Mantené un Punto di Bista Bibliko di Kuido di Salú

“Stima SEÑOR bo Dios . . . ku henter bo mente, i ku tur bo forsa.”​—MAR. 12:30.

1. Kiko tabata Dios su propósito pa humanidat?

YEHOVA DIOS su propósito no a enserá ku hende mester a bira malu ni muri. El a pone Adam ku Eva den e hòfi di Edén, òf paradeis di plaser, “pa kultiv’é i kuid’é,” anto no djis pa 70 òf 80 aña, sino pa eternidat. (Gén. 2:​8, 15; Sal. 90:10) Si e promé pareha a keda fiel na Yehova i a demostrá nan amor p’e dor di someté nan mes na su soberania, nunka nan lo a konosé problema ku salú, debilidat ni morto.

2, 3. (a) Kon e buki di Eklesiastés ta deskribí behes? (b) Ken ta responsabel pa e morto adámiko, i kon su efektonan lo ser eliminá?

² Eklesiastés kapítulo 12 ta pinta un kuadro bibu di “e dianan malu” ku ta kompañá behes den kaso di hende imperfekto. (Lesa Eklesiastés 12:​1-7.) E ta kompará kabei blanku ku e flornan di “palu di amandel.” Hende su pal’i pia e ta kompará ku “hòmbernan fuerte” ku awor ta tur doblá i ta tambaleá. Hende muhénan ku ta bai na un bentana pa haña klaridat i ta haña solamente skuridat, ta un ilustrashon apropiá pa wowonan ku ta bira skur. Siendo ku falta algun djente, “e muladónan ta stòp di mula, pasobra nan ta poko.”

³ Pia ku ta tembla, wowo ku ta bira skur i boka sin djente siguramente no tabata Dios su propósito pa humanidat. Es mas, morto heredá for di Adam ta un di “e obranan di Diabel” ku e Yu di Dios lo eliminá mediante su Reino Mesiániko. Apòstel Juan a skirbi: “E Yu di Dios a aparesé pa e propósito akí, pa e destruí e obranan di Diabel.”​—1 Juan 3:8.

Preokupashon Rasonabel Ta Natural

4. Dikon Yehova su sirbidónan ta preokupá na un grado rasonabel ku nan salú, pero di kiko nan ta konsiente?

⁴ Aktualmente, algun sirbidó di Yehova ta haña nan ta lucha ku e problemanan di salú i di behes ku ta komun pa humanidat imperfekto. Den tal sirkunstansianan, ta natural i asta probechoso pa preokupá te na un grado rasonabel ku nos salú. Nos ke sirbi Yehova ‘ku tur nos forsa’ tòg? (Mar. 12:30) Sinembargo, miéntras ku nos ta trata di mantené un bon salú na un grado rasonabel, nos mester ta realístiko i rekonosé ku nos no por hasi masha kos pa frena e proseso di enbehesimentu òf pa evitá tur enfermedat.

5. Kiko nos por siña for di fiel sirbidónan di Dios ku a trata ku malesa?

⁵ Hopi fiel sirbidó di Yehova tabatin ku lucha ku problema di salú. Epafrodito tabata un di nan. (Fil. 2:​25-27) Timoteo, apòstel Pablo su fiel kompañero, frekuentemente tabatin problema ku stoma, te ku Pablo a  rekomend’é pa usa “un poko biña.” (1 Tim. 5:23) Pablo mes tabatin ku lucha ku “un sumpiña den karni,” posiblemente un problema ku su wowo òf un otro malesa físiko pa kua no tabatin kura e tempu ei. (2 Kor. 12:7; Gal. 4:15; 6:11) Relashoná ku su “sumpiña den karni,” Pablo a roga Yehova fervientemente. (Lesa 2 Korintionan 12:​8-10.) Pero Dios no a libra Pablo milagrosamente di e “sumpiña den karni.” En bes di esei, Dios a fortalesé Pablo p’e por a soport’é. Asina Yehova su poder a bira bisto den Pablo su debilidat. Sin duda, nos por siña hopi for di e kaso akí.

Evitá di Ta Demasiado Preokupá ku Kuido di Salú

6, 7. Dikon nos mester evitá di ta demasiado preokupá ku nos salú?

⁶ Manera bo sa, Testigunan di Yehova ta aseptá yudansa médiko i vários forma di tratamentu. Hopi bes nos revista ¡Despertad! ta kontené artíkulonan tokante salú. I ounke nos no ta promové ningun tratamentu en partikular, nos ta apresiá e yudansa i koperashon di profeshonalnan den kuido médiko. Klaru ku nos ta konsiente sí di e echo ku salú perfekto no ta alkansabel ainda. P’esei, nos sa ku no ta sabí pa nos ta konstantemente preokupá ku kuido di nos salú. Nos aktitut mester ta distinto for di e hendenan ku ta “sin speransa,” kendenan ta pensa ku e bida akí ta tur loke tin i ku lo rekurí na kualke terapia den un intento pa haña kura pa nan malesanan. (Efe. 2:​2, 12) Nos ta determiná pa no pèrdè Yehova su aprobashon djis pa salba nos bida aktual, pasobra nos ta konvensí ku si nos keda fiel na Dios, nos lo “gara loke ta [e] bida berdadero,” esta, bida eterno den su mundu nobo primintí.​—1 Tim. 6:​12, 19; 2 Ped. 3:13.

⁷ Tin un otro motibu mas pakiko nos ta evitá di ta demasiado preokupá ku nos salú. Ora nos ta demasiado preokupá ku nos salú, esei lo por pone nos bira egoista. Pablo a spièrta e filipensenan pa e peliger akí ora el a urgi nan pa “no buska [nan] interes personal so, ma buska tambe interes di otronan.” (Fil. 2:4) Ta na su lugá pa nos kuida nos kurpa na un grado rasonabel, pero e interes profundo ku nos ta mustra den nos rumannan i den e hendenan na ken nos ta hiba “e evangelio akí di e reino” lo yuda nos pa nos no ta demasiado preokupá ku nos bienestar físiko.​—Mat. 24:14.

8. Kiko demasiado preokupashon ku kuido di salú por pone nos hasi?

⁸ Ta eksistí e peliger ku un kristian lo por laga preokupashonnan tokante su salú okupá e promé lugá den su bida en bes di e interesnan di Reino. Ademas, opseshon ku kuido di salú lo por pone nos purba imponé riba otro hende nos opinion personal relashoná ku e balor di sierto dieta, terapia òf di suplementonan alimentisio. Relashoná ku esaki, konsiderá e prinsipio ekspresá den e palabranan di Pablo: “Hasi sigur di e kosnan mas importante, pa boso por ta sin defekto i no pone otronan trompeká te n’e dia di Kristu.”​—Fil. 1:10, NW.

Kiko Ta Mas Importante?

9. Kiko ta un di e kosnan di mas importante ku nos no mester neglishá, i dikon nò?

⁹ Si nos ta hasi sigur di e kosnan di mas importante, nos ta partisipá aktivamente den e trabou di kurashon spiritual, es desir, e trabou di yuda hende haña un bon relashon ku Dios. Nos ta logra esaki dor di prediká na nan i siña nan e Palabra di Dios. E aktividat gososo akí ta produsí benefisio pa nos i pa e hendenan ku nos ta siña. (Pro. 17:22; 1 Tim. 4:​15, 16) E revistanan E Toren di Vigilansia i ¡Despertad! sa tin artíkulonan tokante nos rumannan spiritual ku tin malesanan serio. Tin biaha e relatonan akí ta splika kon e rumannan ei ta trata ku nan problemanan òf asta logra lubidá nan temporalmente dor di buska oportunidat pa yuda otro hende siña konosé Yehova i su promesanan maravioso. *

10. Dikon ta importante ki tratamentu nos ta skohe?

 ¹⁰ Ora kristiannan haña nan ku problema di salú, kada kristian adulto tin ku “karga su mes karga” di responsabilidat ora di skohe ki tratamentu lo e sigui. (Gal. 6:5) Sinembargo, nos tin ku kòrda ku pa Yehova ta importante ki tipo di tratamentu nos ta skohe. Meskos ku rèspèt pa prinsipionan bíbliko ta motivá nos pa “apstené . . . di sanger,” asina rèspèt profundo pa e Palabra di Dios mester motivá nos pa evitá di aseptá terapia ku lo por perhudiká nos spiritualmente òf afektá nos relashon ku Yehova. (Echo. 15:20) Tin proseduranan pa diagnostiká òf pa trata malesa ku ta kasi meskos ku práktikanan spiritista. Yehova a rechasá israelitanan apóstata, kendenan a akudí na “poder mágiko,” òf práktikanan spiritista. El a deklará: “No trese ofrendanan bano mas, sensia ta un abominashon pa mi. Luna nobo i sabat, e yamamentu di asambleanan—Mi no por soportá inikidat [“uso di poder mágiko,” NW], ni e asamblea solèm.” (Isa. 1:13) Durante malesa, siguramente no ta tempu pa hasi algu ku lo por stroba nos orashonnan i pone nos relashon ku Dios na peliger.​—Lam. 3:44.

“Sano Huisio” Ta Masha Importante

11, 12. Ki papel “sano huisio” ta hunga ora nos tin ku skohe kuido médiko?

¹¹ Ora nos ta malu, nos no por ferwagt ku Yehova ta kura nos milagrosamente, pero nos por hasi orashon sí p’e duna nos sabiduria pa skohe tratamentu. Nos mester purba laga prinsipionan bíbliko i sano huisio guia nos den nos skohementu. Ora ta un kaso grave, si ta posibel, kisas ta sabí pa konsultá vários spesialista, na armonia ku e pensamentu di Proverbionan 15:22, ku ta deklará: “Pa falta di konseho plannan ta frakasá, ma ku hopi konsehero nan ta wòrdu lográ.” Apòstel Pablo a urgi su kompañeronan kreyente pa “biba huisioso [“ku sano huisio,” NW], hustu i santu den e siglo presente.”​—Tito 2:12.

¹² Hopi hende awe ta den un situashon paresido na esun di un señora enfermo den tempu di Hesus. Na Marko 5:25 i 26 nos ta lesa: “I [tabatin] un muhé ku diesdos aña largu tabatin un derame di sanger, i ku a sufri mashá na man di hopi dòkter, i ku a gasta tur loke e tabatin sin ku el a wòrdu yudá, ma mas bien a bira pió.” Hesus a kura e señora ei i a trat’é ku kompashon. (Mar. 5:​27-34) Desesperá pa kura di nan malesa, tin kristian kisas ta sinti nan tentá pa skohe proseduranan pa diagnostiká òf pa trata malesa ku ta bai kontra di e prinsipionan di adorashon puru.

13, 14. (a) Kon Satanas por usa nos eskoho di tratamentu médiko pa kibra nos integridat? (b) Dikon nos mester keda leu for di tur loke ta ligá ku podernan sobrenatural?

¹³ Satanas lo usa kualke medio pa desviá nos for di adorashon berdadero. Meskos ku e ta usa inmoralidat seksual i materialismo pa pone algun kristian trompeká, e ta purba kibra e integridat di otronan mediante  tratamentunan médiko kuestionabel ku por ta meskos ku e uso di podernan sobrenatural i spiritismo. Nos ta pidi Yehova den orashon pa libra nos for di “e malbado” i for di “tur inikidat.” P’esei, nos no mester pone nos mes den man di Satanas dor di mete ku kosnan ku por tin di haber ku spiritismo i ku podernan sobrenatural.​—Mat. 6:13; Tito 2:14.

¹⁴ Yehova a prohibí e israelitanan di praktiká adivinashon i bruheria. (Deu. 18:​10-12) Pablo a menshoná “bruheria” entre “e obranan di karni.” (Gal. 5:​19, 20) Ademas, “e hasidónan di bruha,” es desir, esnan ku ta praktiká spiritismo, lo no tin parti den Yehova su mundu nobo. (Rev. 21:8) Ta bisto anto ku Yehova ta odia tur loke tin kualke rastro di spiritismo.

‘Laga Hende Sa Ku Boso Ta Rasonabel’

15, 16. (a) Dikon nos mester di sabiduria pa skohe kuido médiko? (b) Ki konseho sabí e kuerpo gobernante di promé siglo a duna?

¹⁵ En bista di loke nos a kaba di konsiderá, si nos tin kualke duda tokante ún òf otro prosedura pa diagnostiká òf pa trata malesa, ta sabí pa nos rechas’é. Ta klaru ku e simpel echo ku nos no por splika kon un sierto tratamentu ta funshoná, riba su mes no ke men ku e tin di haber ku spiritismo. Pa nos por mantené un punto di bista bíbliko di kuido di salú, nos mester tin sabiduria divino i sano huisio. Den Proverbionan kapítulo 3, nos ta haña e konseho akí: “Konfia den [Yehova] ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan. . . . Retené sabiduria sano i diskreshon, asina nan lo ta bida pa bo alma.”​—Pro. 3:​5, 6, 21, 22.

¹⁶ Pues, miéntras ku nos ta hasi esfuerso pa keda mas salú posibel, nos tin ku tene kuidou pa nos no pèrdè Dios su aprobashon den nos intento pa trata ku malesa òf ku e proseso di enbehesimentu. Den asuntunan di kuido di salú, meskos ku den otro asuntunan, nos mester hasi esfuerso pa ‘laga tur hende sa ku nos ta rasonabel’ dor di biba na armonia ku prinsipionan bíbliko. (Fil. 4:5, NW) Den un karta di vital importansia, e kuerpo gobernante di promé siglo a instruí kristiannan pa apstené di idolatria, sanger i fornikashon. E karta ei a inkluí e siguransa akí: “Si boso warda boso kuidadosamente dje kosnan akí, boso lo prosperá.” (Echo. 15:​28, 29, NW) Den ki manera nan lo a prosperá?

Kuido Rasonabel ku Salú Perfekto na Bista

17. Kon nos a benefisiá físikamente dor di sigui prinsipionan bíbliko?

¹⁷ Ta bon pa kada un di nos puntra nos mes:‘Mi ta realisá te na ki grado ami personalmente a prosperá dor di tene mi mes estriktamente na prinsipionan bíbliko relashoná ku sanger i fornikashon?’ Pensa tambe riba e benefisionan ku nos a haña debí na nos esfuerso pa “purifiká nos mes di tur impuresa di karni i spiritu.” (2 Kor. 7:1) Komo ku nos ta sigui e normanan di Beibel relashoná ku higiena personal, nos ta evitá hopi malesa. Nos ta prosperá pasobra nos ta keda leu di e uso di tabako i droga, kosnan ku ta kontaminá nos kurpa i ta daña nos relashon ku Dios. Pensa tambe riba e benefisionan di salú ku nos ta haña pasobra nos ta kome i bebe na un manera moderá. (Lesa Proverbionan 23:20; Tito 2:​2 i 3.) Ounke faktornan manera sosiegu i  ehersisio por kontribuí na nos bienestar general, nos a prosperá físikamente i spiritualmente spesialmente pasobra nos a aseptá guia bíbliko.

18. (a) Kiko mester ta nos preokupashon prinsipal? (b) Kumplimentu di kua profesia relashoná ku salú nos por spera ansiosamente?

¹⁸ Mas ku tur kos, nos tin ku kuida nos salú spiritual i fortifiká nos relashon presioso ku nos Tata selestial, e Fuente di nos ‘bida presente i di esun ku ta bini’ den su mundu nobo primintí. (1 Tim. 4:8; Sal. 36:9) Den Dios su mundu nobo lo tin un kurashon kompletu, tantu den sentido spiritual komo físiko, pa medio di pordon di piká a base di Hesus su sakrifisio di reskate. E Lamchi di Dios, Hesukristu, lo hiba nos na “fuentenan di e awa di bida,” i Dios lo seka tur lágrima for di nos wowo. (Rev. 7:​14-17; 22:​1, 2) Anto e ora ei, nos lo eksperensiá tambe e kumplimentu di e profesia emoshonante akí: “Ningun habitante lo no bisa:‘Mi ta malu.’”​—Isa. 33:24.

19. Miéntras nos ta kuida nos salú na un manera rasonabel, kiko nos por tin sigur di dje?

¹⁹ Nos ta konvensí ku nos liberashon ta serka, i ansiosamente nos ta warda riba e dia ku Yehova lo para e proseso ku ta pone hende bira malu i muri. Miéntras tantu, nos tin sigur ku nos Tata amoroso lo yuda nos soportá e karga di nos doló- i krekechénan, pasobra ‘e ta perkurá pa nos.’ (1 Ped. 5:7) P’esei, laga nos kuida nos salú, pero semper na armonia ku e instrukshonnan bon kla ku tin den Dios su Palabra inspirá!

[Nota]

Komo Repaso

• Ken ta responsabel pa malesa, i ken lo libra nos di e efektonan di piká?

• Ounke ta normal pa nos preokupá ku nos salú, kiko nos mester evitá?

• Dikon ta importante pa Yehova ki tipo di tratamentu nos ta skohe?

• Relashoná ku nos salú, kon nos por benefisiá dor di sigui prinsipionan bíbliko?

[Preguntanan di Estudio]

[Plachi na página 19]

Dios no a kreá hende pa bira malu ni bira bieu

[Plachi na página 21]

Apesar di problema ku salú, e pueblo di Yehova ta haña goso den sirbishi