditonan i ta trata nan ku konsiderashon i rèspèt. Konsiderá un ehèmpel ku ta mustra kon Hesus komo Rei Designá a trata hende ku el a topa, spesialmente hende ku otronan aparentemente no a gusta mashá i a asta rechasá.

14. Kon hende leproso tabata ser konsiderá den Israel di antigwedat?

¹⁴ Den antigwedat, hende ku lepra hopi bes tabata muri un morto lento i doloroso. Tiki-tiki, e malesa tabata plama riba kurpa di e víktima. Hende tabata pensa ku kura un leproso tabata mes difísil ku lanta hende for di morto. (Num. 12:12; 2 Rei. 5:​7, 14) Hende ku lepra tabata ser deklará impuru i tabata ser aboresé i saká for di sosiedat. Ora nan tabata aserkando hende, nan mester a dal gritu di atvertensia: “Impuru! Impuru!” (Lev. 13:​43-46) Un leproso tabata manera un persona morto. Segun e registronan di rabi, un leproso por a yega te na un distansia di 1,7 meter for di otro hende. Aparentemente, ora un lider religioso a mira un leproso, ounke e tabata na un distansia, el a mand’é ku piedra pa e keda leu.

15. Kon Hesus a trata ku un leproso?

¹⁵ Sinembargo, Hesus sí a reakshoná na un manera masha diferente ora un leproso a bin serka dje i a rog’é pa kur’é. (Lesa Marko 1:​40-42.) En bes di kore kuné, Hesus a trata e hòmber ku otronan a rechasá ku kompashon i rèspèt. Loke Hesus a mira tabata un hòmber den un kondishon deplorabel ku tabatin mester di alivio. Konmoví, Hesus a tuma akshon mesora pa demostrá su sintimentunan di kompashon. El a saka su man, mishi ku e leproso i a kur’é.

16. Ki lès bo a siña for di e manera ku Hesus a trata otro hende?

¹⁶ Komo siguidó di Hesus, kon nos por imitá e manera ku Hesus a reflehá e dignidat di  su Tata? Un manera ta dor di rekonosé ku tur hende—sin importá nan status, salú òf edat—meresé onor i rèspèt. (1 Ped. 2:17) Spesialmente personanan ku ta responsabel pa otronan, manera esposo-, mayor- i ansianonan kristian, mester mustra konsiderashon i onor na esnan ku ta bou di nan kuido i yuda nan mantené nan rèspèt propio. Beibel ta enfatisá ku esaki ta un rekisito pa tur kristian, ya ku e ta bisa: “Den amor fraternal tene tierno kariño pa otro. Den mustra onor na otro hiba delantera.”​—Rom. 12:10, NW.

Desplegá Dignidat den Adorashon

17. Kiko nos por siña for di Beibel tokante dignidat den nos adorashon na Yehova?

¹⁷ Nos mester desplegá dignidat spesialmente den nos adorashon na Yehova. Eklesiastés 5:1 ta bisa: “Warda bo pasonan ora bo ta bai na e kas di Dios.” Yehova a manda tantu Moisés komo Josué pa kita nan sandalia ora nan tabata den un lugá santu. (Eks. 3:5; Jos. 5:15) Nan mester a hasi esaki komo un gesto di rèspèt òf reverensia. Saserdotenan israelita mester a bisti paña djabou di lenen “pa tapa nan sunú.” (Eks. 28:​42, 43) Esaki a prevení ku nan desnudes lo a ser eksponé indesentemente ora nan tabata sirbi na altar. Henter e famia di un saserdote mester a mantené nan mes na Dios su norma di dignidat.

18. Kon nos ta desplegá dignidat den nos adorashon di Yehova?

¹⁸ Pues, dignidat den adorashon ta estrechamente ligá ku onor i rèspèt. Pa nos por haña onor i rèspèt, nos tin ku aktua na un manera respetuoso. E dignidat ku nos ta desplegá mester ta mas ku un kapa òf djis un bistí pa aparensia. E mester bai mas aleu ku loke wowo di hende ta mira, e mester kuminsá kaminda Dios ta mira—den nos kurason. (1 Sam. 16:7; Pro. 21:2) Dignidat mester bira parti di nos i e mester tin efekto riba nos kondukta, nos aktitut, nos relashon ku otro hende i asta riba e manera ku nos ta mira nos mes i pensa di nos mes. Sí, dignidat mester ta bisto tur ora i den tur loke nos ta bisa i hasi. Ora ta trata di nos kondukta, nos aktitut i nos bistí i areglo personal, nos ta hasi kaso di e palabranan di apòstel Pablo: “Nos no ta duna motibu di ofensa den nada, pa e ministerio no wòrdu desakreditá, ma den tur kos nos ta rekomendá nos mes komo sirbidónan di Dios.” (2 Kor. 6:​3, 4) Nos ta “dòrna e doktrina di Dios nos Salbador den tur kos.”​—Tito 2:10.

Sigui Desplegá Dignidat Ku Ta Agradá Dios

19, 20. (a) Menshoná un manera ekselente ku nos por trata otro hende ku dignidat. (b) Kiko mester ta nos determinashon relashoná ku dignidat?

¹⁹ Kristiannan ungí, kendenan ta “embahadornan pa Kristu,” ta desplegá dignidat. (2 Kor. 5:20) E “otro karnénan” ku ta apoyá nan lealmente ta mensaheronan digno di e Reino Mesiániko. Un embahador òf un mensahero ta papia ku kurashi i ku dignidat na fabor di su gobièrnu. P’esei, nos mester papia ku dignidat i kurashi dunando apoyo na e Reino, òf gobièrnu, di Dios. (Efe. 6:​19, 20) I ora nos ta hiba e “bon nobo di felisidat” pa otro hende, nos ta trata nan ku dignidat, no ta bèrdat?​—Isa. 52:7.

²⁰ Nos mester ta determiná pa glorifiká Dios dor di komportá nos mes di akuerdo ku su dignidat. (1 Ped. 2:12) Laga nos semper mustra rèspèt profundo p’e, pa su adorashon i pa nos rumannan den fe. I ku Yehova, kende a bisti su mes ku dignidat i splendor, keda kontentu ku e manera digno ku nos ta rindi adorashon na dje.

[Nota]

Kon Lo Bo Kontestá?

• Apresio pa e splendor di Yehova su dignidat mester tin ki efekto riba nos?

• Kiko nos por siña tokante dignidat for di e manera ku Hesus a trata un sierto leproso?

• Kon nos por onra Yehova ku dignidat?

[Preguntanan di Estudio]

[Plachi na página 19]

Kon Yehova a onra Abel?

[Plachi na página 21]

Yehova su gran obranan ta bisto asta den e manera ku e ta perkurá pan

[Plachi na página 22]

Kiko bo a siña tokante dignidat for di e manera ku Hesus a trata ku un sierto leproso?

[Plachi na página 22]

Adorashon ku dignidat ta enserá mustra onor na Yehova