Nos Lektornan Ta Puntra

Kon Por Ta Ku Adam A Peka Siendo Ku e Tabata Perfekto?

Adam por a peka pasobra Dios a kre’é ku boluntat liber. E echo ku Adam tabata perfekto no ta nifiká ku e no por tabatin e libertat i derecho di skohe ei. En realidat, ta Dios so ta perfekto den tur sentido di palabra. (Deuteronomio 32:​3, 4; Salmo 18:30; Marko 10:18) Pues, perfekshon den kaso di kualke hende òf kos ta limitá. Por ehèmpel, un kuchú ta sirbi perfektamente pa kòrta karni, pero lo bo us’é pa bebe sòpi? Un kos ta sirbi perfektamente pa é propósito ku el a ser trahá.

Ku ki propósito Dios a krea Adam anto? Dios su propósito tabata pa mediante Adam produsí hende inteligente ku boluntat liber. Tur hende ku kier a kultivá amor pa Dios i su kamindanan lo por a demostrá esei dor di skohe pa obedesé su lei. Pues, Dios no a krea hende pa obedes’é outomátikamente, mas bien, nan mes tin ku skohe pa obedes’é. (Deuteronomio 10:​12, 13; 30:​19, 20) Ke men, si Adam no tabatin e abilidat pa skohe pa desobedesé, lo e tabata inkompletu—imperfekto. Beibel ta mustra kon Adam a skohe pa usa su boluntat liber. El a skohe pa sigui su esposa i a desobedesé Dios su lei enkuanto “e palu di konosementu di bon i malu.”​—Génesis 2:17; 3:​1-6.

Pero, esei ta nifiká ku Dios a krea Adam ku un debilidat moral, esta, sin e kapasidat di por tuma bon desishon òf resistí tentashon? Promé ku Adam a bira desobediente, Yehova Dios a eksaminá henter su kreashon terenal, inkluso e promé pareha humano, i a konkluí ku e tabata “masha bon.” (Génesis 1:31) P’esei, ora Adam a peka, su Kreador no mester a korigí un defekto den su diseño, i ku rason el a tene Adam responsabel pa loke el a hasi. (Génesis 3:​17-19) Adam no a laga amor pa Dios i amor pa loke ta bon motiv’é pa obedesé Dios promé ku tur kos.

Kòrda tambe ku ora Hesus tabata riba tera, e tabata un hòmber perfekto meskos ku Adam. Dor ku Hesus, distinto for di otro desendientenan di Adam, a ser konsebí pa medio di spiritu santu, e no a heredá debilidat i p’esei e por a resistí tentashon. (Lukas 1:​30, 31; 2:21; 3:​23, 38) Ta Hesus mes a skohe pa keda leal na su Tata apesar di preshon fuerte. P’esei, ora Adam a hasi uso di su boluntat liber i a desobedesé Yehova su mandamentu, é mes a keda responsabel pa su akto.

Pero, dikon Adam a skohe pa desobedesé Dios? A kaso el a kere ku su situashon lo mehorá di un òf otro manera? Nò, pasobra apòstel Pablo a skirbi ku “no ta Adam a wòrdu gañá.” (1 Timoteo 2:14) Mas bien, Adam a disidí di komplasé su kasá, kende ya a skohe pa kome di e palu prohibí. Su deseo pa komplasé Eva tabata mas grandi ku su deseo pa obedesé su Kreador. Ora Eva a trese e fruta prohibí pa Adam, e mester a para ketu i pensa riba e efekto ku desobedensia lo tabatin riba su relashon ku Dios. Sin un amor profundo i inkebrantabel pa Dios, Adam no por a resistí preshon, ni di su kasá.

Adam a peka promé ku el a bira tata i p’esei tur su desendientenan a nase imperfekto. Sinembargo, meskos ku Adam, nos tambe tin boluntat liber. Laga nos skohe pa meditá ku apresio riba Yehova su bondat i kultivá un amor profundo pa Dios, kende ta digno di nos obedensia i adorashon.​—Salmo 63:6; Mateo 22:​36, 37.