Pronto un Tera Paradísiko!

“Nos Tata ku ta den shelu, bo nòmber sea santifiká. Ku bo reino bin. Ku bo boluntat sosodé na tera meskos ku den shelu.” ​—Mateo 6:​9, 10.

E FAMOSO orashon akí, ku hopi hende konosé komo e Orashon di Nos Tata, ta duna humanidat speransa. Kon asina?

Manera e Orashon di Nos Tata ta revelá, mes sigur ku e Reino di Dios a perkurá pa e boluntat di Dios sosodé den shelu, asina tambe lo e perkurá p’e sosodé riba tera. I ta Dios su boluntat pa e tera bira un paradeis. (Revelashon 21:​1-5) Kiko presis e Reino di Dios ta, i kon lo e restorá Paradeis riba tera?

Un Berdadero Gobièrnu

E Reino di Dios ta un gobièrnu real. Pa kualke gobièrnu funshoná, mester tin gobernante, lei i súpdito. E Reino di Dios tin e tres kosnan ei? Wak kon Beibel ta kontestá e siguiente tres preguntanan:

Ken ta e gobernantenan den Dios Su Reino? (Isaias 33:22) Yehova Dios a nombra su Yu, Hesukristu, komo e gobernante prinsipal di e Reino. (Mateo 28:18) Un kantidat limitá di hende for di ‘tur tribu i lenga i pueblo i nashon lo reina for di shelu riba tera’ huntu kuné.​—Revelashon 5:​9, 10.

Ki leinan e Reino di Dios a establesé pa su súpditonan? Tin di e leinan òf mandamentunan ta rekerí pa su súpditonan hasi sierto kosnan spesífiko. Entre e leinan ei, Hesus a identifiká esun di mas importante, bisando: “‘Stima SEÑOR bo Dios ku henter bo kurason, i ku henter bo alma, i ku henter bo mente.’ Esaki ta e gran mandamentu i e di promé. I e di dos ta semehante: ‘Stima bo próhimo manera bo mes.’”​—Mateo 22:37-39.

 Den kaso di e otro leinan, súpditonan di e Reino di Dios mester evitá di hasi sierto kos. Por ehèmpel, Beibel ta bisa bon kla: “No gaña boso mes: hende inmoral, hende ku ta adorá diosnan falsu, ta kometé adulterio, ta praktiká homoseksualidat òf ta drumi ku un homoseksual, ta hòrta, ta golos pa kos, ta bebe fuma, ta kana zundra otro hende òf ta hasi kos di ladron, ningun di nan lo no haña parti den reino di Dios.”​—1 Korintionan 6:​9, 10, BPK.

Ken ta e súpditonan di e Reino di Dios? Hesus a kompará e súpditonan di e Reino di Dios ku karné. El a bisa: “Nan lo tende mi bos; i nan lo bira ún tou ku ún wardadó.” (Juan 10:16) Pa un hende por ta súpdito di e Reino di Dios, no solamente e tin ku bisa ku e ta sigui e Bon Wardadó, Hesus, sino hasi tambe loke e Wardadó bisa. Hesus a bisa: “No ta tur hende ku bisa mi: ‘Señor, Señor,’ lo drenta e reino di shelu; ma esun ku hasi e boluntat di mi Tata ku ta den shelu.”​—Mateo 7:21.

P’esei, meskos ku Hesus, súpditonan di e Reino di Dios ta usa i onra e nòmber di Dios, Yehova. (Juan 17:26) Nan ta obedesé Hesus su mandamentu pa siña otro hende tokante “e evangelio akí di e reino.” (Mateo 24:14; 28:19, 20) I nan ta mustra berdadero amor pa otro.​—Juan 13:35.

Dios Lo “Destruí Esnan Ku Ta Destruí e Tera”

Kondishonnan mundial ta indiká ku e Reino di Dios pronto lo tuma akshon pa trese kambionan signifikativo riba tera. Kon nos por sa? Dos mil aña pasá, Hesus a deskribí un señal ku ta konsistí di hopi rasgo i ku lo a indiká ku “e reino di Dios ta serka.” (Lukas 21:31) Manera e artíkulo anterior ta mustra, ta evidente ku e diferente partinan di e señal ei ta kumpliendo awor rònt mundu.

Kiko ta sigui? Hesus a kontestá: “E ora ei lo tin un gran tribulashon, manera nunka tabatin for di prinsipio di mundu te aworakí, i ku lo no tin nunka mas tampoko.” (Mateo 24:21) Esaki no ta un katástrofe kousá pa hende. Mas bien, ta Dios ta aktua “pa destruí esnan ku ta destruí e tera.” (Revelashon 11:18) Hende malbado, kende a kasi ruina e planeta ku nan akshonnan egoista, “lo wòrdu kòrtá kitá for di tera.” Pero hende sin kulpa, ku ta sirbi Dios na un manera aseptabel, “lo keda den dje.”​—Proverbionan 2:​21, 22.

Yehova Dios tin bon motibu pa tuma akshon drástiko asina. Dikon? Konsiderá e siguiente ehèmpel: Imaginá ku bo ta doño di un par di flèt. Algun di e hürdónan ta komportá nan mes bon i ta mustra konsiderashon; nan ta paga nan hür i ta kuida e flèt bon. Sinembargo, otro hürdónan ta kousa molèster i ta egoista; nan no ta paga nan hür i ta ruiná e flèt. Apesar ku a hala nan atenshon vários biaha, nan ta sigui tòg. Kiko abo lo hasi? Komo doño, sin duda lo bo saka e mal hürdónan ei afó.

Asina tambe, Yehova Dios, komo Kreador di tera i tur loke tin riba dje, tin derecho di disidí ken e ta laga biba riba e planeta. (Revelashon 4:11) Yehova a bisa ku su propósito ta pa kita hende malbado for di e tera akí, esta, esnan ku ta ignorá su boluntat i ta trapa riba e derechonan di otro hende.​—Salmo 37:​9-11.

Paradeis Restorá

Pronto, e Reino di Dios den man di Hesukristu lo goberná tera. Hesus a yama e komienso nobo akí “e era nobo.” (Mateo 19:28, BPK) Kon e situashon lo bira? Wak kiko Beibel ta primintí:

Salmo 46:9. “E ta hasi gueranan stòp te na e fin di tera.”

 Isaias 35:1. “Tera seku i desierto lo ta kontentu, i Arabá lo regosihá i floria manera rosa.”

Isaias 65:​21-23. “Mi skohínan lo disfrutá di e obra di nan mannan pa hopi tempu. Nan lo no traha en bano, ni haña yu pa kalamidat.”

Juan 5:​28, 29. “E ora lo yega den kual tur ku ta den graf lo tende [Hesus] su bos, i lo sali.”

Revelashon 21:4. “[Dios] lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló.”

Dikon Nos Por Kere

Bo ta kere den e promesanan di Beibel? Beibel a predisí ku hopi hende lo no kere. E ta bisa: “Den e último dianan bofonadónan lo bin . . . , siguiendo nan mes pashonnan, i bisando: ‘Unda e promesa di su binida ta? Pasobra desde ku e tatanan a muri, tur kos ta keda meskos ku nan tabata for di prinsipio di kreashon.’” (2 Pedro 3:​3, 4) Pero e bofonadónan ei ta kompletamente robes. Laga nos wak djis kuater motibu dikon bo por kere loke Beibel ta bisa:

(1) Den pasado, Dios a intervení den asuntunan aki riba tera. E Diluvio di e dianan di Noe ta un ehèmpel sobresaliente.​—2 Pedro 3:​5-7.

(2) E Palabra di Dios a predisí ku eksaktitut loke ta pasando aktualmente den mundu.

(3) Tur kos no ta “meskos ku nan tabata for di prinsipio di kreashon.” Na un eskala nunka bisto den historia, nos planeta ta bayendo atras riba tereno sosial, moral i ambiental.

(4) E “evangelio akí di e reino” ta ser prediká rònt mundu, indikando ku “e fin lo yega” pronto.​—Mateo 24:14.

Testigunan di Yehova ta animá bo pa studia Beibel, e Palabra di Dios, ku nan pa bo por siña mas tokante e speransa di bida eterno bou di e Reino di Dios. (Juan 17:3) Sí, un futuro maravioso ta spera humanidat. E mihó tempunan lo bin pronto! Abo lo forma parti di e futuro akí?

[Komentario na página 6]

Hende ku ta bisa ku kos lo keda relativamente meskos ta kompletamente robes

[Komentario na página 7]

Abo lo forma parti di e futuro akí?