Mantené Bo Matrimonio Manera “un Kordon Lorá Tripel”

“Un kordon lorá tripel no ta kibra lihé.”​—EKL. 4:12.

1. Ken a uni e promé pareha humano den matrimonio?

DESPUES ku Yehova Dios a krea mata i bestia, el a forma e promé hende: Adam. Mas despues, Dios a pone Adam bai un soño profundo, i el a usa un di su repchinan pa traha un ayudante perfekto p’e. Ora Adam a mira su ayudante, e di: “Esaki ta awor wesu di mi wesunan, i karni di mi karni.” (Gén. 1:27; 2:​18, 21-23) Satisfecho ku kreashon di e ayudante akí, Yehova a uni e promé pareha humano den matrimonio i a bendishoná nan.​—Gén. 1:28; 2:24.

2. Kon Satanas a kousa desunion entre Adam ku Eva?

² Lamentablemente, no a tarda mashá ku matrimonio, manera Dios tabata ke pa e ta, a bira e blanko di atake. Kon asina? Un spiritu malbado, ku a haña e nòmber Satanas, a gaña Eva i pon’é kome for di e úniko palu ku Dios a prohibí e pareha di mishi kuné. Despues di esei, Adam a djòin su kasá den loke tabata, bon mirá, un rebelion kontra e gobernashon legítimo di Dios i su bon guia. (Gén. 3:​1-7) Ora Yehova a puntra e pareha ta kiko nan a hasi, tabata bisto ku ya kaba tabatin tenshon den nan relashon. Adam a kulpa su kasá, bisando: “E muhé ku bo a duna pa ta huntu ku mi, ta é a duna mi for di e palu, i mi a kome.”​—Gén. 3:​11-13.

3. Ki idea robes algun hudiu a bin kuné?

³ Den e siglonan ku a sigui, Satanas a usa diferente manera astuto pa fomentá desunion entre parehanan kasá. Por ehèmpel, tabatin biaha ku el a usa lidernan religioso pa promové ideanan tokante matrimonio ku no ta kuadra ku Beibel. Algun lider hudiu no a duna e normanan di Dios muchu balor ya ku nan a permití hende hòmber divorsiá di nan esposa pa kosnan insignifikante manera kuminda muchu salu. Pero Hesus a splika: “Ken ku divorsiá su esposa, si no ta pa motibu di inmoralidat seksual, i kasa ku otro muhé, ta kometé adulterio.”​—Mat. 19:9.

4. Den ki manera e areglo di matrimonio ta e blanko di atake awe?

⁴ Ketu bai Satanas ta sigui purba kibra e union matrimonial. Matrimonio homoseksual, pareha ku ta biba kompañá i divorsio hañá na un manera fásil ta demostrá ku e tin hopi éksito. (Lesa Hebreonan 13:4.) Komo kristiannan, kiko nos por hasi pa no laga e ideanan trosí ku ta reina tokante matrimonio afektá nos? Laga nos konsiderá algun karakterístika di un matrimonio felis i eksitoso.

Mantené Yehova den Bo Matrimonio

5. Relashoná ku matrimonio, kiko “un kordon lorá tripel” ke men?

⁵ Pa un matrimonio tin éksito, Yehova mester ta enbolbí den e relashon. Su Palabra ta bisa: “Un kordon lorá tripel no ta kibra lihé.” (Ekl. 4:12) “Un kordon lorá tripel,” ta un ekspreshon figurativo ku ta duna bo e idea di un kordon ku ta konsistí di tres kabuya. Si apliká e ilustrashon akí na matrimonio, e promé dos kabuyanan ta representá e esposo i esposa kendenan ta lorá huntu ku e kabuya prinsipal, Yehova Dios, pa forma un kordon di tres kabuya. Un pareha ku ta uní ku Dios ta haña e fortalesa spiritual nesesario pa trata ku problema, i esei ta e yabi pa nan logra e mayor felisidat den matrimonio.

6, 7. (a) Kiko kristiannan por hasi pa garantisá ku Dios ta den nan matrimonio? (b) Kiko un ruman muhé ta apresiá di su kasá?

 ⁶ Pero kiko un pareha kasá por hasi pa garantisá ku nan matrimonio ta manera un kordon lorá tripel? E eskritor di salmo, David, a kanta: “Pa hasi bo boluntat, o mi Dios, ta un delisia pa mi; bo lei ta den mi kurason.” (Sal. 40:8) Nos amor pa Dios ta loke ta motivá nos tambe pa sirbié ku un kurason kompletu. Pues, tantu esposo komo esposa mester kultivá un relashon íntimo i personal ku Yehova i haña delisia den hasi su boluntat. Ademas, parehanan kasá mester hasi esfuerso pa fortalesé nan partner su amor pa Dios.​—Pro. 27:17.

⁷ Si e lei di Dios realmente ta den nos kurason, nos lo desplegá kualidatnan manera fe, speransa i amor, i nan lo yuda mantené e union matrimonial. (1 Kor. 13:13) Sandra, un ruman muhé kristian ku tin 50 aña kasá, a bisa: “Loke mas mi ta apresiá di mi kasá ta e guia i konseho bíbliko ku e ta duna mi, i tambe su amor pa Yehova, ku ta mas fuerte ku su amor pa mi.” Esposonan, boso kasá lo por bisa meskos di boso?

8. Kiko ta nesesario pa haña “un bon pago” den matrimonio?

⁸ Komo pareha, boso ta mantené asuntunan spiritual i interesnan di Reino na promé lugá den boso bida? Ademas, boso di bèrdat ta mira boso kasá komo boso partner pa sirbi Yehova? (Gén. 2:24) Rei sabí Salomon a skirbi: “Dos ta mihó ku un, pasobra nan tin un bon pago pa nan trabou.” (Ekl. 4:9) Sí, esposo i esposa mester traha duru pa haña “un bon pago” òf rekompensa den forma di un union amoroso i duradero ku tin e bendishon di Dios.

9. (a) Ki responsabilidatnan un esposo tin? (b) Segun Kolosensenan 3:19, kon un esposo mester trata su kasá?

⁹ Un kos ku por indiká ku Dios ta den un matrimonio ta e esfuerso ku tantu esposo komo esposa ta hasi pa kumpli ku Su rekisitonan. Esposonan tin e obligashon prinsipal di perkurá pa e nesesidatnan material i spiritual di e famia. (1 Tim. 5:8) Tambe nan ta haña e animashon pa tene kuenta ku e nesesidatnan emoshonal di nan esposa. Na Kolosensenan 3:19, nos ta lesa: “Esposonan, stima boso esposanan, i no sea amargá kontra nan.” Un komentarista bíbliko a splika ku e ekspreshon “sea amargá” ta enserá “gòlpia nan òf rous nan na un manera amargá, i nenga nan e kariño, kuido, alimento, protekshon i yudansa ku nan mester haña.” Ta bisto ku tal komportashon lo ta inapropiá den un famia kristian. Un esposo ku ta ehersé su outoridat komo kabes na un manera amoroso ta duna su esposa smak pa ta sumiso.

10. Esposanan kristian mester desplegá ki aktitut?

¹⁰ Esposanan kristian ku ta trata di mantené Yehova den nan matrimonio tambe mester kumpli ku e rekisitonan di Dios. Apòstel Pablo a skirbi: “Esposanan, sea sumiso na boso mes esposo, manera na Señor. Pasobra e esposo ta kabes di e esposa, meskos ku Kristu tambe ta kabes di e iglesia.” (Efe. 5:​22, 23) Satanas a gaña Eva i a laga hende kere ku un bida independiente di Dios lo trese felisidat duradero. Awe, e spiritu di independensia ta bisto den hopi matrimonio. Sinembargo, pa hende muhé ku tin Dios su punto di bista di matrimonio, sumishon na nan kasá amoroso no ta un kos desagradabel. Nan ta kòrda ku Yehova a apuntá Eva komo “un komplemento” di su esposo, i Dios klaramente a konsiderá esei un posishon di onor. (Gén. 2:18, NW) Un esposa kristian ku di buena gana ta koperá ku e papel ku Dios a dun’é ta realmente un “korona” pa su esposo.​—Pro. 12:4.

11. Segun un ruman hòmber, kiko a yuda su matrimonio?

¹¹ Otro kos ku ta yuda mantené Dios den un matrimonio ta si un pareha ta studia e Palabra di Dios huntu. Gerald, kende tin 55 aña felismente kasá, a bisa: “E ingrediente mas importante den un matrimonio eksitoso ta di lesa i studia Beibel huntu.” El a agregá: “Parehanan ku ta hasi kos huntu, spesialmente kosnan spiritual, ta hala mas serka di otro i serka di Yehova.” Estudio di Beibel komo famia ta yuda  kada miembro tene e normanan di Yehova bon kla na mente, ta profundisá nan spiritualidat i ta yuda nan hasi progreso kontinuo.

12, 13. (a) Dikon ta asina importante pa un pareha hasi orashon huntu? (b) Ki otro aktividatnan spiritual ta fortalesé un matrimonio?

¹² Parehanan felismente kasá ta hasi orashon huntu tambe. Ora un esposo ta ‘drama su kurason,’ esta, deshogá su mes, ku petishonnan spesífiko ku tin di haber ku nan sirkunstansia, esei siguramente lo fortalesé e union matrimonial. (Sal. 62:8) Por ehèmpel, ta muchu mas fásil pa pone kualke desakuerdo ku bo tin ku bo kasá un banda despues ku boso dos huntu a roga e Todopoderoso pa duna boso guia i instrukshon. (Mat. 6:​14, 15) Na armonia ku e orashon ei, lo ta na su lugá pa boso kada un determiná pa su mes pa yuda e otro i pa sigui “soportá otro i pordoná otro” libremente. (Kol. 3:13) Kòrda ku orashon ta demostrá ku boso ta dependé di Dios. Rei David a bisa Yehova: “Wowo di tur hende ta spera riba bo.” (Sal. 145:15) Ora nos ta spera riba Dios mediante orashon, nos lo tin ménos inkietut, pasobra nos sa ku ‘e ta perkurá pa nos.’​—1 Ped. 5:7.

¹³ Un otro manera importante pa mantené Yehova den boso matrimonio ta dor di asistí na e reunionnan di kongregashon i traha huntu den sirbishi di vèlt. Na nos reunionnan, parehanan ta siña kon pa lucha kontra e “trampanan” ku Satanas ta usa pa dividí famia. (Efe. 6:11) Anto esposo i esposa ku regularmente ta traha huntu den sirbishi di vèlt ta siña bira “firme, konstante.”​—1 Kor. 15:58.

Ora Difikultat Presentá

14. Ki faktornan por kontribuí na tenshon den matrimonio?

¹⁴ Kisas e sugerensianan menshoná ariba no ta nada nobo, pero pakiko bo no ta analisá nan frankamente ku bo kasá? Wak si den bo matrimonio no tin un òf otro área ku meresé mas atenshon. Sinembargo, Beibel ta rekonosé ku asta hende ku tin Dios den nan matrimonio “lo sufri tribulashon den e bida akí.” (1 Kor. 7:28) Asta matrimonio di fiel sirbidónan di Dios por haña nan ku hopi tenshon òf strès debí na imperfekshon humano, mal influensia di e mundu malbado akí i e trampanan di  Diabel. (2 Kor. 2:11) Pero Yehova ta kapasitá nos pa trata ku tal tenshon. Sí, nos por enfrentá nan ku éksito. E hòmber fiel, Jòb, a pèrdè su bestianan, su kriánan i su yunan. Sinembargo, Beibel ta bisa: “Den tur esaki Jòb no a peka ni e no a kulpa Dios.”​—Jòb 1:​13-22.

15. Kon tenshon por pone hende reakshoná, i kua ta e mihó manera pa un kasá trata ku tal reakshon?

¹⁵ Di otro banda, e kasá di Jòb a bis’é: “Ainda bo ta mantené bo integridat? Maldishoná Dios i muri!” (Jòb 2:9) Sí, na momento di tragedia òf ora otro sirkunstansianan difísil presentá, e trastorno emoshonal ku eseinan ta krea por pone un hende aktua sin pensa. E hòmber sabí Salomon a bisa: “Opreshon ta hasi un hende sabí bira loko.” (Ekl. 7:7) Si bo kasá, debí na difikultat òf “opreshon,” rous bo ku palabranan ofensivo, purba keda trankil. Si bo kontestá meskos bèk, esei lo por pone un di boso òf boso tur dos bisa algu ku lo pone e situashon bira pió. (Lesa Salmo 37:8.) Pues, pasa por haltu di palabranan ku ‘no ta kontrolá,’ kousá pa frustrashon òf desanimashon​—Jòb 6:3.

16. (a) Kon e palabranan di Hesus na Mateo 7:​1-5 ta apliká na matrimonio? (b) Pakiko ta hopi importante pa ta balansá den matrimonio?

¹⁶ Parehanan kasá mester tin ekspektativanan realístiko sí. Un kasá kisas ta ripará sierto karakterístikanan straño di e otro i ta pensa: ‘Mi por kambi’é.’ Ku amor i pasenshi, podisé bo por yuda bo kasá mehorá gradualmente. Pero no lubidá ku Hesus a kompará un hende ku ta krítika e fayonan chikitu di un otro ku un persona ku ta mira e “stòf” den wowo di su ruman pero no ta mira e “balki” den su mes wowo. Hesus a urgi nos: “No husga, pa boso no wòrdu husgá.” (Lesa Mateo 7:​1-5.) Esaki no ke men ku bo mester pasa por haltu di faltanan grave di personalidat. Robert, kende tin kasi 40 aña kasá, a bisa: “Si un pareha kasá ta habrí i franko ku otro i tambe ta dispuesto pa aseptá remarkenan di otro ku tin sentido, esei lo por pone ku nan ta bai hasi kambio den nan aktitut i kondukta.” Pues, sea balansá. En bes di kunsumí pa motibu ku bo kasá no tin sierto kualidatnan ku bo ke bo mira den dje, siña apresiá i disfrutá di e kualidatnan positivo ku e tin awor.​—Ekl. 9:9.

17, 18. Ora problema bira hopi, unda nos por akudí pa yudansa?

¹⁷ Kambio den sirkunstansianan di bida por trese prueba den un matrimonio. Un pareha ku yu por haña nan ku situashonnan difísil. E kasá òf un yu por bira gravemente malu. Mayornan di edat avansá kisas tin mester di kuido spesial. Podisé yunan adulto ta muda i bai biba leu for di kas. Otro kambionan por ta debí na mas privilegio- i responsabilidatnan teokrátiko. Tur e kambionan akí por kousa sierto tenshon i inkietut den un relashon.

¹⁸ Si e tenshon ku tin den bo matrimonio ta laga bo sinti ku bo no por mas, kiko bo por hasi? (Pro. 24:10) No entregá! Satanas ta gosa sinfin ora un sirbidó di Dios bandoná adorashon puru. Lo e ta asta mas felis si un pareha hasi esaki. P’esei, hasi tur loke bo por pa boso matrimonio keda un kordon lorá tripel. Den Beibel tin hopi relato di personanan ku a keda fiel apesar di pruebanan severo. Por ehèmpel, na un okashon David a deshogá su mes na Yehova, bisando: “Tene miserikòrdia di mi, o Dios, pasobra hende . . . ta oprimí mi.” (Sal. 56:1) Abo a yega di sinti bo oprimí pa hende? Sea ku e strès ku bo ta sinti ta bini di un hende di pafó òf di un hende di kas, kòrda: David a haña e fortalesa pa perseverá, i bo tambe por hañ’é. David a bisa: “Mi a buska SEÑOR, i el a  kontestá mi, i a libra mi for di tur mi temornan.”​—Sal. 34:4.

Mas Bendishon

19. Den ki manera nos por protehá nos mes kontra e atakenan di Satanas?

¹⁹ Den e tempu di fin akí, parehanan kasá tin ku sigui “enkurashá otro i edifiká otro.” (1 Tes. 5:11) No lubidá ku Satanas ta pretendé ku nos lealtat na Yehova ta basá riba egoismo. Lo e usa tur medio disponibel, inkluso kousa problema den matrimonio, pa kibra nos integridat na Dios. Pa protehá nos mes kontra e atakenan di Satanas, nos tin ku pone nos pleno konfiansa den Yehova. (Pro. 3:​5, 6) Pablo a skirbi: “Pa tur kos mi tin e forsa mediante esun ku ta duna mi poder.”​—Fil. 4:13, NW.

20. Ki bendishonnan nos ta haña ora nos ta mantené Dios den nos matrimonio?

²⁰ E bendishonnan ku bo ta haña ora ku bo tin Dios den bo matrimonio ta hopi. Esaki sigur tabata e kaso ku Joel i su esposa ku ken e tin 51 aña kasá. El a bisa: “Mi ta gradisí Yehova konstantemente pa mi esposa i pa nos kompañerismo agradabel. E ta un partner ideal.” Kiko ta nan sekreto? “Semper nos a hasi esfuerso pa mustra otro bondat, pasenshi i amor.” Ningun di nos lo hasi esei perfektamente den e sistema di kosnan akí. Pero tòg, laga nos traha duru pa apliká prinsipionan bíbliko i mantené Yehova den nos matrimonio. Si nos hasi esaki, e ora ei nos matrimonio lo ta manera “un kordon lorá tripel [ku] no ta kibra lihé.”​—Ekl. 4:12.

Bo Ta Kòrda?

• Kiko ke men ku Yehova ta den un matrimonio?

• Kiko parehanan kasá mester hasi ora surgi difikultat?

• Kon nos por sa ki ora Dios ta den un matrimonio?

[Preguntanan di Estudio]

[Plachinan na página 22]

Parehanan kasá ku ta hasi orashon huntu ta mihó prepará pa enfrentá situashonnan difísil