Bo Tabata Sa?

Dikon nan a ofresé Hudas 30 pida plata pa traishoná Hesus?

Ora Hudas Iskariot a bai serka e saserdotenan prinsipal pa mira kuantu sèn nan lo a dun’é p’e traishoná Hesus, nan a ofres’é “trinta pida plata.” (Mateo 26:​14, 15) E suma akí ta duna un idea di kuantu nan a odia Hesus i ku, den nan bista, e no tabata bal kasi nada.

Kisas tabata trata aki di siklo di plata, e moneda básiko di e hudiunan. Kiko un hudiu por a kumpra ku 30 siklo? Lei di Moisés a stipulá ku esei tabata preis di un esklabo. Ku 30 siklo tambe lo e por a kumpra un tereno.​—Eksodo 21:32; Mateo 27:​6, 7.

Ora profeta Zakarias a pidi e israelitanan infiel su salario pa su trabou komo wardadó di e pueblo di Dios, nan a pisa “trinta siklo di plata” p’e. Nan a hasi esei pa malu, pa humiá e profeta di Dios, pasobra asina nan a indiká ku pa nan e no tabata bal mas ku un esklabo. P’esei, Yehova a bisa Zakarias: “Tira esaki pa e alfarero [“kaha di tesoro,” NW], e preis magnífiko ei na kual nan a balorá mi.” (Zakarias 11:​12, 13) E akshon di Zakarias, obedesiendo e òrdu ku el a haña, ta pone nos kòrda loke Hudas a hasi ku e suma di plaka ku el a haña pa traishoná Esun ku Yehova a nombra komo wardadó di Israel.​—Mateo 27:5.

Kiko tabata e “karta di divorsio” menshoná den Beibel?

E Lei di Moisés a bisa: ‘Ora ku un hòmber tuma un esposa i sosodé ku e esposa no ta agrad’é, pasobra el a haña algu indesente den dje, e mester skirbié un karta di divorsio i entregá esaki den su man i mand’é bai for di su kas.’ (Deuteronomio 24:1) Pa kiko e dokumento akí a sirbi? E Skritura no ta bisa kiko e tipo di dokumento akí a kontené, pero sin duda e lo a sirbi pa protehá e derecho- i interesnan di e muhé rechasá.

Durante añanan 1951 pa 1952, arkeólogonan a deskubrí vários opheto antiguo den e kuebanan parti nort di Wadi Murabbaat, un roi seku den e desierto hudiu. Entre e vários manuskritonan ku nan a haña einan tabatin un karta di divorsio skirbí na arameo, ku fecha di aña 71 òf 72 di nos era. E karta ta bisa kiko a sosodé riba e promé dia di e luna marhesvan, den e di seis aña di e rebelion hudiu kontra Roma. Hosé, yu di Naksan, ku tabata biba na Masada, a divorsiá di Miriam, yu muhé di Jonatan ku tabata biba na Hanablata. Pues anto, Miriam tabata liber pa kasa ku kualke hòmber hudiu ku el a gusta. Hosé a debolbé e bruidschat di Miriam i a kompens’é ku kuater biaha e balor di kualke pertenensia di dje ku a daña. E karta tabatin e firma di Hosé mes i di tres testigu—Eliezer, yu di Malka; Hosé, yu di Malka; i Eleazar, yu di Hanana.

[Plachi na página 10]

Kuebanan na Wadi Murabbaat

[Plachi na página 10]

Karta di divorsio ku fecha di aña 71/72 di nos era

[Rekonosementu di Potrèt na página 10]

Kuebanan: Todd Bolen/Bible Places.com; karta: Clara Amit, Courtesy of the Israel Antiquities Authority