Yehova Su Bista Ta Riba Nos pa Nos Bon

“Wowo di [Yehova] ta move bai bin dor di henter tera, pa e por sostené fuertemente esnan ku nan kurason ta kompletamente di dje.”​—2 KRÓ. 16:9.

1. Dikon Yehova ta eksaminá nos?

YEHOVA ta e Tata perfekto. E konosé nos asina bon ku e sa asta kiko ta e “intenshon di [nos] pensamentunan.” (1 Kró. 28:9) Sinembargo, e no ta eksaminá nos djis pa buska fayo. (Sal. 11:4, NW; 130:3) Mas bien, debí na su amor, e ke protehá nos di kualke kos ku lo por daña nos relashon kuné òf stroba nos di haña bida eterno.​—Sal. 25:​8-10, 12, 13.

2. Yehova ta usa su poder pa yuda ki klase di hende?

² Yehova ta todopoderoso i ta mira tur hende. P’e motibu ei, e por yuda su sirbidónan leal ki ora ku nan akudí na dje, i e por sostené nan durante prueba. Segundo Krónikanan 16:9 ta bisa: “Wowo di [Yehova] ta move bai bini dor di henter tera, pa e por sostené fuertemente esnan ku nan kurason ta kompletamente di dje.” Tuma nota ku Yehova ta usa su poder pa yuda esnan ku ta sirbié ku henter nan kurason; un kurason ku un motivashon puru i sinsero. E no ta mustra e klase di interes ei den hende ku ta usa engaño òf ku ta hipókrita.​—Jos. 7:​1, 20, 21, 25; Pro. 1:​23-33.

Kana ku Dios

3, 4. Kiko ke men “kana ku Dios,” i kua ehèmpelnan bíbliko ta yuda nos komprondé e asuntu akí?

³ Hopi hende no por imaginá nan ku e Kreador di nos universo inmenso ta permití hende kana kuné den un sentido figurativo. Pero, esei ta presis loke Yehova ke pa nos hasi. Den tempu bíbliko, Enok i Noe “a kana ku Dios.” (Gén. 5:24; 6:9) Moisés “a keda firme, komo si fuera e tabata mira Esun ku ta invisibel.” (Heb. 11:27) Rei David a kana humildemente banda di su Tata selestial. El a bisa: “Pasobra [Yehova] ta na mi man drechi, lo mi no wòrdu moví.”​—Sal. 16:8.

⁴ Klaru ku nos no por tene Yehova su man literalmente i kana kuné. Pero nos por hasi esei den un sentido figurativo sí. Kon asina? Salmista Asaf a skirbi: “Mi ta konstantemente serka bo; bo a kohe mi man drechi tene. Ku bo konseho lo bo guia mi.” (Sal. 73:​23, 24) Ku otro palabra, nos ta kana ku Yehova ora ku fielmente nos ta sigui su konseho ku nos ta risibí prinsipalmente mediante su Palabra skirbí i mediante “e esklabo fiel i prudente.”​—Mat. 24:45; 2 Tim. 3:16.

5. Kon Yehova, meskos ku un tata amoroso, ta mantené su bista riba su sirbidónan leal, i ki sintimentu esei ta lanta den nos?

⁵ Yehova tin masha apresio pa hende ku ta kana kuné, p’esei e ta mantené su bista riba nan meskos ku un tata amoroso, i e ta perkurá pa nan, protehá nan i siña nan. Dios a bisa: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.” (Sal. 32:8) Puntra bo mes: ‘Mi ta mira mi mes, na moda di papia, ta kana ku Yehova man tené, skuchando su sabiduria i sabiendo ku su wowo ta riba mi ku amor? E echo ku mi ta konsiente di su presensia ta influensiá loke mi ta pensa, papia i hasi? I ora mi faya, mi ta mira Yehova, no komo un Dios strèn i inaserkabel, sino komo un Tata tierno, amoroso i miserikòrdioso ku ke yuda personanan ku repentí haña un relashon íntimo kuné atrobe?’​—Sal. 51:17.

6. Ki bentaha Yehova tin riba un mayor humano?

⁶ Tin biaha, Yehova por yuda nos asta promé ku nos kohe un rumbo robes. Por  ehèmpel, kisas e ta ripará ku nos kurason, ku por bira engañoso, ta kuminsá deseá kosnan inapropiá. (Jer. 17:9) Den un situashon asina, Yehova por aktua asta mas lihé ku mayornan humano pasobra su “wowo radiante” tin e abilidat di wak te den nos paden, i asina eksaminá nos pensamentunan di mas íntimo. (Sal. 11:4, NW; 139:4; Jer. 17:10) Konsiderá e manera ku Dios a reakshoná riba un situashon ku a surgi den bida di Baruk, e sekretario i amigu íntimo di profeta Jeremias.

Un Berdadero Tata pa Baruk

7, 8. (a) Ken Baruk tabata, i ki deseonan insaludabel kisas a kuminsá desaroyá den su kurason? (b) Meskos ku un tata preokupá, kon Yehova a demostrá interes den Baruk?

⁷ Baruk tabatin e profeshon di eskriba i a sirbi fielmente huntu ku Jeremias pa kumpli ku un asignashon ku a bira difísil: e proklamashon di Yehova su huisio na Huda. (Jer. 1:​18, 19) Na dado momento, Baruk, kende aparentemente a bini di un famia prominente, a kuminsá buska “kosnan grandi” pa su mes. Kisas el a permití ambishon personal i e deseo pa prosperidat material desaroyá den su mente. Sea kual sea e kaso, Yehova a mira ku e pensamentu peligroso akí tabata desaroyá den Baruk su kurason. Mesora Yehova a atendé e asuntu i mediante Jeremias el a bisa Baruk: “Bo a bisa: ‘Ai di mi! Pasobra SEÑOR a añadí tristesa na mi doló; mi ta kansá di mi kehamentu i mi no a haña deskanso.’” Anto Dios a bis’é: “Bo ta buska kosnan grandi pa bo mes? No buska eseinan.”​—Jer. 45:​1-5.

⁸ Ounke e tabata firme ku Baruk, Yehova no a reakshoná ku rabia, pero ku berdadero interes, meskos ku un tata preokupá. Evidentemente, Dios a mira ku e deseonan di e hòmber akí no tabata bini di un kurason malbado òf engañoso. Yehova tabata sa tambe ku Yerusalèm i Huda tabata den nan último dianan, i e no tabata ke pa Baruk trompeká na e tempu krusial ei. P’esei, pa e por a laga su sirbidó mira e situashon manera e tabata en realidat, Dios a rekord’é ku E “ta bai trese desaster riba tur karni.” Ademas, el a bisa Baruk ku si e aktua sabí, lo e biba. (Jer. 45:5) Bon mirá, Dios a bisa: ‘Sea realístiko Baruk. Keda kòrda kiko lo pasa djis akí ku Huda i Yerusalèm. Keda fiel i biba! Lo mi protehá bo.’ Yehova su palabranan lo mester a alkansá Baruk su kurason, pasobra el a kambia su manera di pensa i a sobrebibí e destrukshon di Yerusalèm, ku a sosodé 17 aña despues.

9. Kon lo bo kontestá e preguntanan den e paragraf?

⁹ Segun ku bo ta meditá riba e relato di Baruk, pensa riba e siguiente preguntanan i tekstonan di Beibel: Kiko e manera ku Dios a trata ku Baruk ta revelá tokante Yehova i loke e ta sinti pa su sirbidónan? (Lesa Hebreonan 12:9.) En bista di e tempu krítiko ku nos ta bibando aden, kiko nos por siña for di Dios su konseho na Baruk i for di Baruk su reakshon? (Lesa Lukas 21:​34-36.) Kon ansianonan kristian por imitá Jeremias i reflehá Yehova su interes i preokupashon pa Su sirbidónan?​—Lesa Galationan 6:1.

E Yu A Imitá e Amor di e Tata

10. Kon bini Hesus ta bon ekipá pa ehersé su posishon komo Kabes di e kongregashon kristian?

¹⁰ Durante e era prekristian, Yehova a revelá su amor pa su pueblo mediante su profetanan i otro sirbidónan fiel. Awendia, esun ku mas ta desplegá e amor akí ta e Kabes di e kongregashon kristian, Hesukristu. (Efe. 1:​22, 23) P’esei, e buki Revelashon ta deskribí Hesus komo un lamchi ku “shete wowo, kuanan ta e shete spiritunan di Dios, mandá den henter mundu.” (Rev. 5:6) Sí, debí ku Hesus ta yen di Dios su spiritu santu, e tin disernimentu perfekto. Ademas, e ta mira ken nos ta di paden, i nada no ta pas’é forbei.

11. Ki papel Kristu ta hunga, i den ki manera su aktitut pa ku nos ta reflehá esun di su Tata?

¹¹ Pero meskos ku Yehova, Hesus tampoko no ta un polis selestial. E ta eksaminá nos ku amor. Un di Hesus su títulonan, “Tata Eterno,” ta pone nos kòrda e papel ku lo e hunga  dunando bida eterno na tur esnan ku ehersé fe den dje. (Isa. 9:6) Ademas, komo Kabes di e kongregashon kristian, Kristu por motivá kristiannan spiritualmente maduro i ku ta kla pa yuda, spesialmente ansianonan, pa duna konsuelo i konseho na esnan ku tin mester.​—1 Tes. 5:14; 2 Tim. 4:​1, 2.

12. (a) Kiko e kartanan na e shete kongregashonnan di promé siglo ta revelá tokante Hesus? (b) Kon ansianonan ta reflehá Kristu su aktitut pa ku e tou di Dios?

¹² E kartanan na e ansianonan di e shete kongregashonnan di promé siglo ta reflehá Kristu su interes profundo den e tou. (Rev. 2:​1–3:22) Den e kartanan ei, Hesus a indiká ku e tabata sa kiko tabata pasa den kada kongregashon i ku e tabatin interes profundo den su siguidónan. Awe, esei ta meskos—i asta mas ainda—ya ku e vishon di Revelashon ta kumpli durante e “Dia di Señor.” * (Rev. 1:10) Hopi bes, Kristu ta ekspresá su amor mediante e ansianonan, kendenan ta sirbi komo wardadónan spiritual di e kongregashon. E por motivá e ‘donnan den forma di hende’ akí pa duna konsuelo, animashon òf konseho ora ta nesesario. (Efe. 4:8; Echo. 20:28; lesa Isaias 32:​1 i 2.) Bo ta mira nan esfuersonan komo un ekspreshon di Kristu su interes personal den bo?

Yudansa Oportuno

13-15. Den ki maneranan Dios por kontestá nos orashonnan? Duna ehèmpel.

¹³ Bo a yega di hasi orashon intenso pa yudansa i a risibí kontesta den forma di un bishita di un kristian spiritualmente maduro ku a animá bo? (Sant. 5:​14-16) Òf e yudansa a bini den forma di un diskurso na un reunion kristian òf den un di nos publikashonnan? Hopi bes Yehova ta kontestá orashon den e maneranan akí. Por ehèmpel, despues ku un ansiano a duna un diskurso, un ruman muhé ku algun siman promé a bira víktima di un gran inhustisia a aserk’é. En bes di keha tokante su problema, e ruman muhé a ekspresá masha apresio pa algun punto bíbliko ku e oradó a trese padilanti den su diskurso. Nan a kuadra ku e ruman muhé su situashon i a konsol’é mashá. El a keda masha kontentu ku el a asistí na e reunion ei!

¹⁴ Relashoná ku yudansa ku nos ta haña mediante orashon, konsiderá e ehèmpel di tres prezu ku a haña konosementu di e bèrdat bíbliko den prizòn i ku a bira publikadó no-batisá eiden. Debí na un insidente violento ku a tuma lugá den prizòn, a bini mas restrikshon riba tur e prezunan den e fasilidat ei. Esaki a pone nan protestá. E prezunan a disidí ku e siguiente dia despues di desayuno, komo un akto di rebeldia, nan lo nenga di entregá nan tayónan bèk. Awor e tres publikadónan no-batisá tabata den un dilema. Si nan djòin e rebelion, nan lo a desobedesé Yehova su konseho na Romanonan 13:1. Si nan no djòin e, nan por a ferwagt represaya di e otro prezunan rabiá.

¹⁵ Komo ku e tres hòmbernan akí no por a komuniká ku otro, nan tur tres a hasi orashon pidi Yehova sabiduria. E siguiente mainta, nan a ripará ku nan tur tres a yega na presis e mesun solushon: simplemente nan a keda sin tuma desayuno. Ora e wardadónan di prezu a bini despues pa rekohé e tayónan, e tres hòmbernan no tabatin nada di entregá bèk. Nan tabata masha kontentu ku Esun “ku ta skucha orashon” tabata masha serka!​—Sal. 65:2.

 Wak Futuro ku Konfiansa

16. Kon e trabou di prediká ta mustra ku Yehova ta interesá den hende semehante di karné?

¹⁶ E obra mundial di prediká ta un otro evidensia ku Yehova ta interesá den hende sinsero, sin importá unda nan ta biba. (Gén. 18:25) Hopi bes mediante angel, Yehova por dirigí su sirbidónan na hende semehante di karné—asta si e personanan akí ta biba den áreanan kaminda e bon nobo no a yega ainda. (Rev. 14:​6, 7) Por ehèmpel, mediante un angel, Dios a dirigí Felipe, un evangelisadó den promé siglo, pa bai serka un funshonario di Etiopia i splik’é e Skritura. Kiko tabata e resultado? E hòmber a aseptá e bon nobo i a bira un siguidó batisá di Hesus. *​—Juan 10:14; Echo. 8:​26-39.

17. Dikon nos no mester bira demasiado preokupá tokante futuro?

¹⁷ Segun ku e sistema aktual di kosnan ta yegando su fin, e “dolónan di parto,” esta, e angustia ku Beibel a profetisá ta kontinuá. (Mat. 24:8) Por ehèmpel, oumento den demanda di produkto, situashonnan ekstremo di wer òf instabilidat ekonómiko por pone ku preis di kuminda ta subi astronómikamente. Por bira mas difísil pa hende haña trabou, i trahadónan por haña nan ku mas preshon pa traha mas tantu. Maske kiko pasa, tur hende ku ta pone nan sirbishi na Yehova na promé lugá den nan bida i ta mantené nan ‘wowo bon,’ esta, enfoká riba un solo propósito, no tin nodi di ta demasiado preokupá. Nan sa ku Dios ta stima nan i ku lo e perkurá pa nan. (Mat. 6:​22-34) Konsiderá, por ehèmpel, kon Yehova a perkurá pa Jeremias durante Yerusalèm su fin turbulento na aña 607 promé ku nos era.

18. Kon Yehova a duna prueba di su amor pa Jeremias durante e sitiamentu di Yerusalèm?

¹⁸ Durante e parti final di e sitiamentu di Yerusalèm dor di Babilonia, Jeremias tabata prezu riba e plenchi di e guardianan. Kon lo el a haña kuminda? Si e tabata liber, e mes por a bai buska. Pero e tabata dependé kompletamente di e personanan rònt di dje, i mayoria di nan tabata odi’é! Sinembargo, Jeremias no a konfia den hende sino den Dios, kende a primintí di perkurá p’e. Yehova a kumpli ku su palabra? Definitivamente! El a perkurá pa tur dia Jeremias a haña un “pan . . . te ora tur pan den stat a kaba.” (Jer. 37:21) Jeremias, i tambe Baruk, Ebed-melek i otronan a sobrebibí e tempu ei di hamber, malesa i morto.​—Jer. 38:2; 39:​15-18.

19. Kiko mester ta nos determinashon segun ku nos ta wak futuro?

¹⁹ Sí, “e wowonan di [Yehova] ta riba e hustunan, i su oreanan ta atento pa skucha nan orashon.” (1 Ped. 3:12) Bo ta kontentu ku nos Tata selestial ta vigilá nos? Bo ta sinti bo safe i sigur sabiendo ku su wowo ta riba bo pa bo mes bon? Si esei ta e kaso, sea determiná pa kana ku Dios, sin importá kiko futuro trese. Nos por tin konfiansa ku Yehova, meskos ku un tata amoroso, semper lo mantené su bista atentamente riba su sirbidónan leal.​—Sal. 32:8; lesa Isaias 41:13.

[Nota]

Bo Por Splika?

• Kon nos por demostrá ku nos ta “kana ku Dios”?

• Kon Yehova a demostrá su amor pa Baruk?

• Komo Kabes di e kongregashon kristian, kon Hesus ta imitá e kualidatnan di su Tata?

• Den ki maneranan nos por mustra nos konfiansa den Dios durante e tempu krítiko akí?

[Preguntanan di Estudio]

[Plachi na página 17]

Meskos ku Jeremias a hasi ku Baruk, ansianonan kristian awe ta reflehá Yehova su interes i preokupashon

[Plachi na página 18]

Kon Yehova lo por duna yudansa na tempu oportuno?