Bo Konosé Bo Tata Selestial?

BO KONOSÉ bo tata bon? Si bo a lanta den un famia amoroso, kisas e pregunta akí ta parse bo straño. Tal bes bo ta kontestá: ‘Klaru ku mi konos’é bon!’ Sí, mayoria di hende sa kiko nan tata ta gusta òf no ta gusta, kon e ta reakshoná den sierto situashon i kon e ta perkurá pa su famia.

Sinembargo, por a yega di sosodé ku bo a keda sorprendí di mira bo tata reakshoná na un manera ku bo no a ferwagt. Por ehèmpel, kisas un yu konosé su tata komo un persona ketu i suave—te ora presentá un situashon di emergensia. Diripiente, e ta mira su tata aktua den un forma desisivo i ku firmesa pa protehá su famia.

Kiko di nos Kreadó? Beibel ta bisa di dje: “Pa medio di dje nos tin bida i ta move i ta eksistí.” (Echonan 17:28, NW) Ta Dios a duna nos bida; den e sentido ei e ta Tata di tur hende ku ta na bida. (Isaias 64:8) Kisas ta asina bo ta pensa di Dios, i esei ta bon i na su lugá. Sinembargo, ainda tin hopi kos mas pa siña tokante dje i deskubrí; i esei ta algu ku sigur lo duna nos hopi plaser i benefisio.

Bo sintimentunan pa bo tata i bo rèspèt p’e ta dependé di kon bon bo konos’é. Meskos tambe, mas bo konosé Dios, mas personal bo relashon kuné ta bira. Si bo siña konosé Dios bon i siña hasi su boluntat, lo e por yuda bo pasa den e difikultatnan di bida.

Ki tipo di persona Dios ta? Ki efekto su kualidatnan lo mester tin riba bo sintimentunan p’e? E echo ku bo konos’é ta trese sierto responsabilidat kuné? Lo bo haña kontesta riba e preguntanan akí den e siguiente artíkulo.

[Komentario na página 3]

Bo sintimentunan pa otro hende ta dependé di kon bon bo konosé nan