Mi A Siña Kon Presioso Bida Ta

TABATA E MAINTA DI 16 DI APREL 2007. Miéntras ku mi tabata di sak abou den huki di un ofisina na di tres piso di e edifisio Norris Hall na kèmpus di Universidat di Estado i Instituto Politékniko di Virginia (òf Virginia Tech), mi a ser rekordá atrobe ku nos mester ta masha gradisidu pa kada dia presioso di bida ku nos tin.

Mi tabata den mi ofisina preparando pa bai na di dos piso pa rekohé mi pòst. Un dosente a pasa i a pidi mi bai kuné na su ofisina pa yud’é ku un problema di kòmpiuter. Nèt ora nos a drenta su ofisina, nos a tende vários tiru di skopèt ta resoná na di dos piso. Komo ku nos no tabatin idea di kiko tabata pasando, nos a kore drenta su ofisina i lòk e porta, anto tur anshá i preokupá nos a warda wak kiko lo a bai pasa durante e siguiente minütnan di nos bida. Mi a haña refugio den un huki i a deshogá mi mes den orashon na Yehova Dios i pidié su guia pa enfrentá kiko ku pasa.

Segun ku nos tabata warda, un suseso ku a tuma lugá 15 aña mas promé a pasa den mi mente. Mi tabata traha komo mekániko na un garashi. Mi kolega tabatin un paila ku gasolin den su man i esei a pega kandela. Den pániko, el a benta e gasolin na kandela aksidentalmente den mi kara! Mi a inhalá e huma kayente i a sufri kemaduranan di segundo i terser grado na e parti ariba di mi kurpa. Nan a hiba mi ku helikòpter na un hospital ku ta spesialisá den kemadura i mi a keda tres luna i mei einan den kuido intensivo, luchando pa mi bida. Despues di sinku luna di tratamentu i terapia, mi por a bai kas bèk, gradisidu pa e simpel echo ku mi tabata na bida. E eksperensia ei a siña mi mira kada dia di bida komo presioso. Tambe el a duna mi mas determinashon ainda pa usa mi bida den e sirbishi di Yehova Dios, esun ku a duna mi bida, komo un di su Testigunan.​—Salmo 90:12; Isaias 43:10.

E komplikashonnan ku mi leshonnan a kousa a pone ku mi no por a traha mas komo mekániko. Mi a bai siña traha ku kòmpiuter i a bira un empleado di Virginia Tech. Ta p’esei mi tabata den e edifisio di Norris Hall e mainta ei.

Na momento di e tirunan, nos no a realisá mes ku e tiroteo ku a kousa mas morto den historia di Merka tabata tumando lugá apénas un piso bou di nos. E masakre a terminá ora ku e pistolero a mata su mes despues ku el a kita bida di 32 víktima inosente. Un 20 minüt despues ku tur kos a kuminsá, nos a tende polis den gang. Nos a yama nan, i nan a eskoltá nos bai pafó sano i salvo.

E eksperensia spantoso akí a siña mi kon pasahero i insigur bida ta. (Santiago 4:14) Pues, ki importante ta pa nos pone nos konfiansa den e Dunadó di bida, Yehova Dios, i mira kada dia komo un regalo presioso ku nos ta haña serka dje!​—Salmo 23:4; 91:2.

[Rekonosementu pa Potrèt na página 8]

AP Photo/The Roanoke Times, Alan Kim