Ken Por Sa Loke Lo Pasa den Futuro?

“Ami ta Dios, . . . Kende ta deklará e fin for di prinsipio, i for di tempunan antiguo, kosnan ku no a wòrdu hasí ainda.”​—Isaias 46:9, 10.

DEN e tempunan insigur akí, analistanan polítiko, finansiero i sosial ta studia historia i tendensianan moderno den nan intento pa pronostiká loke lo pasa den futuro. Tin otro hende, ku den nan desesperashon pa haña sa kiko ta spera nan den futuro, ta akudí na astrologia òf spiritismo. Hopi bes e hendenan ei ta keda desepshoná. Ta imposibel pa haña sa kiko lo sosodé ku e mundu akí, ku nos famia i nos mes? Al fin al kabo, tin un persona ku realmente por mira kiko ta bai pasa den futuro?

E Dios Todopoderoso, Yehova, a dirigí e palabranan sitá ariba na profeta Isaias pa deskribí Su abilidat di profetisá loke lo pasa den futuro. Mediante Isaias, Dios a profetisá liberashon di e israelitanan di antigwedat ku tabata prezu na Babilonia. I el a profetisá tambe ku nan lo bolbe Yerusalèm pa rekonstruí nan stat i tèmpel. Kon eksakto e profesia akí tabata? Un 200 aña di antemano, Isaias a menshoná presis ken lo a konkistá Babilonia, esta, Siro. Ademas, Isaias a deskribí ku eksaktitut Siro su strategia pa desviá Riu Eufrates, ku tabata sirbi komo un protekshon pa e stat. Asta el a premirá ku Siro lo a haña e portanan grandi di dos blat di e stat habrí, loke lo a yud’é konkistá e stat fásilmente.—Isaias 44:​24–45:7.

Distinto for di Dios, hende no tin poder pa wak den futuro. E rei sabí Salomon a skirbi: “No gaba tokante di e dia di mañan, pasobra bo no sa kiko un dia por trese.” (Proverbionan 27:1) E opservashon ei ta sierto te awe. Ningun hende por premirá ni sikiera su mes futuro. Dikon Dios si por profetisá futuro? E ta komprondé tur kos di su kreashon, inkluso karakterístika básiko i tendensia di hende. Dios por premirá eksaktamente kon hende individual i nashonnan kompletu lo aktua ora e skohe pa hasi esei. Ademas, e tin kapasidat sin límite pa kontrolá e resultado di susesonan. Ora e profetisá mediante su profetanan ku algu lo bai sosodé, e ta laga sosodé “loke un sirbidó di dje proklamá . . . i loke su mensaheronan anunsiá, esei e ta kumpli kuné.” (Isaias 44:26, BPK) En realidat, Yehova Dios ta e úniko persona ku por hasi esei.

Por ehèmpel, ounke Isaias a biba mas ku 700 aña promé ku Hesus, e Mesias, el a profetisá tokante e binida di Mesias. Sinembargo, prinsipalmente desde siglo 18, krítikonan di Beibel a ataká e outentisidat di e buki di Isaias. Nan a pretendé ku e profesianan di Isaias en realidat no ta profesia pasobra nan a ser skirbí despues ku nan a sosodé i ku un eskritor simplemente a skirbi loke a tuma lugá kaba. Esei ta bèrdat? Na 1947 a deskubrí un kopia di e buki di Isaias, huntu ku otro ròlnan bieu, den un kueba serka di Laman Morto. Eruditonan a saka afó ku e kopia akí tabata trahá mas ku shen aña promé ku  nasementu di e Mesias primintí, òf Kristu. Sí, Beibel a revelá loke lo a pasa den futuro!

Isaias i otro eskritornan di Beibel no por a profetisá loke lo a pasa den futuro a base di nan propio sabiduria. Mas bien, nan “a papia di parti di Dios segun ku nan a ser hibá pa spiritu santu.” (2 Pedro 1:21, NW) Den e siguiente artíkulonan, nos lo konsiderá susesonan ku Hesus i su disipelnan a profetisá pa nos tempu i pa futuro.