Ki Efekto e Bèrdat Tokante Fièrnu Tin Riba Bo?

ESNAN ku ta siña otro hende ku fièrnu ta un lugá di tormento ta duna un idea kompletamente robes di Yehova Dios i su kualidatnan. Ta bèrdat ku Beibel ta bisa ku Dios lo destruí e malbadonan. (2 Tesalonisensenan 1:​6-9) Pero rabia hustu no ta Dios su kualidat prinsipal.

Dios no ta malisioso ni vengativo. Asta el a puntra: “Ami, SEÑOR Dios, ta kontentu ora un hende malbado muri?” (Ezekiel 18:23, BPK) Si Dios no ta kontentu ni ku morto di hende malbado, kon e por tin goso di mira e hendenan akí haña tormento pa semper?

Dios su kualidat prinsipal ta amor. (1 Juan 4:8) Sí, “SEÑOR ta bon pa tur, i su miserikòrdianan ta riba tur su obranan.” (Salmo 145:9) En buèlta, Dios ke pa nos siña stim’é di kurason.​—Mateo 22:​35-38.

Kua Ta Motivá Bo: Temor di Fièrnu òf Amor pa Dios?

E siñansa ku alma ta sufri den fièrnu ta pone ku hende por haña un temor insaludabel pa Dios. En kambio, un hende ku siña e bèrdat tokante Dios i kuminsá stim’é lo desaroyá un temor saludabel p’e. Salmo 111:10 ta splika: “E temor di SEÑOR ta e prinsipio di sabiduria; tur hende ku kumpli ku su mandamentunan tin bon komprondementu.” E temor di Dios akí, no ta un miedu ekstremo, sino un rèspèt profundo pa e Kreador. E temor saludabel akí ta yuda nos pa no desagrad’é.

Wak ki efekto e bèrdat tokante fièrnu tabatin riba Kathleen, un señora di 32 aña ku tabata un drogadikto. Su bida tabata fiesta so, yen di violensia. E tabata hiba un bida inmoral i tabata odia su mes. El a rekonosé: “Mi tabata wak mi yu muhé di ún aña i pensa, ‘Mira kiko mi ta hasiendo kuné. Lo mi bai kima den  fièrnu pa esaki.’” Kathleen a purba stòp di usa droga, pero nada no a yuda. El a bisa: “Mi kier a hasi loke ta bon, pero nada den mi bida i den mundu no tabatin sentido. Na mi pareser no tabatin ningun motibu pa ta un bon hende.”

Despues Kathleen a topa ku Testigunan di Yehova. El a bisa: “Mi a siña ku no tin fièrnu di kandela. Evidensia bíbliko tabata masha kla. Tabata un tremendo alivio pa sa ku lo mi no bai kima den fièrnu.” Pero tambe el a siña tokante Dios su promesa ku hende lo biba pa semper riba un tera kaminda no tin maldat. (Salmo 37:​10, 11, 29; Lukas 23:43) Tur emoshoná, el a sigui bisa: “Awor sí mi tabatin un berdadero speransa, esta, di biba pa semper den Paradeis!”

Awor ku Kathleen no tabatin miedu di fièrnu di kandela mas, lo e por a stòp di usa droga? E ta konta: “Ora mi tabatin un deseo fuerte pa droga, mi tabata roga Yehova Dios den orashon pa yuda mi. Mi tabata pensa riba su punto di bista tokante e tipo di bisionan ei, i no tabata ke desepshon’é. El a kontestá mi orashonnan.” (2 Korintionan 7:1) E temor akí di desagradá Dios a yuda Kathleen stòp ku su adikshonnan.

Sí, loke por motivá nos pa hasi Dios su boluntat i disfrutá di felisidat pa semper ta ora nos kultivá amor i un temor saludabel p’e—i no temor di kima den fièrnu. E salmista a skirbi: “Felis t’esun ku ta honra SEÑOR, ku ta sigui su kaminda.”​—Salmo 128:1, BPK.

[Kuadro/​Plachinan na página 9]

Ken Lo Ser Librá For Di Fièrnu?

Algun tradukshon di Beibel ta krea konfushon debí ku nan ta tradusí dos palabra griego, Gé·en·na i Haí·des, ku no ta nifiká meskos, komo ún palabra: “fièrnu.” Den Beibel, e palabra Gé·en·na ta referí na destrukshon total, sin speransa di resurekshon. Siendo ku esnan ku ta den Haí·des, òf Hades, sí tin speransa di resurekshon.

P’esei, despues ku Hesus a muri i a lanta for di morto, apòstel Pedro a garantisá su oyentenan ku Hesus lo no keda “den fiernu.” (Echunan dje Apostelnan 2:​27, 31, 32, E Testament Nobo [TN]; Salmo 16:10) E palabra tradusí komo “fiernu” den e versíkulonan akí ta e palabra griego Haí·des. Hesus no a bai un lugá di kandela. Hades, òf “fiernu,” tabata e graf. Pero Hesus no ta e úniko persona ku Dios ta liberá for di Hades.

En konekshon ku resurekshon, Beibel ta bisa: “Morto i fiernu a entrega e mórtonan, qu tawata den nan.” (Rebelacion di Juan 20:​13, 14, TN) Hasi “fiernu” bashí lo nifiká ku Dios lo duna tur hende ku e ta konsiderá digno un resurekshon. (Juan 5:​28, 29; Echunan dje Apostelnan 24:15, TN) Ki un speransa maravioso nos tin di por mira nos sernan kerí sali for di graf! Yehova, e Dios di amor sin límite, ta esun ku lo hasi esaki.