Yehova Su “Wowo Radiante” Ta Eksaminá Tur Hende
Yehova Su “Wowo Radiante” Ta Eksaminá Tur Hende
“[Yehova su] wowo radiante ta eksaminá e yunan di hende.”—SAL. 11:4, NW.
1. Ki klase di persona ta atraé nos?
BO NO ta sinti bo atraí na personanan ku ta mustra berdadero interes den bo? Nan ta mustra nan interes dor di duna nan opinion sinsero ora bo pidi nan. Ora bo tin mester di yudansa, nan ta kla pa yuda bo. Ora bo tin mester di konseho, nan ta duna bo esei ku amor. (Sal. 141:5; Gal. 6:1) Ta dushi pa konosé hende asina. Wèl, tantu Yehova komo su Yu ta personanan asina. De echo, nan ta mas interesá den bo ku kualke otro persona, i no ta motivá pa niun benefisio personal; nan ke yuda bo haña un gara firme riba “loke ta bida berdadero.”—1 Tim. 6:19; Rev. 3:19.
2. Te kon leu Yehova ta interesá den su sirbidónan?
2 E salmista David a mustra kon interesá Yehova ta den nos ora el a bisa: “[Yehova] su mes wowo ta mira, su propio wowo radiante ta eksaminá e yunan di hende.” (Sal. 11:4, NW) Sí, Dios no ta djis wak nos; e ta eksaminá nos. Ademas, David a skirbi: “Bo a eksaminá mi kurason, bo a hasi inspekshon anochi, . . . lo bo deskubrí ku mi no a trama nada.” (Sal. 17:3, NW) Ta bisto anto ku David tabata sa ku Yehova tabata masha interesá den dje. E tabata sa ku si el a kultivá pensamentunan pekaminoso òf a desaroyá un kurason ku ta trama maldat, lo el a hasi Yehova tristu i lo a meresé su desaprobashon. Yehova ta un persona real pa bo meskos ku e tabata pa David?
Yehova Ta Wak Kurason
3. Kon Yehova ta demostrá un aktitut balansá pa ku nos imperfekshonnan?
3 Yehova ta interesá prinsipalmente den e persona ku nos ta di paden—loke nos ta realmente di kurason. (Sal. 19:14; 26:2) Komo un Dios amoroso, e no ta konsentrá riba nos fayonan chikitu. Por ehèmpel, ora Sara, kasá di Abraham, no tabata kompletamente onesto ku un angel materialisá, e angel evidentemente a mira ku e tabatin miedu i bèrgwensa. P’esei, el a djis hala su atenshon. (Gén. 18:12-15) Ora patriarka Jòb a “hustifiká su mes dilanti di Dios,” Yehova no a keda sin bendishon’é, pasobra e tabata sa ku Jòb a sufri masha hopi mes na man di Satanas. (Jòb 32:2; 42:12) Asina tambe, e palabranan franko ku e biuda di Sarepta a bisa profeta Elias no a pone Yehova rabia. Dios a komprondé ku e tabata hopi tristu pa motibu di e morto di su úniko yu.—1 Rei. 17:8-24.
4, 5. Kon Yehova a mustra bondat na e manera ku el a trata ku Abimelek?
4 Debí ku Yehova ta eksaminá kurason, el a tene konsiderashon asta ku hende ku no tabata sirbié. Konsiderá e manera ku el a trata ku Abimelek, rei di e stat Gerar di Filistea. Abimelek no a realisá ku Abraham ku Sara tabata kasá, i p’esei el a tuma Sara p’e bira su esposa. Sinembargo, promé ku Abimelek por a mishi kuné, Yehova a bis’é den un soño: “Mi sa ku ta den e integridat di bo kurason bo a hasi e kos akí, i mi no a laga bo peka kontra mi tampoko; p’esei mi no a laga bo mishi kuné. P’esei anto, trese e hòmber su esposa bèk, pasobra e hòmber ta un profeta, i e lo hasi orashon pa bo, i lo bo keda na bida.”—Gén. 20:1-7.
5 Siguramente, Yehova por a trata Abimelek severamente, ya ku e tabata un adoradó di dios falsu. Pero Dios a mira ku na e okashon akí e hòmber a aktua onestamente. Bondadosamente Yehova e tene kuenta ku esaki i a bisa e rei kon e por a haña pordon i “keda na bida.” Esei no ta e klase di Dios ku abo ke adorá?
6. Den ki maneranan Hesus a imitá su Tata?
6 Hesus a imitá su Tata perfektamente i a enfoká riba e bon den su disipelnan i tabata kla pa Mar. 10:35-45; 14:66-72; Luk. 22:31, 32; Juan 15:15) Hesus su aktitut a kuadra ku su palabranan ku ta pará skirbí na Juan 3:17: “Dios no a manda e Yu den mundu pa kondená mundu, ma pa mundu wòrdu salbá dor di dje.” Sí, e amor ku Yehova i Hesus tin pa nos ta profundo i no ta kambia. E ta bisto den e echo ku nan ke pa nos haña bida. (Jòb 14:15) E klase di amor ei ta yuda nos komprondé dikon Yehova ta eksaminá nos, dikon e ta mira e bon den nos i dikon e ta purba korigí nos di akuerdo ku loke e ta mira.—Lesa 1 Juan 4:8 i 19.
pordoná nan erornan. (Yehova Ta Eksaminá Nos ku Amor
7. Pakiko Yehova ta eksaminá nos?
7 P’esei, no ta korekto pa nos pensa ku Yehova ta manera un polis sintá den shelu ku ta wak ki ora nos ta hasi piká pa gara nos. Ta Satanas ta esun ku ta akusá nos i ta pretendé ku nos ta egoista. (Rev. 12:10) E ta asta akusá hende di tin mal intenshon kaminda esei no ta e kaso! (Jòb 1:9-11; 2:4, 5) Relashoná ku Dios, e salmista a skirbi: “Si ta eror ta loke bo ta vigilá, o Yah, o Yehova, ken lo por keda pará?” (Sal. 130:3, NW) E kontesta opvio ta: Niun hende! (Ekl. 7:20) Mas bien, Yehova ta vigilá òf wak nos ku e wowonan miserikòrdioso i bondadoso di un tata amoroso ku ke protehá su yunan stimá for di daño. Hopi bes, e ta hala nos atenshon na nos imperfekshonnan i debilidatnan pa asina nos por evitá di hasi nos mes daño.—Sal. 103:10-14; Mat. 26:41.
8. Kon Yehova ta instruí i disipliná su sirbidónan?
8 Dios ta ekspresá su amor pa nos mediante e instrukshon i disiplina ku nos ta haña den e Skritura i via e kuminda spiritual ku e “esklabo fiel i prudente” ta perkurá. (Mat. 24:45; Heb. 12:5, 6) Ademas, Yehova ta duna yudansa mediante e kongregashon kristian i su ‘donnan den forma di hende.’ (Efe. 4:8) Es mas, meskos ku un tata, Yehova ta wak kon nos ta reakshoná riba e entrenamentu ku e ta duna nos i e ta buska manera pa sigui yuda nos. Salmo 32:8 ta bisa: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.” Pues anto, ta masha importante pa nos semper skucha Yehova! Nos mester keda humilde i rekonosé ku e ta nos Maestro i Tata amoroso.—Lesa Mateo 18:4.
9. Ki karakterístikanan nos tin ku evitá, i dikon?
9 Di otro banda, laga nos nunka permití orguyo, falta di fe òf “e engaño di piká” hasi nos kurason duru. (Heb. 3:13; Sant. 4:6) Hopi bes, e karakterístikanan akí ta surgi ora un persona ta kultivá pensamentu- òf deseonan insaludabel. E por bai asina leu ku e ta asta rechasá konseho bíbliko apropiá. Pió ainda, e por bira asina desididu pa sigui ku su mal aktitut òf akshonnan ku e ta hasi su mes un enemigu di Dios. Esei sí ta un situashon realmente spantoso! (Pro. 1:22-31) Konsiderá e ehèmpel di Kain, e promé yu di Adam ku Eva.
Yehova Ta Mira Tur Kos i Ta Aktua di Akuerdo ku Esei
10. Dikon Yehova a rechasá Kain su ofrenda, i kon Kain a reakshoná?
10 Ora tantu Kain komo Abel a trese un ofrenda pa Yehova, E tabata interesá no solamente den nan regalo sino tambe den loke a motivá nan. Sabiendo kiko tabatin den nan kurason, Dios a mustra ku el a aprobá e ofrenda di Abel pero ku el a rechasá esun di Kain, kende di un manera òf otro a reflehá un falta di fe. (Gén. 4:4, 5; Heb. 11:4) En bes di Kain siña for di e suseso ei i kambia su aktitut, el a haña rabia riba su ruman.—Gén. 4:6.
11. Kon Kain a demostrá ku su kurason tabata engañoso, i kiko nos por siña for di esaki?
11 Yehova a ripará ku Kain tabatin un aktitut peligroso. P’esei, bondadosamente el a papia ku Kain i a bis’é ku si e hasi loke ta bon, lo e tin motibu pa alegrá. Lamentablemente, Kain no a hasi kaso di e konseho di su Kreador i a mata su ruman. E manera sin rèspèt ku Kain a kontestá Dios despues tambe a mustra ku e tabatin mal kurason. Yehova a puntr’é: “Unda bo ruman Abel ta?” Kain a kontestá rabiá: “Mi no sa. Ta wardadó di mi ruman mi ta anto?” (Gén. 4:7-9) Mira kon engañoso hende su kurason por ta. E por bai asina leu di asta pasa por haltu di konseho direkto di Dios! (Jer. 17:9) P’esei, laga nos siña for di e relatonan ei i sea lihé pa rechasá pensamentu- i deseonan robes. (Lesa Santiago 1:14 i 15.) Si nos risibí konseho bíbliko, laga nos apresi’é i mir’é komo un prueba di Yehova su amor.
Ningun Piká Ta Sekreto pa Yehova
12. Kon Yehova ta reakshoná ora hende hasi malu?
12 Tin hende ta pensa ku si niun hende no mira nan hasi malu, nan a skapa. (Sal. 19:12) Pero den un sentido, no ta eksistí pika sekreto. “Tur kos ta habrí i bisto dilanti di wowo di esun ku nos tin di haber kuné.” (Heb. 4:13) Yehova ta un Hues ku ta eksaminá nos motivashonnan di mas profundo, i e manera ku e ta reakshoná ora hende hasi malu ta reflehá hustisia perfekto. E ta un “Dios, yen di kompashon i grasia, kende no ta rabia lihé i kende ta abundá den miserikòrdia i bèrdat.” Pero si un hende no ta repentí, i ta “peka boluntariamente” òf ta desplegá un aktitut desonesto i tramposo, Yehova ‘di ningun manera lo no laga di kastig’é.’ (Eks. 34:6, 7; Heb. 10:26) Esaki tabata bisto den e manera ku Yehova a trata ku Akan i ku Ananias i Safira.
13. Ki karakterístikanan evidentemente a kontribuí na Akan su mal kondukta?
13 Akan a bai direktamente kontra Dios su mandamentu, i a kohe botin for dje stat di Jeriko i a skond’é den su tènt. I probablemente su famia tabata kómplise den esaki. Ora ku su piká a keda desenmaskará, Akan a mustra ku el a realisá kon serio loke el a hasi tabata, pasobra el a bisa: “Mi a peka kontra SEÑOR.” (Jos. 7:20) Meskos ku Kain, Akan a kultivá un mal kurason. Den kaso di Akan, golosidat tabata e faktor prinsipal ku a pone ku el a bira desonesto. Siendo ku e botin di Jeriko tabata pertenesé na Yehova, de echo, Akan a hòrta Dios. Esaki a pone ku tantu é komo su famia a pèrdè nan bida.—Jos. 7:25.
14, 15. Dikon Ananias i Safira a meresé Dios su desaprobashon, i ki lès nos ta saka for di esaki?
14 Ananias ku su kasá, Safira, tabata miembro di e kongregashon kristian di promé siglo na Yerusalèm. Despues di Pentekòste di aña 33 di nos era, e kristiannan a establesé un fondo pa perkurá pa e nesesidatnan físiko di e kreyentenan nobo ku a bini for di teranan leu i ku a keda na Yerusalèm pa un tempu. E fondo a ser sostené dor di kontribushonnan boluntario. Ananias a bende un tereno i el a duna un parti di e plaka na e fondo. Sinembargo, ku pleno konsentimentu di su esposa, el a hasi komo si fuera ta e montante kompletu di e benta el a duna. Sin duda, e pareha akí kier a risibí onor spesial den e kongregashon. Pero nan a aktua ku engaño. Den un manera milagroso, Yehova a revelá e froude na apòstel Pedro, kende a konfrontá Ananias ku su engaño. Mesora despues di esei, Ananias a kai abou i a muri. Djis despues, Safira tambe a muri.—Echo. 5:1-11.
15 Ananias i Safira no tabata víktima di un debilidat pasahero. Nan a traha un kòmplòt i a gaña ku intenshon di nèk e apòstelnan. Pió ainda, nan mentira tabata kontra spiritu santu i nan a ‘gaña Dios.’ Yehova su reakshon ta mustra bon kla ku e ta prepará pa protehá e kongregashon kontra di hende hipókrita. En bèrdat, “ta un kos teribel pa kai den man di e Dios bibu”!—Heb. 10:31.
Mantené Integridat na Tur Momento
16. (a) Kon Satanas ta purba daña e norma- i balornan di e pueblo di Dios? (b) Ki métodonan Diabel ta usa pa korumpí hende den bo área?
16 Satanas ta hasiendo tur loke e por pa daña nos norma- i balornan i pone nos pèrdè Yehova su aprobashon. (Rev. 12:12, 17) Diabel su intenshonnan malisioso ta masha bisto den e mundu ku ta opseshoná ku sèks inmoral i violensia. Awor ta masha fásil pa yega na pornografia via kòmpiuter òf otro aparatonan elektróniko. Laga nos nunka sukumbí pa Satanas su atakenan. Mas bien, laga nos tin e mesun sintimentu ku salmista David, kende a skirbi: “Lo mi komportá mi mes ku sabiduria, na un manera perfekto. . . . Lo mi kana den mi kas den e integridat di mi kurason.”—Sal. 101:2.
17. (a) Dikon Yehova ta saka pikánan skondí na kla ku tempu? (b) Kiko mester ta nos determinashon?
17 Awendia, Yehova no ta revelá piká serio ni komportashon engañoso di un forma milagroso manera el a yega di hasi den pasado. Sinembargo, e ta mira tur kos i na su debido tempu i na su manera, e ta saka kosnan skondí na kla. Pablo a bisa: “Tin hende ku nan piká ta asina bisto ku promé ku hiba nan dilanti hues, nan piká mes a sali na kla kaba. Pero tin otro hende ku nan piká ta sali na kla te despues.” (1 Tim. 5:24, BPK) Amor ta Yehova su motivashon prinsipal pa saka maldat na kla. E ta stima e kongregashon i e ke protehá su puresa. Ademas, e ta mustra miserikòrdia na esnan ku a peka pero ku awor a repentí di bèrdat. (Pro. 28:13) P’esei, laga nos hasi esfuerso pa nos sirbi Dios ku henter nos kurason i rechasá tur influensia dañino.
Sigui Sirbi Yehova ku Henter Nos Kurason
18. Ki sintimentu Rei David tabata ke pa su yu tin pa ku Dios?
18 Rei David a bisa su yu Salomon: “Konosé e Dios di bo tata, i sirbié ku henter bo kurason i ku un alma boluntario; pasobra SEÑOR ta skudriñá tur kurason i ta komprondé tur intenshon di e pensamentunan.” (1 Kró. 28:9) David tabata ke pa su yu hasi mas ku djis kere den Dios. E tabata ke pa Salomon apresiá e echo ku Yehova tin un interes profundo den Su sirbidónan. Abo ta apresiá Yehova pa esei?
19, 20. Segun Salmo 19:7-11, kiko a yuda David hala serka Dios, i kon nos por imitá David?
19 Yehova sa ku hende ku tin e aktitut korekto lo sinti nan atraí na dje i ku e konosementu di su bunita kualidatnan lo duna nan mas apresio p’e. P’esei, Yehova ke pa nos siña konos’é i familiarisá nos mes ku su personalidat maravioso. Kon nos por hasi esei? Dor di studia su Palabra i eksperensiá su bendishon den nos bida.—Pro. 10:22; Juan 14:9.
20 Abo ta lesa Beibel tur dia, rekonosiendo ku e ta bini di Dios? I bo ta pidi Dios su yudansa pa bo apliká loke bo ta lesa? Bo ta mira e balor di biba na armonia ku prinsipionan bíbliko? (Lesa Salmo 19:7-11.) Si esei ta e kaso, bo fe den Yehova i bo amor p’e lo sigui krese. Anto e, na su turno, lo hala asta mas serka bo, komo si fuera kanando ku bo man tené. (Isa. 42:6; Sant. 4:8) Sí, Yehova lo demostrá su amor pa bo dor di bendishoná bo i protehá bo spiritualmente segun ku bo ta kana riba e kaminda smal ku ta hiba na bida.—Sal. 91:1, 2; Mat. 7:13, 14.
Kon Lo Bo Kontestá?
• Dikon Yehova ta eksaminá nos?
• Kiko a pone algun hende bira enemigu di Dios?
• Kon nos por mustra ku Yehova ta un persona real pa nos?
• Kon nos por sigui sirbi Dios ku henter nos kurason?
[Preguntanan di Estudio]
[Plachi na página 12]
Kon Yehova su bista ta riba nos manera un mayor amoroso?
[Plachi na página 13]
Ki lès nos ta saka for di e ehèmpel di Ananias?
[Plachi na página 14]
Kiko lo yuda nos sigui sirbi Yehova ku henter nos kurason?