Susesonan Profetisá pa Nos Tempu

BEIBEL ta profetisá ku e Reino di Dios lo trese pas i felisidat duradero riba tera. (Daniel 2:44) Den e Orashon di Nos Tata, Hesus a siña su disipelnan pa pidi: “Ku bo reino bin. Ku bo boluntat sosodé na tera meskos ku den shelu.” (Mateo 6:10) Den e profesia importante i bon konosí akí ku Hesus a duna su disipelnan riba Seru di Oleifi, el a profetisá spesífikamente tokante susesonan ku lo tuma lugá i kondishonnan ku lo eksistí promé ku e Reino di Dios bini. Huntu, e rasgonan akí ta forma un señal ku hende sinsero lo por rekonosé fásilmente. Kua di e siguiente rasgonan di e señal abo ta konsiente di dje?

Guera Entre Nashonnan. Hesus a profetisá: “Nashon lo lanta kontra nashon, i reino kontra reino.” (Mateo 24:7) Promé ku e guera mundial na 1914, gueranan tabata algu mas lokal. Sinembargo, Promé Guera Mundial no solamente a enbolbé un gran parti di mundu, sino tambe a aselerá produkshon di e armanan di mas destruktivo ku hende a yega di konosé. Por ehèmpel, nan a usa avion ku hende a kaba di inventá pa benta bòm riba sivilnan. Produkshon masal di arma tabatin komo konsekuensia ku mas hende a ser matá, pasobra mas o ménos mitar di e 65 mion sòldánan ku a bai guera sea a muri òf a keda heridá. Sinembargo, den transkurso di siglo 20, mas i mas morto a kai. Un historiadó a bisa ku “hamas hende lo haña sa eksaktamente” kuantu militar i sivil a muri debí na Segundo Guera Mundial. I te awe tin guera.

Hamber Rònt Mundu. Hesus a profetisá ku “lo tin hamber.” (Mateo 24:7) Na aña 2005, e revista Science a bisa: “Tin 854 mion hende na mundu (alrededor di 14% di e poblashon) ku ta sufri di desnutrishon króniko òf agudo.” Na 2007, un fuente di Nashonnan Uní a bisa ku 33 pais no tin sufisiente kuminda pa alimentá nan pueblo. Siendo ku produkshon di maishi a oumentá mundialmente, kon esei por ta posibel? Wèl, un motibu ta ku en bes di usa kunuku i maishi pa alimentá hende, ta usa nan pa produsí etanòl. E korant The Witness di Suráfrika a bisa: “E kantidat di  maishi ku ta nesesario pa produsí etanòl pa yena tanki di un SUV four-wheel-drive grandi un biaha so lo ta sufisiente pa alimentá ún hende pa henter un aña.” Den paisnan desaroyá tambe, oumento di preis di kuminda ta obligá hopi hende pa skohe entre kome kuminda prinsipal òf paga pa otro nesesidatnan, manera remedi òf verwarming.

Temblornan Grandi. Hesus a bisa: “Lo tin temblornan grandi.” (Lukas 21:11) Si na bo pareser tin mas hende ta ser afektá pa temblor awendia, bo tin rason. Na 2007, sismólogo R. K. Chadha di India a bisa: “Diripiente nos ta mira un oumento den e aktividatnan sísmiko rònt mundu . . . Ningun hende no sa kon bin.” Ademas, dor ku poblashonnan den zona di temblor ta krese rápidamente, mas hende ta muri durante e desasternan akí. E temblor den Oséano Indio na 2004 i e tsunami ku a siguié a pone ku e aña ei a bira esun “ku a kousa mas tantu morto kompará ku e último 500 aña pa loke ta trata temblor” i “e di dos ku a kousa mas tantu morto registrá den historia,” segun e Departamento di Investigashon Geológiko di Merka.

Malesa Inkurabel. Hesus a profetisá: “Lo tin . . . pestilensia.” (Lukas 21:11) Rònt mundu, kada bes mas hende ta haña malesa bieu i nobo, i ta difísil pa haña kura pa nan. Por ehèmpel, hopi bes mester a posponé e meta internashonal pa kaba ku malaria ya ku hende no a logra kontrol’é. Ademas, tantu malesanan bieu, manera tuberkulósis (TB), komo malesanan nobo, manera AIDS, ta mata miónes di hende. E Organisashon Mundial di Salú ta bisa ku “un tersera parti di poblashon di mundu ta infektá aktualmente ku e bakteria di TB.” Tambe, e organisashon a nota ku den hopi pais HIV ta kontribuí na epidemia di TB. Kada sekònde, un persona mas ta ser infektá ku TB, i e bakteria akí ta birando mas resistente kontra remedi. E revista New Scientist a bisa ku na 2007 dòkternan a konstatá ku un pashènt na Europa tabatin un tipo di TB ku “tabata resistente kontra delaster un remedi ku nos tin.”

Dekadensia Moral i Sosial. Hesus a bisa: “Pasobra inikidat ta oumentá, amor di hopi hende lo fria.” (Mateo 24:12) Fuera di loke Hesus a profetisá, apòstel Pablo a indiká ku lo bin un tempu ku balornan sosial i moral lo degradá. El a deskribí e “último dianan” trabahoso ku lo bin nèt promé ku e Reino di Dios pone un fin na e sistema mundial akí. El a bisa: “Hende lo ta stimadó di nan mes, stimadó di plaka, gabadó, arogante, blasfemadó, desobedesidu na mayornan, ingrato, impio, sin amor, irekonsiliabel, ku mala lenga, sin dominio propio, grosero, odiadó di loke ta bon, traidó, imprudente, sobèrbè, mas bien stimadó di plaser ku stimadó di Dios; ku tin aparensia di ta religioso bèrdè, ma ku ta nenga su poder.” (2 Timoteo 3:1-5) Bo a ripará ku awendia hende ta desplegá e mal karakterístikanan ei mas ku ántes?

Ni Hesus, ni Pablo no a menshoná tur e faktornan históriko, sosial i polítiko ku ta responsabel pa e kondishon mundial akí. No opstante, nan profesianan a predisí ku eksaktitut e suseso- i aktitutnan ku nos ta mira awendia. Kiko di futuro? E profesia bíbliko di Isaias ku na un manera konfiabel a profetisá tokante e binida di e Mesias ta deskribí tambe kambionan benefisioso ku e Reino di Dios lo trese riba tera. Den e siguiente artíkulo nos lo konsiderá e kambionan ei.

[Plachi na página 4]

“Nashon lo lanta kontra nashon”

[Plachi na página 5]

“Lo tin . . . pestilensia”

[Rekonosementu]

© WHO/​P. Virot