Tempunan Trabahoso Awor

BEIBEL a predisí ku humanidat lo eksperensiá “tempunan trabahoso.” E ta deskribí e periodo akí komo “e último dianan.” (2 Timoteo 3:​1-5; 2 Pedro 3:​3-7) Hesukristu a papia di e mesun periodo akí ora el a kontestá un pregunta ku su disipelnan a hasié tokante “e fin di tempu.” (Mateo 24:3) Nos ta bibando awor durante e último dianan? Kompará loke Beibel a predisí ku e sitanan di informenan resien ku tin aki bou, i husga pa bo mes.

Loke Beibel a predisí: guera mundial​—Lukas 21:10; Revelashon 6:4.

Loke informe resien ta bisa: “Morto kousá pa guera den siglo 20 tabata tres biaha mas tantu ku den tur e siglonan pasá, bayendo bèk te na nasementu di Kristu.”​—Worldwatch Institute.

Loke Beibel a predisí: skarsedat di kuminda i malesa​—Lukas 21:11; Revelashon 6:​5-8.

Loke informe resien ta bisa: Na 2004 alrededor di 863 mion hende riba tera tabata desnutrí. Esei ta 7 mion hende mas ku na aña 2003.​—Organisashon di Nashonnan Uní pa Kuminda i Agrikultura.

Alrededor di mil mion hende ta biba den barionan pober; 2,6 mil mion hende no tin fasilidatnan sanitario básiko; 1,1 mil mion hende no tin awa limpi pa bebe.—Worldwatch Institute.

Malaria ta afektá 500 mion hende; 40 mion hende tin HIV-AIDS; tuberkulósis a mata 1,6 mion hende na 2005.—Organisashon Mundial di Salú.

Loke Beibel a predisí: ruinamentu di tera​—Revelashon 11:18.

Loke informe resien ta bisa: “Loke hende a hasi lo por resultá den ekstinshon di hopi sorto di bestia i mata.” “Kasi dos tersera parti di e kosnan ku e ekosistema di e planeta ta hasi pa sostené bida a bai atras rònt mundu.”—Evaluashon di Ekosistema di Milenio.

 “Gasnan dañino pa medio ambiente ku hende a produsí a trese un desbalanse den e klima di tera, ku por tin konsekuensia serio pa e planeta.”​—NASA, Instituto Goddard pa Investigashon Espasial.

Loke Beibel a predisí: predikashon di bon nobo di e Reino di Dios rònt mundu—Mateo 24:14; Revelashon 14:6, 7.

Loke informe resien ta bisa: Durante 2007, un máksimo di 6.957.854 Testigu di Yehova a dediká mas ku 1,4 mil mion ora na predikashon di bon nobo di e Reino di Dios den 236 pais.​—Anuario 2008 di Testigunan di Yehova.

Manera a ser bisá kaba, Beibel a predisí ku apesar di tur e mal notisianan, lo tin motibu pa ta optimista. Hesus a papia di e “evangelio” òf bon nobo di e Reino di Dios. Kiko e Reino di Dios ta? Dikon e ta duna humanidat speransa pa un mihó futuro? I ki efekto e Reino di Dios lo tin riba bo?

[Komentario na página 4]

Beibel a predisí e kondishon mundial ku nos ta mira awe