Ki Klase di Persona Nos Tata Selestial Ta Realmente?

HOPI hende por resa e Nos Tata, e orashon modelo ku Hesus a siña su disipelnan, for di kabes. (Mateo 6:​9-13) Kada biaha ku nan hasi e orashon ei, nan ta yama Dios “Nos Tata.” Ma kuantu di nan por bisa ku nan konosé Dios bon?

Kiko di abo? Bo konosé Dios bon? Bo tin un relashon íntimo kuné, bo ta papia kuné i kompartí bo momentonan di goso i di tristesa kuné? Realmente, kiko ta nifiká konosé Dios?

“Yehova Ta Su Nòmber”

Kisas e úniko kos ku un mucha chikitu sa di su tata ta ku e yama Papi. Pero segun ku e mucha ta krese, e ta bin haña sa nòmber di su tata i ki reputashon e tin, i probablemente lo e ta orguyoso di su tata. Kiko di nos Tata selestial, esun ku a duna nos bida? Bo sa su nòmber personal i kiko e nòmber ei ta representá?

Ounke hopi hende ta ripití e frase “Bo nòmber sea santifiká” ora nan ta resa e Nos Tata, probablemente nan no sa mes kiko pa kontestá ora bo puntra nan, “Kiko e nòmber ei ta?” Kosnan manera shelu yen di strea, serunan mahestuoso, koral kolorido i yen di bida, tur ta duna prueba ku ta eksistí un Dios. Pero nan no ta bisa nos sí kiko ta su nòmber. Pa nos haña sa e nòmber ei, nos tin ku wak den Beibel. Ei e ta bisa konkretamente: “Yehova ta su nòmber.”​—Eksodo 15:3, NW. *

Dios ke pa nos konos’é na su nòmber, esta, Yehova. Dikon? Pasobra su nòmber ta representá e persona ku e ta. E nòmber ei ta nifiká literalmente “E Ta Kousa pa Bira.” Ku otro palabra, e ta bira loke ta nesesario pa e por kumpli ku su propósito. Pensa riba lo siguiente: Pa un tata por perkurá pa su famia, e ta bira esun ku ta pone pan riba mesa, konsehero, hues, mediadó, protektor i maestro, dependiendo di e nesesidat- i sirkunstansianan di e famia. Di e mesun manera, e nòmber Yehova ta sigurá nos ku, maske kiko pasa den futuro, Dios ta kompletamente kapas pa kumpli ku su boluntat i bendishoná tur hende ku ta sirbié.

Laga nos konsiderá e diferente ‘papelnan’ ku nos Dios amoroso ta asumí na armonia ku e nifikashon di su nòmber. Esei lo yuda bo komprondé ki klase di Dios Yehova ta, i tambe lo bo siña kiko bo mester hasi pa hala serka dje.

“E Dios di Amor i di Pas”

Apòstel Pablo a yama nos Kreador “e Dios di amor i di pas.” (2 Korintionan 13:11) Dikon? Hesukristu a bisa mas promé: “Dios a stima mundu asina tantu, ku el a duna su Yu unigénito, pa ken ku kere  den dje no bai pèrdí, ma tin bida eterno.” (Juan 3:16) Pa motibu di su amor profundo pa humanidat, Dios a duna su Yu stimá komo un reskate, lokual a habri kaminda pa hende ku pone fe den dje haña bida eterno, liber di e doló i sufrimentu ku piká ta trese kuné. P’esei Pablo a bisa tambe: “Pago di piká ta morto, ma e don di grasia di Dios ta bida eterno den Kristu Hesus, nos Señor.” (Romanonan 6:23) Esei no mester motivá nos pa stima Dios i hala serka dje?

Dios ta ekspresá su amor no solamente na hende en general sino tambe na hende fiel riba un base personal. Moisés a bisa e israelitanan di antigwedat ku hopi biaha tabata desobediente: “T’asina bo ta paga SEÑOR, o pueblo loko i bobo? No ta é ta bo Tata ku a kumpra bo? Ta é a traha bo i establesé bo.” (Deuteronomio 32:6) Bo ta realisá kiko esei ta nifiká? Komo un Tata amoroso, Yehova tabata interesá den su pueblo, apesar ku e tabata konsiente di nan debilidatnan. I el a perkurá pa tur loke nan realmente tabatin mester den sentido material, emoshonal i spiritual.

Nos tur ta haña nos ku kambionan den bida i tin biaha esakinan ta angustiá nos òf asta deprimí nos. Nos tin mester di un persona ku por yuda nos wak nos situashon i problemanan for di e punto di bista korekto. Ken por yuda nos? Esei sin duda ta Yehova Dios. Pa medio di su Palabra, Beibel, e ta duna nos konseho i yudansa amoroso. E Buki Sagrado ei ta splika nos pakiko nos ta pasa den tantu sufrimentu asina i kon nos por enfrentá esaki ku éksito. Meskos ku un tata amoroso ta yuda su yu ku a kai i lastimá su kurpa, asina Yehova den su gran amor ta sak abou, na moda di papia, pa duna nos e yudansa ku nos tin mester. En bèrdat, e man di Yehova no ta kòrtiku ku e no por yuda hende ku ta mustra fe den dje.​—Isaias 59:1.

Dios ta demostrá su amor pa nos tambe pa e echo ku e ta “skucha orashon.” (Salmo 65:2) Dikon nos por bisa esei? Apòstel Pablo a splika: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Kristu Hesus.” (Filipensenan 4:​6, 7) Dor di akudí na Dios den orashon sinsero i sigui e guia ku e ta duna den su Palabra, abo tambe por eksperensiá “e pas di Dios, ku ta surpasá tur komprondementu.”

“Un Dios di Konosementu”

Beibel ta bisa ku Yehova ta “perfekto den konosementu.” Komo “un Dios di konosementu,” e ta komprondé e ser humano mihó ku kualke otro persona i sa kiko ta nos nesesidatnan. (Jòb 36:4, NW; 1 Samuel 2:3) El a bisa mediante su sirbidó Moisés ku “hende no ta biba di pan so, ma ku hende ta biba di tur loke ta sali for di boka di SEÑOR.” (Deuteronomio 8:3; Mateo 4:4) Esaki ta nifiká ku pa nos haña berdadero satisfakshon den bida, kos material so no ta sufisiente.

Nos Kreador ta duna nos guia i konseho balioso pa medio di su Palabra, Beibel. Ora nos ta studia Beibel i apliká su konseho den nos bida, nos ta benefisiá di ‘tur loke ta sali for di boka di Yehova.’ Por ehèmpel, Zuzanna, un señora kristian, a bisa tokante su bida di famia: “Loke a fortalesé nos matrimonio tabata di lesa  Beibel huntu, asistí huntu na reunionnan kristian i kompartí loke nos a siña ku otro hende. Debí na e instrukshon spiritual ku Dios ta duna nos, nos tin e mesun metanan den bida i nos tin un relashon mas fuerte ku otro.”

Kon abo por benefisiá di e konseho i instrukshon spiritual ku Dios ta duna? Esei ta si bo ta studia Beibel regularmente i apliká e konseho ku e ta kontené; asina bo por risibí hopi bendishon spiritual for di Dios.​—Hebreonan 12:9.

E ‘Dios di Salbashon’

Awe, rònt mundu tin konflikto. Hende no sa kiko e dia di mañan lo trese kuné. Si bo ta biba den un pais asotá pa guera, lo bo ta anhelá pas. Den hopi otro parti di mundu, hende ta biba den miedu di krímen i violensia, instabilidat ekonómiko i atake terorista. Ken lo salba nos di tur e kosnan akí? Awor, mas ku nunka, humanidat tin mester di protekshon i liberashon.

“E nòmber di [Yehova] ta un toren fuerte; e hustu ta kore drenta den dje i ta sigur,” segun Beibel. (Proverbionan 18:10) E echo ku nos konosé e nòmber di Dios i ta konfia den dje por pone nos pensa riba loke el a yega di hasi i loke lo e hasi ainda pa libra esnan ku ta mustra fe den dje. Yehova Dios a demostrá fuera di tur duda ku e por libra su pueblo. Por ehèmpel, el a salba Israel dor di destruí Fárao su garoshinan di guera i ehérsito militar. Yehova a demostrá ku e ta e Dios di fieldat, e Dios ku ta kòrda riba esnan afligí i ku ta deseá di aktua na nan fabor.​—Eksodo 15:​1-4.

Nos futuro eterno ta dependé tambe di nos fe den Yehova Dios komo e Salbadó. Rei David di Israel di antigwedat, kende tabatin ku enfrentá vários difikultat, a demostrá e klase di fe ei ora el a skirbi tokante Yehova: “Abo ta e Dios di mi salbashon.” (Salmo 25:5) Ku konfiansa, apòstel Pedro a deklará: “Yehova sa kon pa libra hende deboto na dje for di prueba.”​—2 Pedro 2:9, NW.

Dios ta primintí hende ku ta akudí na dje pa yudansa: “Lo mi proteh’é, pasobra e konosé mi nòmber.” (Salmo 91:14) Sirbidónan di Dios djawe a mira kon e promesa ei a kumpli den nan kaso. Por ehèmpel, Henryk di Polonia a sirbi Yehova fielmente pa 70 aña largu, apesar di kontratempu i persekushon. Tempu Henryk tabatin apénas 16 aña di edat, nan a manda su tata e kampo di konsentrashon di Auschwitz. I nan a hinka Henryk i su ruman den un prizòn nazi pa hóbennan. Despues di esei, nan a mand’é di un kampo di konsentrashon pa otro. Relashoná  ku e susesonan di e tempu ei, Henryk ta kòrda: “Den tur e situashonnan difísil ku mi a haña mi aden, nunka Yehova a bandoná mi. Semper el a yuda mi keda fiel, ounke vários biaha mi a haña mi kara-kara ku morto.” Sí, Yehova ta duna su sirbidónan e fe i forsa pa perseverá.

Pronto Dios lo salba tur esnan ku ta mustra fe den dje i ku ta akudí na dje pa liberashon. E ta deklará: ‘Ami, sí, ami mes, ta Yehova, i no tin otro salbadó fuera di mi.’ (Isaias 43:11) Den “e guera di e gran dia di Dios Todopoderoso,” lo e eliminá e malbadonan for di riba tera i libra e rektonan. (Revelashon 16:​14, 16; Proverbionan 2:​21, 22) Yehova ta sigurá nos: “E humildenan lo heredá e tera, i lo deleitá nan mes den pas abundante.”​—Salmo 37:11.

Kon Bo Por Bira ‘Yu di Dios’?

Den e dianan di profeta Malakias, e israelitanan a pretendé ku Yehova tabata nan Tata. Ma en bes di mustra onor i deboshon na dje, nan a ofresé pan kontaminá i bestia siegu i koho komo sakrifisio na dje. P’esei Yehova a puntra nan: “Si mi ta un tata, unda e onor pa mi ta?”​—Malakias 1:6.

No kometé e mesun ekibokashon ku e israelitanan infiel ei. Mas bien, nos ta animá bo pa siña tokante Yehova Dios i hala serka dje. Disipel Santiago a urgi kristiannan: “Hala serka Dios i e lo hala serka boso.”​—Santiago 4:8.

E echo ku bo tin Yehova komo Tata ta trese sierto responsabilidat kuné. Si bo ta hasi esfuerso pa onra Dios dor di apoyá su normanan den tur aspekto di bo bida, nunka lo e lubidá bo esfuersonan. Al kontrario, lo e yuda bo kana den e kaminda stret ku ta hiba na e mundu nobo primintí, den kua “lo no tin morto mas; lo no tin lamento mas, ni yoramentu, ni doló.” (Revelashon 21:4) Na e tempu ei, henter humanidat obediente “lo wòrdu librá for di su sklabitut na korupshon pa drenta den e libertat glorioso di e yunan di Dios.”​—Romanonan 8:21.

[Nota]

[Komentario na página 5]

Dios ke pa nos konos’é na su nòmber, Yehova, ku ta nifiká literalmente “E Ta Kousa pa Bira”

[Komentario na página 6]

“Den tur e situashonnan difísil ku mi a haña mi aden, nunka Yehova a bandoná mi.”​—HENRYK

[Komentario na página 7]

“Loke a fortalesé nos matrimonio tabata di lesa Beibel huntu, asistí huntu na reunionnan kristian i kompartí loke nos a siña ku otro hende.”​—ZUZANNA