E Palabra di Yehova Ta Bibu

Puntonan Sobresaliente di e Kartanan di Santiago i di Pedro

KASI 30 aña despues di Pentekòste di aña 33 di nos era, disipel Santiago—un mitar ruman di Hesus—a skirbi un karta na “e diesdos tribunan” di Israel spiritual. (Sant. 1:1) Su propósito tabata pa enkurashá nan pa desplegá fe firme i perseveransia ora nan haña nan ku prueba. Ademas, el a konsehá nan pa korigí situashonnan alarmante ku a desaroyá den e kongregashonnan.

Djis promé ku e kampaña di persekushon di Nero, e emperador romano, na aña 64 di nos era, apòstel Pedro a skirbi su promé karta na e kristiannan pa animá nan pa para firme den fe. Den su segundo karta, ku el a skirbi djis despues di esun promé, Pedro a animá su kompañeronan di fe pa presta atenshon na e palabra di Dios i a spièrta nan tokante e dia di Yehova ku tabata na kaminda. Sí, nos por saka benefisio dor di presta atenshon na e mensahenan di e kartanan di Santiago i di Pedro.​—Heb. 4:12.

DIOS TA DUNA SABIDURIA NA ESNAN KU TA “PIDI DEN FE”

(Sant. 1:1–5:20)

Santiago a skirbi: “Bendishoná ta un hende ku ta perseverá den prueba; pasobra unabes ku el a pasa e prueba, e lo risibí e korona di bida.” Yehova ta duna hende ku ta sigui “pidi den fe” e sabiduria nesesario pa nan soportá prueba.​—Sant. 1:​5-8, 12.

Esnan ku “bira siñadó” den e kongregashon tambe tin mester di fe i sabiduria. Despues ku Santiago a identifiká lenga komo “un parti chikitu” di e kurpa, kapas pa “kontaminá henter e kurpa,” el a spièrta kristiannan kontra tendensianan mundano ku por daña nan relashon ku Dios. Ademas, el a deskribí e pasonan ku un persona ku ta malu den sentido spiritual mester dal pa asina e por rekuperá.​—Sant. 3:​1, 5, 6; 5:​14, 15.

Kontesta Riba Pregunta Bíbliko:

2:13​—Den ki manera “miserikòrdia ta triunfá riba huisio”? Ora nos tin ku duna kuenta na Dios, e ta tene kuenta ku e manera miserikòrdioso ku nos a trata otro hende i ta pordoná nos a base di e sakrifisio di reskate di su Yu. (Rom. 14:12) Esaki ta un bon motibu pa laga miserikòrdia bira un kualidat importante den nos bida.

5:20​—E versíkulo akí ta bisa: “Esun ku hasi un pekadó bolbe di e eror di su kaminda lo salba su alma for di morto.” Kiko esaki ta nifiká? Un kristian ku yuda un hasidó di maldat bolbe for di un kaminda pekaminoso ta salba alma di e persona ku a repentí for di morto spiritual i kisas di destrukshon eterno. Ademas, di e manera akí, e persona ku ta yuda e pekadó lo “kubri un multitut di piká” di e pekadó ei.

Lès pa Nos:

1:​14, 15. Piká ta resultado di deseo inkorekto. P’esei, nos no mester kultivá deseonan robes dor di keda pensa riba nan. Mas bien, nos mester sigui ‘okupá nos mente’ i kurason ku kosnan edifikante.​—Fil. 4:8.

2:​8, 9. Un hende ku ta hasi “distinshon di persona” ta aktua kontrali na “e lei real” di amor. P’esei, kristiannan berdadero no ta hasi distinshon di persona.

 2:​14-26. Nos ta “wòrdu salbá dor di fe,” i “no komo resultado di obranan” di e Lei di Moisés ni di esnan ku kristiannan ta efektuá. Nos fe no mester keda na palabra so. (Efe. 2:​8, 9; Juan 3:16) E mester motivá nos pa aktua na armonia ku Dios su boluntat.

3:​13-17. “Sabiduria di ariba” siguramente ta superior na sabiduria “terenal, [“karnal,” NW], [i] diabóliko.” Nos mester sigui ‘buska sabiduria di Dios manera ta buska tesoro skondí.’​—Pro. 2:​1-5.

3:18. E simia di e bon nobo di Reino mester wòrdu “sembrá den pas dor di esnan ku ta hasi pas.” Ta importante pa nos ta hasidónan di pas i no personanan arogante ku ta gusta pleitu.

PARA ‘FIRME DEN FE’

(1 Ped. 1:1–5:14)

Pedro a kòrda su rumannan riba nan “speransa bibu” di un herensia den shelu. El a bisa nan: “Boso ta un rasa skohí, un saserdosio real, un nashon santu.” Despues ku el a duna nan konseho spesífiko tokante sumishon, el a ekshortá nan tur pa ta “di akuerdo ku otro, teniendo kompashon ku otro, stimando manera ruman, i [pa ser] miserikòrdioso i humilde den spiritu.”​—1 Ped. 1:​3, 4; 2:9; 3:8.

Siendo ku “fin di [e sistema hudiu tabata] serka,” Pedro a konsehá e rumannan pa nan “sea ku sano huisio i sobrio ku e propósito di por hasi orashon.” El a bisa nan: “Sea sobrio, sea alerta. . . . Resistí [Satanas], firme den boso fe.”​—1 Ped. 4:7; 5:​8, 9.

Kontesta Riba Pregunta Bíbliko:

3:​20-22​—Den ki sentido boutismo ta salba nos? Boutismo ta un rekisito ku hende ku ta buska salbashon mester kumpli kuné. Sinembargo, boutismo riba su mes no ta salba nos. De echo, nos ta haña salbashon “pa medio di e resurekshon di Hesukristu.” E kandidato pa boutismo mester tin fe ku salbashon ta posibel solamente pasobra Hesus a duna su bida komo sakrifisio, a ser resusitá i “ta na man drechi di Dios” ku outoridat riba e bibu- i e mortonan. Boutismo fundá riba un fe asina ta loke ta korespondé ku e echo ku ‘ocho persona a wòrdu hibá sano i salvo dor di e awa.’

4:​6​—Ken tabata ‘esnan morto’ na kendenan “e evangelio a wòrdu prediká”? Esakinan tabata personanan ku tabata ‘morto den nan delitunan i pikánan,’ òf morto spiritualmente, promé ku nan a tende e bon nobo. (Efe. 2:1) Pero despues ku nan a pone fe den e bon nobo, nan a kuminsá “biba” den e sentido ku nan a kultivá un relashon ku Yehova.

Lès pa Nos:

1:7. Pa nos fe por ta di gran balor, e mester ta di un kalidat ku a ser probá òf di tèst. Un fe firme asina siguramente ta ‘preservá e alma’ bibu. (Heb. 10:39) Nos no mester hala atras pa pruebanan ku ta bini riba nos fe.

1:​10-12. Angelnan a anhelá di wak i komprondé e bèrdatnan profundo ku Dios su profetanan di antigwedat a skirbi relashoná ku e kongregashon kristian ungí. Sinembargo, ta te ora Yehova a kuminsá trata ku e kongregashon, e kosnan akí a bira komprendibel pa nan. (Efe. 3:10) Nos no mester sigui ehèmpel di e angelnan i hasi esfuerso pa investigá “e profundidatnan di Dios”?​—1 Kor. 2:10.

2:21. Imitando nos Ehèmpel, Hesukristu, nos mester ta dispuesto pa sufri asta te na morto pa nos por apoyá e soberania di Yehova.

5:​6, 7. Ora nos tira nos ansiedatnan riba Yehova, e ta yuda nos sigui pone adorashon berdadero na promé lugá den nos bida en bes di ta demasiado preokupá ku kiko lo pasa mañan.​—Mat. 6:​33, 34.

 ‘E DIA DI YEHOVA LO BINI’

(2 Ped. 1:1–3:18)

Pedro a skirbi: “Nunka profesia no a wòrdu duná pa medio di e boluntat di hende, ma hòmbernan santu di Dios a papia, inspirá dor di spiritu santu.” Ora nos ta presta atenshon na e palabra profétiko, esaki por protehá nos kontra “siñadónan falsu” i otro hende ku ke perhudiká nos.​—2 Ped. 1:21; 2:​1-3.

Pedro a spièrta ku “den e último dianan bofonadónan lo bini ku nan bofon.” Pero e dia di Yehova “lo bini manera un ladron.” Pedro a konkluí su karta ku konseho sano pa esnan ku ta ‘spera i ta pura e binida di e dia ei.’​—2 Ped. 3:​3, 10-12.

Kontesta Riba Pregunta Bíbliko:

1:​16-19​—Ken ta e “strea di mardugá,” na ki tempu e ta sali i kon nos por sa ku esaki a sosodé? E “strea di mardugá” ta Hesukristu despues ku el a bira Rei di e Reino di Dios. (Rev. 22:16) Na 1914, Hesus a sali dilanti tur kreashon komo e Rei Mesiániko, ku ta anunsiá e komienso di un dia nobo. E transfigurashon a duna un bista adelantá di Hesus su gloria i poder di Reino i a enfatisá ku Dios su palabra profétiko ta konfiabel. (Mar. 9:​1-3) Ora nos ta presta atenshon na e palabra ei, esei ta iluminá nos kurason, i asina nos ta haña sa ku e Strea di Mardugá a sali.

3:​17​—Segun Pedro, ki informashon e kristiannan tabata ‘sa di antemano’? Pedro tabata referí na e konosementu di antemano di futuro susesonan ku é i otro eskritornan di Beibel a haña mediante inspirashon. Siendo ku e konosementu akí no tabata sin límite, e echo ku e kristiannan di promé tabatin e no a nifiká ku nan tabata sa tur detaye tokante futuro susesonan. Nan a haña sa solamente e liña general di loke hende por a spera.

Lès pa Nos:

1:​2, 5-7. Ora nos ta hasi esfuerso sinsero pa kultivá kualidatnan manera fe, perseveransia i deboshon na Dios, esaki ta yuda nos oumentá nos “konosementu di Dios i di Hesus” i lo yuda nos pa ‘nos no keda inútil ni sin fruta’ relashoná ku e konosementu ei.​—2 Ped. 1:8.

1:​12-15. Pa nos por “wòrdu establesí den e bèrdat,” konstantemente nos mester di rekordatorionan manera esnan ku nos ta risibí via nos reunionnan di kongregashon, estudio personal i lesamentu di Beibel.

2:2. Nos mester tene kuidou pa nos kondukta no trese reproche riba Yehova i su organisashon.​—Rom. 2:24.

2:​4-9. En bista di loke Yehova a hasi den pasado, nos por ta sigur ku e ‘sa kon pa reskatá e santunan for di tentashon’ i kon pa reservá ‘e inhustunan pa e dia di huisio.’

2:​10-13, NW. Ounke “esnan glorioso,” esta, e ansianonan kristian, tin nan debilidatnan i ta kometé eror de bes en kuando, nos no mester papia malu di nan.​—Heb. 13:​7, 17.

3:​2-4, 12. Si nos presta atenshon na “e palabranan ku a wòrdu papiá ántes pa medio di e profetanan santu i e mandamentu di e Señor i Salbador,” esaki lo yuda nos keda enfoká riba e echo ku e dia di Yehova ta serka.

3:​11-14. Komo personanan ku ta “sperando i purando e binida di e dia di Dios,” nos mester (1) tin “un kondukta santu” dor di mantené nos mes limpi físikamente, mentalmente, moralmente i spiritualmente; (2) abundá den echonan ku ta mustra ku nos ta “deboto” na Dios, esta, echonan manera esnan relashoná ku e trabou di prediká e Reino i di hasi disipel; (3) mantené nos kondukta i personalidat “sin mancha” di mundu; (4) ta “sin kulpa” dor di hasi tur kos ku un motivashon puru i (5) ser na “pas” dor di ta na pas ku Dios, ku nos rumannan kristian i nos próhimo.