Profesianan Relashoná ku Nos Futuro Serkano

PAPIANDO di futuro di hende i tera, apòstel Pedro a skirbi: “Segun [Dios] su promesa nos ta sperando shelunan nobo i un tera nobo, den kual ta biba hustisia.” (2 Pedro 3:13) Profeta Isaias ta e promé ku a papia tokante e promesa di “shelunan nobo i un tera nobo.” (Isaias 65:17; 66:22) Dor di sita e profesia akí, Pedro a indiká ku e profesia no a kumpli kompletamente den su tempu.

Mas despues, rònt di aña 96 di nos era, apostel Huan a haña e Revelashon ku a konektá e “tera nobo” ei ku bendishonnan ku lo tin bou di e Reino di Dios. (Revelashon 21:​1-4) Tantu Hesus su palabranan komo esnan di apòstel Pablo tokante susesonan mundial ku lo tuma lugá promé ku e binimentu di e Reino di Dios ta kumpliendo awor. P’esei, nos por spera ku pronto e Reino ei lo trese un mundu nobo. Kon e mundu nobo ei lo ta? E buki bíbliko di Isaias ta bisa nos.

Bendishonnan den e Mundu Nobo

Pas Mundial i Adorashon Uní. “Nan lo bati nan spadanan traha plug ku nan, i nan lo bati nan lansanan traha skèr-pa-snui ku nan. Nashon lo no lanta spada kontra nashon, i nunka mas nan lo train pa guera.”​—Isaias 2:​2-4.

Pas Entre Hende ku Bestia. “Lobo lo ta huntu ku lamchi di karné, leopardo lo kai drumi banda di lamchi di kabritu, i bisé, leon chikitu i bestia gòrdá lo ta huntu, i un mucha chikitu lo guia nan. Baka i ber lo kome yerba huntu; nan chikitunan lo drumi banda di otro, i leon lo kome yerba seku manera buey. . . . Nan lo no kousa daño ni destrukshon den henter mi seru santu, pasobra tera lo ta yen di e konosementu di SEÑOR, manera awa ta tapa laman.”​—Isaias 11:​6-9.

Kuminda na Abundansia pa Tur Hende. “SEÑOR di ehérsitonan lo prepará un bankete luhoso pa tur pueblo riba e seru akí, un bankete di biña bieu, e mihó pida-pidanan di karni i tuti i biña bieu refiná.”​—Isaias 25:6.

 Lo No Tin Morto Mas. “[Dios] lo traga morto pa semper, i Señor DIOS lo seka awa di wowo for di tur kara. E lo kita e reproche di su pueblo for di henter tera, pasobra SEÑOR a papia.”​—Isaias 25:8.

Mortonan Lo Resusitá. “Bo mortonan lo biba; nan kadavernan lo lanta. Boso ku ta drumi den stòf, spièrta i grita di goso, . . . i tera lo duna lus na su mortonan.”​—Isaias 26:19.

Mesias, un Hues Hustu. “E lo no husga segun loke su wowo ta mira, ni hasi desishon segun loke su orea ta tende; ma ku hustisia e lo husga e pobernan, i disidí ku onestidat pa e afligínan di e tera.”​—Isaias 11:​3, 4.

Kurashon pa Hende Siegu i Surdu. “Wowo di e siegunan lo mira, i orea di e surdunan lo tende.”​—Isaias 35:5.

Desierto Lo Produsí. “Tera seku i desierto lo ta kontentu, i Arabá lo regosihá i floria manera rosa. E lo floria abundantemente, i regosihá ku goso i gritu di alegria.”​—Isaias 35:​1, 2.

Un Tera Nobo. “Mi ta krea shelunan nobo [un gobièrnu selestial nobo] i un tera nobo [un sosiedat humano nobo i hustu]; i e kosnan di ántes lo no wòrdu rekordá mas ni bin na memoria. Ma sea kontentu i regosihá pa semper den loke mi ta krea . . . Nan [e habitantenan di Dios su mundu nobo primintí] lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome; pasobra manera e dianan di un palu, asina e dianan di mi pueblo lo ta; i mi skohínan lo disfrutá di e obra di nan mannan pa hopi tempu. Nan lo no traha en bano, ni haña yu pa kalamidat; pasobra nan ta yu di esnan ku SEÑOR a bendishoná, i huntu ku nan, nan desendientenan. Tambe lo sosodé ku promé ku nan yama, lo mi kontestá, i miéntras nan ta papia ainda, lo mi tende.” “‘Meskos ku e shelunan nobo i e tera nobo, ku lo mi traha, lo permanesé mi dilanti,’ SEÑOR ta deklará, ‘asina boso desendientenan i boso nòmber lo permanesé.’”​—Isaias 65:​17-25; 66:22.

Beibel Ta Profetisá un Futuro Magnífiko

Isaias no ta e úniko buki bíbliko ku ta profetisá tokante bendishonnan ku lo bin den futuro. Beibel tin masha hopi profesia ku ta deskribí e kosnan maravioso ku Dios lo logra mediante su Reino bou di Kristu. * Abo lo ke biba den un mundu ku e kondishonnan paradísiko ei? Bo por! Komprobá pa bo mes kiko Beibel realmente ta siña tokante Dios su maravioso propósito pa futuro, i haña sa kon abo lo por bira parti di dje. Gustosamente Testigunan di Yehova lo ke yuda bo.

[Nota]

[Plachi na página 6]

Hende lo ta na pas ku otro i ku bestia

 [Plachi na página 9]

E mortonan lo biba atrobe

[Plachi na página 7]

Henter e tera lo bira un paradeis